Eleabwa 7

Ebwa wɛ Stefin à ga a ndɔ m̀pàrà ngɛ

1Éngɛ angwa zhiri biiri ebe Stefin kpe, “Abwa zɔnɔ gimkpaʼ ne éŋwaʼa?” 2Stefin gíì kpe, “Bwɔngwaanɔm mane ètɛ, mbɔn zhuru ena. Àtɛ sam bɔ Abraham à sa ngo tsɔmɔ abɛ Haran nɔ, Ngwe yɛ e me le enɛŋɛrɛkɛ ngɛ à tee amɔ ebe engɔ abɛ Mesopotamya. 3Ngwe à ga ebe Abraham kpe ‘Ngà saara ekla ngwɛ mane abɛ njɛ ngɔ̀ɔ ene afwɔ yɛ mmɛ ma ngo tee engɛ̂ ngɛ.’ 4Éngɛ engɔ à saara abɛ mɔ a Chaldeyan gɛ̀rɛ̀ ngɔɔ tsɔmɔ efwɔ abɛ deʼ yɛ â ma zɔʼrɔ kpe Haran ngɛ. Èndzobo chɛ àtɛ Abraham à ku ngɛ, Ngwe le Abraham zhiri ngɔ̀ɔ efwɔ afwɔ chwâ yɛ mbɔn mwɔ enjitsɔ ngɛ. 5Ngwe à ke tsɛrɛ eklo deʼ ene afwɔ chwâ zɔnɔ ndɛ̀ʼ kpe na angɔ Abraham bo. Ka de mwɔ antiriŋi afwɔ nɔ, à ke ndɛʼ ebe engɔ bo. Bɛʼngɛ Ngwe à tɔ̧ɔrɔ é ndɛʼ chwâ yɛ ebe Abraham mane bwɔ ekla mɔ. Èndzobo chɛ Ngwe à le etɔ̧ɔrɔ zɔnɔ ngɛ, Abraham à ke shi le ŋwɔ deʼ bo 6Ngwe à ga ebe Abraham kpe ‘Bwɔ ekla mbyɛ ba ngo tsɔmɔ efwɔ abɛ deʼ yɛ ne mwɔ abɛ njɛ bo ngɛ. Angɔ ba ngo mwɔ àdzob. E ba ngo nyii angɔ ene aghɛʼnji bɔɔbɔɔ efwɔ enɔ̂m ako kwɛ̀.’ 7Ngwe gâ kpe ‘Bɛʼngɛ mmɛ yà sɛʼ abɔ byɛ angɔ ma fwɛʼ èdzob ebe angɔ ngɛ, endzobo deʼ fɔɔ bwɔ ekla mbyɛ yà zeʼe efwɔ abɛ yɛ è sa ghɔ angu ene afwɔ zɔnɔ.’ ” 8Éngɛ Ngwe tsɛrɛ kpe e ndee bwɔanɔm shi mwɔ anɛ̂ ene etsɛrɛ yɛ engɔ à nu nè Abraham ngɛ. Èndzobo chɛ â be Ayzik tsɔmɔ ǹkyɛ̀ ŋwaʼ ngɛ, Abraham à ndee engɔ. Ayzik à ndee ŋwɔ mɔ Yakɔb. Yakɔb gɛrɛ ndèe bwɔ mɔ wum ǹchwɔ̀ fyee byɛ â mwɔ nè ètɛ sam bɔ ngɛ. 9Bwɔ Yakɔb â klada sa ku aghɔʼ ene ghongwaanɔm àmɔ̀ Yɔsɛf gɛrɛ fɛ̀n engɔ ne èdzob nɔ abɛ Ejip. Bɛʼngɛ Ngwe à ne mwɔ nè engɔ. 10Ngwe à kɔʼ engɔ ene enyii gimkpaʼ yɛ engɔ à ma fɔɔ efwɔ ngɛ. Èndzobo chɛ Yɔsɛf à tam efàarà Farao, M̀fɔ̀ Ejip ngɛ, Ngwe à ndɛʼ aghɛʼ ǹchwɔ̀ mane azɔm ebe engɔ. M̀fɔ̀ le Yɔsɛf mwɔ ato efwɔ abɛ yɛ mane efwɔ ǹtɔʼ. 11Éngɛ chwɔ à nyii efwɔ abɛ Ejip gimkpaʼ mane abɛ Kanan gimkpaʼ. Bɔ â zɔ ǹgoʼ ene nchwɔrɔ ghɛʼ. Ètɛ sam bɔ à ke le ende deʼ é nde bo. 12Endzobo Yakɔb à zo kpe ǹkùru tsa abɛ Ejip ngɛ, engɔ saa bwɔanɔm mɔ byɛ â mwɔ ètɛ sam bo ngɛ aŋu efwɔ ekyɛ mbèmbè àmɔ̀. 