Matìyò 18

Wə̀d kyen inga anug Ìfɔ̀n ikaŋ.

(Mag 9:33-37; Lug 9:46-48)

1Anyumə̀ we ne Yeso tì mə̀mə̀nənùg məd ya yaʼi a Kàpenàwum, mbɔb ya ghò bìri ibo gha, “Wə̀d ne yaʼi ìwi kyen inga inug ìfɔn ikaŋ àkə we?”

2Yeso ya zug ane, kàrì ŋwan kwa kwa mɔ̀ʼɔ ghì wì təm inɔb imbìghè. 3Wì ya si ghà inɔb gha, “Mə gha tesiʼ inən gha, mbə̰ mənyìʼ kɔ̀pɔ si yaʼ icheg bɔn kwa kwa, nji chəyi mbə̀ biri nyi inga anug ìfɔ̀n ikaŋ. 4Wə̀d ne swi ìwi nyɔd aseg si yaʼ icheg ŋwan kwa kwa gho̰, à ya məd yaʼ ìwi kyen inga anug ìfɔ̀n ikaŋ. 5Wə̀d ne niŋi ŋwan kwa kwa mɔ̀ʼɔ icheg gho̰ ane ìmə ikum, tengàŋ fə niŋ amə.”

Inug mbe ne ghìyə̀ gha bəd ya ghìyə̀ inug tibɔ̀ŋ

(Mag 9:42-48; Lug 17:1-2)

6Yeso ya chè imbìghè ni ghà abə mə̀mə̀nənùg məd gha, “Wə̀d ne ghìyə̀ gha ŋwan kwa kwa mɔ̀ʼɔ inga bəd mbo̰ ne bḛ amə wè gughə anug, ze biri bɔ̀ŋ gha mbe kɔd iteg kyen kyen ibo ane ameg, màʼ aməd inga igyi tìbà, wì fum.

7Ngəʼ kyen biri yaʼ igun isəg gho̰ imbə̀ʼ inug mbe ne ghìyə̀ gha bəd se ghìyə̀ inug tibɔ̀ŋ. Inug icheg mbo̰ ya mənyìʼ yèʼe, si ya gha, ngəʼ kyen biri nyi igun wə̀d ne mbi biri yeʼe anjìm məd. 8Àmə yaʼ aghi ne àze abo kə̀ àze aghog ze ghìyə̀ gha àghò ghiyə anug tibɔ̀ŋ, sɔb waʼ. Ze bɔ̀ŋ gha àghò jəg ìtḛ̀ tì aghog amɔʼ chè icheg ne àghò biri bèrì ighog ibe fɔrɔ ibo ibe ne biri ghì mbi màʼ awe inga iywid ighə̀m imɔʼ. 9Kə̀ àmə yaʼ aghi ne ìwe ighə ya ghìyə̀ gha àghò ghiyə anug tibɔ̀ŋ, chìye ighə we waʼ. Ze bɔ̀ŋ gha àghò jəg ìtḛ̀ tì ighə imɔʼ chè icheg ne àghò biri bèrì aghə abe ne biri ghì mbi màʼ awe inga iywid ighə̀m imɔʼ.”

Ngam məgri imbə̀ʼ njə̀g ne nimi

(Lug 15:3-7)

