Hwègbèèlì 19

Pàwolò a ɛndi ò Ɛ̀hvɛ̀rzɔ̀rzì

1Nà òma Apòlòrzì à mà hwɛ ò mbòwa ndɛnɛ ya Kɔ̀rintò, Pàwolò à mà akeyà ò tenì ya eŋge erzòòkà rzi a uka ò mbòwa ndɛnɛ ya Ɛ̀hvɛ̀rzɔ̀rzì. A ma ùŋmànɛ̀lɛ̀ ŋgurzu ja hwatò ema hwa lòkɛ̀ Yerzù aŋga. 2Rzìi à hwa ijòwa nanù ema, “È ma luwa Èlìŋgɛ̀ yà Wòtani e hvònda ema e ma lòkɛ̀ e?” Hwà mà mò alàhwɛ̀ nanù ema, “Jàyɛ̀, irzɔ i rzi hweyi a hweyà hvɛ tɔ̀ nanù ema ò hwèlì eyà ema e hwɛ̀lɛ̀hwɛ̀ nanù ema Èlìŋgɛ̀ yà Wòtani.” 3Pàwolò rzi a hwa ijòwa nanù ema, “Ima ŋgana lì lùhwìrzɛ̀ rzɔ ema inyɔ e ma luwe e?” Hwà mà mò alàhwɛ̀ nanù ema, “È nyayi ya lì lùhwìrzɛ̀ la ama Yòwanìrzɛ̀.” 4Pàwolò rzìi a òhwa nanù ema, “È nyayi ya lì lùhwìrzɛ̀ ema Yòwanìrzɛ̀ à mà hwɛ lì òhwa, e ma hwɛ ndi ò hwatò ema hwà mà tikòwɛ ò wòhwe wò awu. Yòwanìrzɛ̀ à mà hwe lì òhweyà hwatò hwa Irzàyɛ̀lì ò lì lòkɛ̀ e mɔ̀ ema a ò jɛ̀ɛ̀ ò mburza ya eni, ema a hwèlì Yerzù.” 5Nà òma hwaŋga hwatò hwà mà hweye mamɛ ema Pàwolò à mà òhwe, hwà mà hwa lùhwìrzɛ̀ lì akeyà na lìinà la ama e Rzàŋgò Yerzù. 6È hvònda ema Pàwolò à mà hwa hwàkɛ̀ màà mà eni ò meyòhvò me awu, Èlìŋgɛ̀ yà Wòtani rzìi e hwa rzihweyà. Rzìi hwa wòteyà lì òhwa ò i hvɛhvɛ mbɔrzi ema hwatò hwa rzi rzɔ̀ŋgìtɛ̀nɛ̀, na ò lì òhwa Ŋmɛ̀ndì mò ama Lohwɛ̀. 7Wɔ̀ hwa arzɛ hwà mà hwɛ eyà ya lìyòme la wunyanà na hwahwakɛ.

8Pàwolò à mà lìya aŋga ŋgbɛndɛ iyàwò. Hvònda tɛ à mà hwɛ lì kpèeyà ò ndawò ya màkànɛ ya wònyà Yudà rzìi hwa a kòòwà e rzi hwɛ mɔ̀ lì òka tɔ wɔ̀ŋgɔ̀. Wɔ̀ na mɔ̀ hwà mà hwɛ ò hvenda ndèŋgànɛ̀lɛ̀ mɔ̀ à mà hwɛ lì keka ò lì hwa telɛlɛ aŋga nanù hwa lòkɛ̀ nanù ema màmɛ ema a hwa òhweyà lì hvòmɛ̀nɛ̀ lìkànèyà la ama Lohwɛ̀ e hwèlì ndi e jɔ̀kɛ̀. 9Ndi lòŋgò la awu hwà mà hwɛnɛ maniya ndèŋgànà hwa rzi emeyà ò lì lòkɛ̀. Hwà mà hwɛ lì òhwa hweyà hwe wòhwe ò marzò ma hwatò hwa arzɛ lì hvòmɛ̀nɛ̀ e Njiya ya ama e Rzàŋgò. O eŋgànɛ̀lɛ̀ rzɔ Pàwolò à mà hwa hwɛmɛ rzìi a ɛndɛ na hwatò ema hwà mà lòkɛ̀. Wùnyà tɛ mɔ̀ na wɔ hwà mà hwɛ ndi ò hvenda ò tenì ya e ndawò ya hwèyòkòlèlì ya ama e mòòkòlèlì Tìlanùrzì. 10Pàwolò à mà gbeyà nanù ò hvòka ya meya mehwakɛ. Ène eyà e ma gbeyà nanù ema wònyà Yudà na hwaŋga hwatò ema hwa rza enje wònyà Yudà ema hwà mà hwɛ lì lìya ò erzòòkà ya Èrzìyà hwà mà hweyà eyà ya Lohwà.

