Mag 8

Yeso ya jə bəd chuʼ tikwè

(Mat 15:32-39)

1À ya yaʼ anyumə̀ we, inɔ̰ bəd ne ya yaʼi kwàʼ ìwi kyen ya fete. Icheg ne chəyi mbi ya ywirì bèrì aghi mɔ̀ʼɔ ne tì mbi jəg, Yeso ya kàrì ìmbi mə̀mə̀nənùg aseg, ghà inɔb gha, 2“Mə we sɔ̀mnɔ̀ ako imbə̀ʼ inɔ̰ bəd gho̰ imbə̀ʼ icheg ne mbi fə chughi tì inum ineg itad. Ane, chəyi mbi ywirì bèrì aghi mɔ̀ʼɔ ne tì mbi jəg. 3Mə mə̀ chà awɔb achan njèg, nji mbi biri nə̀ŋə̀ gùg inɔnjì imbə̀ʼ icheg ne mbi mɔ̀ʼɔ abɔ̀ʼ inɔb nɔ̀ʼ ane agha ne taŋ sà.”

4Mə̀mə̀nənùg məd ya biri ibo gha, “Wə̀d kə anìŋ niŋ ngə̀ŋ mə̀kara aya inga ibad zɔbi aŋa ne biri kòʼ ni jə bəd mbo̰ məjìm?”

5Wì ya biri inɔb gha, “Mbə bèrì chiŋ ngə̀ŋ mə̀kara tisə̀ʼə?”

Mbi ya ywìtì gha, “Tì bèrì chiŋ ngə̀ŋ mə̀kara ìsàmbe.”

6Yeso ya zug ane ghà abə inɔ̰ bəd we gha mbe chughi aseg. Anyumə̀ ne mbi ya chughi aseg, wì ya niŋ chiŋ ngə̀ŋ mə̀kara te ìsàmbe, chàʼra Ŋwiye, bə̀ʼri, nàʼ abə ìmbi mə̀mə̀nənùg gha mbe ghapa abə bəd. Mbi ya niŋ ghàpì abə inɔ̰ bəd we. 7Mbi ya bə̀ bèrì àgweg kwa kwa mɔ̀ʼɔ iki piʼì. Anyumə̀ ne wì ya nàʼi məyakà abə Ŋwiye ane àgweg ze, wì ya bə̀ ghà gha mbe ghapa abə bəd. 8Mbi ya bə̀ ghàpì. Ane, wə̀d ijìm ya jəg kɔd. Mə̀mə̀nənùg mbe ya feti ibəʼri mbe ne ya bùʼi, mbi sweg mbì tìkaʼ ìsàmbe. 9À ya yaʼ icheg bəd chuʼ tikwè ne ya yaʼi angu. Anyumə̀ ne mbi ya fə jəghi mànì, wì ya ghà gha mbe si ghò awɔb. 10Kwàʼ ati ati, wì ya nɔ̀ʼ ghò nyi inga abaŋ igyi tì ìmbi mə̀mə̀nənùg, mbi ghò aba aben ze a Dàlmànutà.

Mə̀Farìsi ya ghà gha Yeso ghiyə ayeti anug

(Mat 12:38-42; 16:1-4)

11Anyumə̀ ne Yeso tì ìmbi mə̀mə̀nənùg ya yaʼi a Dàlmànutà, mə̀Farìsi mɔ̀ʼɔ ya ghò ko tàŋ inug tì məd. Mbi yaya kə̀bə̀ ni kwàʼrì aməd. Ane, mbi ya ghà ibo gha wì ghiyə ayeti anug ni chwi gha à ya Ŋwiye nàʼ ika ibo. 12Anug ze ya bètì fìŋ abə Yeso, wì zweg fə̀m, si ghà gha, “Ikəri bəd gho̰ kə kə̀bə̀ ayeti anug imbə̀ʼ aghə? Mə gha tesiʼ inən gha, chəyi mbi biri chwi ayeti anug mɔ̀ʼɔ inɔb.”

13Anyumə̀ ne wì ya gha ane, wì ya sàŋì mə̀Farìsi mbe ywìrì ghò nyi inga abaŋ igyi ze bàni ghò injḭ ìywin.

