Ìfàʼì 4

Pità tì Jɔn təm ane isaʼi imbìghè abə itog bəd

1Bəd mbàn Ŋwiye tì atog wə̀d igun mə̀sogyì mbe ne yaya kyèʼrè mbàn Ŋwiye tì mə̀Sadùsi ya yeʼe pè kṵ̀ igun Pità tì Jɔn ne mbe kiri ghàmà abə bəd. 2Anug ze ya taŋ se awɔb imbə̀ʼ icheg ne Pità tì Jɔn yaya chwìte inug abə bəd bə̀ chètè gha anjìm Yeso bəd biri zweme ane iwu. 3Ane, itog bəd mbe ya gwì awɔb. Icheg ne ituʼ ya fə se fḭ̀yḛ, mbi ya zì awɔb inga nəb ndəŋ ni si saʼ awɔb isu abɔ̀ʼ. 4Mbi ya jiʼì gwì awɔb ane, si ya gha, bəd nɔʼ nɔʼ abɔ̀ʼ bəd mbe ne ya zughi ìngam we ya nɔ̀ŋì ìwɔb ibḛfiŋ igun Yeso Kristo. Inun bəd mbe ne ya nɔŋi ìwɔb ibḛfiŋ igun Yeso Kristo ya yètè se ghò ka chuʼ ita̰.

5Àsi isu abɔ̀ʼ, itog bəd ne sàʼa aben tì bəd kyen inga aben mə̀Ju fɔrɔ mə̀chwitì mə̀nɔ̀ʼɔ̀ ya fete a Jèrusalèm. 6Atog wə̀d igun bəd mbàn Ŋwiye ne ikum məd ya Anàs tì Kayifàs tì Jɔn tì Àlèzandà fɔrɔ bəd məjìm ne yaʼi inga inəbi atog wə̀d kyen igun bəd mbàn Ŋwiye ya bə̀ fète abɔ̀ʼ inɔb. 7Itog bəd mbo̰ ya ghì mbi niŋ Pità tì Jɔn ghò inɔb imbìghè. Mbi ya biri inɔb gha, “Wə̀d ne nàʼi ika inən gha mbə̀ faʼa anug azo̰ àkə we? Kə̀ mbə kə fàʼà anug azo̰ ane ikum ìwi we?”

8Azwighi Ŋwiye ya sweg inga Pità, wì si ywìtì inɔb gha, “Bəd ne sàʼa aben tì itog bəd inga aben, 9àmə yaʼ aghi ne mbə̀ niŋi awa anìŋ nɔ̀ŋì inən imbìghè imbə̀ʼ anug chɔm ze ne tì faʼi abə wə̀d we ne ya buʼrə ni biri icheg ne wì che angu bɔ̀ti 10nji mbə̰ tì bəd məjìm inga Izre, mbə̀ kyeri gha, wə̀d gho̰ ne təmi inən imbìghè anìŋ, à ya ika we ne yaʼi inga ikum Yeso Kristo we a Nazarèd ghi aməd wì bɔ̀ti. Məd ya Yeso we ne mbə̀ ya kɔ̀mbi igun azed abaʼri, si ya gha, Ŋwiye ya zwemni aməd ane iwu. 11À ya məd we ne Àŋwàʼrì Ŋwiye gha imbə̀ʼ aməd gha,

‹Iteg we ne mbə̰ ne kɔ̀rɔ nəb ya to̰ awən,

wi fə bə̀ŋə̀ ane iteg ibug nəb.›

12Chəyi wə̀d mɔ̀ʼɔ ndəŋ ne tì wì pùmni bəd imbə̀ʼ icheg ne chəyi ikum ndəŋ ywìrè igun isəg ne Ŋwiye nàʼi abə bəd ne tì tì karì wì pùmni awa.”

