Lúkási 11
11
Yɛɛ́so a á ega nziʼnɛ nnɔ yí á leswīŋte Ndém
(Mat 6.9-13; 7.7-11)
1Yɛɛ́so a lɛ amɔ̄ʼ aleʼé, ŋ́gɔ́ amɔ̄ʼ ajʉʼ eswíŋtɛ Ndém. Éswíŋte á yí tɛ á mi, mmɔʼ taʼ ŋiŋ nnɔ yi á shʉʼ ndé á mbū yí ŋ́gɛ: «Ndi, zíʼne á wék á leswīŋte á Ndém, ńdeŋ ndeŋ páʼ Jáaŋ, a le ziʼné nnɔ yí lā. » 2Yɛɛ́so á lɛ ndé á mbū nnɔ yí ŋ́gɛ: «Pɛ nɔŋɔ eswíŋtɛ á Ndém, pɛ elé ŋ́gɛ:
“Mɔʼɔ́ wek,
lɛ ŋghʉ̄, epuɔ menɔŋ metsem e ezhɛ́ á légɛ,
wu mé ndaʼ Ndém.
Lɛ eshʉ̄ʼ ŋgɔ́ á efɔ, ésáʼ epuɔ á ndo esī atsetsáʼ.
3Lɛ ŋgyá á wék eleʼé etsem, etsō lejhʉ̄ tsīi, é gɔ ekūuʼ á mbū pek.
4Lɛ ndēkne mefa mék,
páʼ pek é si ndēknɛ azék, émi
epuɔ pīi pɔ́ é fa á mbū pek.
Te cʉ́ʼ pek ewhʉ̄ ánɛ táté.”»
5Yɛɛ́so á zéŋ ndé á mbū pɔ́p ŋ́gɛ: «Ḿpɛ elɛ ndé ŋ́gɛ, ŋiŋ nnɔ wɛ, a wɛɛ̄ á esoó yi, ŋ́gʉ̄ɔ á mba yí té‑etsōʼ, ŋ́kwáʼte nchu ŋgyā yí, ńdé ŋ́gɛ: “Tsɔ́ʼɔtsɔ́ʼ me esoó, lɛ efū á gá azō, 6meŋ ndɔ̄k ŋghī á ŋge ga wuɔ. A á fhó á leziŋ eshʉ̄ʼ á ŋgyā meŋ, meŋ mbīŋ te wɛ̄ ajū mīi, meŋ a lɔk eghi á yí í.” 7Ŋ́gɔ́ amɔ̄ʼ, ŋiŋ yīi a á ŋgyā, á tsɔ́ʼ á mbū yí ŋ́gɛ: “Te pákne á gá, meŋ á ndáʼ efē ŋgyā za, tɛ pek a ewɔŋkhʉ̄ é nɔŋte á ekó. Meŋ gɔ le lū á esī tsetsɔŋɔ, tɛ efāʼ azō ŋgyá á mbū wu ú.” 8Pɛ ejúʼ á mbɔŋɔ́, a zi te lū á esī ŋgyá etsō á mbū yí, páʼ a á esoó yi í, mbɔ a a ké elu á esī, éyá akɔ̄ lɛ́ zīi, ŋiŋ mɛ́t a á si nzɛ́ttɛ, melaʼ mīi, a tshií á apɛ́, ŋ́kwáʼtɛ nchu ŋgyā té ká té ká.