Yeso ya pati mə̀mə̀nənùg imbə̀ʼ àfòrì mə̀Farìsi tì àzi Erɔ̀d

(Mat 16:5-12)

14Anyumə̀ ne Mə̀mə̀nənùg ìmbi Yeso ya nyi inga abaŋ igyi ni ghò ijin ìywin, mbi ya nèbì ni niŋ ngə̀ŋ mə̀kara. Mbi ya bèrì məyi chiŋ ngə̀ŋ mə̀kara imɔʼ inga abaŋ ze. 15Ane, Yeso ya pàti awɔb gha, “Mbə̀ niŋ nyùmə̀, bə̀ we awən imbə̀ʼ àfòrì#8:15 Àfòrì ya tighi inug tibɔ̀ŋ mə̀Farìsi tì àzi Erɔ̀d.”

16Mbi ya ko se ghàmà mbɔb mbɔb gha, “Wì ya ghà anìŋ imbə̀ʼ icheg ne chəyi tì beri ngə̀ŋ mə̀kara.”

17Yeso ya kyeri anug ze ne mbi yaya ghà, ane, wì ya biri inɔb gha, “Aton ne mbə̰ mbe ghàmà gha chəyi mbə̀ beri ngə̀ŋ mə̀kara àkə gha? À wa kə chəyi iwe inən inga atog? Chəyi ìmbən itog bə kiri zḛ? Ìtən fìŋ wa fə bə̀ tu? 18Mbə̰ bèrì aghə, àkə chəyi mbə bàrà isiŋi? Mbə̰ bèrì ìtɔ̀ŋi, àkə chəyi mbə̰ mbe zùghə inug? Àkə chəyi mbə̀ ywirì kɔ̀ndi 19icheg ne mə̀ ya bəʼri chiŋ ngə̀ŋ mə̀kara te tita̰ abə bəd chuʼ tita̰? Mbə̰ ya feti ibəʼri mbe ne ya bùʼi, mbi sweg mbì tìkaʼ sə̀ʼə?”

Mbi ya ywìtì ibo gha, “Tì ya feti mbì tìkaʼ ìghum chɔ̀b ibe.”

20Wì ya bə̀ ywìrì bìri inɔb gha, “Anyumə̀ ne mə̀ ya bəʼri chiŋ ngə̀ŋ mə̀kara te ìsàmbe abə bəd chuʼ tikwè, mbə̰ ya feti ibəʼri mbe ne ya bùʼi, mbi sweg mbì tìkaʼ sə̀ʼə?”

Mbi ya ghà ibo gha, “Tì ya feti mbì tìkaʼ ìsàmbe.”

21Wì ya si bìri inɔb gha, “Ane, Àkə chəyi ìmbən itog kiri zḛ?”

Yeso ya ghù mbaŋà ne fə̀ghə a Bèsayidà

22Yeso tì ìmbi mə̀mə̀nənùg ya ghò a Bèsayidà. Anyumə̀ ne mbi ya yaʼi angu, bəd mɔ̀ʼɔ ya ghò abɔ̀ʼ məd tì mbaŋà mɔ̀ʼɔ ne ya fə̀ghə. Mbi ya pè boʼ ibo ibo gha wì bete mbaŋà ze ghù aməd. 23Yeso ya nyimi abo abə ifəg we, mbi dù inga asiŋi ze. Anyumə̀ ne wì ya fə fami timad inga aghə abə wə̀d we bə̀ nɔ̀ŋì ìmbi ibo igun məd, wì ya biri ibo gha, “Àghò we bàrà aghi mɔ̀ʼɔ?”

24Mbaŋà ze ya nɔ̀rì atog, si gha, “Mə we bàrà bəd ne yḛ̀, si ya gha, mbi ya icheg ized.” 25Yeso ya ywìrì bètì aghə abə mbaŋà ze. Anyumə̀ ne wì ya bètì ane, mbaŋà ze ya tɔ aghə nèn isiŋi. Ane, aghə məd ya zen, wì bàd ighi ijìm kwàʼ icheg chɔm.

26Yeso ya ghà ibo gha wì ghò yi ibo achan. Wì ya ghì ane ywìrì ghà ibo gha, “Imbə̀ʼ àghò nɔ̀ʼ ywìrì nyi inga Bèsayidà.”

