Makòrzì 12

Ŋmàna mò hwàgbèèlì hwà Wòhwe

(Mat 21.33-46; Luk 20.9-19)

1Yerzù rzìi à wòteya lì hwa òhwìrzɛ̀nɛ̀ nà meyànà, a òhwa nanù ema, “Mòtò mɔ̀kɔ à mà òna è hvaya yà enì yà hwèhvùma ema hwa gbeyàna hwènyɔ̀ɔ̀nì. Oŋgò mòtò rzìi a kɔ e ŋgawò ò èŋge hvaya. À ma òŋga hvɛ lìyami ò lì mita hwèŋgè hwèhvùma, ò lì wurzirzɛ hwènyɔ̀ɔ̀nì. À mà òŋga hvɛ lìwòndò la ndɛkì ema hwatò hwà mà lìya ò lì hvayà hwenɔ̀ni. À mà aka hwatò ema hwà mà hwɛnɛ lì kahwa èŋge mbòtà nà mɔ̀, ndèŋgàna a ɛ̀ndɛ ò yɔ̀ndɔ̀. 2È hvònda ema è mbòtà è mà òŋwè, rzìi mɔ̀ à òma è mògbèèlì wa enì ò wàŋga ò hwàgbèèlì hwa èŋge hvayà ema hwa mò òmeya e la eni lìkàyi. 3Ndi hwaŋga hwàgbèèlì hwa èŋge hvaya hwà mà lɛ̀mbɛ òŋgò mògbèèlì, hwa mò nyɔ̀kɔ njùma, rzìi hwa mò timbirzɛ màa ŋgundu. 4È mɔ̀ ema à mà hwɛnɛ èŋge hvaya, rzìi à òmà ò hvɛhvɛ mògbèèlì ò ma hwaŋga hwatò. Hwàŋga hwàgbèèlì hwà mà mò hwènirzɛ mòòhvò, rzìi hwa mò rzambòlɛnɛ ìrzɔnì. 5È mò hwɛnɛ wa hvaya rzìi a tìmba lì òma ò hvɛhvɛ mògbèèlì. Òŋgò mɔ̀, hwaŋga hwàgbèèlì hwà mà mò òŋwa lì òŋwa. À mà tìmba lì òma hwahvɛhvɛ. Lòŋgò ema à mà òme, hwà mà òŋwahwa, lòŋgò hvɛ hwà mà ananahwa. 6Ò mà lìiya mòtò mɔ̀kɔ ò lì òma. Onò mɔ̀ à mà hwɛ ndi e ŋmanà wa eni wa mùnyanà ema à mà lìŋgàne rzayì-rzayì. Mɔ̀ ndi à mà òme ò lìrzukù. À òhwanɛ̀lɛ mɔ̀ ŋmìti nanù ema, ‘Nà òmà a hwèlì ndi e ŋmanà hwa ami, hwa mò ŋgba èluhwe.’ 7Ndi hwaŋga hwàgbèèlì hwa èŋge hvaya, nà òmà hwà mà ɛnɛ òŋgò ŋmanà, à ja, rzìi hwa awòhwànɛ̀lɛ wɔ̀ hwìti nanù ema, ‘Onò ndi à làa erzàŋgò. È jè ì mò òŋwe ò ma ì ma kùwàna ene erzàŋgò ya arzɛ.’ 8Rzìi hwa mò lɛ̀mbɛ, hwa mò òŋwa, hwa aŋgba èembè ya eni ò mburzà yà ŋgawò ya èŋge hvaya.” 9Yerzù rzìi a ijòwa nanù ema, “Mamɛ hvɛ rzɔ e ma e mòhwɛnɛ wà èŋge hvaya a hwɛnì lì gbeyàna hwaŋga hwàgbèèlì hwa èŋge hvaya e? À hwɛnì lì ɛ̀ndɛ ò èŋge hvaya rzìi a òŋwa hwaŋga hwàgbèèlì, rzìi a ŋgbà hwahvɛhvɛ hwàgbèèlì ò lì ɔŋgeya èŋge hvaya. 10Eyà ya Lohwà e òhwa nanù ema,

‘Lìnyayi ema hwà-òŋgèlì hwà mà hvake, lɔ̀ndi lì ma timbɛ lìŋyàyi lì endahwɛlɛ.