10Yeso ya ywìrì ghà abə mə̀mə̀nənùg məd gha, “Mbə̀ niŋ nyumə̀ imbə̀ʼ mbə̰ nɔ̀ʼ wèg wə̀d mɔ̀ʼɔ abɔ̀ʼ bɔn mbo̰ ne bḛ amə. Mə ghà inən gha ìmbɔb mbè angirə̀ mbe tə̀mə imbìghè abə ìmə Mbaʼ ne yaʼi ikaŋ àbɔ̀ŋɔ.#18:10 Chəyi ìŋwàʼrì anun mɔ̀ʼɔ beri, ‘ikaŋ àbɔ̀ŋɔ’ aŋa asiŋi. 11[Ŋwan Wə̀d ya yeʼe ni pumni bəd ne nimi.]#18:11 Chəyi ìŋwàʼrì anun mɔ̀ʼɔ beri akwiri àŋwàʼrì kwa kwa azo̰. 12Mbə̀ kə kɔ̀ndɔ gha? Àmə yaʼ aghi ne wə̀d mɔ̀ʼɔ beri njə̀g iki ifibì, ìzi mɔ̀ʼɔ dù inga ghò nyì fèbè, àkə chəyi wì biri sàŋì ìtin ìghum àbɔg chɔ̀b àbɔg aba iwum ni ghò kə̀b njə̀g ze imɔʼ ne fèbe? 13Mə gha tesiʼ inən gha, wə̀d we mə̀ bàd njə̀g ze, wì biri taŋ gyendi imbə̀ʼ njə̀g ze imɔʼ ne wì bàri chè icheg ne we gyènde imbə̀ʼ ìtin tì njə̀g ìghum àbɔg chɔ̀b àbɔg ne chəyi ti fèbe. 14À ya ane ne chəyi ìmə Mbaʼ ne yaʼi ikaŋ àbɔ̀ŋɔ kɔ̀ŋi gha ŋwan kwa kwa mɔ̀ʼɔ abɔ̀ʼ bəd mbo̰ ne bḛ amə wì nim.”

Anug imbə̀ʼ wə̀d Kristo ni gùghi anug abə aywin

15Yeso ya ghà abə mə̀mə̀nənùg məd gha, “Àmə yaʼ aghi ne ìwe ifi gùghi anug ine, àghò gho kɔ̀ti aməd mə̀tì anug ne wì ghi ine. Mə̀tə ibo ne àghò yaʼi məyi àghò tì məd mbə̰ məbe. Wì mə zug anug ne àghò we ghà ibo, kyeri gha àghò fə niŋ aməd bə̀ndì. 16Àmə yaʼ aghi ne chəyi wì kə̀bi ni zug, àghò niŋ wə̀d ndəŋ imɔʼ kə̀ bəd ndəŋ məbe ni gha mbe yeʼe zug anug ne àghò we ghà abə ìwe ifi. Ghìyə ze yaʼ icheg ne mbi ŋwaʼri inga Àŋwàʼrì Ŋwiye gha, ‹Bɔŋ wə̀d we se pùtə wə̀d, bəd məbe kə̀ mətad mənyìʼ bḛ gha mbɔb kə̀ bàd ati ane anug ze.› 17Àmə yaʼ aghi ne chəyi wì kiri kəbi ni zug, àghò mətə anug ze abə itog bəd inga ifeti bəd Kristo. Àmə bə̀ yaʼ aghi ne chəyi wì kiri kəbi ni zug abə itog bəd inga ifeti bəd Kristo, mbə̀ niŋ aməd icheg wə̀d ne chəyi wì kiri bḛ Ŋwiye, kə̀ icheg wə̀dtag.”

Anug ne bəd bḛ tì anug ne bəd to̰

18Yeso ya chè imbìghè ghà abə mə̀mə̀nənùg məd gha, “Mə gha tesiʼ inən gha, anug ne mbə̀ bḛ igun isəg aŋa, à ya icheg ne Ŋwiye biri bə bḛ ikaŋ àbɔ̀ŋɔ. Anug ne mbə̀ to̰ awən igun isəg aŋa, à ya àzewən ne Ŋwiye biri bə ton ikaŋ àbɔ̀ŋɔ.

19Mə gha tesiʼ inən gha, anyumə̀ ne bəd məbe igun isəg aŋa bḛ anug mɔ̀ʼɔ, nɔn abə ìmə Mbaʼ ne yaʼi ikaŋ àbɔ̀ŋɔ, wì ya fàʼà anug ze inɔb. 20Ze yaʼ anìŋ imbə̀ʼ icheg ne asiŋi ze ne bəd məbe kə̀ mətad fɔti angu inga ìmə ikum, mo we angu tì inɔb.”

Anug ni waʼ inug tibɔ̀ŋ bəd

21Pità ya ghò pè bìri abə Yeso gha, “Anɔŋisəg, àkə aghəm sə̀ʼə ne mə beri ni waʼ inug tibɔ̀ŋ ne ìmə ifi ghi inum? Àkə aghəm ìsàmbe?”

