Eleabwa 16

Timatyɛ buumu Paalo mane Saylas

1Paalo à ngɔɔ efwɔ ebɛ Dɛɛb mane Listra. Gho bɛ̀ɛrɛ abwa deʼ à na tsɔmɔ aŋu ekumu ngɔ ma Timatyɛ. Abli mɔ à na aye Juu me bɛrɛ ene Kristo. Bɛʼngɛ àtɛ mɔ à na gho Grik. 2Bɔ kristo gimkpaʼ efwɔ abɛ Listra mane abɛ Ikoniyɔm â na gà abwa ǹchwɔ̀ mbɔʼ Timatyɛ. 3Paalo à na ke zhiri nè Timatyɛ, éngɛ Paalo ndèe engɔ mbɔʼnga bɔ Juu gimkpaʼ byɛ â ma tsɔmɔ efwɔ akwâ zɔnɔ ngɛ â ne nɛɛ kpe àtɛ Timatyɛ na gho Grik. 4Aŋu angɔ à ma zhiri à fɔɔ efwɔ entiri ebɛ bɔnɔ ngɛ, angɔ à na tòʼrò etsɛrɛ yɛ bèmpwɔnɔntɔm mane eto efwɔ abɛ Jerusalɛm â shi nu ngɛ ebe bɔ Ngwe, gɛ̀rɛ̀ gà ebe angɔ kpe e sa shi atsɛrɛ zɔnɔ. 5Éngɛ angɔ à le ndɔrɔngwe me kama ene ebɛrɛtaa, nuru bɔ gɛrɛ ma tɛ̀bɛ enji gimkpaʼ.

Paalo le nklama nchi abɛ Troas

6Angɔ à zhiri fɔɔ efwɔ ebɛɛ ebɛ Frigya mane Galasha mbɔʼnga azhwɛɛrɛ pɛ à ke le kpe angɔ sɛɛrɛ ekɔn ǹchwɔ̀ efwɔ abɛɛ abɛ Esya bo. 7Èndzobo chɛ angɔ à bwɛn ene ànglɔ̀ ene abɛɛ abɛ Misya ngɛ, angɔ à na kpe mbɔɔ ngɔɔ efwɔ abɛɛ abɛ Bitinya, bɛʼngɛ azhwɛɛrɛ Yeso ne ke saara angɔ bo. 8Éngɛ angɔ nu ǹjì sa ngɔ̀ɔ ngɔɔ efwɔ abɛɛ abɛ Misya gɛ̀rɛ̀ kla ngɔɔ efwɔ antiri abɛ Troas. 9Ǹklì anji yɛ, nklama le Paalo ma tee kpe engɔ a zɔ gho Masedonya deʼ me tama ma bii engɔ kpe, “Zeʼ efwɔ abɛ Masedonya è kpede angbɛɛ.” 10Aŋu Paalo à zɔ azhi ebwa zɔnɔ ngɛ, mbyɛɛ ndeere angbɛɛ ngɔɔ abɛ Masedonya mbɔʼnga mbyɛɛ à shi nu etsɛrɛ kpe Ngwe a shi zɔʼɔ angbɛɛ é sɛ̀ɛrɛ̀ ekɔn ǹchwɔ̀ ebe abɔ byɛ e mwɔ aŋu ngɛ.

Aŋu Lidya aye Filipi à bɛrɛ ebwa Ngwe ngɛ

11Mbyɛɛ à nyɛn efwɔ àwùundim abɛ Troas gɛ̀rɛ̀ kpɛ̀n ngɔɔ abɛ Samotrɛs, gɛ̀rɛ̀ tam enchwe aŋu ngɔɔ abɛ Neyapolis. 12Mbyɛɛ nyɛn aŋu ngɔɔ efwɔ abɛ Filipi, antiri abɛ kɛ efwɔ abɛ Masedonya. Afwɔ zɔnɔ na afwɔ yɛ a mwɔ enji abɛ Rom ngɛ. Mbyɛɛ tsɔmɔ aŋu efwɔ enji akɛkɛ. 13À shi anji ku̧ru bɔ Juu, mbyɛɛ gli efwɔ abɛ ngɔɔ ewee eji deʼ wɛ mbyɛɛ à ma zhuŋu kpe bɔ Juu be né me le afwɔ deʼ ma shùnu à tsaʼra Ngwe aŋu ngɛ. Mbyɛɛ tsɔmɔ a chwâ gɛ̀rɛ̀ gà ebe âye deʼ byɛ â mwɔ aŋu ngɛ. 14Gho bi abwaʼ âye byɛ â ma zhuru endyɛɛ ngɛ à na Lidya wɛ à me zeʼe abɛ deʼ yɛ â ma zɔʼrɔ kpe Taytira ngɛ. Aye wunɔ à na fɛ̀nnɛ ǹdiri, gɛ̀rɛ̀ mwɔ aye deʼ wɛ à ma ghɔ Ngwe ngɛ. Masakɛ fuʼ etaa ngɔ kpe shi engɔ tɛʼ ètimi mɔ è zhuru ebwa wɛ Paalo à ma ga ngɛ. 15Èndzobo chɛ engɔ à nu ndim nè ekla mɔ ngɛ, engɔ zɔʼ angbɛɛ gà kpe, “Mbɔn zeʼ tsɔmɔ a ndɔ mbu na aŋu mbɔn shi kɛʼ kpe mmɛ mwɔ gho kristo éŋwaʼa ebe Masakɛ ngɛ.” Éngɛ engɔ bii angbɛɛ mbyɛɛ ngɔɔ.