11È Rzàŋgò yɔ ndi è gbèyi ene, ndèŋgànɛ̀lɛ̀ e hwèlì ndi mànyàka ò mirzɔ̀ ma arzu. È rzi laŋgè nanù e?’”

12Hwakànèlì hwa Irzàyɛ̀lì hwa mà àrza lì lɛ̀mbɛ Yerzù, èhwanja wɔ̀ hwà mà hwiya nanù ema wɔ̀ ndi Yerzù a kpɛɛlì mònò ŋmàna. Ndi wɔ̀ hwa mà òka e ŋgìndì wɔ̀ŋgɔ̀, rzìi hwa mò hwɛmɛ, hwa ɛ̀ndɛ e ya awu.

Mìijowelì me lì taŋgà e njàŋge yà lìkànèyà

(Mat 22.15-22; Luk 20.20-26)

13O èhvɛhvɛ hvònda hwahvɛhvɛ Hvàlìrzàyì nà e hwa èhvehva ya ama Hɛ̀rɔ̀dì, hwa mà òmahwa ò lì arzana Yerzù màtonà ò lì mò lɛ̀mbɛ. 14Hwàŋga hwatò hwà mà mò jèeya rzìi hwa mò ijòwa nanù ema, “Ìi Mòòkòlelì, ì hwi nanù ema ò hwèlì ndi mòtò ema òhwa e jɔ̀kɛ̀, ndèŋgànɛ̀lɛ̀ hvɛ ò rza tìmbana tɔ̀ mòtò mburzà. O rza enje hvɛ tɔ̀ mòtò ema ò òka wɔ̀ŋgɔ̀ ò lì òhwa eyà. Ndi ò òkòlɛ̀ hwatò, eyà ya ama Lohwɛ̀ ò jɔ̀kɛ̀. È mbenda ya arzù e òhwi ndi ema ì rzaweyà Kayirzà è kiŋgɛ̀ yà Ròmànì e njaŋge ya lìkànèyà e?” 15Ndi Yerzù à mà ayèmbɛ meeyànò me awu, rzìi a òhwa nanù ema, “Mamɛ ndèŋgàtɛ̀ e nò kèkìrzɛ nanù e? È nò jàneyà kahvà hvɔ̀kɔ ya ɛ̀ɛkɛ̀, na e inje.” 16Hwà mà mò jàneyà èŋge kahvà rzìi a hwa ijòwà nanù ema, “Èlìŋgɛ̀ ya ama njɛnɛ ene e? Liinà la ama njɛnɛ lìni e?” Hwa mà mò alàhwɛ̀ nanù ema, “È hwe ama Kayirzà.” 17Yerzù rzìi a hwa òhweyà nanù ema, “È ŋgbè Kayirzà mamɛ e hwèlì è ya ama Kayirzà, e ŋgbè hvɛ Lohwɛ̀ mamɛ e hwèlì è ya ama Lohwɛ̀.” Nà òma hwà mà hweye nanù, hwà mà tàmà.

