Kəfwaʼ 3

Pita baŋŋə wù kəkəŋŋə

1N tsuʼ fə loʼ fə, Pita nsə Jɔn n ndow n ndaw Kəzə̀ i nii zə nə tənəŋə tətəghə n tsə tə n nəŋə zey ghə gɔŋŋə tsənə tii. 2Wù kəkəŋŋə u loʼ wə n loʼ fu n fuʼ u mbàa wən ghə â tɔŋŋə nə̀ aloʼ fuʼ u mbàa u dzuŋu wə. Ghə â ji wi nə tə loʼ kəkəŋŋə, ghə̂ ghə n bòʼlə bəghə tsə wi tsuʼu ndzəm, bə naŋŋə bə wi n fuʼ u mbàa wey nə̀ tə i nɔɔ khəə wə n wɔ ghə̂ ghey ghə tsəghə nyiənə n ndaw Kəzə̀ i nii zə. 3Ambə tə koʼ ndownə Pita ghi Jɔn ghə tsəghə nyiə ndownə n ndaw Kəzə̀ i nii zey, tə n nɔɔ ndow ukhəə n wɔ ghə. 4Pita ghi Jɔn n laalə nyi ndow wi n waa asə̂. Pita n daŋŋə dza ndow tə wi nə̀ “Laalə bə ghey!” 5Wù tii n laalə ndow ghə, moʼlə kə nə ghə i fuunu wi n fə kə 6Pita n fəd dza ndow tə wi nə̀, “N ngəmsə khə way khəə wə ni fuu tə wɔ, n kee fuunu wɔ n fə key n khənə ghii kə. N zəd i Yeso Klisto wù Nazaled, nuu təmi kɔʼ, wə bwey ndow.” 7Nghee Pita dza tsunə sey, tə n kwu tsu kpii kə wi kə zəə kə, tɔɔmə kɔʼ wi nə tə təmi kɔʼ idəŋ. N nəŋə i tii zə kələ, fuu i wi nsə kəŋŋə tə wi tə n daŋŋə taw doʼo i bə. 8Tə n taa kɔʼ n fuu i wi, kaʼ ndow ni bwey. Tə n nyi ndow n ndaw Kəzə̀ i nii zey ghi ghə, bwey taalə kɔʼɔ idəŋ, fuu ukali tə Zə̀ kə. 9Ambə ghə̂ ghey fu adzəm koʼnə wi nghee tə bweynə, zow soʼo nghee tə fuunə kali wə tə Zə̀ kə, 10ghə n koʼ keeli ndow wi nə a loʼ wù wey tə â nɔɔ tsənə n fuʼ u mbàa u ndaw Kəzə̀ i nii zey ghə tɔŋɔnə nə a loʼ fuʼ u mbàa u dzuŋu wə. Dzuu zə n zum ghə, ghə n məʼlə kìi ghəə zey i shinə n kow wi.

Ghɔɔmə i Pita n dzəŋi kə dzûmə tə Klisto

11Nghee tə wù wey zən doʼo ndow n kow Pita ghi Jɔn, dzuu zə n zum ghə. Ghə̂ ghə n nyəŋ zuŋŋə bə fu n luʼu key ghə â tɔŋŋə nə̀ a loʼ zeeli kə Solomun. 12Ambə Pita koʼ tsunə sey, tə n dza ndow tə ghə̂ ghey nə̀, “Ghə̂ a Izree ghə, à lo kee dzuu i zumnə ghaa n ghəə zən ə? A loʼ kee ghaa laalənə ghey n ndzoʼo jii zən ə? À loʼ kee ghaa laalənə ghey tə a i dzanə à loʼ n daʼa kə ghey, ghey ghəŋənə nə̀ wù wən bwey nkee ghaa moʼlə nə̀ ghey loʼ ghə̂ a dzuŋu ghə n sə K-a-zə̀ ni ghəŋə nə̀ wù wən bwey ə? 13Zə̀ kə Abraham, Zə̀ kə Ayzik nsə Zə̀ kə Yakɔb kə, tɔŋɔ Zə̀ kən ghə bày a saa ghə â kɔʼlənə, n kɔʼlə naŋa wù kəfwaʼ a wi Yeso. À loʼ Yeso wən ghaa â fuu tsəʼlə ndownə nə̀ ghə wey wi. Ghaa mâ wi tuu maʼa n sə kə Pilato loʼ sey nə̀ Pilato mâ tsə̀m ni zəghə maʼa wi. 14Ghəə a wi ghə â zownu n sə K-a-zə̀, tə n loʼ wù dzuŋu, ghaa n fəd tuu maʼa wi, kee dza nə̀ Pilato chi zəghə shi bə ghaa n wù wey tə weynə ghə̂ ghə. 15Ghaa â wey maʼa wù wən tə fuunə muu zə, Zə̀ kə n kee zhəm dzəŋŋə bə wi nə ivə. Ghey mâ koʼ ghəə a tii ghə adzəm, ghey a dza bənə nya tə ghaa. 16Wù wən ghaa koʼo bənə fa, ghaa adzəm, ghaa tɔʼ khənu wi, tə taw doʼo bə bòʼ bəghəm i fə̀ŋ zən ghey khənə n kow Yeso. À loʼ bəghəm i fə̀ŋ n kow Yeso i ghəŋənə nə̀ wù wən taw doʼo bə tə ghaa koʼonə.

