Hwègbèèlì 20

Pàwolò a ɛndi ò Màrzèdonìyà na Àkayiyà

1È hvònda ema eŋge kanjɛ-kanjɛ e ma ùke ò lìrzukù. Pàwolò à mà òma à mà hwa mò hwɛlɛlɛ̀ hwàlòkèlì, rzì a hwa ètìrzɛ̀ mèèmà. È hvònda à mà kulɛ lì hwa ètìrzɛ̀ mèèmà rzìi a hwa àkpànɛ̀ɛ, a ɛ̀ndɛ ò erzòòkà ya Màrzèdonìyà. 2Nà òma à mà akeyà hwèŋge hwèrzòòkà hwe arzɛ, à mà òhwa rzayi-rzayi ja hweyà ò lì ètìrzɛ̀ mèèmà me hwàlòkèlì hwa eŋge erzòòkà, rzìi a ɛ̀ndɛ ò èkòmè ya Àkayiyà. 3A ma lìya ŋgbɛ̀ndɛ iyàwò ò èkòmè ya Àkayiyà. A ma hwɛ lì wòŋgirzɛnɛ ò lì ɛndɛ ò èkòmè ya Rzìrìyà aŋga ndi à mà rzɔ̀ŋgìtɛ̀nɛ̀ nanù ema lòŋgò la hwatò hwa wònyà Yudà hwà mà lìyà wùndɛ̀ ya lì mò òŋwa. Aŋga ndi à mà wòŋgirzɛnɛ ò lì timba lì akeyà ò erzòòkà ya Màrzèdonìyà. 4Hwatò ema hwa mà mò òŋgama hwà mà hwɛ ndi Rzòpatà e ŋmanà hwa ama Hvìrzùrzì ema à mà uwɛ̀lɛ̀lɛ̀yi ò mbòwà ndɛ̀ɛndɛ̀ ya Bèrìyà, Arìrztàkùrzì na Rzèkùndùrzì ema hwà mà uwɛ̀lɛ̀lɛ̀yi ò e mbòwà ndɛnɛ ya Tɛ̀rzàlònìkà. Gàyiyùrzì ema à mà uwɛ̀lɛ̀lɛ̀yi ò mbòwà ndɛnɛ ya Dɛ̀bì, Tìmòtì, na Tàyìchìkùrzì na Tlòhvìmùrzì ema hwà mà uwɛ̀lɛ̀lɛ̀yi ò erzòòkà ya Èrzìyà. 5Hwanu wùnyànà hwà mà ɛ̀ndɛ ò wòrzò rzìi hwa jò ambɛ̀lɛ ò mbòwà ndɛnɛ ya Trɔ̀wàrzì. 6O mburza e Ndema ya Hwèhvòòtò ema hwe rza òhvɛ hwindi, irzɔ i ma kpèeyà ò melì me ŋmànja ò mbòwa ndɛnɛ ya Hvìlìpì ò mburza mèenyà meta i ma hwa ùŋmànɛ̀lɛ̀ ò mbòwa ndɛnɛ ya Trɔ̀wàrzì ema irzɔ i ma hwɛ mèenyà lìrzàmbà.

