Mag 10
10
Anug ni sàkì inami
(Mat 19:1-12; Lug 16:18)
1Yeso ya nɔ̀ʼ a Kàpenàwum ghò aba aben ze a Jùdeyà bə̀ fɔrɔ injḭ igyi Jodàn. Tinɔ̰ bəd ya ywìrì ghò fète iban məd. Ane, wì ya ko ni chwìti inug inɔb icheg ne wì yaya kà ghìyə̀.
2Mə̀Farìsi mɔ̀ʼɔ ya ghò ibo ni kwàʼrì aməd. Ane, mbi ya biri ibo gha, “Mə̀nɔ̀ʼɔ̀ wa chwi gha mbaŋà sàkì inam tì ìwi iweg?”
3Wì ya ywìtì inɔb gha, “Muse ya ghà inən gha?”
4Mbi ya gha, “Muse ya bḛ gha mbaŋà naʼa àŋwàʼrì ne chwìye gha zìye fə sàkì inam tì ìwi iweg bɔŋ se chìyè aməd inga nəb.”
5Mbi ya ghà ane, si ya gha Yeso ya ghà inɔb gha, “Muse ya ŋwàʼrì nɔ̀ʼɔ̀ gho̰ inən imbə̀ʼ icheg ne ìtən fìŋ tu. 6Tesiʼ ya gha, nɔ̀ʼ ane isəg ya ko, ‹Ŋwiye ya tangi bəd, mbaŋà tì àyi. 7À ya aton ne mbaŋà biri sàŋì ìwi mbaʼ tì ìwi ngɔb niŋ ìwi weg mbi se fɔrɔ chùghə.#10:7 chəyi ìŋwàʼrì anun mɔ̀ʼɔ beri asiŋi azo̰ ne gha “mbi se fɔrɔ chùghə.” 8Ane, mbɔb mbe məbe biri si yaʼ nyàmnyɔd imɔʼ.› Ane, chəyi mbi ywirì yaʼ bəd məbe. Mbi ya si nyàmnyɔd imɔʼ. 9Ane, imbə̀ʼ wə̀d mɔ̀ʼɔ sàkì yi bəd mbe ne Ŋwiye fə fɔti.”
10Anyumə̀ ne mbi ya bə̀ndi ghò nyi inga nəb, mə̀mə̀nənùg mbe ya ywìrì bìri anug azo̰ ibo. 11Wì ya ghà inɔb gha, “Mbaŋà ne sàkì inam tì ìwi iweg, nam àyi ndəŋ, wì fə gùg anug abə ìwi iweg icheg ne wì nɔ̀kì àyi ndəŋ. 12Àyi mə̀ bə̀ sàkì inam tì ìwi inɔm, nam wə̀d ndəŋ, wì fə fànà icheg ne wì nɔ̀kì mbaŋà ndəŋ.”
Yeso ya zì àbɔrɔ̀bɔd igun bɔn kwa
(Mat 19:13-15; Lug 18:15-17)
13Bəd mɔ̀ʼɔ ya niŋ bɔn kwa ni ghò abə Yeso gha wì bètì awɔb. Mə̀mə̀nənùg məd ya ghàm tɔ abə bəd mbe. 14Si ya gha, anyumə̀ ne Yeso ya bàri anug ze, wì ya gaŋ, si ghà abə ìmbi mə̀mə̀nənùg gha, “Mbə̀ sàŋì bɔn kwa mbe, mbe yèʼe abɔ̀ʼ inum. Imbə̀ʼ mbə̰ kə̰ awən awɔb imbə̀ʼ icheg ne à ya bəd icheg mbo̰ biri jəg anug ìfɔ̀n Ŋwiye. 15Mə gha tesiʼ inən gha, wə̀d ne chəyi wì bḛ anug ìfɔ̀n Ŋwiye icheg Ŋwan kwa, chəyi tengàŋ biri nɔ̀ʼ nyi inga anug ìfɔ̀n ze.” 16Anyumə̀ ne wì ya gha ane, wì ya niŋ bɔn kwa mbe, nɔŋi ìmbi ibo igun inɔb imɔʼ imɔʼ zì àbɔrɔ̀bɔd igun inɔb.
