Eleabwa 15

Eshunu wɛ a mwɔ a Jerusalɛm ngɛ

1Bɔ deʼ â nyɛn abɛɛ abɛ Judeya zeʼe abɛ Antyɔk, gɛ̀rɛ̀ klada sa tee bɔ kristo kpe, “Mala mbɔn ne ndee akwa ndzɔn aŋu etsɛrɛ Mose me ke ngɛ bo, shi e ke ma ngo pwèerè angɔn bo.” 2Paalo mane Banabas â klada sa fɛ̀ɛrɛ nè angɔ mbɔʼ ebwa wunɔ. Angɔ nu etsɛrɛ kpe Paalo, Banabas mane abɔ tsɛrɛ efwɔ abɛ Antyɔk ngɔɔ abɛ Jerusalɛm è zɔ bèmpwɔnɔntɔm mane eto mbɔʼ ebwa wunɔ. 3Angɔ à nyɛn sa ngɔ̀ɔ aŋu ndɔngwe à me saa angɔ ngɛ. Aŋu angɔ à fɔɔ ebɛɛ ebɛ Foenisya mane Samariya ngɛ, angɔ toʼro na aŋu ebɛbɔ a shi bɛrɛ ebwa Ngwe ngɛ. Ekɔn wunɔ le bɔ kristo gimkpaʼ sa gɛnɛ àmɔ̀. 4Èndzobo chɛ angɔ à nyii abɛ Jerusalɛm ngɛ, bɔ ndɔngwe, bèmpwɔnɔntɔm mane eto nu angɔ anchwɔnchwɔ. Angɔ sɛɛrɛ abwa gimkpaʼ yɛ Ngwe shi fwɛʼ zeʼe achim angɔ ngɛ ebe angɔ. 5Bɔ deʼ abwaʼ abɔ byɛ â me bɛrɛ ene Ngwe byɛ â mwɔ efwɔ ǹtìmi bɔ Farisii ngɛ tamma ekere gà kpe, “E we koʼro é ndèe ebɛbɔ gɛ̀rɛ̀ gà angɔ sa shi etsɛrɛ Mose.”

6Éngɛ bèmpwɔnɔntɔm mane eto sɔŋɔ afwɔbi, é kede ebiiri zɔnɔ. 7Aŋu angɔ à shi fɛɛrɛ efwɔ endzobo dɔɔdɔɔ ngɛ, Petoro tam ekere gɛ̀rɛ̀ gà kpe, “Bwɔngwa mbu, mbɔn be nɛɛ kpe efwɔ endzobo dɔɔdɔɔ, Ngwe à shi chi angu abwaʼ ndzɔn é sɛ̀ɛrɛ̀ ekɔn ǹchwɔ̀ ebe ebɛbɔ mbɔʼtye angɔ me né sa zo gɛ̀rɛ̀ le ebɛrɛ. 8Éngɛ Ngwe yɛ me nɛɛ etaa gho ŋwàʼaŋwàʼ ngɛ shi tee kpe mbè shi nu ebɛbɔ é ndɛʼ azhwɛɛrɛ ebe angɔ gɛrɛ na aŋu à ndɛʼ endyɛɛ ngɛ. 9Engɔ à ke ma toʼ awɛɛ ene ntsɔ mane angɔ bo. Engɔ à dzɛd abwa bɔɔbɔɔ angɔ mbɔʼnga angɔ à le ebɛrɛtaa. 10Éngɛ ayɛ me le mbɔn ma ke é kpèrè Ngwe nyɛ̀rɛ̀ zèʼe ene ediri yɛ mbɔn ma gè ekwa bɔ bɛɛrɛ abwa ngɛ? Ediri yɛ, ka de mwɔ ètɛ sam kà ntsɔ mɔmbwo ne me le ekama é beʼ bo ngɛ? 11Keʼ nɔ, mbyɛɛ be nɛɛ kpe e ba ngo pwèerè abɔ nyɛ̀rɛ̀ zeʼe achim enarataa Masakɛ bɔ Yeso Kristo. Ne nkirinkin aŋu e ma ngo pwèerè angɔ ngɛ.”

