Eleabwa 8

1Saalo à na a chwâ bɛ̀rɛ kpe e zhudu Stefin.

Saalo nyíì ndɔngwe

Anji aŋwaʼ yɛ, ndɔngwe yɛ à mwɔ a Jerusalɛm ngɛ klada sa zɔ ǹgoʼ yɛ à me kama ghɛʼ ngɛ. Bɔ Ngwe gimkpaʼ â sɛ̂ʼ efwɔ abɛɛ abɛ Judeya mane Samariya. À tye me bèmpwɔnɔntɔm à ne me sɛ̀ʼɛ bo. 2Ânɔm deʼ byɛ â me le ebum ene Ngwe ngɛ chi akwa àmɔ̀ é kpa Stefin. Â de eku engɔ ma ku̧u. 3Bɛʼngɛ Saalo à twaʼra amɔ é tsɔŋɔ ndɔngwe. Engɔ à na zhiri a ndɔrɔ ndɔrɔ mà gòo aye mane anɔm byɛ â me bɛrɛ Kristo ngɛ ngɔ̀ɔ ndwa a dzɔm.

Firiboʼ sɛɛrɛ ega Ngwe efwɔ abɛ Samariya

4Bɔ byɛ â me bɛrɛ ene Ngwe ngɛ â sɛ̂ʼ efwɔ ese gimkpaʼ, ma zhiri à sɛ̀ɛrɛ̀ ekɔn ǹchwɔ̀ wɛ. 5Firiboʼ ngɔɔ afwɔ yɛ à mwɔ afwɔ kɛ́ efwɔ abɛ Samariya ngɛ sɛ̀ɛrɛ̀ ekɔn ǹchwɔ̀ mbɔʼ Kristo ebe abɔ byɛ â mwɔ aŋu ngɛ. 6Ebaŋabɔ à tɛʼ ètimi mà zhuru ebwa wɛ Firiboʼ à ma gà ngɛ. Angɔ à zhuru ebe engɔ gɛrɛ zɔ enɛ̂ abwa yɛ engɔ à fwɛʼ ngɛ. 7Ezhwɛɛrɛ bɔɔbɔɔ byɛ â le abɔ byɛ ezhwɛɛrɛ byɛ â mwɔ akwa angɔ ngɛ sa flaba akwâ dye ezhwɛɛrɛ bɔɔbɔɔ byɛ shi gli. Abɔ byɛ â me ku abɛɛ akwa mane angɔ byɛ â me buʼru ngɛ â bwada. 8Éngɛ egɛnɛ kɛ́ à ne shwe akwa bɔ gimkpaʼ efwɔ abɛ yɛ.

9Gho deʼ à na tsɔmɔ efwɔ abɛ yɛ ekumu ngɔ ma Shimun. Engɔ à shi buguru eto bɔ Samariya efwɔ endzobo deʼ ene ǹgbara mɔ. Engɔ à na tee kpe mbè na gho deʼ wɛ à me kama ghɛʼ ngɛ. 10Bɔ gimkpaʼ efwɔ abɛ, e klada ene e tsɛddɛ ngɔ̀ɔ bwɛn ene bɔ kɛ́ à na tɛ̀ʼɛ ètimi ma zhuru ebe engɔ. Angɔ sa gà kpe, “Engɔ ne le ekama Ngwe yɛ e ma ga kpe ne ekama kɛ́ ngɛ.” 11Angɔ à na tɛ̀ʼɛ ètimi ma zhuru ebe engɔ mbɔʼnga engɔ à shi buguru eto angɔ ene ǹgbara mɔ efwɔ endzobo dɔɔdɔɔ. 12Bɛʼngɛ èndzobo chɛ angɔ à bɛrɛ ene ekɔn wɛ Firiboʼ à ma gà mbɔʼ ekɔn ǹchwɔ̀ ene ebwa m̀fɔ̀ Ngwe mane ekumu Yeso Kristo ngɛ, angɔ nu ndim, ânɔm mane âye. 13Shimun mɔmbwo bɛrɛ gɛ̀rɛ̀ nu ndim, enyɛrɛ engɛ̂, engɔ klada sa kìrì Firiboʼ ngɔɔ akwâ yɛ engɔ à ma ngɔ̀ɔ ngɛ. Engɔ à kɔ̂n ene abwa zodo zodo mane enɛ̂ abwa yɛ Firiboʼ à ma le ngɛ.

