Mag 9

1Yeso ya ywìrì ghà abə ìmbi mə̀mə̀nənùg tì inɔ̰ bəd we gha, “Mə gha tesiʼ inən gha, chəyi bəd mɔ̀ʼɔ abɔ̀ʼ mbo̰ ne təmi aŋa biri ku ne chəyi mbi bari icheg ne Ŋwiye biri tùmbì bəd ane ìwi ika.”

Yeso ya bə̀ŋə̀ se jə̀ngi jəngi

(Mat 17:1-13; Lug 9:28-36)

2Anyumə̀ ne ineg ya chè tìfughə, Yeso ya niŋ Pità tì Jem fɔrɔ Jɔn mbi kɔʼ ghò ikaŋ iwum mɔ̀ʼɔ, asiŋi ne məyi mbɔb mbɔb ya yaʼi angu. Anyumə̀ ne mbi ya pè angu, nyàmnyɔd məd ya kɔpɔ inɔb imbìghè. 3Ndwi məd yaya se fùyə njàndi njandi, ne chəyi tì wə̀d mɔ̀ʼɔ igun isəg sò ti fu ane. 4Èlayijà tì Muse ya dù inɔb imbìghè. Mbɔb ya dù ane ko ghàm tì Yeso. 5Anyumə̀ ne Pità ya bàri ane, wì ya ghà abə Yeso gha, “Àchwitìnùg, ze bɔ̀ŋ icheg ne tì yaʼi aŋa. Tì biri kɔd izuŋ titad, izuŋ ifibì ine, izuŋ ifibì abə Muse, ìywin ifibì abə Èlayijà.” 6Chəyi wì ya kyeri anug ne wì yaya ghà. Si ya gha, wì ya ghà ane imbə̀ʼ icheg ne məd tì mə̀mə̀nənùg mbin məbe ya bɔ chè ati.

7Anyumə̀ we, Pàʼ mɔ̀ʼɔ ya kubri awɔb, gì mɔ̀ʼɔ si ghàm inga pàʼ ze gha, “Aŋa ya ìmə Ŋwan ne mə̀ taŋ kɔ̀ŋ. Mbə̀ zug anug ne we ghà!” 8Anyumə̀ ne mbi ya zughi gì ze, mbi ya kə ghàbri nèn, si ya gha, chəyi mbi ya ywirì bàd wə̀d mɔ̀ʼɔ, chèyi ane Yeso məd tèzìʼì.

9Anyumə̀ ne mbi yaya swìʼe ikaŋ iwum we, wì ya pati awɔb gha imbə̀ʼ mbi nɔ̀ʼ ghà anug ze ne mbi bari abə wə̀d mɔ̀ʼɔ, pè ane nyùmə̀ ne Ŋwan Wə̀d fə zweme ane iwu.

10Anug ze ya tèn məyi inɔb, si ya gha, mbi yaya bìre mbɔb mbɔb gha, “Ìngam we ne Yeso ya gha Ŋwan Wə̀d biri zweme ane iwu àkə gha?” 11Mbi ya bə̀ bìri abə Yeso gha, “Aton ne mə̀chwitì mə̀nɔ̀ʼɔ̀ gha Èlayijà bèrì ni bi yèʼe àkə imbə̀ʼ aghə?”

12Wì ya ywìtì inɔb gha, “Èlayijà bèrì ni bi yèʼe ni ywiri tangi inug ijìm icheg ne mbi ya ŋwàʼri. Aton ne mbi ŋwàʼri imbə̀ʼ Ŋwan Wə̀d gha wì biri zə̰ ngəʼ ni che ibo, mbi bə̀ ton aməd àkə gha? 13Mə ghà inən gha Èlayijà fə yèʼe, si ya gha, bəd mɔ̀ʼɔ ya ghì inug ibo icheg ne ze ya bɔ̀ŋi inɔb. Mbi ya ghì ane kwàʼ icheg ne mbi ya ŋwàʼri imbə̀ʼ Èlayijà.”