(Mat 7.7-11)
9Meŋ ndɔkɔ eshúŋɔ á wɛ́ ŋ́gɛ, pɛ enáŋa ndɔ́ɔ, Ndém a yá á mbū pɛ. Pɛ enáŋa efāʼa, Ndém a eghʉ̄ pɛ ejʉ́ɔ. Pɛ enáŋa ŋkwáʼtɛ nchu ŋgyā, Ndém a etsɔ́ʼ á mbū pɛ. 10Pɛ echʉ́ nnɛ̄t nzhɛ́ á légɛ, awíɛ a lɔ́ɔ azō á mbū Ndém, mbɔ a a yá á mbū yí. Awíɛ a faʼa azō, mbɔ Ndém a a ghʉ, a ejʉ́ɔ á azō mɛ́t. Awíɛ a kwáʼtɛ nchu ŋgyā, mbɔ Ndém a a tsɔ́ʼ ŋgyā, a ekó éwú. 11Memɔʼɔ́ ewɔŋkhʉ̄ é tsetsɛlɛ pɛ, awɔ́ a á nnɔ éwú ŋgɔ́ éyi, méŋ yi a lɔ́ɔ á yí esōh, á gɔ nnū ŋgyá á mbū yí i? 12Ŋ́gɔ́ éyi, méŋ yi a lɔ́ɔ á yí lepo ŋgāp, á gʉɔ ŋgɔ̄ ŋgá esī, ŋ́gyá á mbū yí i? 13Pɛ pīi, pɛ é epuɔ tepɔŋ ejʉɔ ntí, pɛ ké nzhɛ́ ajūɔ mbɔŋ, tɛ́ ŋgyá á mbū ewɔŋkhʉ̄ pɛ́. Tɛ ŋgʉɔ shɔ́ʼɔ́ ánɛ Mɔʼɔ́ wɛ Ndém yīi, a á lephū ú? A gɔ le néŋ té yá Azwakne zí á mbū epuɔ pīi, pɔ́ é si eswíŋtɛ á yí í?»
Yɛɛ́so a á ega ntswīi ŋ́gɛ, yí tsyaā Sɛ́ta
(Mat 12.22-30; Mlk 3.22-27)
14Á lɛ amɔ̄ʼ aleʼé, Yɛɛ́so á juŋ esī zīi e ke kó ánɛ mmɔʼ ŋiŋ, ńtsɛ́t nchu yí. Esī mɛ́t e le tóō, ŋiŋ mɛ́t á lɛ nzī á leshūŋne. Á pú ntsyā alāʼ zīi, á ŋgɔ́ á ajʉʼ mɛ́t. 15Emɔ̄ʼ epuɔ é lé azɔ́p ŋ́gɛ: «Á juŋɔ mesī mɛ́t páʼā, Bɛlzebul, á efɔ mesī, mé yáa á yí mete tɛ́ á lɔkɔ njūŋɔ. » 16Emɔ̄ʼ epuɔ é kone á Yɛɛ́so, ńdé á mbū yí ŋ́gɛ, a eghʉ̄ á taʼ ŋkʉʼne anu, a egɔ́ ayiŋne zīi, á tswii á légɛ, mete mí é fhɔ́ɔ á mbū Ndém. 17Yɛɛ́so á zhɛ́ mekwaŋte mīi é ntɔ̄ŋ pɔ́p, ńdɛ ndé á mbū pɔ́p ŋ́gɛ: «Epuɔ taʼ alāʼ é náŋa tɛ esɛ̄nne, ńdʉɔ́ʼne menɛ̄t mɔ́p, mbɔ alāʼ mɛ́t á gʉɔ mé mbií, meŋgyā mīi é alāʼ mɛ́t e epú ŋkēmɛ. 18Á zeéŋ ŋgɔ́ ndeŋ ndeŋ ŋ́gɛ, nnɔ Sɛ́ta é sɛnnɛ, ńdʉɔ́ʼne menɛ̄t mɔ́p, mbɔ lefɔ tsí e pí. Meŋ ndʉ́ɛ́ páʼa, melaʼ mīi, pɛ é si ndʉ́ɛ́ ŋ́gɛ, meŋ juŋɔ mesī páʼa, Bɛlzebul efɔ wɔp mé yáa mbʉʼ, tɛ́ meŋ ndɔkɔ njūŋɔ. 19Páʼ menɔ mɛ́, é si njūŋɔ azɔ́p mesī lā. A gɔ́ éyi meŋ ndɔkɔ mete Sɛ́ta tɛ́ ndɔkɔ njūŋɔ azá, mbɔ pɔ́ tswíi mete á mbū awɔ́, tɛ́ ndɔkɔ njūŋɔ azɔ́p é? Menɔ mɛ́ mɛ́t mé láʼ eshúŋ á wɛ́ ŋ́gɛ, pɛ lʉ́ɛ́ páʼā, ńdɔkɔ efā faa. 20Á gɔ́ áa lɛ, meŋ ndɔkɔ mete Ndém tɛ́ ndɔkɔ njūŋɔ mesī ánɛ epuɔ, á lɔkɔ ntswīi á légɛ, Lefɔ Ndém é ndáʼ nzī á ndo esī atsetsáʼ, tɛ é shʉʼ tɛ ntswɛ́tte á wɛ́.
