Eyɔɔ 13

Yeso sô elo bɔ bɛɛrɛ abwa mɔ

1Antara fɔɔ ekere à sa zamma bwɛn, Yeso nɛɛ kpe endzobo ndze é sàarà ese zɔnɔ é ngɔ̀ɔ ebe àtɛ a shi tini. Aŋu engɔ à shi doʼo àmɔ bɔ byɛ â mwɔ efwɔ ese ngɛ, engɔ tee edoʼ mɔ ebe angɔ. 2Aŋu à sa gɛ̀bbɛ̀ ende tiʼdi ngɛ, dɛbli shi chi etaa Judas Iskariyɔd ŋwɔ Shimun, é fɛ̀n Yeso. 3Yeso à nɛɛ kpe àtɛ à shi ge abwa gimkpaʼ eblabwo ndze, gɛrɛ nɛɛ kpe mbè à zeʼe ebe Ngwe gɛ̀rɛ̀ ma wu ghɛɛbɛ é ngɔ̀ɔ ebe engɔ. 4Éngɛ engɔ tam aŋu angɔ à ma nde ngɛ, chidi ǹdiri achim mɔ, fuu ǹdi fla ekwa etiri mɔ. 5Aŋu engɔ à shi le énde nɔ, engɔ dɔɔ ndim efwɔ ala so ela, klada sa sò elo bɔ bɛɛrɛ abwa mɔ, è fla ene ǹdi fla ekwa yɛ à me furu etiri mɔ ngɛ. 6Engɔ ngɛ bwɛn ebe Shimun Petoro ngɛ, Petoro gâ ebe engɔ kpe, “Masakɛ, ngwo à ma ngo sò elo mbu?” 7Yeso gíì kpe, “Ngwo ke shi nɛɛ ebwa wɛ mmɛ ma le ngɛ bo, afwɔ yɛ sa ndada ngwo nɛɛ.” 8Petoro ga kpe, “Ngwo yà ne elo mbu so.” Yeso gíì kpe, “Mala mmɛ ne so awɛ bo shi ngwo ne tsɛʼ ene ebwa deʼ nè mmɛ bo.” 9Shimun Petoro gíì kpe, “Masakɛ, e me engɛ̂, ke so tye elo bo, so ebwo mane ato ndza gɛrɛ.” 10Yeso gíì kpe, “Egho wɛ à shi so ekwa mɔ ngɛ na sò me elo mbɔʼnga ekwa ngɔ gimkpaʼ me pɛ. Ngwo we pɛ ka de ne mwɔ mbɔn bɔ gimkpaʼ bo.” 11Enga Yeso à shi nɛɛ egho wɛ à ma ngo fɛ̀n engɔ ngɛ, na ǹji yɛ engɔ à ga kpe ke ma bɔ gimkpaʼ me pɛ bo ngɛ. 12Èndzobo chɛ engɔ à shi mɛ̀ɛrɛ sò elo angɔ ngɛ, è ge ǹdiri achim mɔ, ghɛɛbɛ ngɔɔ afwɔ mɔ. È biiri ebe angɔ kpe, “Mbɔn be nɛɛ ǹji yɛ mmɛ à le ebwa wunɔ endɔn ngɛ? 13Mbɔn na zɔʼrɔ angu kpe ‘Àtee abwa’ mane ‘Masakɛ.’ Mbɔn be koʼro é ga éngɛ mbɔʼnga mmɛ ne engɔ. 14Enjitsɔ wɛ mmɛ àtee abwa mane Masakɛ ngɔn, shi so elo mbɔn ngɛ, mbɔn gɛrɛ be koʼro é sò elo abɔ abê. 15Mmɛ shi tee aghɛʼ endɔn kpe mbɔn le na aŋu mmɛ shi le endɔn nɔ. 16Mmɛ ga éŋwaʼa endɔn kpe, gho afwɛʼ ke me fɔɔ gho kɛ̀ mɔ bo, kà ghontɔm ke me fɔɔ egho wɛ me tɔmɔ engɔ ngɛ bo. 17Aŋu mbɔn shi nɛɛ abwa zɔnɔ ngɛ, mala mbɔn le shi e ba bɔ̀nɔ̀ angɔn.”

