Eyɔɔ 12

Aŋu â zhwaʼa Yeso a Bɛtani ngɛ

1Enji à ne nɔ mfo é nyii efwɔ anji antara fɔɔ ekere. Yeso ngɔɔ a Bɛtani a ndɔ Natsoro wɛ engɔ à zhwɛɛmɛ engɔ ene ewu ngɛ. 2Aŋu â ne ndeere ende deʼ é ndɛʼ eghɔ ebe Yeso anyi. Mata à na gɛ̀bbɛ̀ ande aŋu. Natsoro à ne egho bi abwaʼ abɔ byɛ â me tsɔmɔ edɔm echud ma nde nè Yeso ngɛ. 3Éngɛ Meri nu ngud mbì deʼ myɛ à me kama ekɛb ngɛ, dɔ̀ɔrɔ elo Yeso gɛrɛ fla ene nyɔrɔ ato mɔ. Efwɔ ndɔ à sa ngoʼo ene esɛɛ nchwɔnchwɔ yɛ à ma glì ene a ngud myɛ ngɛ. Ala yɛ à me ndeere a ngud myɛ anyi ngɛ â na zɔʼrɔ kpe nard. 4Gho bɛ̀ɛrɛ abwa Yeso bi wɛ ekumu ngɔ à mwɔ Judas Iskariyɔd, engɔ wɛ à ma ngo fɛrɛ Yeso ngɛ ga kpe 5“A ke né nu a ngud mbì mɔnɔ fɛ̀n ndɛ̀ʼ ekɛb ebe bɔ ndzaŋa bo? À ne mwɔ ekɛb tye e nɛ̀rɛ̀ gho afwɛʼ anyi efwɔ anɔ̂m bibi.” 6Engɔ à ke ga énde nɔ mbɔʼnga à ma klasɔn ene bɔ ndzaŋa bo. Bɛʼngɛ engɔ à ne ejii, mwɔ egho wɛ à ma shi achwɔ̀ ekɛb ngɛ. Engɔ à na doʼo à ji ekɛb efwɔ achwɔ̀ ekɛb yɛ â mwɔ nè engɔ ngɛ. 7Bɛʼngɛ Yeso gíì kpe, “Mbɔn saara engɔ gho zhiʼ. Engɔ shi etseʼre ngud yɛ e me tye ngɛ ene anji yɛ e ma kpa angu ngɛ. 8Mbɔn ba ngo ma bwò à mwɔ nè bɔ ndzaŋa abwaʼ ndzɔn akyɛ gimkpaʼ, bɛʼngɛ mmɛ ke ma ngo ma mwɔ nè mbɔn akyɛ gimkpaʼ bo.”

E nde akɔɔ ato Natsoro

9Éngɛ ebaŋabɔ Juu zo kpe Yeso wa a Bɛtani, angɔ ngɔɔ aŋu. Angɔ à ke ngɔɔ é zɔ tye Yeso bo, â gɛrɛ ngɔɔ é zɔ Natsoro wɛ Yeso à shi zhwɛɛmɛ ene ewu ngɛ. 10Éngɛ m̀fɔ̀rɔ̀ zhiri gɛrɛ ndèerè é zhudu Natsoro. 11Â na ke zhudu Natsoro mbɔʼnga â na ga kpe na mbɔʼ engɔ wɛ bɔ Juu akɛkɛ â bɛʼrɛ angɔɔ sa bɛ̀rɛ me ene Yeso ngɛ.

Yeso nyii a Jerusalɛm na M̀fɔ̀ nɔ

12Â tam enchwe aŋu, ebaŋabɔ wɛ à me zeʼe ene antara fɔɔ ekere ngɛ zo kpe Yeso wa zeʼe anji a Jerusalɛm. 13Éngɛ angɔ bwɛ eghama ene eghɔb ngɔ̀ɔ ese é kla engɔ, sa flaba akwâ ga kpe, “Hosana! M̀bɔ̀nɔ ye ebe engɔ wɛ me zeʼe ene ekumu Masakɛ ngɛ! M̀bɔ̀nɔ ye ebe m̀fɔ̀ bɔ Israel.” 14Éngɛ Yeso zɔ akɔb m̀pwɔ̀ bèʼebɔ deʼ, gɛ̀rɛ̀ kwaʼ edɔm aŋu, aŋu e me ŋwɛʼrɛ efwɔ aŋwɛʼrɛ kpe 15“Mbɔn ke sa bumu bo, bɔ abɛ Zayɔ̀n. Mbɔn kɔʼ, m̀fɔ̀ ndzɔn ya zeʼe, me tsɔmɔ edɔm akɔb m̀pwɔ̀ bèʼebɔ.” 16Ambèmbè bɔ bɛɛrɛ abwa Yeso à ke nɛɛ enji ene ebwa wunɔ bo, bɛʼngɛ èndzobo chɛ Yeso à zhwɛm ene ewu nè enɛŋɛrɛkɛ Ngwe ngɛ, angɔ shi zhuŋu kpe â shi dye ŋwɛʼrɛ abwa zɔnɔ mbɔʼ engɔ, gɛ̀rɛ̀ shi fwɛʼ ekwa ngɔ. 17Enjitsɔ, ebaŋabɔ wɛ à me mwɔ nè Yeso èndzobo chɛ engɔ à zɔʼ Natsoro efwɔ eshe gɛ̀rɛ̀ zhwɛɛmɛ engɔ ene ewu ngɛ, â fɔɔ embè sa sɛ̀ʼɛ ebwa wunɔ. 18Bɔ akɛkɛ â na ngɔ̀ɔ ebe Yeso mbɔʼnga â shi zo kpe engɔ à shi fwɛʼ ebwa zodo zodo wunɔ. 19Éngɛ bɔ Farisii sa ga àmɔ̀ àmɔ̀ kpe, “É bwɛ̀n enjitsɔ, ntsɔ ke né fwɛʼ ebwa deʼ bo. Kede ese gimkpaʼ a shi kiri achim engɔ.”