12Éngɛ ǹtìmi gimkpaʼ â ba tuuu aŋu angɔ à zo Banabas mane Paalo toʼro enɛ̂ abwa mane abwa zodo zodo gimkpaʼ yɛ Ngwe shi fwɛʼɛ ebe ebɛbɔ nyɛ̀rɛ̀ zèʼe achim angɔ ngɛ. 13Èndzobo chɛ angɔ à shi mɛ̀ɛrɛ gà ngɛ, Jems gâ kpe, “Bwɔngwaanɔm mbu, mbɔn zhuru ena! 14Shimun shi tòʼro aŋu Ngwe à shi dye tee edoʼ ebe ebɛbɔ nyɛ̀rɛ̀ zèʼe aŋu à chidi abɔ deʼ abwaʼ angɔ é mwɔ bɔ ngɔ ngɛ. 15Abwa yɛ bàmɛnɛkɔn â ga ngɛ a shi koʼokoʼo nè ebwa wunɔ. Aŋu e me ŋwɛʼrɛ efwɔ aŋwɛʼrɛ Ngwe kpe

16Masakɛ gâ kpe ‘Ebwa wunɔ fɔɔ mmɛ wa wu zeʼe achim

gɛ̀rɛ̀ ndèerè ebwa M̀fɔ̀ Devid wɛ à shi go ngɛ.

Mmɛ wa wu byɛ aŋu à shi ga ngɛ, gɛ̀rɛ̀ le shi e wu kam aŋu a me dye mwɔ ngɛ.

17Éngɛ abɔ abê gimkpaʼ efwɔ ese ba ngo zeʼ ena

ka de mwɔ ebɛbɔ gimkpaʼ byɛ e me bɛrɛ ene ekumu ngu ngɛ ba ngo mwɔ ma bɔ mbu, mmɛ Masakɛ mmɛ shi ga.

18Mmɛ ne egho wɛ à le e nɛɛ ebwa wunɔ bli egha tsɛrɛ ngɛ.’ ”

19Jems fɔɔ embè gà kpe, “Mmɛ sɛʼ tsɛrɛ kpe ntsɔ ke nyii ebɛbɔ byɛ â shi bɛrɛ ene Ngwe ngɛ bo. 20Ankɔmɔ engɛ̂, ntsɔ ŋwɛʼrɛ eŋwɛʼrɛ toʼro ebe angɔ kpe e ke nde ende deʼ wɛ e shi tɔ̧ɔrɔ ngwere bli anyi ngɛ bo. Angɔ ke wu le ebwa endese bo. Angɔ gɛrɛ ke nde nyɛm deʼ yɛ è me shwɛrɛ kà me le anɔm anyi ngɛ bo. 21Ntsɔ be nɛɛ kpe â shi tsoro zɔʼrɔ etsɛrɛ Mose efwɔ ndɔrɔ bɛɛrɛ abwa bɔ Juu efwɔ enji ku̧ru bɔ Juu. E gɛrɛ shi sɛɛrɛ ega ngɔ efwɔ ebɛ gimkpaʼ.”

