Luk 5

Yeso zɔʼ bɔ bɛɛrɛ abwa mbèmbè mɔ

(Mat 4:18-22; Mak 1:16-20)

1Anji deʼ, Yeso me tsɔmɔ eba angli Gɛnɛsarɛd, mane enɔrɔ bɔ akɛkɛ wɛ â me kɛɛrɛ engɔ gɛ̀rɛ̀ ma zhuru ega Ngwe ngɛ. 2Engɔ kɔʼ eba eji è zɔ akpe fyee yɛ àsòʼ shuuru â me shi me ngɔɔ ma sò jɛ̂rɛ àmɔ̀ ngɛ. 3Yeso nyii efwɔ ekpe bi wɛ à mwɔ engɔ Shimun ngɛ gɛ̀rɛ̀ gà ebe angɔ kpe e tini ekpe we mpiʼ sàa efwɔ eji. Éngɛ engɔ tsɔmɔ a chwâ efwɔ ekpe sa tee abɔ byɛ. 4Èndzobo chɛ engɔ à mɛɛrɛ gà ngɛ, engɔ gâ ebe Shimun kpe, “Ngà wu tini ekpe ngɔɔ embè ene afwɔ ndim yɛ a me turu ngɔɔ efwɔ ngɛ gɛ̀rɛ̀ shi ndwa jɛ̂rɛ ntsɔn shi mbɔn ba bèddè edeʼ.” 5Shimun gíì kpe, “Masa, mbyɛɛ a shi fwɛʼ ene ekama efwɔ ǹklì gimkpaʼ, mbyɛɛ ke bere ala deʼ bo. Bɛʼngɛ na aŋu à ga éngɛ ma ngwo ngɛ, mmɛ wa ndwa jɛ̂rɛ chɛ” 6Èndzobo chɛ angɔ à fwɛʼ éngɛ ngɛ, angɔ bedde nuru shuuru akɛkɛ wɛ jɛ̂rɛ angɔ à sa ke é panna ngɛ. 7Éngɛ angɔ le kpe asɔrɔ angɔ yɛ â mwɔ efwɔ ekpe ewe ngɛ, e zeʼe kpèdè angɔ. Éngɛ angɔ zeʼe shwèere akpe fyee yɛ, a sa ke ŋwɛrɛ ngɔɔ enji eji. 8Èndzobo chɛ Shimun Petoro à zɔ ebwa wunɔ ngɛ, engɔ go efàarà Yeso, chwɔ̀n etongu mɔ a chwâ ga kpe, “Ngà nyɛrɛ ebara mfu Masakɛ, mmɛ na gho abwa bɔɔbɔɔ.” 9Engɔ mane asɔrɔ mɔ kɔn ene shuuru akɛkɛ chɛ angɔ à me bèdde ngɛ. 10Jems mane Eyɔɔ byɛ â mwɔ bwɔanɔm Zɛbɛdii ngɛ, wɛ â ma sòʼ Shuuru nè Shimun ngɛ gɛ̀rɛ̀ kɔn. Éngɛ Yeso ga ebe Shimun kpe, “Mbɔn ka bum, enyɛrɛ ànchwɔ̀ sa ngɔɔ embè, mbɔn ba ngo sa sòʼ ma bɔ.” 11Éngɛ angɔ à tiri akpe àmɔ̀ sàa ewee eji, è shi ela gimkpaʼ aŋu gɛ̀rɛ̀ kìrì engɔ.

Yeso gli gho deʼ

(Mat 8:1-4; Mak 1:40-45)

