Lûk 2

Epîə ə Njisə̀sè

(Matyò 1.18-25)

1Ə̀ tè nyi kepî mtuʼ nə mɛ, Àngostòs fɔ̀yn ə̀ endaʼ ə Lûmzè ə fɨsə̂ alâŋ kyîke nə ə nyaʼ nâʼàpî ezə ə ndeze. 2Zə nə ghɨnəmə e nyi ghɛ ə tè nyàʼ sə shi kè kə Kìlinùs kɔʼ sə pɛ̀ tə̀ʼ ə Silyà. 3Nâʼà pi ndè e kɛsə ndùə ə ghənə ə tɔ̂ŋ se nyàʼ ezə ə vəynze.

4-5Njosɛ̀f ə fɨə ə tɔ̂ŋ ə̀ Nazalɛ̀t ə Ngalìlî ə kɔʼɔ ə Petlɛ̀ghêm ə Njòndyâ mə ə̀ za nyi tɔ̂ŋ ə̀ fɔ̀yn Ndàfît kûmə̀ nə è tè nyi wùə èsas ə ndɛ̂ Ndàfîtzè. È tè ndùə se nyàʼ əzə ə yî Mèlighe kə è tè njiə sə zhwi. Ə̀ nyi za Mèli e nyi èndwɔ̂. 6Ə̀ tè nyi kə ghənə pa nyi ke fumə, shîŋə̀kè ə kwənə kə è piə. 7È və pîə va vəyn və̂ ngɔ̀yn, ə nyi vâyn ndômə̀, ə ngolə̂ vəyn ə èpɨ̂aŋ ə sendzɨse ə nyɨ̀ŋsə̀ vəyn ə ngwùʼ zɛ ə nyamse tè zhiə ətəyn kûmə̀ nə luʼe tè kɛse va ə ndɛ zɛ ə ghɨ kwiə tè pə̀ ndamtə̂ ətəyn.

Tsì sə Fezhə̀sè ə tsàyn tom ə̀ vayn se ngyəyn sə sepfɨse

8Ə̀ tè nyi kepî mtuʼ nə mɛ̂, ngyəyn sə sepfɨ shîse e nyi apàs endaʼ nə kɛmə, tsɨ̂ŋnə̀ sepfɨ sə ghənə̂sè ètuʼve. 9Tsì ə̀ Pɛ̂pɛ ə fɨə ə ghənə ekyàʼ, pomsê ə Fezhə̀zè ə kyìŋə̀nga ghənə, ghənə e sè fânə̀ nâʼà sə ŋaŋ. 10Pîza, Tsì ə̀ Pɛ̂pɛ nə zɛ ə pìə sê ghənə nə, “Kə ghàyn fayn, m pəyn è tom èchùŋ sê ghàyn, è nyi se fo esaŋnê sê ghɨghe əkɨ̂m. 11Ə̀ piə Tsàmtè se ghàyn ndâyn ə tɔ̂ŋ ə̀ Ndàfît, ə̀ nyi Klâys Pɛ̂pɛ. 12Zɨ̀nə nyi chwiə sê ghàyn. Va təyn nyi mə ə ngole èpɨ̂aŋ ə sendzɨse ə nyɨ̀ŋsə̀ ə ngwùʼ zɛ ə nyamse nə̂ zhiə ətəyn.”

13Kè sə ashìŋə̀, nɔ̂yn ə setsì kyîke ə pə̀ kwəynsə̂ sè tsîtə̀ Fèzhə̀ pîə nə: 14“Pomsêzè sê Zhə̀fè elùʼ engaŋtəve ekwùtwəyn, pɔ̂ynè e nyi ə chi sê ghɨ ghɛ ə È kɔ̀ŋɔ̀!”

15Kə Tsì nə sɛ zà ghənə ə kɛsə̂ kɔʼɔ ekwùtwəyn, ngyəyn sɛ e pîə sê ngɨŋ sə ghənə̂sè nə, “Ə ghâsènì tyaŋ ə Petlɛ̀ghêm ə fe ghɛ zɨnə ze kyàyn, kə Pɛ̂pɛ tsâyn sê ghâsènì.”

16Ghənə ə zàŋsə̀ ndùə ə fe Mèli yî Njosɛ̀f è vayn, è nyiŋ ə ngwùʼ. 17Kə ngyəyn sə təynse fe Njisə̀s ə tsà èghɛ zɛ tsì fè pì sê ghənə kûmə̀ vayn nə vɨ̂yn. 18Ə̀ tè zɨə naʼapi ndè ghɛ zɛ ə ngyəyn sə sepfɨ nə sɛ pì, kayntə kəndò. 19Pîza Mèli ə ndəmə̀ ə̀ghɛ nə ghɨyn ə vəyn ekwâʼtè, ghə faŋa kəndò. 20Ngyəyn sə sepfɨ sɛ ə kɛsə̂ ndò sè tsɨ̂tə̀ ndûə Fèzhə̀ fɨnə tɨmə tèkɨ̂m sê Fəynfe eghɛ zɛ ə ghənə fe ə fɨnə zɨə, kè kə tsì fe tsàyn sê ghənə.

Ə tsɨ̀ zə ə vayn

21Ə̂ pə̀ kə̂ ə se nam ə vanə ə mtuʼ mfamə, ə̂ tsɨ̀ə ezə ə vayn nə Njisə̀s, kè eghɨ kə tsì tè pə̀yn pi, ndɔ̀ʼɔ nyiəm pɔŋ vəyn.