Aŋwɛʼrɛ yɛ â saa ebe ebɛbɔ byɛ â me bɛrɛ ene Ngwe ngɛ

22Éngɛ bèmpwɔnɔntɔm mane eto buumu afwɔbi nè bɔ gimkpaʼ efwɔ ndɔngwe, è nu etsɛrɛ kpe e chidi anɔm deʼ efwɔ ǹtìmi yɛ, sàa angɔ nè Paalo mane Banabas abɛ Antyɔk. Angɔ à chidi anɔm fyee byɛ bɔ â ma ghɔ angɔ anchwɔnchwɔ ngɛ. Anɔm bɔnɔ â na Judas wɛ â ma zɔʼrɔ engɔ kpe Basabas ngɛ mane Saylas. 23Â gɛrɛ sàa aŋwɛʼrɛ zɔnɔ ebe angɔ me ŋwɛʼrɛ efwɔ kpe, “Mbyɛɛ bɔ kristo, bèmpwɔnɔntɔm mane eto, sàa atsaʼra ebe bwɔngwaanɔm mbyɛɛ byɛ e mwɔ ebɛbɔ, byɛ e ma tsɔmɔ efwɔ ebɛ Antyɔk, Sirya mane Silisya ngɛ. 24Mbyɛɛ shi zo kpe bɔ deʼ efwɔ ǹtìmi njɛɛ shi zeʼe nyii gɛ̀rɛ̀ sa buguru eto mbɔn ene abwa yɛ angɔ ma gà ngɛ. Bɛʼngɛ de ke ma mbyɛɛ a me saa angɔ bo. 25Éngɛ mbyɛɛ à sɔŋɔ afwɔbi, gɛ̀rɛ̀ bɛ̀rɛ chidi bɔntɔm deʼ saa endɔn. Angɔ ba zeʼe nè asɔrɔ njɛɛ Banabas mane Paalo. 26Angɔ na bɔ byɛ â shi ndɛʼ akwa àmɔ̀ ene afwɛʼ Masakɛ bɔ Yeso Kristo ngɛ. 27Éngɛ mbyɛɛ shi saa Judas mane Saylas endɔn. Angɔ ba ngo hli abwa éŋwaʼa yɛ mbyɛɛ me ŋwɛʼrɛ endɔn ngɛ na bɔ nɔ. 28E we nara endyɛɛ mane azhwɛɛrɛ pɛ kpe e ke ge ediri deʼ akwa ndzɔn yɛ a me fɔɔ ebwa wunɔ ngɛ bo kpe, 29‘Mbɔn ke nde ende deʼ wɛ à shi dye ndɛʼ na ala etɔ̧ɔrɔ ebe ngwere bli ngɛ bo. Mbɔn ke nde nyɛm deʼ yɛ e ne me kɛmɛ ngɛ bo. Mbɔn ke nde nyɛm deʼ yɛ è me shwɛrɛ ngɛ bo. Mbɔn gɛrɛ klini akwa ndzɔn ene ebwa endese. Mbyɛɛ bɔnɔ angɔn kpe mbɔn ba ngo zɔ ǹchwɔ̀, mala mbɔn nu azɔm ne fwɛʼ ebwa deʼ abwaʼ abwa zɔnɔ bo.’ ” 30Â saa àbɔntɔm bɔnɔ efwɔ abɛ Antyɔk, e gɛrɛ kla bɔ ndɔngwe gimkpaʼ ndɛʼ aŋwɛʼrɛ yɛ ebe angɔ. 31Èndzobo chɛ abɔ byɛ â zɔʼrɔ aŋwɛʼrɛ yɛ ngɛ, angɔ à gɛnɛ àmɔ̀ ene ekɔn wɛ a me saa ma twàʼrà angɔ anyi ngɛ. 32Judas mane Saylas byɛ â gɛrɛ mwɔ bàmɛnɛkɔn Ngwe ngɛ â ga efwɔ endzobo dɔɔdɔɔ nè angɔ, ma twàʼrà gɛ̀rɛ̀ ma ndɛʼ ekama ebe angɔ. 33Angɔ à tsɔmɔ efwɔ antiri endzobo deʼ nè abɔ byɛ. Bɔ Ngwe â gɛrɛ sàa angɔ ene m̀bwarambwad. Angɔ gɛrɛ ngɔ̀ɔ achim ebe abɔ byɛ â me tɔmɔ angɔ ngɛ. 34#15:34 Eŋwɛʼrɛ sam deʼ â zhiiri mpweʼ 34: Bɛʼngɛ Saylas à kɛʼ e nɔ aŋu. 35Paalo mane Banabas â tsɔmɔ efwɔ abɛ Antyɔk efwɔ endzobo deʼ mane abɔ tsɛrɛ akɛkɛ ma tee gɛ̀rɛ̀ ma sɛ̀ɛrɛ̀ ekɔn ǹchwɔ̀ Masakɛ.

Paalo sɛʼrɛ nè Banabas

36Endzobo deʼ à fɔɔ, Paalo gâ ebe Banabas kpe, “Ntsɔ wu ngɔɔ achim gɛ̀rɛ̀ gamma ebe bwɔngwaanɔm bɔ abê efwɔ akwâ gimkpaʼ byɛ ntsɔ à shi sɛɛrɛ ekɔn ǹchwɔ̀ Masakɛ aŋu ngɛ, gɛ̀rɛ̀ zɔ na aŋu angɔ ma ngɔɔ embè ngɛ.” 37Banabas à na ke é nu Eyɔɔ Mak é ngɔ̀ɔ nè angɔ. 38Bɛʼngɛ Paalo à ke me zhuŋu kpe e we koʼro é nu engɔ bo mbɔʼnga engɔ a shi dye waʼ angɔ efwɔ abɛ Pamfilya gɛ̀rɛ̀ ne mɛɛrɛ afwɛʼ bo. 39Efɛɛrɛ kamakam deʼ à gli aŋu, angɔ sɛʼrɛ. Banabas à nu Mak angɔ kpɛn ngɔɔ abɛ Sayprɔs. 40Paalo à nu Saylas wɛ bɔ Ngwe â shi chi gɛ̀rɛ̀ gà kpe enarataa Masakɛ mwɔ nè engɔ ngɛ. 41Angɔ à fɔɔ efwɔ ebɛ Sirya mane Silisya ma zhiri à twàʼrà ndɔrɔngwe.

Currently Selected:

Eleabwa 15: nbt

Highlight

Copy