Mijòhwèlì lì hvòmɛ̀nɛ̀ hwe hvùmùwèlì

(Mat 22.23-33; Luk 20.27-40)

18Lòŋgò la Irzàdùrzì hwà mà jèeyà Yerzù. Hwa mà lòkɛ ema ò rza enje tɔ̀ Hwehvùmuwelì. Rzìi hwa òhwa nanù ema, 19“Ìi Mòòkòlèlì, e mbenda ya ama Mòrzè è òhwà nanù ema, ‘Munyanà a hwàayi tɛ mòlanà rzìi òŋgò mùnyanà a ŋwa ema mɔ̀ nà òŋgò mòlanà hwa rza nyayi ŋmanà ŋmanyàŋgò wà eni hwa luuŋga lɔ̀kɔ a hwɛnì wònjà ò lì hwaa mòŋgò mòkurze ò lì ŋyayeya ŋmanyàŋgò wa eni hwàna.’ 20O nàŋgɛ rzɔ, ò ma hwɛ lìrzamba la hwàna hwa wunyanà, hwa nyàŋgò hvɔ̀kɔ. È ŋmanà wa wòrzò à mà ŋwa, ndi mɔ̀ nà e jòjìyɛ̀ yà eni hwa rzi ŋya tɔ̀ ŋmanà. 21È mɔ̀ ema à ma ùkirzɛ̀ hwàhwàkɛ̀ rzìi a rzàŋgòwa mòŋgò mòkurze. Mɔ̀ hvɛ à mà ŋwa e rzi hwɛ lì ŋya tɔ̀ ŋmanà, nanù ndi e ma hwɛ hvɛ na e ŋmanà wa mùnyanà, ema à mà ùkirzɛ̀ hwàyàwò. 22Nàtɛ̀ɛ na lìŋgi lìrzamba la wùnyànà hwa hwàa mòŋgò mòkurze hwa ŋwa e rzi hwɛ lì ŋya tɔ̀ ŋmanà na mɔ̀. O lìrzukù òŋgò mòlanà mɔ̀ hvɛ a ŋwa. 23Nàŋgɛ rzɔ, ò Hwehvùmuwelì òŋgò mòlanà a ò hwɛ ndi è mòlanà wa ama njɛnɛ e? Èhwanja lìrzamba la arzɛ lì mà mò hwaa.” 24Yerzù rzìi a òhwa nanù ema, “È tòni, èhwanja è rza rzɔ̀ŋgìtɛ̀nɛ̀ mamɛ eyà ya Lohwà e òhwa, tɔ̀ e ŋginyà ya ama Lohwɛ̀. 25Hwàŋga ema hwà mà ŋwɛɛ, hwa hvùmù tɛ ò rza ò hwɛ tɔ̀ mahwà. Hwa ò hwɛ ndi nàa i aŋgèlì ja ŋmanyù ya lohwà. 26Nàŋgɛ rzɔ lì hvòmɛ̀nɛ̀ Hwehvùmuwelì hwe kpelì. È rzi laŋgi ò kààtì yà ama Mòrzè ehvarzù ema è òhwa lì hvòmɛ̀nɛ̀ è ŋmanà gbèe ema è mà rzèeyà e? Àŋga è tìlàhwì nanù ema nà òmà Lohwɛ̀ à mà hwɛ lì òhwìrzɛ̀nɛ̀ Mòrzè lì hvòmɛ̀nɛ̀ Abràhamù, Irzàkì, nà Jèkɔ̀bu ema hwa mà ŋwɛ̀ɛ̀, Lohwɛ̀ à mà òhwa nanù ema, ‘Imba ndi nà hwèlì Lòohwà là ama Abràhamù, Irzàkì nà Jèkɔ̀bù.’ 27Èŋge ŋgàna è uŋmɛ̀lɛ̀ nanù ema hwa hwèlì lòŋgɛ. Lohwɛ̀ à hwèlì ndi Lohwà là hwatò ema hwa hwèlì lòŋgɛ rzeketɛ Lohwà la e wɔ̀ ema hwà mà ŋwɛɛ. Inyɔ e tòni rzayì-rzayì.”