13Anyumə̀ ne mbi ya bàri icheg ne Pità tì Jɔn mbe ghàmà ne chəyi mbe bɔ, bə̀ kyèri gha mbɔb ya inati bəd ne chəyi mbi nyi àŋwàʼrì, anug ya chè awɔb. Itog bəd mbo̰ ya bə̀ kyèri gha Pità tì Jɔn ya kweʼì yaʼ abɔ̀ʼ Yeso. 14Si ya gha, chəyi mbɔb ya beri anug mɔ̀ʼɔ ni ghà abə Pità tì Jɔn imbə̀ʼ icheg ne wə̀d we ne mbi ya ghu aməd ya yaʼ angu itəmi. 15Ane, mbi ya ghà abə Pità tì Jɔn gha mbe duwə isəg, kye ghò aba azin. Mbi ya bə̀ kye. Itog bəd mbe məjìm ya si chùm. 16Mbi ya ghàm mbɔb mbɔb gha, “Ze kə anìŋ tì ghənə abə bəd mbo̰? Wə̀d ijìm inga Jèrusalèm aŋa fə kyeri gha bəd mbo̰ fàʼ ayeti anug ne che ibo. Chəyi inɔnjì ina ni ton. 17Chəyi anug ndəŋ ni ghì chèyi ni ghì gha imbə̀ʼ bəd ndan ndàn si nɔ̀ʼ zug. Tè pati awɔb gha imbə̀ʼ mbi ywiri ghama awɔb inug imbə̀ʼ ikum we abə bəd.”

18Anyumə̀ ne mbi ya chuʼri inug mànì, mbi ya kàrì Pità tì Jɔn, si pati awɔb gha imbə̀ʼ mbi ywìrì nɔ̀ʼ ghàm inug kə̀ ywìrì chwiti inug imbə̀ʼ ikum Yeso abə bəd ka. 19Si ya gha, Pità tì Jɔn ya ywìtì inɔb gha, “Mbə̀ kə kɔ̀ndɔ gha? Anug ne bɔŋi imbìghè abə Ŋwiye àkə aza? Àkə ni zugri awən kə̀ àkə ni zugri Ŋwiye? 20Mbə̀ kyeri gha chəyi tì biri ton ni chètì anug ne tì bari bə̀ zug.”

21Itog bəd mbe ya ywìrì taŋ pàti awɔb bɔŋ sàŋì awɔb gha mbe gho. Chəyi mbi ya kyeri icheg ne tì mbi chə awɔb imbə̀ʼ icheg ne bəd məjìm yaya nàʼà ighumni abə Ŋwiye ane anug ne ya du. 22Bəd yaya ghùmnə Ŋwiye imbə̀ʼ ayeti anug ze ne Pità tì Jɔn ya ghì imbə̀ʼ icheg ne wə̀d we ne mbɔb ya ghu aməd ya fə chè tituʼ ìghum ikwè.

Bəd mbe ne ya bḛ Yeso ya chàʼra Ŋwiye ni chì ibɔ igun inɔb

23Icheg ne itog bəd mbàn Ŋwiye tì itog bəd inga aben ya sàŋa Pità tì Jɔn ane, mbɔb ya ghò kwàʼ ati ati pè kɔ̀ti mbin tì bəd ne ya bḛ Yeso, mə̀tì anug ne mbi pati awɔb ghà inɔb. 24Anyumə̀ ne mbi ya zughi anug ze, mbɔb məjìm ya fɔti ichug ni chàʼra Ŋwiye. Mbi ya chàʼrì gha, “Atumbisəg, à ya àghò ne tàngi ikaŋ tì ìseg tì tìbà, bə̀ tàngi ighi mbe ne yaʼi inga inɔb ijìm. 25Àghò ya chà Azwighi Ŋwiye ze ghì ìwe wə̀d àfàʼì Dèvid ne yaʼi ìwa mbaʼ aneg, wì ghàm gha,

‹Bəd inga iben mbe ne kayi mə̀Ju kə gàŋa gha?

Aton ne mbɔb mbe chùmə̀ ìchùmə ako àkə gha?