Hwaana hwa ama Rzikehva

11Lohwɛ̀ à mà gbeyà nanù ema Pàwolò a gbeyà hweyà hwe mànyàka ema hwatò hwa rzi nyàmɛ̀lɛ̀ ò lì ɛnɛ. 12Hwàtò hwà mà wòwa tɔ̀ ìpɔ̀tìkà na hwehvɛhvɛni ema Pàwolò à mà gbeyàne, ò lì ɛndɛ lì wɔ̀wìrzɛ̀ hwà-òkèlì, na ò lì ulɛ hwèlìŋgɛ̀ hwe wòhwe ò inyò ja hwatò. 13Lòŋgò la hwatò hwa wònyà Yudà, ema hwà mà hwɛ lì lìŋgòwa èki ya arzɛ ò lì ulɛ hwèlìŋgɛ̀ hwe wòhwe ò inyò ja hwatò, wɔ hvɛ hwà mà keka ò lì gbeyàna lìinà la ama e Rzàŋgò Yerzù ò lì gbèeyà ene èwòlò. Wɔ̀ hwà mà hwɛ lì òhweyà hwèlìŋgɛ̀ hwe wòhwe nanù ema, “Nà ò kànelì ò lìinà la ama Yerzù, ema Pàwolò a òhweyà hwatò nanù ema ò wurze ò nyò ya ama òŋgò mòtò.” 14O ma hwɛ Pìlìrzì e Kàrzami hvɔ̀kɔ ya wònyà Yudà ema e ma hwɛ̀lɛ̀hwɛ̀ Rzikehva. A ma ŋya lìrzamba la hwàna hwa wunyanà. Hwàŋga hwàna ndi hwà mà hwɛ lì gbeyà nanù. 15Ndi ò hvònda hvɔ̀kɔ èlìŋgɛ̀ ya wòhwe e ma hwa òhweyà nanù ema, “Nà hwi Yerzù, ndèŋgànɛ̀lɛ̀ na hwi Pàwolò, ndi inyɔ e hwèlì ndi njɛnɛ e?” 16Oŋgò mòtò ema èlìŋgɛ̀ ya wòhwe e ma kànèyà à mà hwa urzuhweya rzìi a hwa anana hwa arzɛ natɛ̀ɛ hwà mà mò atɛkɛ. A ma hwa anana nyayi ema wɔ̀ hwà mà wurzana lìhwaŋgi na hwehwena rzìi a hwa nyaawàna màatù ma awu. 17Wònyà Yudà na hwatò ema hwa rza enje wònyà Yudà hwà mà hweyà hwene hweyà. Wɔ hwà mà hweye hwene hweyà wɔ hwà mà lɛmbeya wɔ̀ŋgɔ̀. Lìina la ama e Rzàŋgò Yerzù lɔ hvɛ lì ma òhva èluhwe ndɛnɛ. 18Rzayi-rzayi ja hwaŋga ema hwà mà lòkɛ̀yì hwà mà jà, rzìi hwa purzɛlɛ ò mòte wòhwe wò arzɛ ema hwà mà gbeyɛ. 19Rzayi-rzayi ja hwaŋga ema hwà mà hwɛ lì gbeyà èwòlò ya ndimirzi hwà mà jànà i kààtì ja awu ja arzɛ ema hwa ma hwɛ lì gbeyàna ò lì aŋgbana lìyaŋga ò èki yɔ̀kɔ rzi hwa ji rzɛlɛ ò marzò ma hwatò hwa arzɛ. I kààtì ja arzɛ ema hwà mà rzɛlɛ, i ma tanɛ lì hwɛ eyà ya mòrzurzelì mò eyà ya meni meta me hwèlùnì. 20Hwene hweyà hwe arzɛ ema hwe ma hwɛ lì gbèyɛ̀nɛ hwe ma gbeyà rzayi-rzayi ja hwatò ò lì lòkɛ̀ eyà ya ama e Rzàŋgò ndèŋgànɛ̀lɛ̀ ŋmɛ̀ndì mò eni mò ma hwɛ lì nyàla na ŋginyà.

È kanjɛ-kanjɛ ò tenì ya mbòwa ndɛnɛ ya Ɛ̀hvɛ̀rzɔ̀rzì

21O mburza ya hwene hwègbèèlì hwe arzɛ, Pàwolò à mà kulɛ ò ŋmèma mò eni nanù ema a akeyà ò tenì ya hwèrzòòkà hwe Màrzèdonìyà na Àkayiyà ndèŋgànà a e ɛndɛ ò Jèrurzalɛ̀mù. A ma òhwa nanù ema, “Nà mà ɛndɛ tɛ aŋga, na àŋgàmɛ̀nɛ̀yi lì ɛndɛ hvɛ ò lì ɛnɛ èkòmè ya Ròmànì.” 22O eŋgànɛ̀lɛ̀ rzɔ mɔ̀ à mà òma hwà-òŋgòwànèlì hwa eni hwahwàkɛ Tìmòtì na Ɛ̀ràrztùrzì, ò erzòòkà ya Màrzèdonìyà, ndi mɔ̀ à mà lìya ò erzòòkà ya Èrzìyà hvɛ ŋmanà hvòka hvònda.