Yeso ya ghù Ŋwan mbaŋà mɔ̀ʼɔ ne azwighi tibɔ̀ŋ ya yaʼi inga məd

(Mat 17:14-21; Lug 9:37-43a)

14Anyumə̀ ne Yeso tì mə̀mə̀nənùg mbe ne ya yaʼi tì məd ya swiʼi ikaŋ iwum we ghò kɔ̀ti mbin tì mə̀mə̀nənùg, mbi ya bàd inɔ̰ bəd ne ya yaʼi kwàʼ ìwi kyen ne ya kad awɔb. Mbi ya bə̀ bàd mə̀chwitì mə̀nɔ̀ʼɔ̀ ne yaya tàŋà inug tì inɔb. 15Anyumə̀ ne inɔ̰ bəd we ijìm ya bàra Yeso, mbi ya yeti chè ati, ane nòrò ghò iban məd, pè chàʼrì aməd. 16Wì ya biri abə mə̀mə̀nənùg mbe gha, “Àkə aghə ne mbə̰ mbe tàŋà tì bəd mbo̰?”

17Mbaŋà mɔ̀ʼɔ inga inɔ̰ bəd we ya ywìtì ibo gha, “Àchwitìnùg, mə kə yèʼe ine tì ìmə Ŋwan mbaŋà ne azwighi tibɔ̀ŋ yaʼi inga məd. Azwighi tibɔ̀ŋ ze ya ghìyə̀ gha imbə̀ʼ wì ya ghàmà yi. 18Mà nyumə̀ ijìm ne azwighi tibɔ̀ŋ ze nyimi aməd, ze ya mèʼè məd aseg, mbìrìnjo se dùwə̀ ibo ichug, wì se kùrə asɔŋ, nyɔd məd ijìm se kà ka. Ane, mə kə̀ ghà abə ìmbe mə̀mə̀nənùg gha mbe kamni azwighi tibɔ̀ŋ ze chì. Si ya gha, chəyi tì mbi chì.”

19Yeso ya ghà inɔb gha, “Chəyi ikəri bəd gho̰ beri ibḛfiŋ! Mə kə anìŋ chughi tì inən ane agha ne sa iye? Mə kə anìŋ nyimi fìŋ tì inən ane agha ne sa iye? Mbə̀ niŋ aməd yèʼe nàʼ inum!” 20Mbi ya niŋ Ŋwan mbaŋà we ghò nàʼ ibo. Anyumə̀ ne azwighi tibɔ̀ŋ ze ya bàra Yeso, ze ya chìʼrì Ŋwan we kwàʼ ati. Ŋwan we ya gùg aseg, se bìngə, mbìrìnjo ko se dùwə̀ ibo ichug. 21Yeso ya biri abə mbaʼ Ŋwan mbaŋà we gha, “Agha fə sà iye ne aghɔn azo̰ yaʼ igun Ŋwan gho̰?”

Wì ya ywìtì ibo gha, “Ze ya ko anyumə̀ ne wì yaya kiri ŋwan bɔd. 22Ze ya mèʼè məd inga iywid bə̀ fɔrɔ inga mənib, ni zweti aməd. Àmə yaʼ aghi ne tì àghò ghì anug mɔ̀ʼɔ, taŋ dìgrì igun ina, wètì awa.”

23Yeso ya ghà ibo gha, “Àghò ghà gha, ‹Àmə yaʼ aghi ne tì mə ghì anug mɔ̀ʼɔ!› Kyeri gha chəyi anug mɔ̀ʼɔ ne tì ze chè wə̀d we ne beri ibḛfiŋ.”

24Kwàʼ ati ati, mbaʼ ŋwan we ya kyen ane ika gha, “Mə bḛ, si ya gha, àmə ibḛfiŋ bɔd. Wète amə ghì gha àmə ibḛfiŋ ka!”

25Anyumə̀ ne Yeso ya bàri icheg ne inɔ̰ bəd yaya nòtò yèʼe fète, wì ya ghàm kyen abə azwighi tibɔ̀ŋ ze gha, “Àghò azwighi ze ne ghìyə̀ gha imbə̀ʼ wə̀d ghàm yi bə̀ ghìyə̀ gha imbə̀ʼ wə̀d zug yi anug, che dù inga ŋwan mbaŋà gho̰. Imbə̀ʼ àghò nɔ̀ʼ ywiri nyi awe inga məd.”