22Yeso ya ywìtì ibo gha, “Mə ya ghà ine gha, kayi məyi aghəm ìsàmbe. À ya aghəm ìghum ìsàmbe chɔ̀b ìsàmbe.”#18:22 Ìŋwàʼrì anun mɔ̀ʼɔ gha aghəm ìghum ìsàmbe aghəm ìsàmbe kə̀ aghəm ìghum ìsàmbe chɔ̀b ìsàmbe.

23Yeso ya ywìrì ghà inɔb gha, “Anug ìfɔ̀n ikaŋ ya icheg ifɔn mɔ̀ʼɔ ne ya beri ni nèn anug imbə̀ʼ icheg ne bəd àfàʼì məd ya nyimi ikab məd. 24Icheg ne wì yaya nḛ̀ ane, mbi ya niŋ wə̀d mɔ̀ʼɔ ne ya nyimi ikab məd akam iki ifibì ghò ibo. 25Icheg ne chəyi wə̀d we ya beri ikab we ni ywì ibo, mbaʼ àfàʼì məd ya gha mbe niŋ aməd tì iweg məd tì bɔn məd fɔrɔ ighi məd ijìm fèn yèʼe ywì njo ze.

26Icheg ne ifɔn we ya gha ane, wə̀d àfàʼì we ya gɔ̀m itog inwḭ aseg boʼ ibo ibo gha, ‹Nyimi fìŋ, mə biri kə̀b ikab we ijìm yèʼe nàʼ ine.› 27Ifɔn we ya bèrì àsɔ̀mnəfiŋ igun məd chì njo ze, sàŋì aməd wì gho yi.

28Si ya gha, anyumə̀ ne wə̀d àfàʼì we ya du isəg, wì ya ghò abə wə̀d àfàʼì ndəŋ ne yaya nyìme ikab məd chuʼ iki ifibì. Wì ya jwiʼ wə̀d njo we ane ameg nyìmi, si ghà ibo gha, ‹Àghò mənyìʼ ywì ìmə ikab!›

29Wə̀d àfàʼì we ya bə̀ gɔ̀m itog inwḭ aseg, boʼ ibo ibo, ghà ibo gha, ‹Nyimi fìŋ, mə biri kə̀b ikab we ijìm yèʼe nàʼ ine.›

30Chəyi wə̀d gho̰ ya bḛ. Wì ya chè imbìghè niŋ aməd ghò zì inga nəb ndəŋ ni gha wì chughi inga anene wì ywi ikab məd.

31Anyumə̀ ne mbin tì bəd àfàʼì ya bàri anug ne ya du, ze ya taŋ nàʼ ngəʼ inɔb. Ane, mbi ya si ghò mə̀tì inug ijìm ne ya du abə ifɔn we. 32Ifɔn we ya kàrì wə̀d àfàʼì we, ghà ibo gha, ‹Àghò ya kwàʼ izəg! Mə ya chì njo ijìm ne àghò yaya nyìme mə imbə̀ʼ icheg ne àghò ya boʼ ibo inum. 33Àkə kayi àze ati ni kə bèrì àsɔ̀mnəfiŋ igun ìwe ifi mbə̰ bəd àfàʼì icheg ne mo bə bèrì àsɔ̀mnəfiŋ igun ine?› 34Ifɔn we ya gaŋ chà wə̀d we a ndəŋ. Wì ya si ghà abə bəd àfàʼì mbe ne yaya nḛ̀ bəd ndəŋ gha mbe chə aməd anene wì tu njo ze ijìm.”

35Yeso ya si nwḭ̀yḛ̀ ghà inɔb gha, “À ya icheg ne ìmə Mbaʼ ne yaʼi ikaŋ àbɔ̀ŋɔ biri bə fàʼ tì bəd mbe ne chəyi mbi waʼi inug tibɔ̀ŋ abə ìmbɔb məfi kwàʼ ane ìzɔb fìŋ ijìm.”

Currently Selected:

Matìyò 18: MBTP

Highlight

Copy