Kəfwaʼ 4

Pita ghi Jɔn n tay i saʼ

1Nghee Pita ghi Jɔn nam ghɔɔmənə ghi ghə̂ ghey, ghə fɔɔngili a loʼ ghə ghi wù wey tə â loʼnə tow kə təsawgoʼ kə n ndaw Kəzə̀ i nii zə nsə ghə̂ a Sadusi ghə, n bə n səə ghə. 2Ghə̂ ghən â bə koʼ bə Pita ghi Jɔn n təŋkey nəghə mə â ngii fəə ghə nghee ghə diinə ghə̂ ghə n ghəə ghə bòʼ Yeso. Ghə â naʼlə nə̀ Yeso zhəm dzəŋŋə nə ivə, dii tsu nə̀ wù loʼnu ni zhəm dzəŋŋə nə ivə. 3Ghə n kwu kɔʼ Pita ghi Jɔn, fii naŋa ndow ghə n ndaw tsaʼ ni saʼ ghə tsətsə wey n təŋkey â loʼ n nəŋə i fənə tə. 4À kee loʼ nə̀ ndəmə ghə̂ ghey ghə â zownə ghɔɔmə i ghə zə, n bəghəm fuu. Taŋ a ghə̂ ghey ghə â bəghəmnə tə Yeso n dzəŋi nyiə kɔʼɔ ndow təkam tətaa.

5Tsətsə wey, tsoʼ tə inaʼ, ngəd tə Təjuu nsə ghə̂ a dii a kəlaŋ ghə n təmdzəŋi bə n Yerosalem. 6Fɔɔngili u nii nii wə tɔŋɔ Anas n loʼ fu, Kayfas, Jɔn, Alekzanda nsə tyəm a fɔɔngili u nii nii wə n loʼ soʼo fu.

7Ghə n ney naŋa bə Pita ghi Jɔn n sə̂ kə ghə, bəb ndow tə ghə nə̀, “Ghəə ghey ghaa â ghəŋŋənə, ghaa â ghəŋŋə n daʼa kə ndee nkee n zəd i ndee?” 8Zay kə Zow kə n nyi bə n kow Pita, tə n beeli ndow ghə nə̀, “Tsoʼ tə inaʼ tə nsə ngəd tə inaʼ tə! 9Abə i loʼ nə̀ ghaa bəbə ghey n ghəə ghə na fa a dza ghey ghəŋə ghə i dzuŋu zə ni baŋŋə kəkəŋŋə, tɔʼlə soʼo ni keeli jìi zey ghey baŋŋənə wi tii, 10n dza n dza bə tə ghaa adzəm nsə ghə̂ ghə Izree ghə adzəm nə a loʼ n zəd i Yeso Klisto, wù Nazaled, wù wən teynə fa n sə kə ghaa nə tə n taw doʼo bə. Ghaa â baa Yeso wən n zat kə fəkaʼ, Zə̀ kə n kee zhəm dzəŋŋə bə wi nə ivə. 11Yeso wən loʼ wù wey màʼlə K-a-zə̀ kə dzanə nə̀,

‘Tay zey ghaa ghə̂ a bɔm a təndaw a tuu maʼanə,

Zə a bə fəd doʼo kɔʼnə tay i bow i ndaw zə.’

12À loʼ kə n bam i Yeso wù keelinə bəghəshi zə, wù loʼ kəm way fa n mbi Zə̀ kə fuu naŋanə tə loʼ ni bəghəshi saa n ghəə a saa a bəbə ghə.”

13Nghee ghə koʼnə jìi zey Pita ghi Jɔn ghɔɔmənə tii nə ghə tsəŋə way, koʼ tɔb kɔʼ soʼo nə a maŋ loʼ laŋa tə aghə̂ nə ghə ka basə nyi dzə n ndaw kəmàʼlə, dzuu zə n ngii zum ghə. Ghə sey daŋŋə koʼ keeli ndownu nə̀ ghə â loʼ dzəŋi tsə ghi Yeso. 14Ghə n kee laʼ kìi ghə i dza zə n təŋkey ghə â ndzəmə koʼo ndownu wù wey ghə â baŋŋənə, tə teynə n səə Pita ghi Jɔn. 15Sey ghə n dza tə Pita ghi Jɔn nə̀ ghə shi təmi tsu a bii. Ambə ghə shi ndownə, ghə̂ a ndaw tsə ghey n daŋŋə kaʼ ni ghɔɔmə n wû i ghə. 16Ghə n bəbə n wû i ghə nə̀, “A i jiə tsu ngee ghi ghə̂ ghən ə? Aghə̂ adzəm n Yerosalem n keeli nə̀ ghə n ghəŋə kɔb kə ighəə kə, saa way ni tuu maʼa. 17Ni kee ghəŋə nə̀ kə ghəə a tii a nə zamnə, saa khə ni teeli kii naŋa ndow ghə nə kə ghə nə kəm ghɔɔmə ghə i loʼ zə n zəd i wù wən ghə tɔŋŋə nə̀ a loʼ Yeso.”

18Ghə sey daŋŋə tɔŋɔ nyi dzəŋŋə bənu Pita ghi Jɔn, tsəʼlə tsu kəlaŋ tə ghə nə̀ kə ghə nə kəm ghɔɔmə ghəə zə nkee ni dii aghə̂ n zəd i Yeso.

19Pita ghi Jɔn, n fəd beeli ndow ghə nə̀, “Wû i ghaa, moʼlə tsu na nə̀ a kpii ghə i ghaa zə tə Zə̀ kə ə? Ni zow tə ghaa mɔ, ni zow tə Zə̀ kə ə? 20Abə ghey, ghey way ni buu doʼo nə̀ ghey ghɔɔmə way ghəə ghən ghey loʼ nə̀ ghey n koʼ mə i zow.”