26Məfɔn mbe igun isəg fə chuʼri nyɔd ane àzɔ̀ŋì;

Bəd mbe ne sàʼa iben fə bə̀ fète ni zɔ̀ŋ Anɔŋisəg tì Wə̀d məd we ne wì zɔ̀ʼi.›

27Tesiʼ ya gha, à ya kwàʼ inga ikye aben aŋa ne Erɔ̀d tì Pɔntiyos Payilèd ya bɔ̀mbì tì bəd ne kayi mə̀Ju fɔrɔ mə̀Izre ni taŋ mənaŋ igun Yeso, ìwe wə̀d àfàʼì ìzḛzḛ we ne àghò ya fə zɔʼi. 28Mbɔb fə ghì inug mbo̰ ijìm kwàʼ icheg ne àghò kə̀bi gha mbe yaʼ bə̀ kwàʼ icheg ne àghò ya nɔŋi ane ìwe ika. 29Àghò, Anɔŋisəg, nḛ icheg ne mbe sìbè awa, si nàʼ ika abə ìmbe bəd àfàʼì mbe chete ìwe ìngam ne chəyi mbe bɔ. 30Àghò seme àze abo ghù bəd ne ghɔ̰̀ bə̀ chwi ineni ka ka bə̀ fàʼ iyeti inug inga ikum ìwi Yeso, ìwe wə̀d àfàʼì ìzḛzḛ.”

31Anyumə̀ ne mbi ya chàʼra Ŋwiye mànì, asiŋi ze ne mbɔb ya fete angu ya ghùd. Azwighi Ŋwiye ya sweg inga inɔb mbɔb məjìm, mbɔb se chètè Ìngam Ŋwiye ne chəyi mbe ywìrè bɔ.

Bəd mbe ne ya bḛ Yeso yaya ghàpà ìmbɔb ighi

32Bəd məjìm mbe ne ya bḛ Yeso ya bèrì fìŋ imɔʼ bə̀ nɔ̀ŋì ìwɔb ikɔndi igun anug amɔʼ. Chəyi wə̀d mɔ̀ʼɔ ne yaya tàŋà ighi mɔ̀ʼɔ ane ìmbi. Mbɔb məjìm yaya ghàpà ighi ijìm mbe ne mbɔb ya bèri. 33Bədtɔm Kristo ya chè imbìghè ni chètì abə bəd gha Anɔŋisəg Yeso fə zweme ane iwu. Mbi yaya ghàmà ne chəyi mbe bɔ. Ŋwiye ya ghì ìchɔ̀mì nɔʼ nɔʼ inɔb. 34Chəyi wə̀d mɔ̀ʼɔ inga ìwɔb inɔ̰ we ne ya cheʼi aghi mɔ̀ʼɔ imbə̀ʼ icheg ne bəd ne ya beri isiŋi ìseg kə̀ bèrì nəb yaya ghò fèndè, se nìŋə ikab yèʼe. 35Mbi yaya nìŋə ikab we pè nɔ̀ŋɔ̀ imbìghè abə bədtɔm Kristo. Bədtɔm Kristo yaya se ghàpà ighi abə bəd icheg ne wə̀d imɔʼ imɔʼ kòʼi ni bèri.

36Jòseb ne ya ŋwan inga inəbi Levì ya wə̀d mɔ̀ʼɔ abɔ̀ʼ bəd mbe ne ya bḛ Kristo. Məd ya nɔ̀ʼ a Sayiprùs. Bədtɔm Kristo ya chùb ikum məd ane Bànabàs. (Ikum gho̰ ya ni gha, ŋwan ne nə̀rə fìŋ abə bəd.) 37Wì ya fèn àzi asiŋi ìseg, niŋ ikab ghò nɔ̀ŋì imbìghè abə bədtɔm Kristo.

Currently Selected:

Ìfàʼì 4: MBTP

Highlight

Copy