14Bèmpwɔnɔntɔm byɛ â mwɔ abɛ Jerusalɛm ngɛ zo kpe bɔ Samariya shi bɛrɛ ene Ngwe. Éngɛ angɔ tɔm Petoro mane Eyɔɔ ebe angɔ. 15Èndzobo chɛ Petoro mane Eyɔɔ à bwɛn ngɛ, angɔ tsàʼrà Ngwe ene abɔ byɛ â me bɛrɛ ene Ngwe ngɛ kpe angɔ nu azhwɛɛrɛ pɛ. 16Enga azhwɛɛrɛ pɛ à de ke shi kla zeʼe a chwâ ekwa gho deʼ abwaʼ angɔ bo. Angɔ à shi nu tye me ndim ene ekumu Masakɛ Yeso Kristo. 17Éngɛ Petoro mane Eyɔɔ tɛʼ ebwo àmɔ̀ akwa angɔ, azhwɛɛrɛ pɛ gɛrɛ nyii akwa angɔ. 18Èndzobo chɛ bèmpwɔnɔntɔm â tɛʼ ebwo àmɔ̀ eto angɔ ngɛ, Shimun zɔ kpe azhwɛɛrɛ Ngwe a shi nyii akwa abɔ byɛ e me bɛrɛ ene Ngwe ngɛ. Éngɛ Shimun tɔ̧ɔrɔ bèmpwɔnɔntɔm ndɛ̀ʼ ekɛb, 19gɛrɛ gà ebe angɔ kpe, “Mbɔn ndɛʼ ekama zɔnɔ ena mbɔʼtye mmɛ tɛʼ abwo ndza ato gho deʼ nɔ, azhwɛɛrɛ pɛ nyii ekwa ngɔ.” 20Bɛʼngɛ Petoro gíì kpe, “Ngwo wa ngɔɔ efwɔ edzɔwu asatan mane ekɛb ngwɛ! Mala ngwo zhuŋu kpe ngwo we né zɔn azhwɛɛrɛ Ngwe ene ekɛb! 21Ngwo ke le eklo kà antiri deʼ ene afwɛʼ njɛɛ bo mbɔʼnga etaa mfyɛ ke pɛ efàarà Ngwe bo. 22Ngà kobo ezhuŋu bɔɔbɔɔ zɔnɔ ngwo me le nɔ, gɛrɛ tsàʼrà Ngwe ebe Masakɛ kpe engɔ dzɛd abwa bɔɔbɔɔ njɛ, é zhùŋù m̀pè ebwa zɔnɔ. 23Mmɛ shi zɔ kpe ekumbog ye shwe efwɔ etaa mfyɛ, ngwo gɛrɛ mwɔ ghodzɔm ebe abwa bɔɔbɔɔ.” 24Shimun gâ ebe Petoro mane Eyɔɔ kpe, “Mmɛ buʼ ebwo, mbɔn tsàʼrà Ngwe ebe Masakɛ ato ndza mbɔʼtye abwa zɔnɔ mbɔn ga nɔ, edeʼ ke gli ekwa ngu bo.” 25Èndzobo chɛ angɔ à shi tòʼro abwa yɛ Ngwe à fwɛʼ akwa angɔ gɛ̀rɛ̀ sɛ̀ɛrɛ̀ ekɔn ǹchwɔ̀ Masakɛ ngɛ, Petoro mane Eyɔɔ ngɔɔ achim a Jerusalɛm. Angɔ à sɛɛrɛ ekɔn ǹchwɔ̀ efwɔ akwâ akɛkɛ anji aŋu â ma ngɔ̀ɔ efwɔ abɛ Samariya ngɛ.