Paalo mane Saylas efwɔ ndɔdzɔm

16Aŋu mbyɛɛ à sa ngɔ̀ɔ afwɔ tsaʼra Ngwe ngɛ, mbyɛɛ sɔ nè èdzob deʼ wɛ à mwɔ ŋwɔaye wɛ à me le azhwɛɛrɛ bɔɔbɔɔ ngɛ. Azhwɛɛrɛ bɔɔbɔɔ zɔnɔ à na le engɔ ma tòʼrò abwa yɛ a ma ngo gli ngɛ. Engɔ a na le masa mɔ ma le ekɛb eghɛʼ nyɛ̀rɛ̀ zèʼe ene abwa zɔnɔ. 17Èdzob wunɔ à kiri Paalo nè mbyɛɛ ma flaba gà kpe, “Anɔm bɔnɔ na bɔ afwɛʼ ebe Ngwe yɛ mwɔ ekere àkɛ ngɛ! Angɔ ba tòʼrò ebwa wɛ bɔ me né le e yà nde etyê Ngwe ngɛ.” 18Èdzob wunɔ à le énde efwɔ enji akɛkɛ karadidi etaa Paalo twa ghɛʼ. Paalo ghɛɛbɛ amɔ gɛ̀rɛ̀ gà ebe azhwɛɛrɛ yɛ kpe, “Ene ekama Yeso Kristo mmɛ gâ engɛ̂ kpe gli ekwa ngɔ.” Azhwɛɛrɛ bɔɔbɔɔ yɛ gli ekwa ngɔ ekyɛ ŋwaʼ.

19Èndzobo chɛ masa ngɔ à nɛɛ kpe afwɔ le ekɛb ndzɔɔ shi bɔɔ ngɛ, angɔ bere Paalo mane Saylas nu angɔ ngɔ̀ɔ ebe eto ati ewu̧. 20Â bwɛ angɔ ngɔɔ efàarà eto abɛ Rom gɛ̀rɛ̀ gà kpe, “Anɔm bɔnɔ na bɔ Juu, e gɛrɛ ma ke é buguru abwa efwɔ abɛ kɛ bɔ. Angɔ ba tee ezɔɔrɔ deʼ yɛ etsɛrɛ bɔ, ntsɔ na bɔ Rom nɔ, ne me ke bo ngɛ! 21Mbyɛɛ na bɔ Rom, mbyɛɛ ke né bɛrɛ kà é bɛɛrɛ abwa zɔnɔ bo. Etsɛrɛ njɛɛ ke me tee éngɛ bo.” 22Ebaŋabɔ à buumu àmɔ̀ nè angɔ é bere Paalo mane Saylas. Eto efwɔ abɛ Rom â panna ǹdiri Paalo mane Saylas gɛrɛ ndɛʼ etsɛrɛ kpe e wuru angɔ. 23Èndzobo chɛ â shi wuru angɔ anchwɔnchwɔ ngɛ, e ndwa angɔ efwɔ ndɔdzɔm, gɛ̀rɛ̀ ndɛʼ etsɛrɛ ebe egho wɛ à ma kɔʼ ndɔdzɔm ngɛ kpe è gwɔbɔ fɛ̀ɛrɛ anduʼndɔ anchwɔnchwɔ. 24Egho wɛ à ma kɔʼ ndɔdzɔm ngɛ à nu etsɛrɛ yɛ gɛ̀rɛ̀ ndwa angɔ efwɔ atwɔndɔ yɛ à me nyii ngɔɔ efwɔ ghɛʼ ngɛ. Engɔ à koro elo angɔ aghɛɛghɛɛ èngwara awa deʼ 25À shi aghɛɛghɛɛ ǹklì, Paalo mane Saylas ma tsàʼrà Ngwe gɛ̀rɛ̀ ma kwɔrɔ atsa ebe Ngwe. Abɔ dzɔm abê ma zhuru ebe angɔ. 26Sa klikɔ̀ʼ, chwâ njiʼi ene aghɛʼ yɛ etirindɔ ene ndɔdzɔm à binni ngɛ. Ekyɛ ŋwaʼ anduʼndɔ gimkpaʼ fuʼ, dzɔmɔrɔ chɛ â me koro bɔ dzɔm anyi ngɛ tsɛddɛ. 27Èndzobo chɛ egho wɛ à ma kɔʼ ndɔdzɔm à tam zɔ anduʼndɔ gimkpaʼ me fuʼu ngɛ, engɔ zhuŋu kpe bɔ dzɔm shi dɔrɔ. Éngɛ engɔ chwaʼ ebyeŋwɔ̀ mɔ kpe mbè zhudu angbe mbè mbwo. 28Bɛʼngɛ Paalo flaba akwâ ene etsoʼ mɔ gimkpaʼ ga kpe, “Ke ge abyɛ ekwa ngwɛ bo. Mbyɛɛ bɔ gimkpaʼ ba anɔ.” 29Àkɔʼ ndɔdzɔm wɛ zɔʼ kpe e zeʼ nè ekɛʼɛ. E nu ekɛʼɛ zeʼe, e dɔrɔ go a chwâ elo Paalo mane Saylas angɔ ekwa sa biri klìklìklì. 30Éngɛ engɔ bwɛ angɔ ngɔɔ ese biiri kpe, “Èmasa, ne ebwa wɛ mmɛ me né le shi e pweere angu?” 31Angɔ gíì kpe, “Ngà le ebɛrɛ ene Masakɛ Yeso shi è wa ngo pwèerè awɛ mane ekla ngwɛ.” 32Éngɛ angɔ sɛɛrɛ ega Masakɛ ebe engɔ mane bɔ gimkpaʼ byɛ â mwɔ efwɔ ndɔ ngɔ ngɛ. 33Efwɔ antiri endzobo yɛ, ǹklì anji yɛ, egho wɛ à ma kɔʼ ndɔdzɔm ngɛ bwɛ angɔ ngɔ̀ɔ sɔ ebyɛ angɔ. Engɔ mane ekla mɔ gimkpaʼ â nu ndim ekyɛ ŋwaʼ. 34Engɔ à nu Paalo mane Saylas kwaʼ ngɔɔ a ndɔ mɔ ndɛʼ ende deʼ kpe angɔ nde. Egɛnɛ à shwe ekwa ngɔ mane ekla mɔ mbɔʼnga angɔ à bɛrɛ ene Ngwe.