Anug imbə̀ʼ mbaŋà ne ya beri ighi
(Mat 19:16-30; Lug 18:18-30)
17Anyumə̀ ne Yeso ya nɔ̀ʼi ni ghò igha̰, mbaŋà mɔ̀ʼɔ ya nòtò ghò pè gɔ̀m itog inwḭ ibo imbìghè, biri ibo gha, “Àchwitìnùg chɔm, mə kə anìŋ ghənə bɔŋ jəg ìtḛ̀ ighə̀m imɔʼ?”
18Yeso ya ghà ibo gha, “Aton ne àghò kàri amə ane wə̀d chɔ̀m àkə gha? Chəyi wə̀d mɔ̀ʼɔ angu ne bɔ̀ŋi chèyi ane Ŋwiye. 19Àghò taŋ kyèri mə̀nɔ̀ʼɔ̀ Ŋwiye ne ghà gha: Imbə̀ʼ àghò zweti awe wə̀d. Imbə̀ʼ àghò ghiyə awe anug ni nɔ̀kì àyi kə mbaŋà ndəŋ. Imbə̀ʼ àghò ji awe. Imbə̀ʼ àghò bḛ awe anug gha àghò bàd ati, ne ya anug ako. Imbə̀ʼ àghò ghiyə awe iji igun wə̀d. Àghò ghumni ìwe mbaʼ tì ìwe ngɔb.”
20Mbaŋà ze ya ghà ibo gha, “Àchwitìnùg, mə̀ ya fə ko nɔ̀ŋì mə̀nɔ̀ʼɔ̀ mbo̰ məjìm nɔ̀ʼ ane mə yaʼ ŋwan kwa.”
21Yeso ya nèn aməd kɔ̀ŋ, si ghà ibo gha, “Aghi mɔ̀ʼɔ ze angu ne chəyi àghò beri. Ndò ghò fèndì ighi mbe ne àghò beri ijìm, ghò nàʼ ikab we abə bəd fum. Àghò biri si bèrì ighi ikaŋ àbɔ̀ŋɔ. Ghiyə ane, si yèʼe bèni abɔ̀ʼ inum.” 22Anyumə̀ ne mbaŋà ze ya zug anug azo̰, anug ya chè aməd. Ane, wì ya nɔ̀ʼ ghò yi se yḛ̀ nè sɔ̀mnɔ̀ imbə̀ʼ icheg ne wì ya taŋ bèrì ighi nɔʼ nɔʼ.
23Yeso ya nèn isiŋi chè kad, si ghà abə ìmbi mə̀mə̀nənùg gha, “Ze biri ka abə bəd ighi ni nyi inga anug ìfɔ̀n Ŋwiye!”
24Mə̀mə̀nənùg mbe ya zug ìngam we, anug chè awɔb. Si ya gha, Yeso ya ywìrì ghà inɔb gha, “Ìmbum bɔn, ze taŋ ka ni nyi inga anug ìfɔ̀n Ŋwiye! 25Ze zàm abə Kàme ni chè inga ibighi saʼ, chè icheg ne wə̀d ighi biri nyi inga anug ìfɔ̀n Ŋwiye.”
26Mə̀mə̀nənùg mbe ya yeti chè ati, si ghàm mbɔb mbɔb gha, “Ze mə̀ yaʼ ane, nji wə̀d ne biri pum àkə we?”
27Yeso ya nèn awɔb ghà inɔb gha, “Anug ya chè yaʼ bəd, kayi Ŋwiye imbə̀ʼ icheg ne, chəyi anug mɔ̀ʼɔ ne tì ze chè Ŋwiye.”
28Pità ya ko se ghà ibo gha, “Nḛ, tì fə sàŋì ighi ijìm beni abɔ̀ʼ ine.”