21«Pɛ é si nzhɛ́ɛ á légɛ, tɛnte ŋiŋ, a cuŋtɛ á tsitsi ncu yi, ńdɔk mbíp mba zi á mbɔŋɔ́, mbɔ amɔ̄ʼ azō a gɔ le á tsitsi yi ghʉ̄ʉ. 22Táʼ, mmɔʼ ŋiŋ a piŋɛ eshʉ̄ʼ nte ntsyā yí, mbɔ a a lʉɔ́ʼ á yí, éjhʉ́, égɔ á yí ekú á tsitsi ncu yīi, a á nɔŋ ndɔ̄kɔ ntʉ̄ɛ̄, éŋwɛt etsō tsí elɔk egʉɔ, pɔ́ a mesoó pí, e egʉɔ ŋgāpte.
23«Ŋiŋ a lʉʼɛ ŋ́gɛ pek yí é gɔ le gɔ́ nnɔ ɔ́, mbɔ a lɔkɔ ntáka anu zá. Ŋiŋ yīi a te si ntswítɛ á gá á lecūʼte epuɔ, ŋ́gyá á mbū Ndém ɛ́, a á si ŋŋwāŋa á wɔ́p ŋwaŋ.
Anu ŋiŋ yīi, pɔ́ Yɛɛ́so é té nnɔ tɛ ntsékne ɛ́
(Mat 12.43-45)
24«Ŋ́gɔ́ mé ŋiŋ yīi, esī é ŋgɔ́ ánɛ yí, mɛ́ pikɛ tɛ njūŋ, mbɔ e fhó ánɛ yí, étó egʉɔ mé késáatswɛt, ékɛ́tɛ, éfaʼ á ajʉʼ zīi, e e pwɛ́ne enáŋ éwú. Ŋ́gɔ́ éyi e é faʼ kékáŋ, mbɔ e e lé egɛ: “Meŋ a piŋ nzem mé mba za, ájʉʼ zīi, meŋ ke zī ntó éwú.” 25Ŋ́gɔ́ éyi e piŋɛ nzem, ŋ́kó ŋgē eshʉʼe, ŋiŋ mɛ́t á gɔ́ páʼ ŋgyā zīi, azō á té wú ú, mbɔ mɛ́ ncuŋte njɔ̄k á mbɔŋɔ́, 26mbɔ a lɛ egʉɔ egɔ efaʼ emɔ̄ʼ mesī esambīa, émi é pú ŋgáʼ ńtɔ́k á yí. Pɔ́ a pɔ́p e eshʉʼ ŋkó á ŋgyā mɛ́t ńnáŋ. Anu ŋiŋ wuɔ mɛ́t, a epiŋ ŋgē emakne, ḿbék ntɔ́k páʼ á ke zī ŋgɔ́ épúp. »
Kwaʼ eshhʉ̄ mbɔŋ á awɔ́?