13Èndzobo chɛ angɔ à ngɔ̀ɔ efwɔ abɛ Ejip ene ekyɛ nùrù fyee ngɛ, Yɔsɛf le bwɔngwaanɔm ngɔ nɛɛ engɔ. Yɔsɛf à le M̀fɔ̀ yɛ à mwɔ efwɔ abɛ Ejip ngɛ nɛɛ mbɔʼ ekla ngɔ. 14Éngɛ Yɔsɛf tɔm ekɔn ebe àtɛ mɔ Yakɔb kpe ekla gimkpaʼ zeʼe. Bɔ gimkpaʼ byɛ â ngɔ̀ɔ abɛ Ejip ngɛ a na bɔ èsama tɛd tɛʼ wum ǹchwɔ̀ tan 15Yakɔb mane bwɔ mɔ â ngɔɔ abɛ Ejip, è tsɔmɔ aŋu bwɛn èndzobo chɛ angɔ à kudu ngɛ. 16Â bwɛ akudu-akwa angɔ ngɔ̀ɔ achim abɛ Shɛchɛm gɛrɛ kpa angɔ efwɔ eshe yɛ Abraham à zɔn ebe bɔ ekla Hamɔɔ ngɛ. 17Èndzobo chɛ endzobo à sa zamma kɔʼ ebe Ngwe é shi etɔ̧ɔrɔ mɔ yɛ à shi le nè Abraham ngɛ, nuru bɔ Israel abɛ Ejip a sa zhiiri à ngɔɔ embè embè. 18É ngùdù, m̀fɔ̀ deʼ yɛ à ne me nɛɛ mbɔʼ Yɔsɛf bo ngɛ nu atan efwɔ abɛ Ejip. 19M̀fɔ̀ yɛ à na ndooro ètɛ sam bo gɛrɛ ma twa ebe angɔ. Engɔ à na tiri angɔ kpe e waʼra bwɔ àmɔ̀ me ese mbɔʼtye e kudu aŋu. 20À ne efwɔ endzobo zɔnɔ yɛ â be Mose ngɛ. Mose à ne nara ezɔɔrɔ efàarà Ngwe ghɛʼ. Â kpee engɔ efwɔ ndɔ àtɛ mɔ efwɔ ata tɛd. 21Èndzobo chɛ â chi engɔ efwɔ ndɔ àmɔ̀ sàa ese ngɛ, ŋwɔaye m̀fɔ̀ nu engɔ kpee shi ene ŋwɔanɔm mɔ. 22Â tee azɔm bɔ Ejip gimkpaʼ ebe Mose, engɔ gɛrɛ shi gho kɛ̀ ene aga mane eleabwa. 23Èndzobo chɛ Mose à bwɛn enɔ̂m èsama fyee ngɛ, engɔ ndèerè amɔ é ngo gamma ebe bwɔngwa mɔ bɔ Israel. 24Engɔ à zɔ gho Ejip deʼ nyii gho Israel deʼ, engɔ ngɔɔ é kpèdè gho Israel wɛ. Engɔ à gii àflà zhudu gho Ejip wɛ. 25Engɔ à zhuŋu kpe bɔ mbe ba ngo nɛɛ kpe Ngwe yà le mbè chi angɔ efwɔ ǹgoʼ. Bɛʼngɛ angɔ à ke nɛɛ bo. 26À tam enchwe aŋu, Mose zɔ bɔ Israel fyee e ma ngwè, engɔ twaʼra amɔ é le m̀bwarambwad abu angɔ ga kpe, “Anɔm, mbɔn zhuru, mbɔn na bwɔngwa, mbɔn na ngwe énde kpe ayɛ?” 27Bɛʼngɛ egho ngɔ wɛ à ma nyìi egho we ngɛ bɛʼɛ Mose sàa abɛɛ bi, biiri ebe engɔ kpe, “Awɛ ge awɛ kpe ngwo sa kɔʼ gɛ̀rɛ̀ sa sɛ̀ʼɛ angbɛɛ? 28Ngwo wa ke zhudu angu na ngwo à zhudu gho Ejip wunde êwɛ̀ ngɛ?” 29Èndzobo chɛ Mose à zo ebwa wunɔ ngɛ, engɔ dɔrɔ abɛ Ejip ngɔ̀ɔ tsɔmɔ abɛ Midyan. Engɔ à tsɔmɔ aŋu, nu aye be bwɔanɔm fyee. 30Aŋu enɔ̂m èsama fyee à shi fɔɔ ngɛ, angere deʼ bum ebe Mose efwɔ akwânked. Ewunɔ à gli ene afwɔ deʼ yɛ éwu à ma bɛ̀rɛ ene êtùʼ deʼ ngɛ. Afwɔ zɔnɔ à ne ebara egu Sinay. 