26Anyumə̀ ne wì ya gha ane, azwighi tibɔ̀ŋ ze ya kyen, chìʼrì ŋwan mbaŋà we kwàʼ ane ika, chè dù. Ŋwan we ya si yaʼ aseg icheg awu wə̀d. Àze ya ghì bəd nɔʼ nɔʼ se gha, “Wì fə ku!” 27Si ya gha, Yeso ya nyimi abo məd, nɔ̀ aməd, wì nɔ̀ʼ təm titighe.

28Anyumə̀ ne Yeso ya ghò nyi inga nəb, mə̀mə̀nənùg məd ya biri ibo anjìm anjìm gha, “Aton ne ze kə ka ina ni kamni azwighi tibɔ̀ŋ ze chì àkə gha?”

29Wì ya ywìtì inɔb gha, “Chəyi tì mbə̰ chì iku azwighi gho̰ ane inɔnjì ndəŋ chèyi ane ichaʼri Ŋwiye.#9:29 Ìŋwàʼrì anun mɔ̀ʼɔ yètì gha, fɔrɔ ni chughi witì njèg. ”

Yeso ya bə̀ ywìrì ghàm imbə̀ʼ ìwi iwu

(Mat 17:22-23; Lug 9:43b-45)

30Yeso tì ìmbi mə̀mə̀nənùg ya nɔ̀ʼ ane asiŋi ze ghò chè a Galìli. Chəyi wì ya kə̀bi gha wə̀d mɔ̀ʼɔ kyeri asiŋi ne wì ya yaʼi angu. 31Wì ya ghì ane imbə̀ʼ icheg ne wì yaya chwìte inug abə ìmbi mə̀mə̀nənùg gha, “Mbi biri fèn Ŋwan Wə̀d abə bəd, mbi zweti aməd. Si ya gha, igun aneg ne pè ane itad, wì ywirì zwème ane iwu.” 32Chəyi ìmbɔb itog ya zḛ imbə̀ʼ anug ze ne wì yaya ghà. Mbi ya bə̀ bɔ ni biri ibo.

Wə̀d ne yaʼi wə̀d kyen inga anug ìfɔ̀n ikaŋ

(Mat 18:1-5; Lug 9:46-48)

33Yeso tì ìmbi mə̀mə̀nənùg ya ghò a Kàpenàwum. Anyumə̀ ne mbi ya fə se inga nəb, wì ya biri inɔb gha, “Anug ne mbə̰ mbe kə̀ tàŋa inɔnjì kə aghə?”

34Mbi ya chim tizi imbə̀ʼ icheg ne mbi yaya yḛ̀ nè sìmnè ìkyen. 35Wì ya chughi aseg, kàrì mə̀mə̀nənùg mbe ìghum chɔ̀b ibe, ghà inɔb gha, “Wə̀d mɔ̀ʼɔ mə̀ kə̀b ni yaʼ wə̀d mbègtog, wì bèrì bi yaʼ wə̀d ne si nwḭ̀yḛ̀, bə̀ yaʼ wə̀d ne fàʼà abə bəd məjìm.” 36Wì ya ghà ane, niŋ ŋwan kwa mɔ̀ʼɔ nɔ̀ŋì wì təm inɔb inga fìghàra. Wì ya nyimi ŋwan we, si ghà inɔb gha, 37“Wə̀d ne niŋi ŋwan kwa mɔ̀ʼɔ icheg gho̰ ane ìmə ikum, tengàŋ fə bə̀ niŋ amə. Wə̀d ne niŋi amə, kayi mo ne wì niŋi, wì niŋ yaʼ wə̀d we ne tɔmi amə.”

Wə̀d ne chəyi wì to̰ awa, tengàŋ we yi tì ina

(Lug 9:49-50)

38Jɔn ya ghà abə Yeso gha, “Àchwitìnùg, tì kə bàd wə̀d mɔ̀ʼɔ ne kàmna izwighi tibɔ̀ŋ chìyè inga bəd, ane ìwe ikum. Ane, tì kə kə̀b ni ghì gha imbə̀ʼ wì kàma yi izwighi tibɔ̀ŋ imbə̀ʼ icheg ne məd kayi wə̀d mɔ̀ʼɔ abɔ̀ʼ ina.”

