Ìfàʼì 5

Anug imbə̀ʼ Ànàniyàs tì Sàfirà

1Anyumə̀ we ne Jòseb ya fḛ àzi asiŋi ìseg, wə̀d mɔ̀ʼɔ ya yaʼ angu ne ikum məd ya Ànàniyàs tì iweg məd ne ikum məd ya Sàfirà. Mbɔb ya bə̀ fèn àzɔb tì asiŋi ìseg. 2Si ya gha, məd tì iweg məd ya bḛ ni sɔbri ikab mɔ̀ʼɔ nɔ̀ŋì àzɔb aghi. Ane, Ànàniyàs ya si ghò nàʼ yaʼ aba ikab abə bədtɔm Kristo.

3Icheg ne wì ya nàʼi ane, Pità ya biri ibo gha, “Ànàniyàs, aton àghò sàŋi gha Sàtàn nyi ine inga fìŋ tàmbi awe anìŋ àkə gha? Àghò mə̀tì anug ako abə Azwighi Ŋwiye icheg ne àghò fḛ asiŋi ìseg sɔ̀bri ikab nɔ̀ŋì anjìm. 4Imbə̀ʼ asiŋi ìseg ze ya kə̀ àze bɔŋ àghò we se fḛ̀? Anyumə̀ ne àghò kə̀ fə fḛ asiŋi ìseg ze, imbə̀ʼ ikab we ijìm ya kə̀ bə̀ yi ìwe? Aton ne àghò kɔ̀ndi iku anug gho̰ anìŋ àkə gha? Àghò ghà anug ako abə Ŋwiye kayi abə bəd.”

5Anyumə̀ ne Ànàniyàs ya zughi ane, wì gùg aseg, ku zù. Wə̀d ijìm ne ya zughi anug ne du ya taŋ bɔ. 6Bɔn ijɔŋ ya nyi inga nəb nib awu məd inga ndwi, bèʼì dù isəg, ghò twə̀ŋi.

7Nyùmə̀ ya chè icheg mbe awà mətad, iweg məd yeʼe ne chəyi wì kyèri anug ne fə du. 8Pità ya biri ibo gha, “Gha inum. Aŋa àkə inun ikab ne àghò tì ìwe inɔm, Ànàniyàs, mbə̀ fḛ àzən asiŋi ìseg gho̰?”

Wì ya ywìtì gha, “E! À ya inun ikab angu we.”

9Pità ya si biri ibo gha, “Mbə̀ kə ko ane aghə ne àghò tì ìwe inɔm yèʼe ni kwàʼrì Azwighi Anɔŋisəg? Nḛ, bəd mbe ne nɔʼi ni twəŋi ìwe inɔm, Ànàniyàs, mbɔb mbin inuʼ akɔŋi ayin. Mbi biri bə bèʼì awe ghò twə̀ŋi.”

10Kwàʼ ati, Sàfirà ya gùg aseg ibo imbìghè, bə̀ ku zù. Bɔn ijɔŋ mbe ne kə twə̀ŋi inɔm məd ya nyi inga nəb, si bàd gha wì fə ku. Mbi ya bə̀ bèʼì aməd dù ghò twə̀ŋi iban inɔm məd. 11Ifeti bəd Kristo fɔrɔ bəd ndəŋ məjìm ne ya zughi anug ze ya taŋ bɔ.

Bədtɔm Kristo ya ghù bəd nɔʼ nɔʼ ne ghɔ̰̀

12Bədtɔm Kristo yaya ghìyə̀ iyeti inug nɔʼ nɔʼ igun bəd, bəd bàrà. Bəd ne ya bḛ Kristo yaya ghò bɔ̀mbɔ̀ inga asiŋi ze ne mbe kàrà ane məkə̀tə̀ Solomùn. 13Bəd yaya ghùmnə awɔb kwàʼ icheg chɔm. Si ya gha, chəyi wə̀d ne chəyi abɔ̀ʼ inɔb ya beri fìŋ ne tì wì fɔ̀ti abɔ̀ʼ inɔb. 14Tesiʼ ya gha, mbaŋà nɔʼ nɔʼ tì mə̀yi nɔʼ nɔʼ yaya yètè abɔ̀ʼ inɔ̰̀ bəd we ne yaya bḛ Anɔŋisəg. Ane, ìwɔb inɔn ya chè imbìghè ni kweg. 15Inug yeti yeti mbe ne bədtɔm Kristo yaya ghìyə̀ ya ghì gha bəd se nìŋə ìmbɔb bəd ighɔn ghò nɔ̀ŋɔ̀ igun mənɔnjì fɔrɔ igun tìsa iban inɔnjì ni gha, anyumə̀ ne Pità we chè, àzìŋə məd ze tì ze chè igun mbi mɔ̀ʼɔ, ghù awɔb. 16Bəd nɔʼ nɔʼ yaya nɔ̀ʼɔ̀ inga iben ijìm mbe ne ya che kad Jèrusalèm ghò tì ìmbɔb bəd ighɔn fɔrɔ bəd ne izwighi tibɔ̀ŋ yaʼi inga inɔb. Bədtɔm mbe ya ghù awɔb mbɔb məjìm.