27Yɛɛ́so á ge emak á leshūŋne, mmɔʼ menzwí á tshí á nnɔ alāʼ, ńdé á mbū yí ŋ́gɛ: «Eshhʉ̄ mbɔŋ a á menzwí yīi, a le zhí á wú, ńzéŋ nnɔ́ŋne á wú. » 28Yɛɛ́so á pwɛt ndé ŋ́gɛ: «Kwaʼ eshhʉ̄ mbɔŋ, a gɔ́ áa ŋiŋ yīi, á juúʼ ashuŋne Ndém, ŋ́ghʉ̄ ndeŋ ndeŋ épúp. »
Mía anu a gɔ́ áa lezhɛ̄ ŋiŋ yīi Méŋ‑Ŋiŋnɔŋ a ewiɛ́
(Mat 12.38-42)
29Yɛɛ́so a le gē eshúŋne épúp, alāʼ á zɛ́t ntswīʼnɛ ŋkɔ́ʼ kɔʼé. Á lé á mbū alāʼ mɛ́t ŋ́gɛ: «Epuɔ ŋguʼ puɔ, é té pɔŋ, pɔ́ é si ŋkōnɛ á gá ŋ́gɛ, meŋ ezéŋ ŋghʉ̄ ŋkʉʼne anu, a egɔ́ ayiŋne zīi, á tswii á légɛ mete má é fhɔ́ɔ á mbū Ndém. Amɔ̄ʼ ayiŋne anu zīi meŋ gɔ á ntswiī pɔ́p, á té éwú ú, ńdaʼ gá á leghʉ taʼ ŋkʉʼne anu, páʼ ezi Ndém a le ghʉ̄ ánɛ ntswi‑ŋke yi, Jonási. 30A le ghʉ̄ʉ̄, Jonási á gɔ́ ayiŋne mete mí, á mbū epuɔ Ninive. Ndeŋ ndeŋ épúp, a a shʉʼ eghʉʉ, Méŋ‑Ŋiŋnɔŋ a egɔ́ á ayiŋne mete mí, á mbū epuɔ ŋguʼ puɔ. 31A láʼ ekuʼ aleʼé zīi, Ndém a záʼa ntsaŋ epuɔ menɔŋ, efɔ ŋgɔŋ Sába, ŋ́gɔ́ á menzwí, a eshʉʼ ntshí á mvhɔ epuɔ ŋguʼ puɔ, ńnéŋ mefa á apa pɔ́p, melaʼ mīi pɔ́ é fa tɛ á tsia. A le tshí á alāʼ te ndeŋɛ́, ńjúʼ mɛ́ nɔŋ ŋghítɛ azhɛ̄‑anu Efɔ Salomɔŋ, á shʉʼ tɛ ntshí lezēk tsí éwú. Mmɔʼ ŋiŋ a piīŋ ŋgɔ́ wuɔ tsetsɔŋɔ, azhɛ̄‑anu zí, á fáŋ ntɔ́k azi Salomɔŋ. Táʼ, mɛ́ piīŋ te si ncʉ̄tɛ á yí í. 32Epuɔ Ninive e láʼ ekuʼ aleʼé mɛ́t, énéŋ mefa á apa epuɔ ŋguʼ puɔ, melaʼ mīi pɔ́p, épuɔ Ninive é le júʼ anu Jonási, ŋ́gɔ̄ nnɛ̄t zɔp, ŋ́gwáʼ atswhī tepɔŋ zɔ́p. Mmɔʼ ŋiŋ a piīŋ ŋgɔ́ éwú tsetsɔŋɔ, azí anu á fáŋ ntɔ́k azi Jonási, pɔ́ piŋ te á yí júʼ.
Pɛ epá é lepīk ŋkaʼ yīi, Ndém a le yá me pɛ
(Mat 5.15; 6.22-23)