Yeso dye ga aŋu e ma ngo fɛ̀n engɔ ngɛ

18“Mmɛ ke two mbɔn bɔ gimkpaʼ bo. Mmɛ we nɛɛ angɔ byɛ mmɛ me pwɔ̀nɔ ngɛ. Bɛʼngɛ ewunɔ né le ebwa wɛ efwɔ aŋwɛʼrɛ Ngwe ngɛ gli éŋwaʼa kpe, ‘Egho mmɛ ma nde ekuʼ nè engɔ ngɛ wa ngo fɛ̀n angu.’ 19Mmɛ na ga endɔn enjitsɔ dye e sa gli, mbɔʼtye e gli, mbɔn bɛrɛ kpe mmɛ ne engɔ wɛ mmɛ à ga kpe mmɛ ne engɔ ngɛ. 20Mmɛ ga éŋwaʼa endɔn, egho wɛ bɛrɛ egho wɛ mmɛ me saa ngɛ ne bɛrɛ angu. Egho wɛ gɛrɛ bɛrɛ angu ngɛ, ne bɛrɛ engɔ wɛ à saa angu ngɛ.” 21Èndzobo chɛ Yeso à mɛɛrɛ sɛ̀ɛrɛ̀ énde nɔ, ekwa ngɔ sa zɔŋɔrɔ, è chi pèe kpe, “Mmɛ ga éŋwaʼa endɔn, gho bi abwaʼ ndzɔn wa ngo fɛ̀n angu.” 22Bɔ bɛɛrɛ abwa ngɔ kede amɔ aghɔɔghɔɔ ma di amɔ kpe engɔ na two ma awɛ ngà? 23Egho bi abwaʼ bɔ bɛɛrɛ abwa, engɔ wɛ Yeso à me doʼo ghɛʼ ngɛ, à ne zɔʼrɔ amɔ ebara engɔ. 24Shimun Petoro le abwo ebe egho bara wɛ kpe, “Biiri ebe engɔ kpe è two awɛ?” 25Engɔ too amɔ ene Yeso biiri ebe engɔ kpe, “Masakɛ, egho anyi na awɛ?” 26Yeso gíì kpe, “Ne egho wɛ mmɛ ma firi abɔʼ ǹgoŋ efwɔ ekuʼ ndɛʼ ebe engɔ ngɛ.” Éngɛ engɔ ge abɔʼ ǹgoŋ yɛ ndɛʼ ebe Judas Iskariyɔd ŋwɔ Shimun. 27Judas éngɛ nu abɔʼ ǹgoŋ yɛ ngɛ, asatan nyii efwɔ etaa ngɔ. Yeso gâ ebe engɔ kpe, “Zamma lè ebwa ngwo ma ke é le ngɛ.” 28Bɛʼngɛ gho deʼ afwɔ nde yɛ à ke nɛɛ ǹji yɛ Yeso à ga ebe engɔ éngɛ ngɛ bo. 29Aŋu Judas à mwɔ àshi ekɛb ngɛ, abɔ deʼ â zhuŋu kpe Yeso à na ke kpe Judas zɔn ela byɛ angɔ ma ke ene antara fɔɔ ekere ngɛ, kà ala deʼ é ndɛʼ ebe bɔ ndzaŋa. 30Judas ngɛ nu abɔʼ ǹgoŋ yɛ ngɛ, e pɔɔgɔ gli ese. À shi etiʼdi.

Yeso dye ga kpe Petoro wa tɔrɔ angbe

31Èndzobo chɛ Judas à shi gli ngɛ, Yeso gâ kpe, “E shi ndɛʼ eghɔ ebe Ŋwɔ Gho enjitsɔ, gɛ̀rɛ̀ ndɛʼ eghɔ ebe Ngwe nyɛ̀rɛ̀ zèʼe achim ngɔ. 32Mala e ghɔ Ngwe nyɛ̀rɛ̀ zèʼe achim engɔ, Ngwe ya ngo ndɛʼ eghɔ ebe ŋwɔ egha mɔ mɔmbwo, e gɛrɛ ghɔ engɔ ekyɛ ŋwaʼ. 33Bwɔ mbu, mmɛ bli nè mbɔn mpiʼ. Mbɔn ba ngo zɛʼ angu. Mmɛ ga endɔn na mmɛ à ga ebe bɔ Juu ngɛ kpe, mbɔn ke né zeʼ afwɔ yɛ mmɛ ma ngɔɔ ngɛ bo. 34Mmɛ ndɛʼ etsɛrɛ fe endɔn enjitsɔ kpe mbɔn doʼ angɔn mbɔrɔmbɔn. Aŋu mmɛ à shi doʼo angɔn ngɛ, mbɔn doʼo angɔn mbɔrɔmbɔn. 35Éngɛ ngɛ mala mbɔn doʼo angɔn mbɔrɔmbɔn shi gho ŋwàʼaŋwàʼ wa ngo nɛɛ kpe mbɔn na bɔ bɛɛrɛ abwa mbu.” 36Shimun Petoro biiri ebe engɔ kpe, “Masakɛ, ngwo na ngɔ̀ɔ awe?” Yeso gíì kpe, “Afwɔ mmɛ ma ngɔɔ ngɛ ngwo ke né kìrì angu enjitsɔ bo bɛʼngɛ ngwo wa kìrì angu endzobo achim.” 37Petoro biiri ebe engɔ kpe, “Masakɛ mmɛ ke né kìrì awɛ enjitsɔ bo mbɔʼ ayɛ? Mmɛ wa ndɛʼ ato ndza egha njɛ.” 38Éngɛ Yeso gíì kpe, “Ngwo wa ndɛʼ ato njɛ egha ndza? Mmɛ ga éŋwaʼa engɛ̂ kpe, èkoʼo fa sa tsoʼo, ngwo shi tɔrɔ angu akyɛ tɛd.”

Currently Selected:

Eyɔɔ 13: nbt

Highlight

Copy