Yeso ga mbɔʼ ewu mɔ

20Enjitsɔ bɔ Grik deʼ â na abwaʼ abɔ byɛ â me ngɔɔ a Jerusalɛm é ghɔ Ngwe endzobo antara wunɔ ngɛ. 21Abɔ Grik bɔnɔ â ngɔɔ ebe Firiboʼ wɛ à me zeʼe a Bɛtsayda efwɔ abɛ Galilii ngɛ, gɛ̀rɛ̀ ga ebe engɔ kpe, “Masa, mbyɛɛ ba ke é zɔ Yeso.” 22Firiboʼ ngɔɔ ga ebe Andere angɔ bɔ fyee ngɔɔ ga ebe Yeso. 23Éngɛ Yeso gíì ebe angɔ kpe, “Endzobo shi koʼo yɛ bɔ ma ngo zɔ enɛŋɛrɛkɛ Ŋwɔ Gho ngɛ. 24Mmɛ ga éŋwaʼa endɔn kpe sam ǹku turu a chwâ ne fwe bo, shi è ya nɔ tye ma sam ǹku ŋwaʼ yɛ. Bɛʼngɛ mala e fwe gli, shi è ya ngo ndɛʼ samara tsɛrɛ akɛkɛ. 25Egho wɛ è me doʼo ekwa mɔ ngɛ wa ngo nyim. Bɛʼngɛ engɔ wɛ è me gwe ekwa mɔ efwɔ ese zɔnɔ ngɛ, wa shi ene etyê kengudu. 26Egho wɛ è ma fwɛʼ ena ngɛ kiri angu. Afwɔ yɛ mmɛ mwɔ ngɛ, gho afwɛʼ ngu gɛrɛ mwɔ aŋu. Àtɛ ngu wa ghɔ egho wɛ è ma fwɛʼ ena ngɛ.” 27Yeso ga kpe, “Enjitsɔ etaa mfu fe diri, mmɛ gɛrɛ shi ga kpe ayɛ? Àtɛ kpede angu efwɔ antiri endzobo zɔnɔ. Keʼ mmɛ ke ma ga éngɛ bo, mbɔʼnga na ǹji yɛ mmɛ à zeʼe ngɛ, mbɔʼtye mmɛ fɔɔ efwɔ endzobo ǹgoʼ zɔnɔ. 28Àtɛ, tee ekama yɛ e mwɔ ene ekumu ngwɛ ngɛ.” Éngɛ etsoʼ deʼ ga zeʼe ezob kpe, “Mmɛ shi tee ekama ndza, gɛ̀rɛ̀ ma wu tee egha tsɛrɛ.” 29Ebaŋabɔ wɛ à me tamma aŋu ngɛ à zo etsoʼ wɛ. Éngɛ abɔ deʼ ga kpe na m̀bò kumu, adeʼ kpe, “Angere deʼ à ga ebe engɔ.” 30Bɛʼngɛ Yeso ga ebe angɔ kpe, “Etsoʼ wunɔ ke me ga egha ndza bo, bɛʼngɛ na egha ndzɔn. 31Enjitsɔ, endzobo tsɛrɛ esɛʼ Ngwe efwɔ ese shi koʼo. Enjitsɔ e ba ngo fli ato efwɔ ese zɔnɔ. 32Éngɛ èndzobo chɛ Ngwe è ma beʼ angu a chwâ ngɔ̀ɔ ekere ngɛ, mmɛ wa le bɔ gimkpaʼ zeʼe ena.” 33Engɔ à ga ebwa wunɔ énde é tee M̀pè ewu yɛ engɔ ma ngo ku ngɛ. 34Ebaŋabɔ gii kpe, “Mbyɛɛ à shi zo efwɔ atsɛrɛ kpe Ǹtɔmzhwaʼa ye tye ekyɛ ŋwaʼ. Ngwo na da sa ga kpe e ba bèʼrè Ŋwɔ Gho ekere ngɛ ene? Ŋwɔ gho na awɛ?” 35Éngɛ Yeso gíì ebe angɔ kpe, “Mbɔn ba ngo le ekɛʼ efwɔ antiri endzobo deʼ. Mbɔn zhiri enjitsɔ aŋu mbɔn me le ekɛʼ ngɛ dye adi̧iri sa fɔɔ angɔn. Egho wɛ è ma zhiri akwâ di ngɛ ke nɛɛ afwɔ yɛ è ma ngɔɔ ngɛ bo. 36Éngɛ mbɔn bɛrɛ ene ekɛʼ aŋu mbɔn me le ekɛʼ ngɛ, mbɔʼtye mbɔn me né mwɔ bɔ kɛʼ.” Aŋu Yeso à shi mɛ̀ɛrɛ ga ngɛ, è nyɛrɛ nyɔɔ ngɔɔ namma.