33«Mɛ́ gɛ té ndɛ́tɛ á láam, ńdʉ̄ɔ ɔ́. Mɛ́ yɛɛ̄t mmók ánɛ láam páʼā, ńtshí áa mé athʉ́, á kɛʼɛ ejʉʼ tɛ ŋgɔ́ yīi, ŋiŋ a nɔŋ ŋkúɔ́ á ŋgyā, á jʉ́ɔ ejʉʼ á mbɔŋɔ́. 34Menēk ŋiŋ é si ŋgɔ́ páʼ ŋkaʼ yīi, é mbe nnɛ̄t yí lā. Menēk mú é nɔŋ ndánɛ, mbɔ o lɔk ejʉ́ɔ ejʉʼ tsem á mbɔŋɔ́. Menēk mú é piŋɛ nnɔ̄ŋ eséŋɛ, mbɔ o o gɔ́ efʉʼ metsem, égɔ́ áa ntē nzém. 35Púp, pá menēk mú á lesēŋ, o cʉ́ʼɛ nzīŋɛ áa ntē nzém. 36Ŋ́gɔ́ éyi, o ó si mbúu nzīŋɛ á ntē ŋkaʼ, ḿbiŋɛ ŋkʉ̄ʉ nzém, mbɔ o ó si njʉ́ɔ ejʉʼ á mbɔŋɔ́, efʉʼ metsem, ńdeŋ ndeŋ páʼ, mɛ́ koók ŋkaʼ, é kɛʼɛ, o jʉ́ɔ ejʉʼ lā. »
Yɛɛ́so a á ega ŋkyáknɛ wɔ kɛ́ʼte‑mbé Ndém mbɔɔ epuɔ Falísia
(Mat 23.1-36; Mlk 12.38-40)
37Yɛɛ́so á mak á leshūŋne, taʼ ŋiŋ Falísia á tɔ́ŋ á yí á mba yí, ŋ́gɛ a eshʉ̄ʼ pɔ́ yí epfɛ́t etsō. Yɛɛ́so á véŋ, ŋ́gʉɔ tɛ ŋkó á mba, pɔ́ yí é náŋ á esī, ńnɔŋ mpfɛ́tɛ azō. 38Mbɔ Yɛɛ́so a á ge epfɛ́t azō, a te sōk emɔ̄ʼ mejʉʼ nnɛ̄t mí, páʼ mɛt alāʼ wɔp a á si ndʉ́ɛ́ épúp ɔ́. Ŋiŋ Falísia wuɔ mɛ́t, á jʉ́ɔ, á kʉʼne á yí tɛʼ. 39Yɛɛ́so á lé á mbū yí ŋ́gɛ: «Pɛ epuɔ Falísia, pɛ ejʉ́ɔ. Pɛ zhɛɛ́ á lecuŋte esōk mekwáŋ kwáŋ pɛ́, pɔ́ ndɔ̄ŋ meluʼ zɛ, páʼ lepé é si nzɛ́ttɛ. Táʼ, ḿbiŋ te zhɛ́ á lesok ntē wɛ́ ɛ́, nzi lejʉ pɔ́ ekwaŋte tepɔŋ ntií ntiī, é gɔ́ éwú tɛ ndó. 40Pɛ gene gene, Ndém mé le ghʉ̄ á tsitsi wuɔ mɛ́t ntsem. Yí mé lɛ te zéŋ ŋghʉ̄ ntē wɛ́ ɛ́ lɛ̄? 41Pɛ epá ntē wɛ́, ńcʉ́ʼɛ ŋgāptɛ etsō mbɔŋ tsīi, é ntē mekwáŋ kwáŋ pɛ́, á mbū megaŋ ŋgʉɔ̄ʼ, tɛ́ ndɔk nzīŋ ánɛ lepé, ńcʉ́ʼ té alɔ́ʼ, á mvhɔ Ndém.
42«Pɛ epuɔ Falísia, pɛ é wɔ eshhʉ̄ mbekɛ́. Pɛ é si ŋkápa á tsitsi nnāʼ, mbɔɔ ntií ntiī nzap, ḿbiŋɛ ŋgāptɛ nzhɛ legēm, ḿbíɛ́ á taʼ nzhɛ, ŋ́gyáa á mbū Ndém. Táʼ, ḿbiŋɛ ndēknɛ á legɔ̄ ndeŋ ndeŋ á mvhɔ epuɔ menɔŋ, ńzéŋ ŋkɔ̄ŋ á Ndém. Á piŋ ŋgɔ́ á mía ajū mīi, pɛ é mbɔ́ŋte á wɛ́ á leghʉ, té piŋ ndēkne etsi emɔ̄ʼ.