23O ene hvònda ɔ̀ndi mòhvùŋgu mò ndɛnɛ mò ma hwɛ ò mbòwa ndɛnɛ ya Ɛ̀hvɛ̀rzɔ̀rzì, ò lì hvòmɛ̀nɛ̀ e Njiya ya ama e Rzàŋgò ema hwatò hwà mà hwɛ lì òŋgama. 24O ma hwɛ mùnyanà mɔ̀kɔ ema à mà hwɛ̀lɛ̀hwɛ̀ Dɛ̀mɛ̀trìyùrzì. A ma hwɛ ndi lì gbeyà èwòlò ya wòkuhwa wò rzìlìhwà. A ma hwɛ lì wòndɛ hwèèmà ema hwe ma ayèkɛnɛ̀ hwèèmà ema hwe ma hwɛ ò mòòka mò ama lòòhwà ema lì ma hwɛ̀lɛ̀hwɛ̀ Atɛ̀mìrzì. Ène èwòlò e ma hwɛ lì jànà hwàgbèèlì hwa eni mɔ̀rzɛ̀ŋgì rzayi-rzayi. 25O eŋgànɛ̀lɛ̀ rzɔ mɔ̀ à mà rzàŋga hwàgbèèlì hwa eni hwa arzɛ na hwahvɛhvɛ hwatò ema hwà mà hwɛ lì gbeyà eŋge nyayi ya èwòlò, rzìi a hwa òhweyà nanù ema, “Wònyamòwè kòkò, e hwi nanù ema jò uhwàna wòlì rzayi-rzayi ò ene nyòŋga. 26O naŋgɛ rzɔ, inyɔ hwiti e ma ɛni, na lì hweyà eyà ema ònò mòtò Pàwolò a gbeyà. Mɔ̀ a òhwa nanù ema mòhwa ema mà wòndɛhwɛyi na màà mà hwatò hwa hwènàmà ma rza enje mòohwa. Ndeŋgànɛ̀lɛ̀ mɔ̀ à mà gbeyà rzayi-rzayi ja hwatò e ma hwa hwèlì ò Ɛ̀hvɛ̀rzɔ̀rzì na hwèrzòòkà hwe arzɛ hwe Èrzìyà, hwa lòkɛ̀ nanù ema hweyà ema mɔ̀ à òhwa hwe hwèlì ndi e jɔ̀kɛ̀. 27O eŋgànɛ̀lɛ̀ na òka wɔ̀ŋgɔ̀ nanù ema lìinà la e nyòŋga ya arzu lì hwɛni lì hvàŋgeyà. Rzeke hvɛ tɛ eŋge mɛnɛ na òka wɔ̀ŋgɔ̀ hvɛ nanù ema mòòka mò ama lòòhwà lì ndɛnɛ Atɛmirzi lì rza hwɛnɛ hvɛ tɔ̀ wòlìtò. Hwàtò hwa rza ò mò ɛnɛ nàa yòma hvɛ tɛ òma tɛ mɔ̀ ndi à hwèlì lòòhwà la hwatò hwa arzɛ ò erzòòkà ya Èrzìyà na hwatò hwa arzɛ hwa e rze ya mɔ̀nyɛ̀.”

28Nà òma e ŋgindi e ma hweye hwene hweyà rzìi e tata rzayi-rzayi, rzìi e wòteyà ò lì tɛɛ merzeya nanù ema, “Atɛmirzi, lòòhwà la Ɛ̀hvɛ̀rzɔ̀rzì a imbami lì aka mòòhwà ma arzɛ.” 29Mòŋgò mòhvùŋgu mò ma nyàla ò e mbòwa ndɛɛndɛ ya arzɛ. È ŋgindi rzìi e hvùma Gàyiyùrzì na Arìrztàkùrzì, ema hwà mà uwɛ̀lɛ̀lɛ̀yi o Màrzèdonìyà ema hwà mà hwɛ ò mòndeŋge na Pàwolò, rzìi hwa hwà hwaŋgàna ò ndawò ya wòlìya wò mbòwa. 30Pàwolò ŋmìti à mà wòŋgirzɛnɛ ò lì kpèeyà lì tɛ̀mɛ̀ ò wòrzò wò eŋge ŋgindi. Ndi hwàlòkèlì hwà mà mò aya. 31Tɔ lòŋgò la hwàkànèlì hwa eŋge erzòòkà ema hwà mà hwɛ hvɛ ndi imbunda ja ama Pàwolò wɔ hvɛ hwà mà mò òmeya ŋmɛ̀ndì, ò lì mò rzòrzòmeya nanù ema a rzi kpèeyà ò tenì ya eŋge ndawò ya hwèlìyelì.