Bəd chɔʼ ibɔʼì ighog abə bədtɔm

17Àdeg ya sweg inga fìŋ abə atog wə̀d igun bəd mbàn Ŋwiye fɔrɔ bəd mbe ne ya yaʼi tì məd bə̀ sweg inga fìŋ abə bəd mbe ne yaʼi inga ifeti mə̀Sadùsi. 18Ane, mbi ya gwì bədtɔm mbe ghò zì inga nəb ndəŋ ze ne yaʼi inga aben ze. 19Izimi we, angirə̀ Anɔŋisəg ya ghò fìʼì tinuʼ nəb ndəŋ ze, chì awɔb chà asaŋ, ghà inɔb gha, 20“Mbə̀ gho təm inga mbàn Ŋwiye ghà inug ijìm imbə̀ʼ icheg ne tì bəd jəg ìtḛ̀ feg gho̰.”

21Anyumə̀ ne ituʼ ya chəghi, mbi ya ghò nyi inga mbàn Ŋwiye, ko ni chwiti inug icheg ne angirə̀ we ya gha inɔb.

Atog wə̀d igun bəd mbàn Ŋwiye tì bəd mbe ne ya yaʼi tì məd ya ghò kàrì itog bəd ne sàʼa aben məjìm tì itog bəd aben mə̀Ju məjìm gha mbe gho fète inga ìwɔb ichamì. Anyumə̀ ne mbi ya gho fète, mbi ya chà bəd gha mbe gho niŋ bədtɔm mbe inga nəb ndəŋ yèʼe. 22Si ya gha, anyumə̀ ne mə̀sogyì mbe ya pe a nəb ndəŋ ze, chəyi mbi ya bàri bədtɔm mbe inga nəb ndəŋ . Ane, mbi ya bə̀ndì ghò ghà gha, 23“Tè pè bàd nəb ndəŋ ze ne mbi feni kwàʼ icheg chɔm. Tè bə̀ bàd mə̀sogyì mbe ne nə̀ngə isiŋi ne mbi təmbi iban tinuʼ nəb. Si ya gha, anyumə̀ ne tì si fìʼì nəb ndəŋ ze nyi inga, chəyi tì bari wə̀d mɔ̀ʼɔ inga.” 24Anyumə̀ ne atog wə̀d igun mə̀sogyì mbe ne nə̀ngə mbàn Ŋwiye tì itog bəd mbàn Ŋwiye ya zughi anug azo̰, ze ya chè awɔb. Ane, ibo ya buʼrə inɔb, mbi se bìre gha, “Kə̀ àkə iku anug weg gho̰.”

25Anyumə̀ ne mbi yaya bìre ane, wə̀d mɔ̀ʼɔ ya nyi isəg, ghà inɔb gha, “Mbə̀ nḛ, mbaŋà te ne mbə̀ kə zi inga nəb ndəŋ, itin inga mbàn Ŋwiye chwìte inug abə bəd.” 26Mbi ya zug ane, atog wə̀d igun mə̀sogyì nɔ̀ʼ ghò tì mə̀sogyì pè niŋ awɔb ghò inga ichamì we. Chəyi mbi ya gwi awɔb ane ika imbə̀ʼ icheg ne mbi yaya bɔ gha bəd mbe biri tumbi awɔb ane ateg zwèti.

27Mbi ya pè nɔ̀ŋì awɔb, mbi təm imbìghè abə bəd mbe ne sàʼa aben. Atog wə̀d igun bəd mbàn Ŋwiye ya biri inɔb gha, 28“Tì kə̀ pati awən gha imbə̀ʼ mbə̰ chwiti awən inug imbə̀ʼ ikum gho̰ abə bəd. Mbə̰ mbe kiri chwite inug mbe. Mbə fə ghì bəd məjìm inga Jèrusalèm zug. Mbə̰ ya anìŋ bə̀ kə̀bə̀ ni ghì gha ndɔ̀n ze ne yaʼi imbə̀ʼ icheg ne mbi zweti aməd, ze nyi igun ina. Kə̀ kayi ane?”

