Eleabwa 6

Â chidi bɔ sàambyɛ é gɛ̀bbɛ̀ ela

1Antiri endzobo deʼ à fɔɔ, nuru bɔ bɛɛrɛ abwa zhiiri, àzhwɔ̀ gli abwaʼ bɔ Juu mane abɔ Juu byɛ â ma ga atsoʼ Grik ngɛ. Abɔ Juu byɛ â ma gà atsoʼ Grik ngɛ gâ kpe e ba bɛ̀ʼrɛ̀ ayeti mbɔɔ aŋu e ma gɛ̀bbɛ̀ ela efwɔ anji ngɛ. 2Éngɛ bèmpwɔnɔntɔm wum ǹchwɔ̀ fyee byɛ zɔʼ abɔ byɛ â me bɛrɛ ene Ngwe ngɛ afwɔbi, gà ebe angɔ kpe, “E ke me nara kpe mbyɛɛ waʼ ega Ngwe nê sɛ̀ɛrɛ̀ sa nyiimi endzobo à gɛ̀bbɛ̀ ma ande bo. 3Éngɛ bwɔngwa, mbɔn chidi bɔ sàambyɛ deʼ abwaʼ ndzɔn, byɛ azhwɛɛrɛ pɛ me shwe akwa angɔ, angɔ gɛrɛ me le azɔm ngɛ, shi mbyɛɛ ge angɔ ene afwɔ zɔnɔ, e sa gɛ̀bbɛ̀ ande. 4Mbyɛɛ mbwo ba ngo nu endzobo é tsàʼrà Ngwe gɛ̀rɛ̀ sɛ̀ɛrɛ̀ ega Ngwe.” 5Abɔ byɛ â gɛnɛ àmɔ̀ ghɛʼ ene ebwa wɛ bèmpwɔnɔntɔm â ga ngɛ. Angɔ à chidi Stefin wɛ azhwɛɛrɛ pɛ à me shwe ekwa ngɔ, è gɛrɛ me le ebɛrɛtaa ngɛ, Firiboʼ, Prokoros, Nikano, Timon, Parmɛnas mane Nikolas wɛ à mwɔ gho ebɛbɔ wɛ à me zeʼe abɛ Antyɔk gɛrɛ shi bɛrɛ ene ebwa Ngwe bɔ Juu ngɛ. 6Èndzobo chɛ â chidi angɔ ngɛ, bèmpwɔnɔntɔm byɛ tsaʼra Ngwe ene angɔ gɛ̀rɛ̀ tɛʼ ebwo àmɔ̀ ato angɔ. 7Éngɛ ega Ngwe sa ngɔ̀ɔ embè embè. Abɔ byɛ â me bɛrɛ Ngwe ngɛ sa ghɛʼghɛʼ a Jerusalɛm. Ètɛ zhiri akɛkɛ klada sa zhuru ega Ngwe wɛ.

Aŋu â bere Stefin ngɛ

8Stefin à na gho deʼ wɛ Ngwe à me ndɛʼ m̀bɔ̀nɔ ebe engɔ ghɛʼ ngɛ. Engɔ à ne le ekama ma fwɛʼ enɛ̂ abwa mane abwa zodo zodo abwaʼ bɔ. 9Bɛʼngɛ abɔ â mwɔ efwɔ ndɔ bɛ̀ɛrɛ abwa byɛ â ma zɔʼrɔ angɔ kpe, “Abɔ byɛ e shi pwèere àmɔ̀ ngɛ” â na fɛ̀ɛrɛ nè Stefin. Abɔ bɔnɔ â na zeʼe efwɔ abɛ Juu, Sirɛn mane Alɛkzandrya. Angɔ mane abɔ Juu byɛ â me zeʼe efwɔ ebɛɛ abɛ Silisya mane Esya ngɛ klada sa fɛ̀ɛrɛ nè Stefin. 10Bɛʼngɛ Ngwe le Stefin le azɔm, azhwɛɛrɛ Ngwe le kpe angɔ ne me né fɛɛrɛ fɔɔ engɔ èndzobo chɛ engɔ ma ga ngɛ bo 11Éngɛ angɔ ngɔɔ ndɛ̀ʼ ekɛb ebe bɔ deʼ kpe e zeʼ bɛrɛ antsɛ andɔɔ ma gà kpe, “Mbyɛɛ à zo egho wunɔ ma gà abwa enji Mose mane Ngwe.” 12Ene aghɛʼ zɔnɔ angɔ à buguru eto bɔ, bɔ tɛbɛ mane bàtee atsɛrɛ. Angɔ bere Stefin ngɔ̀ɔ efwɔ ndɔ m̀pàrà. 13Éngɛ angɔ bwɛ bɔ deʼ zeʼe kpe e bɛrɛ antsɛ andɔɔ ato Stefin kpe, “Egho wunɔ wa bwò à ga andɔɔ mbɔʼ ndɔngwe kɛ̀ yɛ me pɛ ngɛ mane atsɛrɛ Mose. 14Mbyɛɛ à shi zo gho wunɔ ma gà kpe Yeso wɛ me zeʼe a Nazarɛd ngɛ wa ngo tsɔŋɔ ndɔngwe kɛ̀ gɛ̀rɛ̀ kobo eleabwa yɛ Ngwe à ndɛʼ ebe bɔ zeʼe achim Mose ngɛ!” 15Abɔ byɛ â me tsɔmɔ efwɔ ndɔ m̀pàrà ngɛ nɔm aghɔɔ ekwa Stefin, e zɔ kpe efàarà ngɔ à ne mwɔ ne engɔ angere nɔ.

Currently Selected:

Eleabwa 6: nbt

Highlight

Copy