Imbenda ja ahwakɛ ema ì imbami lì aka

(Mat 22.34-40; Luk 10.25-28)

28Mòòkòlèlì mɔ̀kɔ wa mbenda à mà hwɛ aŋga, rzìi a hwèya mamɛ hwa mà hwɛ lì òhwa. Nà òma à mà ayèmbɛ nanù ema Yerzù a mà ŋgba Irzàdùrzì ja alàhwɛ̀ ja gbamù rzìi a ijòwa Yerzù nanù ema, “Ìi Mòòkòlèlì ò imbenda ja arzɛ ima yɔ e hwèlì wòlìtò lì aka enɛyi e?” 29Yerzù rzìi a mò alàhwɛ̀ nanù ema, “È mbenda ema e òhvi wòlìtò lì aka ja arzɛ e hwèlì ndi è mbenda ema e òhwa nanù ema, ‘Ìi hwatò hwa Irzàyɛ̀lì e òkànèyà: Rzàŋgò Lohwà la anyu mɔ̀ mɛnɛ ndi à hwèlì e Rzàŋgò. 30Lìŋgàna e Rzàŋgò Lòohwà la aŋgɔ̀, na ŋmèma mò aŋgɔ̀ mò arzɛ nà èlìŋgɛ̀ ya aŋgɔ̀ ya arzɛ, na màlùtèyà, ò mò lìŋgàne nà e ŋginyà ya aŋgɔ̀ ya arzɛ.’ 31È yɔ ema e ùkirzɛ̀ ihwàkɛ ò wòlìtò e hwèlì ndi e yɔ ema e òhwa nanù ema, ‘Lìŋgàna ŋmànyàŋgò wa aŋgɔ̀ nà òmà ò alìŋgànɛ ò wa hwìti.’ O rzà ènje èhvɛhvɛ mbenda ema è òhvi wòlìtò lì aka ini jà ahwàkɛ.” 32Rzìi òŋgò Mòòkòlèlì wa mbenda a òhweyà Yerzù nanù ema, “Mòòkòlèlì ò hvòmɛ̀nɛ̀yi. Ò òhwi ndi è jɔ̀kɛ̀ nanù ema Lohwà lɔ̀kɔ̀ ndi lì hwèlì, ò rzà enje lìhvɛhvɛ Lohwà lì aka tɛ mɔ̀ mɛnɛ. 33Mòtò a hwɛnì lì mò lìŋgàna na ŋmèma mò eni mò arzɛ, na màlùtèyà ma eni ma arzɛ, na e ŋginyà ya eni ya arzɛ na lì lìŋgàna hvɛ ŋmànyàŋgò wà aŋgɔ̀ nà òmà ò alìŋgànɛ ò wa hwìti. Ènè e hwèlì wòlìtò lì aka ò lì ŋgba Lohwɛ̀ màhwèyà ema mà rzɛlɛhwɛyi nà mahvɛhvɛ màhwèyà.” 34Nà òmà Yerzù à ma ɛnɛ nanù ema òŋgò Mòòkòlèlì wa mbenda a alàhwɛ̀ nà lìhwiyè, rzìi a mò òhweyà nanù ema, “Ò rza rzɔ̀lɛnɛ nà Lìkànèyà là ama Lohwɛ̀.” O mburzà nanù tɔ̀ mòtò a rzi tanɛ lì ijòwa hvɛ Yerzù tɔ̀ miijòwelì.

Mìijowelì lì hvòmɛ̀nɛ̀ è Mɔ̀ ema à Ɔ̀kirzɛ̀hwɛ̀yi

(Mat 22.41-46; Luk 20.41-44)

35Yerzù à mà hwɛ lì òkòlɛ̀ ò Ndawò yà Lohwà. Rzìi à ijòwa nanù ema, “Mamɛ ndèŋgàtɛ̀ hwà-òkòlèlì hwa mbenda hwa òhwa hwà ama, e Mɔ̀ ema à Ɔ̀kirzɛ̀hwɛ̀yi a uwɛ̀lɛ̀lɛ̀yi ndi ò lìwende la ama Dàhwitì e? 36Dàhwitì mɔ̀ ŋmìti, Èlìŋgɛ̀ yà Wòtani e mà mò kpèeyà rzìi a òhwa nanù ema,

‘È Rzàŋgò Lohwɛ̀ à mà òhweyà e Rzàŋgò wa ami ama,

Lìyà ò lìya la ami la mòme,

natɛ̀ɛ na e hvònda ema na gbeyà ò

laala hwakɔ̀èlì hwa aŋgɔ̀ na mataŋgà mà aŋgɔ̀.’