É le ebɛrɛ mane ke le ebɛrɛ abwaʼ bɔ Juu

37Éngɛ, ka de mwɔ aŋu Yeso a shi le anɛ̂ abwa akɛkɛ efàarà angɔ ngɛ, angɔ à da ke bɛrɛ ene Yeso bo. 38Ewunɔ à ne le kpe ebwa wɛ Àmɛnɛkɔn Ngwe Azaya à ga ngɛ gli éŋwaʼa kpe, “Masakɛ, awɛ shi bɛrɛ ekɔn wɛ mbyɛɛ à mɛnɛ ngɛ? Awɛ shi zɔ ekama njɛ nɛ̀ɛ?” 39Enji yɛ angɔ à ne me né bɛrɛ bo ngɛ na mbɔʼnga Azaya à ga akwâ tsɛrɛ kpe 40“Ngwe a shi le aghɔɔ angɔ fo gɛ̀rɛ̀ kaama ńtara angɔ, mbɔʼtye angɔ ne zɔ ene aghɔɔ amɔ, gɛ̀rɛ̀ ne nɛɛ ǹji efwɔ ńtara amɔ bo. Mala angɔ zɔ gɛ̀rɛ̀ nɛɛ ǹji shi e ba ghɛɛbɛ zeʼe ebe Ngwe.” 41Éngɛ Azaya à ga ebwa wunɔ mbɔʼnga engɔ à zɔ enɛŋɛrɛkɛ Yeso gɛrɛ ga mbɔʼ engɔ. 42Éngɛ bɔ akɛkɛ, ka de mwɔ eto bɔ Juu â bɛrɛ ene Yeso, bɛʼngɛ â na bumu é ga apɛpɛ mbɔʼ bɔ Farisii kpe e ba chidi angɔɔ efwɔ ndɔ tsaʼra Ngwe bɔ Juu. 43Angɔ à ne doʼo eghɔ yɛ à ma zeʼe ebe bɔ ngɛ fɔɔ engɔ yɛ à ma zeʼe ebe Ngwe ngɛ.

Aga Yeso ya ngo sɛʼ bɔ

44Éngɛ Yeso ku̧u akɛkɛ kpe, “Egho wɛ è bɛ̀rɛ ene mmɛ ngɛ, ke ma bɛ̀rɛ tye ene mmɛ bo, bɛʼngɛ è gɛrɛ na bɛ̀rɛ ene gho wɛ me saa angu ngɛ. 45Egho wɛ ma zɔ angu ngɛ shi zɔ engɔ wa à sàa angu ngɛ.” 46Éngɛ Yeso wu ga kpe, “Mmɛ ne zeʼe efwɔ ese ne ekɛʼ nɔ, mbɔʼtye gho deʼ ŋwaʼ wɛ è me bɛrɛ ene mmɛ ngɛ ke tsɔmɔ adi̧iri bo.” 47Éngɛ mala gho deʼ zo ega ngu shi tɔrɔ ke klini mmɛ ke ma sɛ̀ʼɛ egho wɛ bo mbɔʼnga mmɛ ke me zeʼe é sɛʼ ese bo, bɛʼngɛ mmɛ ne zeʼe é pwèerè bɔ efwɔ ese. 48Éngɛ àtsɛrɛ esɛʼ deʼ wa aŋu ebe abɔ byɛ e ma bɛ̀ʼrɛ̀ angu gɛ̀rɛ̀ tɔrɔ é bɛrɛ ene ega ngu ngɛ. Aga yɛ mmɛ à shi ga ngɛ ya ngo sɛʼ angɔ anji ngùdu. 49Ewunɔ ne éŋwaʼa mbɔʼnga mmɛ ke ma ga ene ekama ndza bo, bɛʼngɛ àtɛ wɛ à sàa angu ngɛ à shi ndɛʼ etsɛrɛ ena é ga abwa gimkpaʼ yɛ mmɛ shi ga ngɛ. 50Mmɛ we nɛɛ kpe etsɛrɛ ngɔ yà gbèe ǹjì é ngɔ̀ɔ efwɔ etyê kengudu. Éngɛ ebwa wɛ mmɛ ma ga ngɛ à tye me engɔ wɛ àtɛ à shi tòʼro ena é ga ngɛ.

Currently Selected:

Eyɔɔ 12: nbt

Highlight

Copy