Ìfàʼì 6

Mbe chɔʼ mbaŋà ìsàmbe ne wètè ane àfàʼì

1Inga ineg mbe, inɔ̰ mə̀mə̀nənùg Yeso yaya yètè ghò gho imbìghè. Mə̀Ju mbe ne yaya ghàmà Grig ya puti mə̀Ju mbe ne yaya ghàmà Hibrù. Mbi ya puti awɔb gha mbɔb mbe wàʼra ìmbɔb məku àyi anyumə̀ ne mbe ghàpà tijəg. 2Bədtɔm mbe ìghum chɔ̀b ibe ya zug ane, fèti mə̀mə̀nənùg məjìm ghà inɔb gha, “Chəyi ze biri bɔ̀ŋ gha tì waʼ anug ni ghàm Ìngam Ŋwiye ghò yaʼ ane anug ni ghàpì tijəg. 3Ane, ìmba məfi fɔrɔ ìta njàbi, mbə̀ chɔʼ mbaŋà ìsàmbe abɔ̀ʼ inən ne mbə̀ kyeri gha ìwɔb ikuchèg bɔ̀ŋ, bə̀ kyèri gha mbɔb bèrì Azwighi Ŋwiye inga inɔb bə̀ bèrì iwe. Tì biri zì àfàʼì azo̰ ni ghàpì tijəg inɔb ikye abo. 4Àsi mba, tì biri niŋ ìwa nyùmə̀ ijìm ane anug ni ya chàʼrà Ŋwiye bə̀ chwìte Ìngam Ŋwiye.”

5Anug azo̰ ne mbi ya gha ya bɔ̀ŋ abə inɔ̰ bəd we ijìm. Ane, mbi ya chɔʼ Stifə̀n ne ibḛfiŋ məd ya taŋ kà. Azwighi Ŋwiye ya bə̀ sweg inga məd. Mbi ya bə̀ chɔʼ Filip tì Prokorùs tì Nìkanò tì Timòn tì Pàmenà fɔrɔ Nikolàs we a Antìyɔ̀g ne ya bḛ anug Ŋwiye mə̀Ju. 6Mbi ya ghì, mbaŋà ìto̰ təm imbìghè abə bədtɔm Kristo. Bədtɔm Kristo ya si nɔ̀ŋì ibo igun inɔb, chàʼra Ŋwiye inɔb. 7Ane, Ìngam Ŋwiye ya chè imbìghè ni kweg. Inɔ̰ bəd ne yaya yètè abɔ̀ʼ mə̀mə̀nənùg inga Jèrusalèm yaya tḭ tḭ ghò gho imbìghè. Bəd mbàn Ŋwiye nɔʼ nɔʼ ya bə̀ bḛ Kristo.

Itog bəd gwìye Stifə̀n

8Ŋwiye ya taŋ ghì ìchɔ̀mì abə Stifə̀n bə nàʼ ika ibo. Ane, wì ya ghì iyeti inug kyen kyen bəd bàd. 9Bəd mɔ̀ʼɔ inga ichamì Ŋwiye mə̀Ju we ne mbi yaya kàrà ane “Bəd ne yaʼi awɔb atog inɔb#6:9 Bəd ne kayi ywìrè məfeg”, tì mə̀Ju mbe a Sayirèn tì Àlèzandrìyà fɔrɔ mə̀Ju mbe aba isəg Sìlisìyà tì Esìyà ya ko se tàŋà inug tì Stifə̀n. 10Si ya gha, Azwighi Ŋwiye ya nàʼ ika abə Stifə̀n ne chəyi tì wə̀d mɔ̀ʼɔ chɔʼri anug ne wì yaya ghàmà.

11Ane, mbi ya taŋ mənaŋ tì mbaŋà mɔ̀ʼɔ anjìm anjìm gha mbɔb yeʼe bḛ gha, mbɔb kə̀ zug icheg ne Stifə̀n we zɔ̀mbɔ̀ Muse bə̀ zɔ̀mbɔ̀ Ŋwiye.

12Mbi ya ghì ane nɔ̀ àbùrì inga bəd fɔrɔ inga itog bəd inga aben bə̀ fɔrɔ inga mə̀chwitì mə̀nɔ̀ʼɔ̀. Ane, mbi ya gwìye Stifə̀n niŋ ghò imbìghè abə bəd ne sàʼa aben. 13Anyumə̀ ne mbi ya pe imbìghè abə bəd ne saʼa aben, mbi ya ghi bəd təm bḛ inug ako gha, “Mbe gho̰ we ghàmà inug tibɔ̀ŋ imbə̀ʼ mbàn Ŋwiye fɔrɔ imbə̀ʼ mə̀nɔ̀ʼɔ̀ Muse. 14Tè kə̀ zug icheg ne məd we gha Yeso we a Nazarèd biri buʼ mbàn Ŋwiye izo̰, bə̀ kɔ̀pi məcheg aben mbe ne Muse ya nàʼi ina.”

15Bəd məjìm mbe ne ya chughi aseg ni saʼ Stifə̀n ya tɔŋ aghə igun məd, bàd gha ìfe məd ya kwàʼ icheg ìwi angirə̀.

Currently Selected:

Ìfàʼì 6: MBTP

Highlight

Copy