12Anji deʼ Yeso à ne mwɔ efwɔ abɛ deʼ, éngɛ anɔm deʼ zhiri zeʼe wɛ akɔ̂m a me nde ekwa ngɔ gimkpaʼ ngɛ. Èndzobo chɛ anɔm wunɔ à zɔ Yeso ngɛ, engɔ go tuʼu efàarà mɔ a chwâ gɛ̀rɛ̀ bii Yeso kpe, “Masakɛ, ma ngwo me doʼo ngwo we né le angu mmɛ pɛ.” 13Yeso ndɛrɛ abwo mɔ mɔ̀mɔ̀ anɔm wunɔ anyi, è ga ebe engɔ kpe, “Mmɛ we doʼo ngà pɛ.” Ekyɛ ŋwaʼ akɔ̂m wɛ gɛ̀rɛ̀ nyɔɔ ekwa ngɔ. 14Éngɛ Yeso ndɛ̀ʼ etsɛrɛ ebe engɔ kpe, “Enga ke toʼro ebe gho deʼ bo, bɛʼngɛ shi ngɔɔ tee ekwa ngwɛ ebe àtɛ zhiri Ngwe gɛrɛ ndɛʼ etɔ̧ɔrɔ yɛ Mose à shi tsɛrɛ kpe mbɔn sa ndɛ̀ʼ é sò angɔn é tee kpe mbɔn shi pɛ ngɛ.” 15Ka de mwɔ aŋu Yeso à ga kpe e ke sɛɛrɛ ebe gho deʼ bo ngɛ, ekɔn mbɔʼ Yeso sa wa sɛ̀ʼ à ngɔɔ ngɔɔ. Éngɛ anɔrɔ bɔ sa mɛ̀ɛ zeʼe é zo ebe engɔ gɛ̀rɛ̀ ma ke kpe engɔ gli eŋwan mbɔɔ. 16Bɛʼngɛ Yeso à na doʼo à nyɔɔ ngɔɔ tsàʼrà Ngwe ena akwâ mɔ gho zhiʼ.

Yeso gli gho deʼ wɛ abɛɛ ekwa ngɔ àbi à shi ku ngɛ

(Mat 9:1-8; Mak 2:1-12)

17Anji tsɛrɛ, Yeso ma tee bɔ, bɔ Farisii mane bàtee atsɛrɛ gɛrɛ mwɔ aŋu. Angɔ à ne gli zeʼe efwɔ ashimabɛ gimkpaʼ a Galilii, Judeya mane Jerusalɛm. Éngɛ ekama Ngwe me mwɔ afwɔ yɛ ebe engɔ é sa gli bɔ aŋwan. 18Éngɛ bɔ deʼ zeʼ me beʼe gho àglaba deʼ edɔm ekwaʼa gɛ̀rɛ̀ ma twàʼrà àmɔ̀ é shi engɔ ene afwɔ yɛ Yeso à mwɔ ngɛ. 19Na aŋu aghɛʼnji à me tsɛʼ ebe angɔ é fɔɔ bo mbɔʼnga ebaŋabɔ à me ghɛʼ ngɛ, angɔ kwaʼ ngɔɔ efwɔ ekere ndɔ, è zɛɛrɛ afwɔ deʼ ene èzhɛ̀ ndɔ, chi atɔrɔ gɛ̀rɛ̀ beʼ egho wɛ edɔm etan mɔ nyɛɛmɛ chwee sàa a chwâ efàarà Yeso. 20Èndzobo chɛ Yeso à zɔ ebɛrɛtaa yɛ angɔ à me le ngɛ, engɔ gâ ebe gho wɛ abɛɛ ekwa bi à me ku ngɛ kpe, “Esɔrɔ ngu, a shi dzɛd abwa bɔɔbɔɔ njɛ.” 21Bɔ Farisii mane bàtee atsɛrɛ klada sa kùmù àmɔ̀ àmɔ̀ sa ga kpe, “Ewùnɔ na awɛ e ma ndwàʼ Ngwe ene andɔɔ. Awɛ me né dzɛd abwa bɔɔbɔɔ, à ke tye Ngwe gho zhiʼ bo?” 22Éngɛ Yeso à nɛɛ ebwa wɛ angɔ à ma zhuŋu ngɛ è biiri ebe angɔ kpe, “Ayɛ me le mbɔn ma zhuŋu m̀pèrè abwa tsɔnɔ efwɔ ńtara ntsɔn?” 23Ne ebwa we e me zamma é ga, kpe, “E shi dzɛd abwa bɔɔbɔɔ njɛ kà ngà tam ekere zhiri?” 24Bɛʼngɛ mmɛ wa ngo tee endɔn kpe Ŋwɔ Gho we le ekama edɔm chwâ é dzɛ̀d abwa bɔɔbɔɔ. Yeso ga ebe aglaba gho yɛ kpe, “Mmɛ ga engɛ̂, tam ekere, è nu ekwaʼa ngwɛ è ngɔɔ a ndɔ.” 25Engɔ tam ekere ekyɛ ŋwaʼ aghɛɛghɛɛ bɔ, è nu ekwaʼa wɛ à me bwɛn edɔm ngɛ ngɔɔ a ndɔ sa zodo Ngwe. 26Éngɛ gho ŋwàʼaŋwàʼ kɔ̂n gɛ̀rɛ̀ ndɛ̀ʼ ebɛrɛ ebe Ngwe. Éngɛ èklɔ̀ â shwe ene bɔ gimkpaʼ byɛ â mwɔ aŋu ngɛ. Angɔ sa ga kpe, “Mbyɛɛ shi zɔ m̀pè ebwa deʼ yɛ e me kɔrɔ tsà ngɛ ànchwɔ̀.”