17Waazə ghə, n khənu nə ghaa nsə ghə̂ ghən ghə laalənə ghaa, ghaa â ghəŋə ghəə ghən n kow Yeso n təŋkey ghaa â khə way ghəə zey ghaa â ghəŋŋənə. 18À loʼ nə̀, à wən loʼ jìi zey Zə̀ kə neynə ni luulə ghəə ghən tə â naʼa naŋanə n wɔ tûm tə wi tə tədzəm nə̀, wù wi wey tə â dza naŋa nə̀ i tûm bənu khə ni teeli fəghə. 19Kwey nuu bə na fə̀ŋ tə ghaa tə n ghəə a bəbə ghə, ghaa bə n səə Zə̀ kə tə̀ tə neyzəə ghəə a ghaa a bəbə ghə. 20Abə ghaa ghəŋənə sey, Zə̀ kə i ghəŋə tsu nə̀ kɔŋŋə kə nyaʼi nyi bə ghaa, tə i fuu ghaa n gaamə zə, tə tûm bə soʼo wù wey tə â dza naŋa nə̀ i tûm bənu, tɔŋɔ Yeso wey tə â sày naŋa kɔʼ tə ghaa. 21Yeso khə ni doʼo kə idəŋ ni ndow kuum n nəŋə zey i kpiinə tə Zə̀ kə ni bayyə naŋa dzəŋŋə aghəə adzəm. Zə̀ kə mâ khə təb naŋa ghəə ghən tə saa n bam i tûm tə wi tə zow tə. 22Mushi mâ dza nə̀, ‘Mûkəbii, Zə̀ kə ghaa, i say kɔʼɔ wù tûm ə wi n fəŋŋə kə ghaa tə̀ tə â sàynə mə. Ghaa khə ni teeli zow ghəə ghey adzəm tə dzanə tə ghaa. 23Wù wey tə i zow way ghəə ghey wù tûm wey dzanə, Zə̀ kə i dzaw nuu shi bə wi n fəŋŋə kə ghə̂ a wi, tə ləŋi maʼa wi.’ 24Ndzəm ndzəm, tûm tə Kəzə̀ tədzəm, ni ney nuu bə n kow Samwel, ghə mâ naʼa zey ghəə ghən a shiənə n tsuʼu n mən. 25Ghaa loʼ waa a waa a tûm tə Kəzə̀, dii tsu nə̀ kaa mən Zə̀ kə â zə̂nə ghi ghə bày a ghaa ghə, loʼ soʼo tə ghaa. Zə̀ kə â dza tə Abraham nə̀, ‘Mə i buulə tənaʼa tədzəm fa n mbi n bam i waa a waa ghə.’ 26Ambə Zə̀ kə sày kɔʼnə wù kəfwaʼ a wi, tə n bùʼ tûm bə dzə wi n səə ghaa nə̀ tə bə buulə ghaa, tə ghəŋə nə̀ ghaa adzəm, ghaa kweyyə nuu bə n ghəə a ghaa a bəbə ghə.”

Currently Selected:

Kəfwaʼ 3: WEH

Highlight

Copy