29Wì ya biri ane, si ya gha, Pità tì bədtɔm mbin ya ywìtì gha, “Tè bèrì ni zugri yaʼ Ŋwiye, kayi ni zugri bəd. 30Ŋwiye ìmba mə̀mbaʼ ya zwemne Yeso we ne mbə̀ ya kɔ̀mbi igun azed abaʼri, zwèti. 31Ŋwiye ya nɔ̀ aməd ane, nɔ̀ŋì ibo aba abo jəghi ane Atog wə̀d igun bəd məjìm fɔrɔ ane Wə̀d ne pùmnə bəd, ni gha məd we tì wì ghì mə̀Izre bə̀ŋì fìŋ sìkì inug tibɔ̀ŋ, Ŋwiye waʼ ìmbɔb inug tibɔ̀ŋ. 32Mba ya bəd ne bari ati ane inug mbo̰ ijìm. Azwighi Ŋwiye ze ne Ŋwiye we nàʼà abə bəd mbe ne zùgrə aməd, ze bə̀ kyèri inug mbo̰ ijìm.”

33Anyumə̀ ne bəd mbe ne sàʼa aben ya zughi anug azo̰, mbi ya gaŋ chè ati, se kə̀bə̀ gha nji mbe zwèti bədtɔm mbe. 34Si ya gha, Farìsi mɔ̀ʼɔ ne ikum məd ya Gàmalìyè ya yaʼ abɔ̀ʼ bəd mbe ne sàʼa aben. Məd ya yaʼ wə̀d ne chwìte mə̀nɔ̀ʼɔ̀. Bəd məjìm yaya ghùmnə aməd. Wì ya nɔ̀ʼ təm titighe ghà gha mbe cha bədtɔm mbe isəg iki piʼì. 35Anyumə̀ ne mbi ya cha awɔb isəg, wì ya ghà abə bəd mbe ne sàʼa aben gha, “Mə̀Izre, mbə̀ we awən tì anug azo̰ ne mbə̰ mbe kə̀bə̀ ni ghì tì mbaŋà ìto̰. 36À ya yaʼ ane anyumə̀ mɔ̀ʼɔ, mbaŋà ze ne mbi yaya kàrà ane Tìyodàs ya nɔ̀ʼ gha zìye ya mbaŋà ìzin. Bəd ne ya beni abɔ̀ʼ məd ya yaʼ icheg aki akwè. Si ya gha, anyumə̀ ne mbi ya zweti aməd, bəd mbe məjìm ya sàkà. Anug məd ze ya nim. 37Àze tì anug ya chè. Wə̀d mɔ̀ʼɔ a Galìli ne ikum məd ya Judàs ya bə̀ nɔ̀ʼ inga ineg mbe ne mbi yaya tàŋa bəd, fèti bəd nɔʼ nɔʼ se yḛ̀ tì mbiwən. Anyumə̀ ne wì ya bə ku, bəd məjìm mbe ne yaya bène abɔ̀ʼ məd ya bə̀ sàkà. 38Ane, anug ne mə̀ kəbi ni kə awən ane isaʼi gho̰ ya gha, mbə̀ chiye ìmbən ibo ane anug azo̰ ne mbaŋà ìto̰ te fàʼà, sàŋì awɔb. Àmə yaʼ ne anug ze ne mbɔb mbe kə̀bə̀ ni ghì kə̀ àfàʼì ze ne mbɔb mbe kə̀bə̀ ni fàʼ ze nɔʼi abə wə̀d-aku, nji ze biri nwḭ̀yḛ̀. 39Àmə yaʼ ne anug azo̰ nɔʼi abə Ŋwiye, nji chəyi mbə̀ biri bèrì ika ni təmni awɔb. Mbə̰ biri bàd gha mbə̰ ya anìŋ zɔ̀ŋɔ̀ yaʼ Ŋwiye.”

40Bəd mbe ne sàʼa aben ya zug ikə ìwi Gàmalìyè. Ane, mbi ya ywìrì kàrì bədtɔm mbe, mbi nyi inga nəb. Mbi ya ywiri awɔb ane ngwàn#5:40 Ngwàn ìzo̰ ya ngwàn mɔ̀ʼɔ ne mbi tangi ane gɔb ne beri njaʼ icheg tikwè kə̀ tita̰. Ngwàn ìzo̰ ya zìyè ina ne mèghè nɔ̀ŋɔ̀ ipabi. bə̀ pàti awɔb gha imbə̀ʼ mbi nɔ̀ʼ ywìrì ghà anug mɔ̀ʼɔ abə bəd ane ikum Yeso. Mbi ya ghì ane si sàŋì awɔb, mbi ghò.

41Bədtɔm mbe ya nɔ̀ʼ abɔ̀ʼ bəd mbe ne sàʼa aben se yḛ̀ nè gha, Ŋwiye fə niŋ awɔb ane bəd ne koʼi ni zən ngəʼ bə̀ bèrì tìnìrètog imbə̀ʼ Yeso. 42Mbi ya chè imbìghè ni chwiti inug abə bəd ineg ijìm bə̀ ghà ikən chɔm inga mbàn Ŋwiye fɔrɔ anəb anəb gha Yeso ya Wə̀d we ne Ŋwiye zɔ̀ʼi.

Currently Selected:

Ìfàʼì 5: MBTP

Highlight

Copy