Pità ya ghà wə̀d we ne Yeso yaʼi

(Mat 16:13-20; Lug 9:18-21)

27Yeso tì ìmbi mə̀mə̀nənùg ya nɔ̀ʼ ghò inga isiŋi mbe a Kàserìyà Fìlipì. Anyumə̀ ne mbi ya si inɔnjì, wì ya biri inɔb gha, “Bəd kə gha mo ya we?”

28Mbi ya ywìtì ibo gha, “Bəd mɔ̀ʼɔ mbe gha àghò ya Jɔn we ne yaya nàʼà mənib. Mbi ndəŋ mbe gha àghò ya Èlayijà. Mbi ndəŋ gha àghò ya wə̀d mɔ̀ʼɔ abɔ̀ʼ bədkə̀n Ŋwiye.”

29Wì ya biri inɔb gha, “À yaʼ awən, mbə̀ kə gha mo ya we?”

Pità ya ywìtì ibo gha, “Àghò ya Wə̀d we ne Ŋwiye zɔ̀ʼi.”

30Anyumə̀ ne Pità ya gha ane, wì ya si taŋ pàti awɔb gha imbə̀ʼ mbi nɔ̀ʼ gha awɔb anug ze imbə̀ʼ aməd abə wə̀d mɔ̀ʼɔ.

Yeso ya gha zìye biri zə̰ ngəʼ ku

(Mat 16:21-28; Lug 9:22-27)

31Yeso ya ko ni chwiti inug abə ìmbi mə̀mə̀nənùg gha, Ŋwan Wə̀d bèrì ni taŋ zə̰ ngəʼ, bəd kyen mbe inga aben tì itog bəd mbàn Ŋwiye tì mə̀chwitì mə̀nɔ̀ʼɔ̀ biri to̰ awɔb məd. Mbi biri zweti aməd. Igun aneg ne pè ane itad wì zwème ane iwu. 32Wì ya ghà azo̰ asaŋ asaŋ. Ane, Pità ya niŋ aməd mbi tindi ghò ane iban, pè ko ghàm kyen aməd gha imbə̀ʼ wì gha yi ane. 33Yeso ya ghabri nèn ìmbi mə̀mə̀nənùg si ghàm kyen abə Pità gha, “Àghò Sàtàn, che nɔ̀ʼ iban inum! Chəyi àghò nɔŋi ìwe ikɔndi igun ighi mbe ne Ŋwiye kə̀bi. Àghò nɔ̀ŋì yaʼ igun ighi mbe ne bəd kə̀bi.”

34Anyumə̀ ne wì ya gha ane, wì ya kàrì inɔ̰ bəd we bə̀ kàrì ìmbi mə̀mə̀nənùg abɔ̀ʼ məd, ghà inɔb gha, “Wə̀d mɔ̀ʼɔ mə̀ kə̀b ni beni abɔ̀ʼ inum, tengàŋ to̰ yi inug mbe ne nyàmnyɔd məd ze ghə̀ʼrə̀, si bèʼì àze azed abaʼri beni abɔ̀ʼ inum. 35À ya ane imbə̀ʼ icheg ne wə̀d ne kə̀bə̀ ni nɔ̀ŋì ìwi ìtḛ̀, tengàŋ biri sam ìtḛ̀ we. Àsi wə̀d ne sami ìwi ìtḛ̀ imbə̀ʼ ikən chɔm, tengàŋ biri ywiri jəg ìtḛ̀ we. 36Wə̀d kə mə̀ bèrì isəg gho̰ ijìm si sam ìwi ìtḛ̀, chùd ze ne tengàŋ biri jəg kə iza? 37Aghi ne tì wə̀d nàʼ ni ywirì bèrì ìwi ìtḛ̀ kə aghə? 38Atog abə wə̀d mɔ̀ʼɔ mə̀ ya nìrè imbə̀ʼ amə fɔrɔ imbə̀ʼ ìmə ìngam inga ikəri bəd gho̰ ne chəyi we ghùmnə Ŋwiye, ne we bə̀ ghìyə̀ yaʼ inug tibɔ̀ŋ, nji atog abə Ŋwan Wə̀d biri bə nìd imbə̀ʼ tengàŋ anyumə̀ we ne wì ywirì yèʼe tì ìmbi mbè angirə̀ ìzḛzḛ tì ika we ne Mbaʼ nàʼi ibo gha wì tumbə isəg.”

Currently Selected:

Mag 8: MBTP

Highlight

Copy