39Yeso ya ghà inɔb gha, “Mbə̀ saŋa aməd imbə̀ʼ icheg ne chəyi wə̀d mɔ̀ʼɔ ne ghìyə̀ inug yeti yeti ane ìmə ikum, ne biri ywiri nɔʼ bə̀ŋə̀ se ghà yaʼ inug tibɔ̀ŋ imbə̀ʼ amə. 40Wə̀d ne chəyi wì to̰ awa, tengàŋ we yi tì ina. 41Mə gha tesiʼ inən gha, wə̀d we ne nàʼi toʼ mənib inən gha mbə̀ no imbə̀ʼ icheg ne mbə̀ bḛ ikum Kristo, tengàŋ biri mənyìʼ bèrì ìzi chùd.”

Inug mbe ne kwàʼrà bəd gha mbe ghi inug tibɔ̀ŋ

(Mat 18:6-9; Lug 17:1-2)

42Yeso ya chè imbìghè ghà abə mə̀mə̀nənùg məd gha, “Wə̀d mɔ̀ʼɔ mə̀ ghì gha ŋwan kwa mɔ̀ʼɔ abɔ̀ʼ mbo̰ ne bḛ amə wè ghiyə anug tibɔ̀ŋ, nji ze biri bɔ̀ŋ gha mbe tiŋə kwàʼ iteg kyen ibo ane ameg ghò màʼ aməd inga igyi tìbà. 43Àze abo mə̀ ghì gha àghò ghiyə anug tibɔ̀ŋ, sɔb. Ze bɔ̀ŋ gha àghò jəg ìtḛ̀ ighə̀m imɔʼ tì abo amɔʼ, chè icheg ne àghò biri bèrì ibo ibe Ŋwiye màʼ awe inga iywid nɔʼ mèg, ne à ya asiŋi ichə. 44[Inga angu, chəyi tègwìd te ne kùrə nyàmnyɔd bəd te kùyə. Iywid we ne tɔ̰̀ bəd, chəyi wì biri bə nɔʼ nime.] 45Àze aghog mə̀ ghì gha àghò ghiyə anug tibɔ̀ŋ, sɔb aghog ze. Ze bɔ̀ŋ gha àghò jəg ìtḛ̀ ighə̀m imɔʼ tì aghog amɔʼ, chè icheg ne àghò biri bèrì ighog ibe Ŋwiye màʼ awe inga iywid nɔʼ mèg, ne à ya asiŋi ichə. 46[Inga angu, chəyi tègwìd te ne kùrə nyàmnyɔd bəd te kùyə. Iywid we ne tɔ̰̀ bəd, chəyi wì biri bə nɔʼ nime.] 47Ìwe ighə mə̀ ghì gha àghò ghiyə anug tibɔ̀ŋ, chɔʼ. Ze bɔ̀ŋ gha àghò nyi inga anug ìfɔ̀n Ŋwiye tì ighə imɔʼ, chè icheg ne àghò biri bèrì aghə abe Ŋwiye màʼ awe inga asiŋi ichə. 48Inga angu,

‹Chəyi tègwìd te ne kùrə nyàmnyɔd bəd te kùyə. Iywid we ne tɔ̰̀ bəd, chəyi wì biri bə nɔʼ nime.›

49Mbi biri ghì wə̀d ijìm zen ane iywid, [icheg ne mbe zène ighi àfàtì ijìm ane fìngwaŋ.]

50Fìngwaŋ bɔ̀ŋ, si ya gha, à mə̀ chəyi fe ywìrè nə̀mə̀, tì àghò tangi gha fe ywìrì nə̀m? Mbə̰ ya icheg fìngwaŋ. Ane, mbə̀ chughi ane àbɔrɔ̀bɔd tì ìmbən məfi.”

Currently Selected:

Mag 9: MBTP

Highlight

Copy