43«Pɛ epuɔ Falísia, pɛ é wɔ eshhʉ̄ mbekɛ́. Pɛ koó á ŋgyā aswiŋte, ŋ́kɔ̄ŋ áa lenāŋ á mvhɔ, ájʉʼ zīi mɛ́ e jʉ́ɔ á wɛ́. Ńzéŋ ŋkɔ̄ŋ ŋ́gɛ, mɛ́ elɔ̄k mekuʼ, ńtsāʼte á wɛ́ á nnɔ alāʼ. 44Pɛ epuɔ Falísia, pɛ é wɔ eshhʉ̄ mbekɛ́. Pɛ é si ŋgɔ́ páʼ lesi tsīi, mɛ́ le túŋ epuɔ éwú té ghʉ ayiŋne, mɛ́ ge eziŋ á ndo éwú, ńnɔŋ te nzhɛ́ ɛ́, ŋ́kʉ̄ɛ epe. »
45Yɛɛ́so á lé épúp, mmɔʼ ŋkɛʼte‑mbé Ndém á lé á mbū yí ŋ́gɛ: «O lʉ́ɛ́ páʼa, ńzéŋɛ ndɔkɔ nzɔ̄tɛ á wék azék. » 46Yɛɛ́so á pwɛt ŋ́gɛ: «Mbɔɔ pɛ azɛ́ wɔ kɛ́ʼte‑mbé Ndém, pɛ é azɛ́ wɔ eshhʉ̄ mbekɛ́, pɛ é si ŋgyáa apiʼ, á nɔŋ ntsyāa epuɔ. Ḿbiŋ nnɔ̄ŋ te nzápa tsɔ athū apū, ńdɔkɔ ntswítɛ á wɔ́p ɔ́. 47Pɛ é kwaʼ wɔ eshhʉ̄ mbekɛ́. Memɔʼɔ́ pɛ́, é le zwhité metswi‑ŋke Ndém. Pɛ cʉ́ʼ ncūŋte ḿbɔ́ mesi mɔ́p. 48Pɛ ghʉɛ páʼa, ńdɔkɔ ntswíʼtɛ anu zīi, memɔʼɔ́ pɛ́ é lɛɛ́ ŋghʉɛ. Pɔ́ le zwhité metswi‑ŋke Ndém, pɛ pīiŋ ncʉ́ʼ ncūŋte mesi mɔ́p, á mbɔŋɔ́. 49Anu jʉɔ mɛ́t mé le ghʉ̄ tɛ́, Ndém yīi a zhɛɛ́ etsō tsem, á lé ŋ́gɛ: “Meŋ a shʉʼ etó metswi‑ŋke pá, mbɔɔ meziŋ‑ntō pá á mbū pɔ́p, pɔ́ ekó ŋgēne emɔ̄ʼ, ńzwhíte emɔ̄ʼ.” 50É melaʼ épúp, tɛ́ Ndém a a shʉʼ eghʉʉ, metshi metswi‑ŋke pí mīi, memɔʼɔ́ pɛ́ é le pfɛttéē, tɛ efhó tɛ ŋguʼ, e egʉ̄ɔ athū pɛ, pɛ epuɔ ŋguʼ puɔ. 51Á shʉʼ ezi ánɛ Abɛl yīi, memɔʼɔ́ pɛ́ é le zwhíī, égʉɔ ekó ánɛ Sakalía. Pɔ́ le zwhí á Sakalía wuɔ mɛ́t, á tsetsɛlɛ ajʉʼ nnɔɔ́ŋ‑epɔʼ, pɔ́ nchu Mía Ŋgyā Ndém. Ŋŋ, á kwaʼ anuúnē, Ndém a a shʉʼ eghʉʉ, metshi mɔ́p é egʉ̄ɔ athū pɛ, pɛ epuɔ ŋguʼ puɔ.
52«Pɛ wɔ kɛ́ʼte‑mbé Ndém é kwaʼ wɔ eshhʉ̄ mbekɛ́, pɛ lē ndʉɔ á kí lelɔk ntsɔ́ʼ nchu ŋgyā yīi, mɛ́ gɔ ezápa éwú tɛ́ nzhɛ́ anu zīi, á ndeŋ ndeŋ. Pɛ méŋwɛ̄t é té si nzápa éwú ú, ḿbiŋ nnɔ̄ŋ te mvéŋɛ ŋ́gɛ, epuɔ pīi é si ŋkɔ̄ŋɔ, e ezápa éwú ú. »
53Yɛɛ́so a le náŋ tɛ nɔ̄ŋ efhɔ́ɔ á ŋgyā mɛ́t ntúɔ́, wɔ kɛ́ʼte‑mbé Ndém mbɔɔ epuɔ Falísia é po ánɛ yí, ńzī á lezɛ̄tte á yí menu ntií ntiī. 54Ńdɔ̄k ashuŋne mmɔ̄ á yí ŋ́gɛ, a a té á eshúŋnɛ, éfāte.
Currently Selected:
Lúkási 11: ybb
Highlight
Share
Copy
Want to have your highlights saved across all your devices? Sign up or sign in
© CABTAL