35À tam enchwe aŋu, eto efwɔ abɛ Rom saa bɔ ǹtàm ara fan ebe àkɔʼ akwâ a ndɔdzɔm, ndɛʼ etsɛrɛ ebe engɔ kpe, “E saara anɔm byɛ shi e ngɔɔ.” 36Éngɛ egho wɛ à ma kɔʼ bɔ a ndɔdzɔm ngɛ gâ ebe Paalo kpe, “Eto efwɔ abɛ a shi ndɛʼ etsɛrɛ kpe e zɛɛrɛ awɛ mane Saylas saa. Mbɔn be né nyɛn enjitsɔ sa ngɔɔ ene m̀bwarambwad.” 37Bɛʼngɛ Paalo gíì ebe abɔ ǹtàm ara fan byɛ kpe, “Mbyɛɛ à ke go ebwa deʼ bo, e wuru angbɛɛ aghɛɛghɛɛ bɔ. Mbyɛɛ gɛrɛ mwɔ bɔ Rom, e ge angbɛɛ a ndɔdzɔm. Enjitsɔ angɔ ba ke é sàa angbɛɛ ese ene egeʼ. Keʼ, ke mwɔ éngɛ bo! Eto efwɔ abɛ Rom bara zeʼe anɔ àmɔ̀ àmɔ̀ shi chi angbɛɛ sàa ese.” 38Abɔ ǹtàm ara à ngɔɔ tòʼrò abwa zɔnɔ ebe eto efwɔ abɛ Rom. Éngɛ èndzobo chɛ angɔ à zo kpe Paalo mane Saylas na bɔ Rom ngɛ èklɔ̀ bere angɔ. 39Éngɛ eto byɛ ngɔɔ kla Paalo mane Saylas bii kpe angɔ dzɛrɛ abwa bɔɔbɔɔ ndzɔɔ. Â chi Paalo angɔ a ndɔdzɔm gɛ̀rɛ̀ ga kpe angɔ glini efwɔ abɛ yɛ. 40Paalo mane Saylas â nyɛn a ndɔdzɔm gɛ̀rɛ̀ ngɔɔ a ndɔ Lidya. Aŋu angɔ kla bwɔngwaanɔm mane bwɔngwaaye, twaʼra angɔ, gɛ̀rɛ̀ nyɛn ngɔɔ àmɔ̀.

Currently Selected:

Eleabwa 16: nbt

Highlight

Copy