Makòrzì 11

Yerzù à kpèelì nàa Kiŋgɛ̀ ò Jèrurzalɛ̀mù

(Mat 21.1-11; Luk 19.28-40; Yòw 12.12-19)

1Nà òmà Yerzù nà hwà-òkòwèlì hwa eni hwa mà jèe lì kòmbɛ̀nɛ̀ Jèrurzalɛ̀mù, ò tòŋgòŋgò ya e mbòwà yà Bɛ̀thvegi nà Bɛ̀tanì ò Hvàko ya Njàhwɛ̀, Yerzù à mà òmà hwà-òkòwèlì hwa enì hwahwàkɛ. 2A hwa òhweyà nanù ema, “È ɛ̀ndɛ ò èŋgè mbòwà è hwèlì ò wòrzò, nà òmà è kpèeyà ò tenì, è ùŋmànɛ̀lɛ ŋguma jàkàrzì ja mòmɛ̀ e kakahwi aŋga jàkàrzì ema tɔ̀ mòtò a rzi lìyayi ò ŋmanyu. È ji rzòlòhwè e ji jàne anù. 3È ɛni mòtò a e ijòwi tɛ nanù ema, ‘Mamɛ e gbeyà nanù e?’ È mò òhweyà nanù ema, ‘È Rzàŋgò è jì tùkanelì. À jì tìmbìrzɛ̀ ŋgèlì hvɔ̀kɔ.’” 4Hwà mà ɛ̀ndɛ rzìi hwà ùŋmanɛlɛ jàkàrzì ema ì tìŋgɛ̀hwɛyi ò wòrzò wò èwòka ò tòŋgòŋgò ya njìya, rzìi hwà jì rzòlòwà. 5Lòŋgò la hwatò hwà mà tɛ̀mɛ̀ aŋga rzìi hwà hwa ijòwa nanù ema, “Mamɛ̀ è gbeyà nanù è? Mamɛ̀ ndèŋgatɛ̀ è rzòlòwà iŋgi jàkàrzì è?” 6Rzìi hwà hwa alàhwɛ nà òmà Yerzù à mà hwa òhweyà à mà hwa alàhwɛ̀. Hwàŋga hwatò rzìi hwa hwà hwɛmɛ̀, hwà jì ɛ̀ndɛ̀nɛ̀. 7Nà òmà hwà mà jànè iŋgi jàkàrzì òma Yerzù rzìi hwà jì ikà ìmbɔ̀ti ja awù ò ŋmanyu. Yerzù rzìi à jì agba ò ŋmanyu, rzìi à jì lìyà. 8Hwatò rzayì-rzayì hwà mà tàalɛ ìmbɔ̀ti ja awù ò njìya ò lì mò ŋgbà èluhwe rzìi hwanɛ̀yì wɔ̀ hvɛ hwà tààlɛ̀ hwèkɔ̀kɔ ema hwe mà maà lì kɛ̀ɛhwɛ̀ ò njiya. 9Hwàŋgà ema hwà mà ɛ̀ndɛ ò wòrzò, nà hwanɛ̀yì ema hwà mà mò nɔ̀ŋgɔ rzìi hwà à tɛ̀ɛ̀ nanù ema,

“Hòrzanà, Jèka!

Mònàmɛ̀ nà è mɔ̀ ema à jelì ò lìnà là amà è Rzàŋgò.

10Mònàmɛ̀ nà lìkànèyà ema lì hwɛnì lì jà, là amà è rzàŋgò yà àrzu Dàhwitì.

Hòrzanà, Jèka nà Lohwɛ̀ ema à hwèlì natɛ̀ɛ nà ò ŋmanyu!”

11Yerzù à mà kpèeya ò Jèrurzalɛ̀mù rzìi à ɛ̀ndɛ ò Ndawò yà Lohwà. Rzìi à hvɛ̀ŋgɛ̀ mìirzɔ̀ èki yà arzɛ. Ndì kànatɛ̀ è hvònda è mà tɔ̀ɔ̀lɛ̀, rzìi à tìmba ò Bɛ̀tanì nà lìyòmɛ̀ là eni là Hwà-òkòwèlì nà hwahwàkɛ.