Pàwolò a hvɛhvi e mbòwa ya Trɔ̀wàrzì e ŋgelì ya lìrzùkù

7Ŋgombe hvɔ̀kɔ ya rzàtelì, irzɔ hwa arzɛ i ma arzàŋgànɛlɛ èki yɔ̀kɔ ò lì laa ò lì uŋmɛ̀lɛ̀ e ndìŋgɛ ya ama e Rzàŋgò. Pàwolò à mà wòteyà lì òhwirzɛnɛ hwatò, a hwa òhwirzɛnɛ natɛ̀ɛ na ò e kɔrzi ya wuu, èhwanja mɔ̀ à mà hwɛnɛ lì endɛ ò enɛyi eka ya elele. 8Hwà mà hvàalɛ̀ rzayi-rzayi ja hwètùlù ò tu ya e ŋmanyu ya e ndawò ya ndɛki ema irzɔ i ma arzaŋganɛ. 9Mbèrza hvɔ̀kɔ ema e ma hwɛ̀lɛ̀hwɛ̀ Yùtìkùrzì e ma lìya ò hvànàmà, ijɔ i ma hwɛ lì mò kòòwà tenyi-tenyi ehwànja à mà òhva ijɔ ò mirzɔ̀. Nà òma Pàwolò à mà wàhwirzɛ̀ e mbɔrzi ya eni rzìi e Yùtìkùrzì a rzɔ̀ ò ijɔ, à mà hvòkòwa ò ŋmanyu ya eŋge hvànàmà ya eŋge tùu ya eŋge ndɛki ema e ma ùkirzɛ̀ iyàwò ja eŋge ndawò rzìi a unda ò rze ya mɔ̀nyɛ̀. Nà òma hwà mà ɛndɛ lì mò wòwa, hwa ùŋmànɛ̀lɛ̀ nanù ema à mà màa lì ŋwa. 10Ndi Pàwolò mɔ̀ à mà rzihwa ò rze ya eŋge ndawò rzìi a mò gbiyama ò nyò rzìi a mò rzɛhwɛ. A hwa òhweyà nanù ema, “È rza atàkìrzɛ̀, mɔ̀ à e hwèlì ò lòŋgɛ.” 11Pàwolò rzìi a timba lì agba ò ŋmanyu ya eŋge ndawò ya ndɛki. O mburza hvònda ema mɔ̀ à mà kande èhvòòtò mɔ̀ na hwàlòkèlì rzìi hwa laa, à mà hwa òhwirzɛnɛ natɛ̀ɛ wuunyà wò yahwa. Rzìi à ɛndɛ. 12Wɔ hwà mà ɛ̀ndɛ̀nɛ̀ eŋge mberza ò ndawò ema e hwèlì lòŋgɛ. Hwàŋga hwatò hwà mà lìŋga rzayi-rzayi.

Pàwolò hwà mà anjiya ò Trɔ̀wàrzì hwa ɛndi ò Milɛturzi

13Irzɔ i ma ɛndɛ ò wòrzò ò lì kpèeyà ò tenì ya melì me ŋmànja, rzi ja akeyà ò ŋmànja lì ɛndɛ lì uka ò mbòwa ndɛnɛ ya Arzɔ̀rzi. Aŋga ndi i ma àŋgàmɛ̀nɛyi lì wòwa Pàwolò. Mɔ̀ à mà òhwa nanù ema je ɛndɛ ò wòrzò, èhwanja mɔ̀ à mà ɛndɛ ndi yɔ̀ndɔ̀ ya ŋmindi. 14Nà òma mɔ̀ à mà jò ùŋmànɛ̀lɛ̀ ò mbòwa ndɛnɛ ya Arzɔ̀rzi i ma mò hwanɛ ò melì me ŋmànja rzi je ɛndɛ na mɔ̀ ò mbòwa ndɛnɛ ya Mitilɛni. 15O wònɛyi wùnyà, irzɔ i ma ɛndɛ yɔ̀ndɔ̀ ya ŋmànja lì anjiya aŋga, rzìi jò uka e rzàawà ya ŋmànja ya e mbòwa ndɛnɛ ya Kiyɔ̀rzi. O wònɛyi wùnyà hvɛ irzɔ i ma uka ò e rzàawà ya ŋmànja ya e mbòwa ndɛnɛ ya Rzàmɔ̀rzì, ò wònɛyi wùnyà hvɛ i ma uka ò e rzàawà ya ŋmànja ya e mbòwa ndɛnɛ ya Milɛturzi. 16Pàwolò mɔ̀ à mà kulɛ ndi nanù ema, i hwɛni lì hvanja e mbòwa ndɛnɛ ya Ɛ̀hvɛ̀rzɔ̀rzì ò ŋmanyu aŋga nanù i rza hvaŋga hvònda ò lì uka ò erzòòkà ya Èrzìyà. A ma hwɛ lì ahwèŋgɛ̀ ò lì uka ò mbòwa ndɛɛndɛ ya Jèrurzalɛ̀mù, ò wùnyà wò Pɛ̀ntìkɔ̀rzì à mà atanɛ tɛ.