32Wòlìya wò arzɛ wò ma hwɛ ndi kanje-kanje, lòŋgò la hwatò hwà mà hwɛ lì tɛɛya eyà yɔ̀kɔ, hwanɛyi wɔ hvɛ hwa tɛɛya ehvɛhvɛ. Èhwanja rzayi-rzayi ja awu hwa rzi hwiye tɔ mamɛ ndeŋgatɛ hwà mà arzaŋganɛ aŋga. 33Lòŋgò la hwatò hwà mà kulɛ ndi nanù ema, Alɛ̀rzàndrìyà ndi à mà hwɛnɛ e njɔ̀mì. Kanatɛ mɔndi hwatò hwa wònyà Yudà hwà mà òme ò lì hvuŋgana. Alɛ̀rzàndrìyà rzi a karzɛ lìya la eni ò ŋmanyu ò lì arza lì òhwa eyà ò lì arzùŋgɛ̀ ò marzò ma hwaŋga hwatò. 34Ndi na òma hwà mà ayembɛ nanù ema, Alɛ̀rzàndrìyà a hwèlì ndi mòtò wa wònyà Yudà, wɔ hwa arzɛ hwà mà tɛɛ mòrzeya mò eyà yɔ̀kɔ ò awa ihwakɛ nanù ema, “Atɛmirzi, lòòhwà la Ɛ̀hvɛ̀rzɔ̀rzì a òlò lì aka manɛyi mòhwa.” 35O lìrzùkù e mòtilelì wa e mbòwa ndɛnɛ à mà lɔ̀kɔ mòŋgò mɔtɔwu. Rzìi à òhwa nanù ema, “Wònyàmòwe kòkò hwa Ɛ̀hvɛ̀rzɔ̀rzì, ò jɔ̀kɛ̀ njɛnɛ a hwèlì anu rze, ema a rza hwiyɛ nanù ema, Ɛ̀hvɛ̀rzɔ̀rzì ndi à hwèlì e mbòwa ndɛnɛ ema e ɔŋgeya mòòka mò ama lòòhwà la arzu lì ndɛnɛ Atɛmirzi. Ndeŋgànɛ̀lɛ̀ tɔ̀ ima mòtò a hwi nanù ema ene mbòwa ndɛnɛ ndi e ɔŋgeya lìŋyàyi la wòrzaŋgi ema lì ma uwɛ̀lɛ̀lɛ̀yi ò ŋmanyu yà lohwà. 36Kanatɛ inyɔ hwa arzɛ e hwi nanù ema tɔ mòtò a rza tanɛyi a una hvenda ò ene eyà, ò rza lɔ̀wu nanù ema e gbeye tɔ mòhvùŋgu. 37Inyɔ e ma jana hwanu hwatò anu tɔ̀ nɛ wɔ hwa rzi hwɛ tɔ yòma ò tenì ya mòòka mò arzu, ndèŋgànɛ̀lɛ̀ hwa rza òhwi tɔ eyà ya wòhwe ò lì teŋgɛ̀nɛ̀ lòòhwà la arzu. 38È hwèlì tɛ nanù ema Dɛ̀mɛ̀trìyùrzì na hwàgbèèlì hwa eni hwa hwɛni tɛ eyà ò lì teŋgɛ̀nɛ̀ mòtò, ikòti i lìhvòhwèlì ndèŋgànà hwàkànèlì hvɛ hwa hwèlì, wɔ̀ hwa tanɛyi lì rzɔ̀mɔ̀nɔ̀ òŋgò mòtò aŋga. 39Ndi e hwèlì tɛ nanù ema inyɔ e arza tɛ eyà ema e akayi nanù, e hwɛni ndi lì rzeyahwɛlɛ ò ndawò ya hwèlìyelì hwe mbòwa na òma e mbenda e òhwa. 40Nà òhwa ndi nanù ehwànja eyà ema e gbèyɛ̀nɛ yawònò, e Gɔhwina ya Ròmànì e òhwa ndi nanù ema i gbeyà ndi mòhvùŋgu. O rza enje tɔ lìtiŋga ema irzɔ i gbèeyà lìni lùwànje. O rza enje tɔ lìtiŋga la jɔ̀kɛ̀ ema irzɔ i tanɛ lì hwa ŋgba lì hvòmɛ̀nɛ̀ mònò mòhvùŋgu.” 41Nà òma à mà kulɛ lì òhwa nanù, rzi a wùulɛ̀ e ŋgindi.

Currently Selected:

Hwègbèèlì 19: bri

Highlight

Copy