29Yeso ya ghà inɔb gha, “Mə ghà tesiʼ inən, wə̀d ne sàŋì ìzi nəb, kə̀ ìmbi məfi, kə̀ ìti njàbi, kə̀ ìwi ngɔb, kə̀ ìwi mbaʼ, kə̀ ìmbi bɔn, kə̀ ìmbi isiŋi ìseg imbə̀ʼ amə fɔrɔ imbə̀ʼ ikən chɔm, 30tengàŋ biri ywirì bèrì ighi mbo̰ inga nyùmə̀ gho̰ achug iki ifibì. Wì biri bèrì nəb, bèrì məfi tì njàbi, bèrì mbì ngɔb, bèrì bɔn bə̀ bèrì isiŋi ìseg, mbi bə̀ chɔʼ ibɔʼì ighog məd. Wì biri jəg ìtḛ̀ ighə̀m imɔʼ inga nyùmə̀ isəg we ne yèʼe. 31Si ya gha, bəd nɔʼ nɔʼ mbe ne yaʼi imbìghè, biri yaʼ bəd ne si nwḭ̀yḛ̀. Bəd mbe ne si nwḭ̀yḛ̀ si yaʼ imbìghè.”
Yeso ya ghàm anug imbə̀ʼ ìwi iwu ane ighəm ni pè ane itad
(Mat 20:17-19; Lug 18:31-34)
32Anyumə̀ ne Yeso tì ìmbi mə̀mə̀nənùg yaya kɔ̀ʼɔ ghò a Jèrusalèm, Yeso yaya yḛ̀ imbìghè. Anug ze ya chè mə̀mə̀nənùg mbe. Bəd mbe ne ya beni ibo anjìm ya bɔ. Wì ya bə̀ ywìrì niŋ mə̀mə̀nənùg mbe ìghum chɔ̀b ibe ghò iban ko ghà anug ze ne biri dù ibo inɔb. 33Wì ya ghà inɔb gha, “Mbə̀ Nḛ, tì ya anìŋ kɔ̀ʼɔ ghò a Jèrusalèm. Tì mə pè angu, mbi biri nyimi Ŋwan Wə̀d nàʼ abə itog bəd mbàn Ŋwiye tì mə̀chwitì mə̀nɔ̀ʼɔ̀. Bəd mbo̰ biri sɔb isaʼi gha mbe zweti aməd. Mbi biri ghì ane, si nàʼ aməd abə bəd mbe ne kayi mə̀Ju. 34Bəd mbe ne kayi mə̀Ju biri chəʼ aməd, ched timad igun məd, te məd ane ngwàn bə̀ zweti aməd. Igun aneg ne pè ane itad, wì zwème ane iwu.”
Jem tì Jɔn ya biri anug mɔ̀ʼɔ abə Yeso
(Mat 20:20-28)
35Jem tì Jɔn ne ya bɔn Zebedì ya ghò abə Yeso pè ghà ibo gha, “Àchwitìnùg, tì kə̀b gha àghò ghiyə anug ze ne tì biri biri ine.”
36Wì ya biri inɔb gha, “Anug ne mbə̰ mbe kə̀bə̀ gha mə̀ ghiyə inən àkə aghə?”
37Mbi ya ghà ibo gha, “Anyumə̀ ne àghò chughi inga àze anug ìfɔ̀n, bḛ gha wə̀d ifibì abɔ̀ʼ ina chughi ane àze aba abo jəghi, ìywin bə chùghi ane àze aba abo təŋ.”
38Yeso ya ghà inɔb gha, “Chəyi mbə̀ kyeri anug ze ne mbə̰ mbe bìre.” Anyumə̀ ne wì ya ywìti ane, wì ya biri inɔb gha, “Tì mbə̰ zən iku ngəʼ we ne mə̀ biri zən? Tì mbə̰ bə̀ niŋ mənib icheg ne mə̀ biri niŋ?”
39Mbi ya ywìtì ibo gha, “E! Tì we tì tì zə̰ iku ngəʼ we bə̀ niŋ mənib mbe.”
