Matìyò 19

Yeso ghàm imbə̀ʼ anug ni sàkì inam

(Mag 10:1-12)

1Anyumə̀ ne Yeso ya màni ni ghàm imbə̀ʼ anug ni gha wə̀d waʼ inug tibɔ̀ŋ mbi ìwi ifi, wì ya nɔ̀ʼ a Galìli ghò aba aben ze Jùdeyà ne yaʼi injḭ igyi Jodàn. 2Tinɔ̰ bəd ya beni abɔ̀ʼ məd ghò angu. Ane, wì ya ghù bəd məjìm ne yaya ghɔ̰̀ inga tinɔ̰ bəd te.

3Mə̀Farìsi mɔ̀ʼɔ ne ya gho ibo ni kwàʼrì aməd ya biri ibo gha, “Àchwitìnùg, ìmba mə̀nɔ̀ʼɔ̀ wa chwi gha aton mɔ̀ʼɔ ze angu ne tì wə̀d nàʼ si sàkì inam tì ìwi iweg imbə̀ʼ aton ze.”

4Yeso ya biri inɔb gha, “Àkə chəyi mbə̀ kiri fɔŋi gha, anyumə̀ ne Ŋwiye ya tangi isəg, wì ya tangi mbaŋà tì àyi? 5Ŋwiye ya gha, ‹Aŋa ya aton ne wə̀d biri sàŋì ìwi mbaʼ tì ìwi ngɔb ghò fɔ̀ti tì ìwi iweg, mbɔb mbo̰ məbe si yaʼ nyàmnyɔd imɔʼ.› 6Ane, mbɔb kayi ywìrì bəd məbe. Mbɔb ya si nyàmnyɔd imɔʼ. Ane, imbə̀ʼ wə̀d mɔ̀ʼɔ sàka yi bəd ne Ŋwiye fə fɔti.”

7Mbɔb ya ywìrì bìri ibo gha, “Ane, aton ne Muse ya bḛ gha mbaŋà naʼa àŋwàʼrì ne chwìye gha zìye fə sàkì inam tì ìwi iweg bɔŋ se chìyè aməd inga nəb àkə gha?”

8Yeso ya ywìtì gha, “Muse ya ŋwàʼrì nɔ̀ʼɔ̀ we inən imbə̀ʼ icheg ne ìtən fìŋ tu. Kayi icheg ne ze ya yaʼi anyumə̀ ne Ŋwiye ya tangi isəg. 9Mə ghà tesiʼ inən, wə̀d ne sàki inam tì ìwi iweg, si nam àyi ndəŋ, tengàŋ fə fànà. Wə̀d we tì wì sakì inam tì ìwi iweg məyi anyumə̀ ne iweg məd nɔ̀ki mbaŋà ndəŋ.”

10Mə̀mə̀nənùg ìmbi Yeso ya si ghà ibo gha, “Ze mə̀ yaʼ anìŋ abə inɔm tì iweg, ane ya gha ze bɔ̀ŋ gha imbə̀ʼ wə̀d nam yi.”

11Yeso ya ywìtì gha, “Chəyi tì bəd məjìm bḛ ìngam gho̰. Ìngam gho̰ kòʼ məyi abə bəd mbe ne Ŋwiye fə ghi gha mbe bḛ ìwi ìngam. 12Iton mɔ̀ʼɔ mbe angu ne chəyi bəd mbe nàma: Bəd mɔ̀ʼɔ mbe angu ne mbi ya gwi awɔb tì akuʼi ne fə ku. Bəd ndəŋ ya bəd ne mbi zaʼi awɔb. Mə̀mbin ya bəd ne mbi dəbi ni chughi awɔb icheg bəd ne àzɔb akuʼi fə ku məyi imbə̀ʼ anug ìfɔ̀n ikaŋ. Wə̀d ne tì wì bḛ ìngam gho̰, wì bḛ.”

Yeso zì àbɔrɔ̀bɔd igun bɔn kwa

(Mag 10:13-16; Lug 18:15-17)

13Anyumə̀ we, bəd yaya nìŋə ìmbɔb bɔn kwa ghò ni gha Yeso nɔŋɔ ìmbi ibo igun inɔb, chàʼra Ŋwiye inɔb. Si ya gha, mə̀mə̀nənùg məd yaya to̰ awɔb se kàmna bəd mbe. 14Yeso ya ghà inɔb gha, “Mbə̀ saŋa bɔn kwa mbe yèʼe inum. Imbə̀ʼ mbə̰ kə̰ awən awɔb imbə̀ʼ icheg ne anug ìfɔ̀n ikaŋ ya abə bəd ne yaʼi icheg bɔn kwa mbo̰.”