Pàwolò a akpanɛ ŋmèmba mò Ɛ̀hvɛ̀rzɔ̀rzì

17Nà òma i ma uke mbòwa ndɛnɛ ya Milɛturzi, Pàwolò à mà òma ŋmɛ̀ndì ò hwàtimbelì hwa ŋmèmba mò Ɛ̀hvɛ̀rzɔ̀rzì nanù ema hwa jèe hwa mò ùŋmànɛ̀lɛ̀ ò Milɛturzi. 18È hvònda ema hwà mà uke, rzìi mɔ̀ à hwa òhweyà nanù ema, “Inyɔ hwiti e hwi na òma imba nà mà lìya lìrzakò la arzɛ ema nà mà hwɛ na inyɔ, lì wòteyà wùnyà wò wòrzò ema imba nà mà tɛ̀yirzɛ lìtaŋga ò erzòòkà ya Èrzìyà. 19Nà ma gbèeyà e Rzàŋgò na lì arzirzɛ lì ndɛnɛ, na mirzɔ̀lì, na màkèkìrzɛ̀nɛ̀ ema me ma nò gbeeyɛnɛ, ehwànja wònyà Yudà hwà mà nò kimeya. 20Inyɔ hwiti e hwi nanù ema e hvònda ema nà mà hwɛ lì e òhweyà ŋmɛ̀ndì mò gbamù, nà mà hwɛ ndi lì e òkòlɛ ò mòte, na ò mandawò ma anyu, na rzi e uteya tɔ̀ eyà tɔ̀ yɔ̀kɔ ema e ma hwɛnɛ lì e òŋgòwàna. 21Nà ma kòkòwɛ̀lɛ̀ hwatò hwa wònyà Yudà na hwatò ema hwa rza enje wònyà Yudà nanù ema wɔ hwa hwɛni lì tikòwa ò lì anjiya ò wòhwe wò awu lì timbeya Lohwɛ̀ na lì lòkɛ̀ hvɛ e Rzàŋgò ya arzu Yerzù. 22Ndeŋgànɛ̀lɛ̀ ò naŋgɛ, na òma èlìŋgɛ̀ e nò lìyɛlɛ, na àŋgàmɛ̀nɛyi lì ɛndɛ ò mbòwa ndɛɛndɛ ya Jèrurzalɛ̀mù tɔ̀ nɛ na rza hwiyɛ mamɛ ema e ò nò gbèyɛ̀nɛ aŋga. 23Nà hwi ndi nanù ema ò tɔ ima mbòwa ndɛnɛ ema na ɛndɛ, Èlìŋgɛ̀ yà Wòtani e nò kòkòwɛ̀lɛ̀ nanù ema hwèwòwà na mètàkà me hwèlì me nò ambɛ̀lɛ̀. 24Ndi imba na rza wòwi lòŋgɛ la ami nàa tɔ̀ eyà. Aŋga nanù imba na kulɛ èwòlò ya ami, na èwòlò ema e Rzàŋgò Yerzù e ma nò ŋgbɛ. Èwòlò ya ami e hwèlì ndi ò lì òhwa Ŋmɛ̀ndì mò Gbamù lì hvòmɛ̀nɛ̀ e ndèli ema Lohwɛ̀ à mà uŋmɛ̀lɛ̀ hwatò hwa hwènàmà.