Yeso ya si ghà inɔb gha, “Mbə̰ biri zə̰ ngəʼ ze ne mə zə̰, bə̀ niŋ mənib icheg ne mə̀ niŋ; 40Si ya gha, kayi àmə ati ni chɔʼ wə̀d ne biri chughi ane àmə abo jəghi kə̀ wə̀d ne biri chughi ane àmə abo təŋ. Iti mbe ya abə bəd mbe ne Ŋwiye ya fə tangi nɔ̀ŋì inɔb.”
41Anyumə̀ ne mə̀mə̀nənùg mbin ìghum ya zughi anug ze, mbi ya ko gaŋ abə Jem tì Jɔn. 42Ane, Yeso ya kàrì mə̀mə̀nənùg mbe məjìm, ghà inɔb gha, “Mbə̰ kyèri gha bəd mbe ne tùmbə̀ bəd mbe ne kayi mə̀Ju ya nyə̀mə̀ inug nyəmi igun inɔb. Mbə̰ bə̀ kyèri gha bəd kyen abɔ̀ʼ inɔb bèrì ika ni tùmbì awɔb ane inug ijìm. 43Si ya gha, kayi ane inga inən. Wə̀d ne kə̀bi ni yaʼ wə̀d kyen inga inən bèrì ni ya fàʼà inən. 44Wə̀d ne kə̀bi ni yaʼ wə̀d mbègtog inga inən bèrì ni yaʼ àbòʼì inən mbə̰ məjìm. 45Mə ya ghà anìŋ imbə̀ʼ icheg ne chəyi Ŋwan Wə̀d yèʼe gha bəd faʼa ibo. Wì ya yèʼe ni fàʼ abə bəd, bə̀ ku ni zeri bəd nɔʼ nɔʼ.”
Yeso ya ghù Bàtimìyòs ne ya fə̀ghə
(Mat 20:29-34; Lug 18:35-43)
46Yeso tì ìmbi mə̀mə̀nənùg ya ghò a Jèrikò. Anyumə̀ ne mbɔb tì inɔ̰ bəd ne ya yaʼi kwàʼ ìwi kyen ya dù inga Jèrikò, Bàtimìyòs ne ya ifəg, bə̀ yaʼ ŋwan Timìyòs, ya chughi iban inɔnjì ni nɔn ighi. 47Anyumə̀ ne wì ya zug gha à ya Yeso a Nazarèd we chè, wì ya ko se kyḛ gha, “Yeso, Ŋwan ifɔn Dèvid, dìgre igun inum!”
48Anyumə̀ ne wì ya gha ane, bəd nɔʼ nɔʼ ya ghàm tɔ ibo gha wì chim tizi. Si ya gha, wì ya ywìrì taŋ kyen gha, “Ŋwan ifɔn Dèvid, dìgre igun inum!”
49Yeso ya təm si ghà gha, “Mbə̀ kàrà aməd.” Anyumə̀ ne mbi ya kàri Bàtimìyòs, mbi ya ghà ibo gha, “Bɔti fìŋ! Nɔ̀ʼ titighe, Yeso we kàrà awe.”
50Wì ya zug ane, chì ìzi ndwi màʼi mèʼì iban, nɔ̀ʼ tɔ̀mɔ̀, ghò abɔ̀ʼ Yeso.
51Yeso ya biri ibo gha, “Anug ne àghò we kə̀bə̀ gha mə ghi ine àkə aghə?”
Mbaŋà ze ya ghà ibo gha, “Masà, mə kə̀b gha àghò ghiyə mə̀ se bàd isiŋi.”
52Yeso ya ghà ibo gha, “Ìwe ibḛfiŋ fə ghì àghò bɔti. Si ghò awe.”
Kwàʼ ati ati, mbaŋà ze ya ywìrì ko se bàd isiŋi. Ane, wì ya nɔ̀ʼ beni abɔ̀ʼ Yeso ghò a asiŋi ze ne Yeso yaya ghò.
Currently Selected:
Mag 10: MBTP
Highlight
Share
Copy
Want to have your highlights saved across all your devices? Sign up or sign in
© 2019 CABTAL