15Anyumə̀ ne wì ya gha ane, wì ya si nɔ̀ŋì ìmbi ibo igun bɔn kwa mbe, chàʼra Ŋwiye inɔb, si nɔ̀ʼ ghò yi.

Anug imbə̀ʼ ajɔŋ ne beri ikab

(Mag 10:1-12)

16Aneg mɔ̀ʼɔ, wə̀d mɔ̀ʼɔ ya ghò abə Yeso pè bìri ibo gha, “Àchwitìnùg, àkə anug chɔm azeg ne mə beri ni ghì bɔŋ jəg ìtḛ̀ ighə̀m imɔʼ?”

17Yeso ya ywìtì ibo gha, “Aton ne àghò we bìre inum imbə̀ʼ anug chɔm àkə gha? À ya məyi Wə̀d imɔʼ ne bɔ̀ŋi. Àghò mə kə̀b ni jəg ìtḛ̀ ighə̀m imɔʼ, àghò nɔŋi tikə Ŋwiye.”

18Wə̀d we ya biri gha, “Tikə icheg iteg?”

Yeso ya ywìtì ibo gha, “Imbə̀ʼ àghò zwète awe wə̀d. Imbə̀ʼ àghò fana awe. Imbə̀ʼ àghò jìye awe. Imbə̀ʼ àghò bḛ awe anug ako igun wə̀d. 19Ghumni ìwe mbaʼ tì ìwe ngɔb. Bə kɔ̀ŋ wə̀d ne yaʼi iban ine icheg ne àghò kɔ̀ŋi ìwe nyɔd.”

20Wə̀d we ya ywìtì gha, “Mə we nɔ̀ŋɔ̀ tikə ìto̰ tijìm. Àkə aghə ne si bùʼ?”

21Yeso ya ywìtì ibo gha, “Àghò mə kə̀b ni bɔ̀ŋ mànì, ndò gho fèn ìmbe ighi ijìm, nàʼ ikab abə bəd ne chəyi àzɔb, àghò biri si taŋ bèrì ighi ikaŋ àbɔ̀ŋɔ. Àghò mə mànì ni ghì ane, si yèʼe bèni abɔ̀ʼ inum.”

22Anyumə̀ ne ajɔŋ ze ya zughi anug azo̰, wì ya sɔ̀mnɔ̀, si nɔ̀ʼ ghò yi. Wì ya nɔ̀ʼ ghò yi ane imbə̀ʼ icheg ne wì ya taŋ bèrì ighi.

23Yeso ya ghà abə mə̀mə̀nənùg məd gha, “Mə ghà tesiʼ inən, kwàʼ ze biri ka abə wə̀d ikab ni nyi inga anug ìfɔ̀n ikaŋ. 24Mə ya anìŋ ywìrè ghà inən gha, ze zàm abə kàme ni chè inga ibighi saʼ chè icheg ne ze zami abə wə̀d ikab ni nyi inga anug ìfɔ̀n Ŋwiye.”

25Anyumə̀ ne mə̀mə̀nənùg ìmbi Yeso ya zughi ìngam gho̰, anug ya taŋ chè awɔb, mbɔb si bìri gha, “Àmə yaʼ anìŋ, wə̀d ne biri pum àkə we?”

26Yeso ya nèn awɔb si ghà gha: “Inug ya chè bəd. Si ya gha, chəyi anug mɔ̀ʼɔ ne tì ze chè Ŋwiye.”

27Pità ya ywìtì gha, “Tì fə sàŋì ighi ijìm bèni abɔ̀ʼ ine. Aghi ne tì biri si bèrì àkə aghə?”

28Yeso ya ghà inɔb gha, “Mə ghà tesiʼ inən, anyumə̀ ne Ŋwiye biri bə̀ŋì ighi ijìm ane mbi feg, Ŋwan Wə̀d biri chùghi igun atən ifɔn ìzḛzḛ məd. Mbə̰ mbo̰ ìghum chɔ̀b ibe ne beni abɔ̀ʼ inum biri si chùghi igun itən ifɔn se sàʼa tinəbi Izre te ìghum chɔ̀b ibe. 29Wə̀d ijìm ne sàŋì nəb kə̀ məfi kə̀ njàbi kə̀ mbaʼ kə̀ ngɔb kə̀ iweg kə̀ bɔn kə̀ bèyi mben məd imbə̀ʼ ìmə ikum, wì biri bèrì ighi mbo̰ ijìm achug iki ifibì bə̀ ywìrì jəg ìtḛ̀ ighə̀m imɔʼ. 30Si ya gha, bəd ndan ndàn ne yaʼi imbìghè amad anìŋ biri si yaʼ anjìm, bəd ndan ndàn ne yaʼi anjìm biri si yaʼ imbìghè.”

Currently Selected:

Matìyò 19: MBTP

Highlight

Copy