21Ambə ghə bəmi kpi tsunə ghə, ghə n zəghə tsu ghə nə ghə nuu. Ghə â koʼ tsu nə̀ jii way tə ghə ni chɔd ghə, n təŋkey, aghə̂ adzəm â fuu nkɔʼlə tə Zə̀ kə n ghəə ghən a shinə. 22Wù wən ghə â ghəŋənə kɔb kə ighəə kən n kow wi, â loʼ nə tə n tsəghəshi num tə nghəm nkaykə.

Dzûmə tə Yeso tə gɔŋŋə nə̀ Zə̀ kə fuu ghə n fə̀ŋ

23Ambə Pita nsə Jɔn zəghə maʼa tsunə ghə̂ a ndaw tsə ghey, ghə n dzəŋŋə ndow koʼ ndow ghə̂ a ghə, tiilə dza ndow ghəə ghey ghə fɔɔngili a nii ghə nsə ngəd tə inaʼ tə dzanə. 24Ambə ghə zow tsunə ghəə ghən, ghə n təmdzəŋi bə ni gɔŋŋə, gɔŋŋə shi kɔʼ n dzə i taw zə tə Zə̀ kə nə̀, “Zə̀ kə, wə loʼ zaamə mbi, à loʼ wɔ wə bɔmnə bikighow kə nsə ghəlitsə kə, à bəm wɔ nali kə dzuu kə, nsə fə wən udzəm u loʼnə fa n mbi. 25À loʼ wɔ, wə â ghəŋə nə̀ Zay kə Zow kə ghɔɔmə n bam i bày bày ghey fɔ̀ɔ Devid, wù kəfwaʼ wə, nə tə dza nə̀,

‘À shi kee naʼa tey tə bəghəm way tə̀ Zə̀ kə, fəələnə n nəghə wə ə?

À kuum kee ghə̂ a gheyyə bii kaabə tsənə ghə̂ ghə ə?

26Də̀ŋ u mbi u bayyə wû i tsam,

Tow wə inaʼ wə a təmdzəŋi bənə,

Ni zùu bàalə Kəzə̀ nsə wù wey tə tsuʼ naŋanə.’

27À wən bɔɔmə loʼ ghəə zey zə â shinə fa inaʼ, Helɔd nsə Pontus Pilato n ndzəm təmdzəŋi bə ghi ghə̂ ghən ghə way ghə̂ a Təjuu ghə nsə ghə̂ ghə Izree ghə ni kad tsəm n tow kə wù kəfwaʼ wə u zow wən wə â tsuʼ naŋanə, tɔŋɔ Yeso. 28Ghə â təmdzəŋi bə ni maŋ ghəŋə ghəə ghey wə â khə bayyə naŋa dzənə n daʼa kə nsə n ləghə zə nə̀ a khə ni bə shi. 29Mûkəbii, koʼo nghee ghə biinə ghey tii, ghəŋə tsu nə̀ ghə̂ a kəfwaʼ ghə a keeli tsu fə̀ŋ ni dəb ə naʼlə ghɔɔmə zə zə̀ nə ghə khə way tsəŋ zə. 30Dii bə daʼa kə kə̀ sey nə̀ ghey i loʼ ni baŋŋə ghə̂ ghə, ghey i ghəŋə ghəə a faalə ghə n zəd i Yeso, wù kəfwaʼ wə u zow wə.”

31Ambə ghə gɔŋŋə may tsunə, luʼu tə n noʼlə tsu n luʼu key ghə â təmdzəŋi doʼonə tii. Zay kə Zow kə n nyi bə n kow ghə, ghə n zey ni naʼlə tûm Kəzə̀ nə ghə tsəŋə way.

Dzûmə tə Yeso tə dzawwə fə wey ghə khənə

32Dzûmə tə Yeso tədzəm tə â loʼ nə kəfə kəmɔʼ n moʼlə tə ghə tədzəm nsə n fə̀ŋ tə ghə tədzəm. Wù ghə umɔʼ n ney way fə kə wi kə tə a loʼ fə kə wi kə ngəŋ kə, ghə â fəd dzəŋi khə fə u ghə udzəm. 33Nghee ngəd tə Yeso tə keeli tsunə daʼa kən, ghə n tiilə dza tə ghə̂ ghə nghee tə Mûkəbii Yeso â zhəm dzəŋŋə bənə tii nə ivə. Ndzuŋ ə Kəzə̀ n loʼ ghi ghə adzəm. 34Wù ghə u loʼ n laʼa way fə kə n fəŋŋə kə ghə, n təŋkey, ndəm ə ghə ghey ghə â khə luʼu tə nsə ndaw tə, ghə â fìilə tsuunu, ghə n bə n khəə u tii wə. 35Ghə n bə fuu naŋŋə bə khəə u tii wə tə ngəd tə Yeso tə, ghə n ney dzawwə fuu ndow tə ghə̂ ghə tə ghə koʼonə fə key ghə laʼanə.

36Wù loʼ â loʼnu ghə â tɔŋŋənə wi nə a loʼ Yosef, tə â shi n bii kə Levi, nə ghə ji wi n naʼ i Sayprus. Ngəd tə Yeso tə â tsə zəd i wi nə a loʼ Banabas, dii tsu n ghɔɔmə i ghə nə̀, “Wù wey tə kuunə fə̀ŋ tə ghə̂ tə.” 37Tə â fii tsu luʼu kə wi, ney bə khəə u tii wə, bə fuu bə tə ngəd tə Yeso tə.

Currently Selected:

Kəfwaʼ 4: WEH

Highlight

Copy