Yeso zɔʼ Lɛvi

(Mat 9:9-13; Mak 2:13-17)

27Yeso nyɛrɛ afwɔ yɛ è ngɔɔ. Éngɛ engɔ kla àshuru aŋwɛ deʼ wɛ ekumu ngɔ à mwɔ Lɛvi ngɛ, engɔ me tsɔmɔ afwɔ afwɛʼ mɔ. Yeso gâ ebe engɔ kpe, “Kiri angu.” 28Lɛvi gɛrɛ tam ekere, è shi ela mɔ gimkpaʼ gɛ̀rɛ̀ kìrì engɔ. 29Éngɛ Lɛvi kɛʼ antara kɛ̀ deʼ ebe Yeso a ndɔ mɔ. Éngɛ enɔrɔ bàshuru aŋwɛ tsɛrɛ akɛkɛ mane abɔ tsɛrɛ akɛkɛ â na nde nè angɔ. 30Bɔ Farisii mane bàtee atsɛrɛ byɛ à me mwɔ efwɔ ǹtìmi angɔ ngɛ sa kumu ma ga ebe bɔ bɛɛrɛ abwa ngɔ kpe, “Ayɛ me le mbɔn ma nde gɛ̀rɛ̀ ma ŋwɔ mane bàshuru aŋwɛ mane bɔ abwa bɔɔbɔɔ?” 31Yeso gíì ebe angɔ kpe, “Abɔ byɛ e mwɔ ekama ngɛ ke ma ke ǹgàkyè bo. À na ke ǹgàkyè mwɔ angɔ byɛ e ma gwɔ̀n ngɛ. 32Mbɔn nɛɛ kpe mmɛ ke me zeʼe é zɔʼ abɔ byɛ e ma le abwa yɛ a me koʼro efàarà Ngwe ngɛ bo, bɛʼngɛ mmɛ ne zeʼe me ebe bɔ abwa bɔɔbɔɔ kpe e kobo eleabwa àmɔ̀.”

Ebiiri mbɔʼ é tsɔmɔ ene chwɔ atsaʼra Ngwe

(Mat 9:14-17; Mak 2:18-22)

33Bɔ Farisii ga ebe Yeso kpe, “Bɔ bɛɛrɛ abwa Eyɔɔ mane bɔ bɛɛrɛ abwa bɔ Farisii ba doʼo à tsɔmɔ ene chwɔ atsaʼra Ngwe, ayɛ me le bɔ bɛɛrɛ abwa mbyɛ e sa tsɔmɔ akyɛ gimkpaʼ ma nde gɛ̀rɛ̀ ma ŋwɔ?” 34Yeso gíì kpe, “Ngwo we nɛɛ shi ègɔ̀n egho wɛ ma nu-aye ngɛ kpe è tsɔmɔ nè chwɔ atsaʼra Ngwe wɛ engɔ me mwɔ nè angɔ ngɛ? 35Bɛʼngɛ, endzobo ya zeʼe wɛ e ma ngo nu egho wɛ è me le ebwa nu-aye ngɛ shi shi angɔ àmɔ̀ àmɔ̀, ne efwɔ enji byɛ angɔ ma sa tsɔmɔ ene chwɔ atsaʼra Ngwe.” 36Éngɛ engɔ ga nklama timi fɔnɔ ebe angɔ kpe, “Tsɛ̀ʼ gho deʼ e me né nu aparandi fe shi ngɔɔ ghɔ̀ ene asam bo. Mala engɔ le éngɛ, shi aparandi fe yɛ ke ma ngo koʼo koʼo nè ǹdi sam yɛ bo. 37Nkirinkin gho deʼ ke né nu mɔm jù è ge efwɔ agla sam bo. Mala engɔ le éngɛ, shi amɔm ju myɛ ma toʼ agla, mɔm mɛɛrɛ tu, agla gɛrɛ bɔɔ. 38Ká mɔm jù ne koʼro nyii me efwɔ agla fe? 39Abɔ byɛ e gɛrɛ ma ŋwɔ mɔm ngɛ ke ma dye ŋwɔ mɔm sam shi sa wa biiri mɔm fe bo, mbɔʼnga e ba sa ga kpe amɔm sam myɛ ka nara.”

Currently Selected:

Luk 5: nbt

Highlight

Copy