31Mose à kɔ̂n ene ebwa wɛ engɔ à zɔ ngɛ gɛ̀rɛ̀ tini ngɔ̀ɔ ebara ǹgɛ̀ yɛ é le kpe mbè zɔ anchwɔnchwɔ, éngɛ engɔ zo etsoʼ Masakɛ è ga kpe, 32“Mmɛ na Ngwe ètɛ sam mbyɛ, Ngwe Abraham, Ayzik mane Yakɔb.” Ekwa Mose à fe, engɔ sa bumu gɛ̀rɛ̀ ne wu kɔʼ bo. 33Éngɛ Masakɛ gâ ebe Mose kpe, “Ngà chidi ebla nchɛ mbɔʼnga afwɔ yɛ ngwo me tama ngɛ na afwɔ pɛ. 34Mmɛ shi zɔ ǹgoʼ yɛ bɔ mbu ma zɔ abɛ Ejip ngɛ. Mmɛ shi zo eku̧u angɔ gɛ̀rɛ̀ shi kla zeʼe a chwâ é chi angɔ efwɔ. Enjitsɔ ngà zeʼ, mmɛ wa tɔmɔ awɛ abɛ Ejip.” 35Mose ne egho wɛ bɔ Israel â tɔn gɛ̀rɛ̀ sa biiri ebe engɔ kpe, “Awɛ ge awɛ kpe sa kɔʼ gɛ̀rɛ̀ sa sɛ̀ʼɛ angbɛɛ?” Engɔ ne egho ŋwaʼ wɛ Ngwe à tɔm kpe engɔ kɔʼɔ gɛ̀rɛ̀ chi abɔ byɛ efwɔ ǹgoʼ nyɛ̀rɛ̀ zèʼe ene angere wɛ à bum ebe engɔ efwɔ êtùʼ fyɛ à ma fe ngɛ. 36Mose à chi bɔ Israel abɛ Ejip. Engɔ à le enɛ̂ abwa mane abwa zodo zodo akɛkɛ efwɔ abɛ Ejip mane ebɔrɔndim Rɛd. Engɔ à gɛrɛ fɔɔ embè é le abwa zɔnɔ efwɔ enɔ̂m èsama fyee aŋu angɔ à mwɔ efwɔ akwâ ńked ngɛ. 37Mose ne egho wɛ à ga ebe bɔ Israel kpe, “Ngwe yà sàa àmɛnɛkɔn endɔn nkirinkin na aŋu à saa angu nɔ. Àmɛnɛkɔn wɛ gɛrɛ wa ngo mwɔ gho bi abwaʼ ndzɔn.” 38Na Mose ŋwaʼ wunɔ wɛ à mwɔ nè bɔ Israel efwɔ ebɔrɔńked ngɛ. Engɔ à na aŋu nè ètɛ sam bɔ èndzobo chɛ Ngwe à sàa ekɔn nyɛ̀rɛ̀ zèʼe ebe angere edɔm egu Sinay ngɛ. Ne ekɔn etyê ŋwaʼ wɛ Mose à nu ebe angere ngɛ wu ntsɔ ma kìrì ànchwɔ̀ nɔ. 39Bɛʼngɛ ètɛ sam bɔ â tɔn é zo engɔ. Â tiri engɔ sàa abɛɛ bi gɛ̀rɛ̀ zhùŋù kpe shi mbɔɔ wu kɔ̀ɔ engɔ sàa achim abɛ Ejip. 40Éngɛ angɔ ga ebe Arɔn kpe, “Ngà ndeere ngwere deʼ endyɛɛ shi e sa gbèe angbɛɛ. Mbyɛɛ ke nɛɛ ebwa wɛ e me gli nè egho wɛ e ma kpe na Mose, wɛ à chi abɔ gbee gli efwɔ abɛ Ejip ngɛ bo.” 41Na aŋu, wɛ angɔ à ndeere ngwe bli yɛ a mwɔ na ŋwɔ m̀pwɔ̀ nɔ, sa twɔ̀n ela à tɔ̧ɔrɔ anyi, gɛ̀rɛ̀ kɛʼ antara é sa gɛnɛ àmɔ̀ kpe mbɔɔ shi ndeere ngwe ndzɔɔ ene ebwo mbɔɔ. 42Éngɛ Ngwe ghɛɛbɛ efàarà mɔ ebe angɔ gɛ̀rɛ̀ ndɛ̀ʼ afwɔ ebe angɔ é sa ghɔ ela byɛ e mwɔ ezob ngɛ, na aŋu bèmpwɔnɔntɔm â shi ŋwɛʼrɛ kpe