37È hwèlì tɛ ema Dàhwitì mɔ̀ ŋmìti à mà lòma lì mò hwɛlɛ Rzàŋgò, nɛ rzɔ è Mɔ̀ ema à Ɔ̀kirzɛ̀hwɛ̀yi a tànɛyi lì hwɛ e ŋmanà hwa eni e?”

Yerzù a gbèelì mayòwa lì hvòmɛ̀nɛ̀ hwà-òkòlèlì hwa mbenda

(Mat 23.1-36; Luk 20.45-47)

È ŋgìndì è ma hwɛ lì òkànèyà Yerzù nà mɔ̀nyɛ̀ŋgì mò rzayì-rzayì. 38Nà òmà Yerzù à mà hwɛ lì òkòlɛ̀ rzìi a òhwa nanù ema, “È àŋgòhweyà hwà-òkòlèlì hwa mbenda. Hwa lìŋgàni lì ɛ̀ndɛ ò èki ya arzɛ na meŋgòmbè me wahwi. Hwa lìŋgàni ema hwatò hwa hwà kɔmè nà èluhwe nàa ò hwèki hwe hwelùwa. 39Hwa lìŋgàni hvɛ ò lì lìyà ò kònda ja hwèluhwe ò ndawò ja màkanɛ̀ ja wònyà Yudà, hwa lìŋgàni hvɛ hwèki hwe hwèluhwe ò hwèwòka hwe ndèma. 40Hwa lùùmbana hvɛ mekurze erzàŋgò ya awu. Hwa lìŋgàni hvɛ lì ɔ̀jɔ̀nɔ̀ hwatò na màkanɛ̀ ma wahwi. Wɔ̀ hwa lùwa kɔ̀kìrzɛ̀ ya màwɔ̀ŋgɔ̀.”

Jàhwèyà ja mòkurze

(Luk 21.1-4)

41Yerzù à mà lìyà ò tòŋgòŋgò ya iwòŋgò ema hwà mà ika màhwèyà ò Ndawò yà Lohwà. A ma hwɛ lì ɔ̀ŋgɔ nà òmà hwatò hwa mà hwɛ lì ika ìkahvà ja awu ò tenì ya iŋgi iwòŋgò. Rzayì-rzayì ja hwèwàŋgì wɔ̀ hvɛ hwà mà ika rzayì-rzayì ja kahvà, 42ndi ò ma jà mòlìrzà mò mòkurze mò mòlanà à mà aŋgba kahvà ihwàkɛ rzàlì ja hwɛ̀ɛ̀kɛ. Iŋgi kahvà ì mà hwɛ ndi nàa lìyòmɛ̀ la hvilaŋgi. 43Yerzù rzìi a hvɛ̀tɛlɛ hwà-òkòwèlì hwa eni ema hwa je hwa mò kòmbɛ̀nɛ̀, rzìi a hwa òhweyà nanù ema, “Nà e òhweyà è jɔ̀kɛ̀ ema mònò mòlìrzà mò mòkurze mò mòlanà, mò ikayi lì aka hwèwàŋgì hwe arzɛ. 44Wɔ̀ hwa mà ika ndi ò hwèhvetɛ̀lɛ hwe awu hwe rzayì-rzayì, ndi mɔ̀ à ŋgbelì ndi ò lìtake la eni mamɛ ya arzɛ a òhvi ò lòŋgɛ.”

Currently Selected:

Makòrzì 12: bri

Highlight

Copy