Firiboʼ mane gho kɛ̀ abɛ Etyopya

26Angere Masakɛ deʼ gâ ebe Firiboʼ kpe, “Ngà ndeere awɛ ngɔ̀ɔ abɛɛ abitin, anji aŋu e ma nyɛn abɛ Jerusalɛm ngɔ̀ɔ abɛ Gaza ngɛ.” Bɔ ke ma à bli à fɔɔ ene ǹjì yɛ enjitsɔ bo. 27Éngɛ Firiboʼ ndeere amɔ ngɔ̀ɔ. Azɛʼgho Etyopya deʼ à na aŋu wɛ à mwɔ gho kɛ̀ ene afwɔ shi ekɛb ebe Kandake wɛ a mwɔ eye m̀fɔ̀ Etyopya ngɛ. Engɔ à ne zeʼe a Jerusalɛm é ghɔ Ngwe. 28Aŋu azɛʼgho Etyopya mɔmbwo à sa ghɛɛbɛ à ngɔ̀ɔ achim abɛ mɔ efwɔ àwùu wɛ à ma tiri ma m̀pwɔ̀rɔ̀ bèʼebɔ ngɛ, engɔ ma zɔ̀ʼrɔ̀ afwɔ deʼ efwɔ aŋwɛʼrɛ Àmɛnɛkɔn Ngwe Azaya. 29Éngɛ azhwɛɛrɛ pɛ gâ ebe Firiboʼ kpe, “Ngà kpɛn ngɔ̀ɔ ebara àwùu wende.” 30Firiboʼ dɔrɔ ngɔ̀ɔ abɛɛ aŋu gɛ̀rɛ̀ zo engɔ ma zɔʼrɔ abwa efwɔ aŋwɛʼrɛ Azaya, àmɛnɛkɔn Ngwe. Firiboʼ biiri ebe engɔ kpe, “Ngwo we nɛɛ ǹji ene ebwa wɛ ngwo ma zɔʼrɔ ngɛ ngà?” 31Éngɛ gho kɛ̀ wɛ gíì kpe, “Mmɛ wa da sa nɛɛ ene, wɛ gho deʼ ne shi tòʼro ena bo ngɛ?” Engɔ gɛrɛ zɔʼ Firiboʼ kpe è kwaʼ nyii efwɔ àwùu nè embè. 32Antiri afwɔ aŋwɛʼrɛ Ngwe yɛ engɔ à ma zɔʼrɔ ngɛ à ne ga kpe

“Engɔ à ne na ǹglɔ̀ zɔ e ma nu é ngo kɛmɛ nɔ,

engɔ à ne na ŋwɔ ǹglɔ̀ wu e ma hlɔ nyɔrɔ ngɔ, è ne ma ku̧u bo nɔ.

Egho wunɔ à ke ga ebwa deʼ bo.

33Â ke ndɛʼ eghɔ ebe engɔ bo, e gɛrɛ ne tee éŋwaʼa ebe engɔ bo. Tsɛ̀ʼ gho deʼ me nɛɛ tye è ga mbɔʼ ekla engɔ bo, mbɔʼnga â zamma chi engɔ efwɔ ese.” 34Éngɛ egho kɛ̀ wunɔ biiri ebe Firiboʼ kpe, “Ngà toʼro ena ká àmɛnɛkɔn Ngwe na ga ebwa wunɔ ngɛ egha mɔ kà ebe gho tsɛrɛ.” 35Éngɛ Firiboʼ klada sa gà ebe engɔ, me klada zeʼe efwɔ antiri aŋwɛʼrɛ zɔnɔ, engɔ à sɛɛrɛ ekɔn ǹchwɔ̀ mbɔʼ Yeso. 36Aŋu angɔ à ma zhiri à ngɔ̀ɔ ngɛ, angɔ bwɛn ene afwɔ deʼ yɛ ndim à mwɔ ngɛ, azɛʼgho yɛ gâ kpe, “Kɔʼɔ, ndim deʼ mɔ. Ndɛʼ ndim ena ekyɛ ŋwaʼ.” 37#8:37 Eŋwɛʼrɛ sam deʼ be le mpweʼ 37kpe Firiboʼ ga ebe engɔ kpe, “Ebe ne ndɛʼ ndim engɛ̂ mala ngwo me bɛrɛ ene etaa mfyɛ gimkpaʼ.” Egho wɛ gii kpe, “Mmɛ wu bɛrɛ kpe Yeso na ŋwɔ Ngwe.” 38Egho kɛ̀ wɛ gâ kpe àwùu tam. Angɔ bɔ fyee kla ngɔ̀ɔ efwɔ ndim myɛ, Firiboʼ gɛrɛ ndɛʼ ndim ebe engɔ. 39Èndzobo chɛ angɔ à gli efwɔ ndim ngɔ̀ɔ ewee ngɛ, azhwɛɛrɛ Ngwe beʼ Firiboʼ ngɔ̀ɔ. Egho kɛ̀ wunɔ ne wu zɔ Firiboʼ ekyɛ tsɛrɛ bo. Bɛʼngɛ engɔ à sa zhiri à ngɔ̀ɔ embè egɛnɛ me shwe ekwa ngɔ. 40Éngɛ Firiboʼ sa zɔ amɔ efwɔ abɛ deʼ yɛ â ma zɔʼrɔ kpe Azotus ngɛ. Aŋu engɔ à ma fɔɔ ngɛ, è zhiri à sɛ̀ɛrɛ̀ ekɔn ǹchwɔ̀ wunɔ aŋu karadidi ngɔ̀ɔ bwɛ̀n abɛ Kaysarya.

Currently Selected:

Eleabwa 8: nbt

Highlight

Copy