“Bɔ Israel! Mbɔn à ke ma kɛmɛ nyɛmɛrɛ ma tɔ̧ɔrɔ ma ghɔ angu anyi efwɔ enɔ̂m èsama fyee akwâ ńked bo?

43Mbɔn à ne beʼe ma ankpɛʼ Ngwe yɛ â ma zɔʼrɔ kpe Molɛk mane

azhi Refàn yɛ à mwɔ ngwe etɔrɔta ndzɔn ngɛ na angɔ mbɔn à ma zɔ ngɛ.

Ne èngwere bli chɛ mbɔn à me ndeere ene ebwo mbɔn ma ghɔ ngɛ.

Éngɛ mmɛ wa ngo bɛ̀ʼrɛ̀ angɔn na àgɔn nɔ, sàa angɔn ezhin dɔɔdɔɔ ese, e fɔɔ ebɛ Babilɔn.”

44Stefin wu ga kpe, “Èndzobo chɛ ètɛ sam bɔ â mwɔ akwâ ńked ngɛ, â ne le ankpɛʼ wɛ à ma tee kpe Ngwe ya abwaʼ angɔ ngɛ. Â ne ndeere aŋu Ngwe à toʼro ebe Mose kpe engɔ byɛ ngɛ. Â ne ndeere ene ezɔɔrɔ yɛ Ngwe à shi tee ebe Mose ngɛ. 45Endzobo deʼ à fɔɔ, ètɛ sam bɔ enji Yashwa nu ankpɛʼ wɛ angɔ à nu ebe ètɛ àmɔ̀ ngɛ zhiri nè engɔ bwɛn ene chwâ yɛ Ngwe à shi dye gà kpe mbè wa fli ebɛ byɛ e mwɔ aŋu ngɛ. Ankpɛʼ wɛ à tsɔmɔ ene afwɔ chwâ yɛ bwɛn efwɔ endzobo m̀fɔ̀ Devid. 46Ngwe à tee enarataa mɔ ebe Devid, Devid bii engɔ kpe e shi engɔ byɛ afwɔ tsɔmɔ ebe Ngwe Yakɔb. 47Bɛʼngɛ à na Saramu à byɛ ndɔngwe ebe engɔ. 48Ka Saramu de me byɛ ndɔ zɔnɔ, Ngwe Angwanìm ke ma mwɔ efwɔ ndɔ yɛ e me byɛ ene ebwo ngɛ bo. Na aŋu àmɛnɛkɔn Ngwe à shi ga kpe 49Ngwe gâ kpe

‘Atan m̀fɔ̀ ndza ye ekere,

chwâ ma atan tɛʼ elo mbu.