Yerzù à mà jemà gbèe wò nyɔ̀hvinyà

(Mat 21.18-19)

12Nà òmà hwà mà uhwɛlɛlɛ ò Bɛ̀tanì wònɛyi wùnyà, Yerzù a mà lɛmbeya e njàwò. 13À mà ɛnɛ gbèe wò hwèhvùma wò nyɔ̀hvinyà ò hvòka ema wò òhvi na hwèyalì. À mà ɛ̀ndɛ lì ɔŋgɔ̀ ŋgà wò nyàyi hwèhvumà. È hvònda à mà ùkè aŋga, à rzì ùŋmànɛlɛ̀ tɔ̀ yòmà, lì aka tɛ hwèyalì mɛnɛ, ndì è hvònda ya eni ya lì ŋya hwèhvumà è rzì ùkè. 14Rzìi à òhweyà wòŋgò gbèe nanù emà, “Tɔ̀ mòtò à rzà ò hvata hvɛ hwèhvumà” Hwà-òkòwèlì hwà mà hweyà nà òmà à mà òhwè hwenè hweyà.

Yerzù à mà hvayà hwatò hwà nyòŋga ò tenì yà è Ndawò yà Lohwà

(Mat 21.12-17; Luk 19.45-48; Yòw 2.13-22)

15Yerzù nà hwà-òkòwèlì hwa eni hwa mà uka ò mbòwà yà Jèrurzalɛ̀mù. Nà òmà hwa mà ùke, rzìi mɔ̀ à kpèeyà ò tenì yà è Ndawò yà Lohwà yà wònyà Yudà, rzìi à wòteyà lì hvayà hwàŋgà hwatò ema hwa mà hwɛ lì ànda nà lì àhwirzɛ̀ hwèèmà aŋga. À mà nòŋgòlɛ̀ iŋgi tehwèlì ema hwatò hwa mà hwɛ lì kènjirzɛ̀ malì mà awu ò ŋmanyu, nà lì nòŋgòlɛ̀ hvɛ ìmbòkò jà hwàŋgà ema wɔ̀ hvɛ hwà mà hwɛ̀ lì àhwirzɛ̀ imbèŋgà. 16À rzà ìmànɛ̀lɛ̀ hvɛ ema tɔ̀ mòtò à wòwè hwèèmà hwe nyòŋga lì akeyà ò èwòka yà è Ndawò yà Lohwà. 17Rzìi à wòteyà lì òkòlɛ̀ hwatò, à òhwà nanù emà, “È rzà enje è jɔ̀kɛ̀ nanù ema e tìlahwì nanù ema,

‘È ndawò yà amì è ò hwɛ̀lɛhwɛ̀ ndì è ndawò yà màkanɛ̀ yà hwèkòmè hwe arzɛ̀ è?’

Ndì inyɔ̀ è e timbìrzɛ̀ ndì èkì yà hwàyihwɛ̀!” 18Ipìlìrzì ndɛnɛ nà hwà-òkòlèlì hwa mbenda hwà mà hweyè nà òmà Yerzù à mà òhwe nanù rzìi hwà wòteyà lì arzà njɔ̀mi ò lì mò òŋwà. Hwà mà mò òkà wɔ̀ŋgɔ̀ ehwànja è ŋgìndì ya arzɛ̀ è mà òndà nà hwètàmirzèlì ò hwèyòkòlèlì hwe eni. 19È hvònda è ŋgòmbè yà lohwà e mà ùke rzìi hwà ànjiya ò èŋge mbòwà ndɛɛndɛ̀.

Hwèyokòlelì wò gbèe wò nyɔ̀hvinyà ema wò ma ŋwa

(Mat 21.20-22)