25“Nà ma hwɛ na inyɔ, rzìi na a e òhweyà lì hvòmɛ̀nɛ̀ lìkànèyà la ama Lohwɛ̀. O naŋgɛ na hwi nanù ema tɔ mɔ̀kɔ wa anyu a rza ò nò ɛnɛ hvɛ. 26O eŋgànɛ̀lɛ̀ rzɔ na e kòkòwɛ̀lɛ̀ yawònò nanù ema tɔ̀ ima mɔ̀ wa anyu a wɔ̀lɛ̀nɛ̀ tɛ lòŋgɛ la eni, a hwiye nanù ema imba rza enje aŋga. 27Èhwànja ò rza enje tɔ̀ eyà ema imba na kiyi lì e òhweyà lì hvòmɛ̀nɛ̀ hweyà hwe arzɛ ema Lohwɛ̀ a kimi lì gbeyà. 28È àwòŋgòhwɛlɛ inyɔ hwiti, na lìhwemba la hwatò ema Èlìŋgɛ̀ yà Wòtani ye e ŋgbelì ò rze ya anyu ò lì ɔŋgeya. È hwɛ nàa hwà-ɔ̀ŋgèlì hwa mɛ̀lɛ̀ŋgù e ɔŋgeya hwatò hwa ama Lohwɛ̀. A ma gbeyà ŋmèmba mò eni ò lì hwɛ e mò eni lì akeyà na e kpelì ema è Ŋmanà wà eni a ŋwelɛlɛyi ò mbarza. 29Nà hwi nanù ema, imba nà mà ɛndɛ tɛ, hwatò hwa ò e jà ò ìtììtènì ja anyu ŋgànà hvɔ̀kɔ na òma mòkanyi mò njuwɛ mò kpèeyà ò lìhwemba la mbòlì. Ndeŋgànɛ̀lɛ̀ hwa rza o tànɛ lì ɛndɛ ema hwa rza e hvàŋgelɛ̀ ŋmèmba mò anyu. 30O ò jà hvònda ema hwatò hwa ò uwɛ̀lɛ̀lɛ̀yi ò ìtììtènì ja anyu, ema hwa ò rzɛŋgɛnɛ hweyà hwe lì kɔ, aŋga nanù hwatò ema hwa lòkɛ̀ Yerzù hwa ò hwa òŋgama. 31O eŋgànɛ̀lɛ̀ rzɔ inyɔ e wòwe hvònda ò lì ɔ̀ŋgɛ̀lɛ̀ nanù ema nà mà hwɛ lì òkòlɛ inyɔ hwa arzɛ ò tenì ya ŋmerze na wuu, ò hvòka ya meya meyawò ò tenì ya lìtake. 32O naŋgɛ nanù na e lì ò màà mà ama Lohwɛ̀ nanù ema a e ɔŋgeya. Ŋmɛ̀ndì ema nà mà e òhweyà lì hvòmɛ̀nɛ̀ e ndèli ya ama Lohwɛ̀ mò e òŋgòwàna. Nà hwɛni ŋginyà ò lì e ètìrzɛ̀ ndèŋgànɛ̀lɛ̀ na e ŋgba e ndèli ema Lohwɛ̀ à mà rzekeya hwatò hwa eni. 33Nà rzi òhve tɔ̀ nyɔ̀ŋgi ò lì wòwàna tɔ mòtò tɔ mɔ̀kɔ e rzìlìhwà tɔ̀ e gòòlù ya eni tɔ lìwɔti. 34Inyɔ hwiti e hwi nanù ema, nà mà gbeyà èwòlò na manù màà mà ami, rzìi na luwa wòlì ema irzɔ na hwatò hwa ami ema i ma hwɛ lì gbeyà èwòlò i ma àndane tɔ mamɛ ema i ma arze. 35O tenì ya hwene hweyà hwe arzɛ, imba nà mà e uŋmɛ̀lɛ̀ nanù ema, ò lì gbeyà èwòlò na ŋginyà ò ene ŋgana, aŋga nanù inyɔ e òŋgòwàna hwà-òkèlì na lì ɔ̀ŋgɛ̀lɛ̀ e mbɔrzi ema Rzàŋgò Yerzù a ma òhwe nanù ema, ‘O hwèlì mònàmɛ̀ rzayi-rzayi ò lì ŋgbàà lì aka ò lì wòwa.’”

36È hvònda ema Pàwolò à mà kulɛ lì òhwa, à mà rzuma màwɔ̀ŋgɔ̀ŋgɔ ma eni ò rze na wɔ hwa arzɛ rzi hwa kànɛ. 37Wɔ hwa arzɛ hwà mà hwɛ ndi ò lùwa, na òma hwà mà mò arzàŋgànɛ̀lɛ̀ na ò lì mò kɔmɔ, ò lì mò akpanɛ ò yɔ̀ndɔ̀ ya eni. 38Mamɛ ema e ma hwa lɛmbirzɛ ndùtù rzayi-rzayi, e ma hwɛ ndi e mbɔrzi ema Pàwolò à mà òhwe nanù ema, wɔ hwa rza ò mò ɛnɛ hvɛ. O eŋgànɛ̀lɛ̀ rzɔ hwà mà ɛndɛ ò lì mò lìyɛlɛ ò lì kpèeyà ò melì me ŋmànja.

Currently Selected:

Hwègbèèlì 20: bri

Highlight

Copy