Na m̀pè ndɔ ze mbɔn me né byɛ ena ngà?

Afwɔ yɛ mmɛ me nɛɛ tye mmɛ tsɔmɔ aŋu ku̧ru ngɛ aze de?

50Ke mwɔ mmɛ mɔmbwo à ndeere ela bɔnɔ gimkpaʼ bo?’ ”

51Stefin fɔɔ embè e gà kpe, “Mbɔn shi na le kèzobwa énde ngɛ kpe ayɛ? Ńtara ntsɔn ne kama nɔ ene? Ètimi mbɔn ne koo ene ega Ngwe nɔ ene? Mbɔn gɛrɛ sa fɛ̀ɛrɛ nè azhwɛɛrɛ pɛ ne ètɛ sam mbɔn à le nɔ? 52Àmɛnɛkɔn Ngwe deʼ à shi zeʼe ètɛ sam mbɔn tɔn engɔ ke nyii? Angɔ à zhudu bàmɛnɛkɔn Ngwe byɛ â ga efwɔ endzobo achim mbɔʼ e zeʼe gho afwɛʼ wɛ à ma le abwa a me koʼro efàarà Ngwe ngɛ. Enjitsɔ mbɔn shi fɛrɛ gɛ̀rɛ̀ zhudu engɔ. 53Na mbɔn à nu etsɛrɛ Ngwe nyɛ̀rɛ̀ zèʼe ebe angere. Bɛʼngɛ mbɔn gɛrɛ ke ma shi etsɛrɛ yɛ bo.”

Aŋu â timmi Stefin ene atye ngɛ

54Bɔ efwɔ ndɔ m̀pàrà â zhuru aŋu Stefin à ma gà ngɛ. Angɔ bɔɔ etaa sa wu̧ru engɔ gɛ̀rɛ̀ sa kwo ashwɔ àmɔ̀ ene eboo. 55Bɛʼngɛ Stefin wɛ azhwɛɛrɛ pɛ à me shwe ekwa ngɔ ngɛ kɔʼ ekere gɛ̀rɛ̀ zɔ enɛŋɛrɛkɛ Ngwe, gɛ̀rɛ̀ zɔ Yeso me tsɔmɔ abɛɛ abwo nde Ngwe. 56Stefin gâ kpe, “Kɔʼɔ! Mmɛ zɔ ezob fuʼ, Ŋwɔ Gho me tsɔmɔ abɛɛ abwo anɔm Ngwe.” 57Abɔ byɛ â mwɔ efwɔ ndɔ m̀pàrà ngɛ flaba akwâ kuu, koo ètimi àmɔ̀ ene ebwo àmɔ̀. Éngɛ angɔ bɔ gimkpaʼ dɔrɔ ekyɛ ŋwaʼ ngɔ̀ɔ ebara ngɔ. 58Angɔ chi engɔ efwɔ abɛ ndwa ese gɛ̀rɛ̀ timmi engɔ ene atye. Entsɛ byɛ â shi ǹdiri àmɔ̀ ebe eghobo deʼ wɛ ekumu ngɔ à ma Saalo ngɛ kpe è sa kɔʼɔ. 59Angɔ à fɔɔ embè ma timmi Stefin ene atye aŋu engɔ à ma ndɛʼ atsaʼra ebe Masakɛ ga kpe, “Masakɛ Yeso ngu, nu azhwɛɛrɛ ndza.” 60Stefin gunu etongu mɔ a chwâ gɛ̀rɛ̀ flaba ku̧u ene etsoʼ kɛkɛ ga kpe, “Masakɛ! Ngà dzɛd ebwa bɔɔbɔɔ wunɔ angɔ a le nɔ!” Stefin ga énde gɛ̀rɛ̀ ku. Saalo gɛ̀rɛ̀ bɛ̀rɛ kpe â zhudu engɔ.

Currently Selected:

Eleabwa 7: nbt

Highlight

Copy