20È hvònda yà elele ema hwà mà hwɛ lì tìmba, rzìi hwa ɛnɛ wòŋgò gbèe wò èhvùma ya nyɔ̀hvinyà wò mà ŋwa natɛ̀ɛ nà ò meyàŋga. 21Pètrò rzìi à ɔ̀ŋgɛlɛ eyà Yerzù à mà gbeye rzìi à mò òhweyà nanù ema, “Ìi Mòòkòlèlì, ɔ̀ŋgɔ tɛ gbèe ò mà jeme wò ma ŋwà!” 22Yerzù rzìi a òhwa nanù ema, “È lòkɛ̀ Lohwɛ̀ nà mèèmà me anyu me arzɛ. 23Nà è òhweyà è jɔ̀kɛ̀ nanù ema, tɔ̀ ima mɔ̀ ema a òhwanì enè hvàko nanù ema, ‘Tɛmɛ ò ɛ̀ndɛ ò ahvimbɛ ò ŋmanjà,’ rzìi a rza òhve hwètamirzelì ò ŋmèma mò eni ndì à lòkɛ̀ nanù ema mamɛ ema à òhwi è gbèyɛ̀nɛ̀, è mò gbèyɛ̀nɛ̀. 24Nà è òhweyà ema tɔ̀ mamɛ ema è ìjòwahwi Lohwɛ̀ ò màkanɛ̀, è lòkɛ̀ tɛ nanù ema è e lùwà, e ò gbèyɛ̀nɛ̀. 25Ò tɛmì tɛ ò màkanɛ̀, rzìi e hwɛ nanù ema, ò òhvanì mòtò hwètàtò ò ŋmèma, ò mò làkìrzɛ̀. Àŋga nanù Tatɛ̀ wa àŋgɔ wà ŋmanyu yà lohwà mɔ̀ hvɛ à ò làkìrzɛ̀ è me àŋgɔ wòhwe.”#11.25 Lòŋgò la ikààtì ja wòrzò ì lati hvɛ ŋmɛ̀ŋgɛ ema mò ùkirzɛ̀yi 26: “Ndì inyɔ̀ è rza làkirzɛ tɛ wòhwe wò hwàto, Tatɛ̀ hwà ànyu ema a hwèlì ò ŋmanyu yà lohwà, mɔ̀ hvɛ a rza è ò làkirzɛ wòhwe wò ànyu.”

È wònjà ya amà Yerzù e ìjòwahwi mìijòwelì

(Mat 21.23-27; Luk 20.1-8)

27Yerzù nà hwà-òkòwèlì hwa eni hwà ma ùke hvɛ ò Jèrurzalɛ̀mù. Nà òmà Yerzù à mà hwɛ lì kɔ̀kɔ̀ mèende ò tenì ya è Ndawò yà Lohwà, Ipìlìrzì ndɛnɛ, hwà-òkòlèlì hwa mbenda, nà hwàmbaki, hwà mà mò jèeya. 28Rzìi hwà mò ìjòwa nanù ema, “Ima wònjà òhvi yà lì gbeyànà hwenè hweyà e? Njɛnɛ̀ a ò ŋgbèlì enè wònjà e?” 29Yerzù rzìi à hwà òhweyà nanù emà, “Nà è ìjòwa mìijòwelì mèyɔ̀kɔ è nò alàhwɛ tɛ, ìmba hvɛ nà è òhweyà njɛnɛ̀ a nò ŋgbèlì è wònjà ò lì gbeyà hwenè hweyà. 30Njɛnɛ à ma ŋgbà Yòwanìrzɛ̀ è wònjà ya lì lùhwìrzɛ̀ hwatò e? Lì mà ùhwɛlɛlɛ ndì ò Lohwɛ̀, ŋgà ò hwatò e?” 31Hwà mà àwòhwànɛ̀lɛ̀ wɔ̀ hwìti nanù ema, “Jò òhwì tɛ nanù ema, ‘È wònjà ya ama Yòwanìrzɛ̀ e uwɛ̀lɛ̀lɛ̀yi ndi ò Lohwɛ̀,’ à jò ijòwa nanù ema, ‘Mamɛ ndèŋgàtɛ è rzìi mò lòkɛ̀ e?’ 32Ndì jò òhwì tɛ nanù ema, ‘È wònjà yà eni è uwɛ̀lɛ̀lɛ̀yi ndi ò hwatò.’” (Hwà mà òkà hwatò wɔŋgɔ̀ èhwanjà tɔ̀ imà mòtò à mà lòkɛ̀ nanù ema Yòwanìrzɛ̀ à hwèlì ndì Mòòhwèlì wà Èlìŋgɛ̀ nà è jɔ̀kɛ̀). 33Rzìi hwà alàhwɛ Yerzù nanù ema, “Ì rza hwi” Yerzù rzìi à hwa tìmbirzɛlɛlɛ nanù ema, “Tɔ̀ ìmba hvɛ̀ nà rza tanɛ̀ lì è òhweyà imà wònjà nà gbeyànà hwenè hweyà.”

Currently Selected:

Makòrzì 11: bri

Highlight

Copy