Ə ndù tyəyn vayn ə Ndɛ Ètsə̀mə

22Tuʼ ətəynve ə kwənə kə ghənə ndù shu sengɨŋ sə ghənə̂sè kə Saʼ ə Mosîsè tè tyə̀nə, ghənə ə njìə kɔʼɔ è vayn ə Njèlusalɛ̀m se tyəyn sê Pɛ̂pɛ 23kûmə̀ nə saʼ ə Pɛ̂pɛze tè tyə̀nə nə, “Ə̀ fɨə pìə vâyn ndômə̀ èkwə̀ endwɔ̀ sə shi, ə ndə̀mə̀ nə ə nyi va Pɛ̂pɛ.” 24Ə tè kɔʼ è vəyn zâ, ndùə kəpi se lwiynse esaʼ ə Pɛ̂pɛ zɛ ze tè pìə nə, ə kyi se fo mkwɨ̀lə̂ m̀pɛ̀ ə va za ə̂ fo nɨ̂ŋtə̀ mɛ m̀ nyi kə mə̂yn mè m̀pɛ̀.

25Ə̀ tè nyi zâ wùə vîvè e nyi ə Njèlusalɛ̀m, zə vəynze e nyi Simyòn, Zuʼse Ŋwaʼase e nyi ə və tu, è ndamə kə nâʼà chichi, njiə àshîŋə̀ se fɨ̂aʼ efɨaʼ ə Fezhə̀e. È tè lɨmtə kə etuʼ vɛ kə̂ Pɛ̂pɛ tə zə̂sə̀ shîəm mə ghɨə Isìlâym̀ ətəyn, 26mə Zuʼse Ŋwaʼase ə tə tyə̀yn sê vəyn nə è tə kwuə va ə̀ tsɛ̂ kə va mə è və fe wùə vɛ Pɛ̂pɛ tè se nyi mə è və chɔʼ se tom. 27Ə̂ pə̀ kə̂ pɨ̀a Njisə̀s yî nyìə vəyn nji pə̂yn è vəyn ə Ndɛ Ètsə̀mə kə ə nəyn sê vəyn kə saʼze tè piə, Zuʼse Ŋwaʼase ə chisə Simyòn, è və ndò ndùə fumə kèpi ashìŋə̀ nə kɛ 28ə fiə vayn, ə kyiə ə gho sè kɔʼsə̂ Fèzhə̀ piə nə: 29“Nə̀ ndù zôyn ə Pɛ̂, ə wufɨ̀aʼa vɛu ndo ke nâʼà e pɔ̂ynè kə ò tè tsɨ̀ne, 30kûmə̀ nə shi ghɨmghe ə fe kə ò tè sɔzâ əghɨ ghɛ 31ghɨghe əkɨ̂m ə fe. 32Sɔ̂sè nə zɨnə mə tə nə ə ze ə nyi epayn zɛ e tyə̂nə̀ paynsə̂ ndôm vɛve sê ghɨ ghɛ ə̀ va əghɨ ə Njûsghè, fo èpomsê sê ghɨə Isìlâyghè, əghɨ ghɛ.”

33Pɨ̀a vəyn è nyiə vəyn tè nyi è kayn kûmə̀ əghɛ ghɛ ə Shimùyn tè pi kûmə̀ vayn nə vɨ̀nə. 34Simyòn ə pɔsə̂ ghənə ə ke pi sê Mèli nə, “Ò ke nə Zhə̀fè ə ndə̀m vayn vɨ̂yn nə è tə ndwisè ə̀ghɨə Isìlây ghè, ghe tsɨ̂ə kə nyi, ə è pfɨse yîə, ghe tsɨ̂ə kəpi za. Ə̂ è faŋ kepî sə chwiə zɛ ghɨə nə nyə̂ʼsə̀, 35è kɨ̂sè kə̂ ghɛ ghɛ ə ghɨə ndə̂tə̀ ə ghənə ətəm fɨ mɨ̂sè ə ndayn. Nyife nyi kepî se nə sò etəm zɛze.”

36Ə̀ tè nyi zâ, fɨ̀aʼtè èzəyn zhizè e nyi, e tɔŋtə̂ nə Anà, ə va Fànuwɛ̂l, ə wùə ètàŋ ə Ashàzè, mə è və ndəmə̂ nâʼà àchûŋ. È nyi mə è və tə malə ə ndamə kə yî ndomə̀ vəyn sə sepìŋ sèsɛ̀mbɛ. 37È və kwuə ze sè nyi za mə è və ndəmə̂ sè nyi sepìŋ mghɨm famə njòse kyàʼ nâʼà pîza ndam tsɨs ke ə Ndɛ Ètsə̀mə kɔʼsə̂ Fezhə̀ pamə ècho tsə̂mə̀ èchwì tsə̂mə̀ etuʼve. 38Ə̀ tè se nyi ashìŋə̀ kɛ ə pə̂yn è Njisə̀s ə ndɛ Fèzhə̀ è və njiə pə̀ ə fo àzɔ̀ŋnè ə vaynke sê Zhə̀fè sè tsâ èghɛ ə vayn nə zɨ̂yn nâʼàpî sê ndè vɛ è tè lɨmtə nə Zhə̀fè pəyn fɨsê əghɨə Njèlusalɛ̀mghè ə ngəʼ.

Ə kɛsê kwɨlə̂ è vayn

39Njosɛ̀f yî Mèli ə mɨ̀sè naʼapi ghè kè kə saʼa Pɛ̂pɛze tè tyə̀nə ə kɛsə̂ kwɨlə̂ ə ghənə̂ tɔ̂ŋ ə Nazalɛ̀t ə Ngalìlîe. 40Vayn sè ndəmə̂, zuʼse ə vəynse e tɛnə̂, tɔf eghaʼâ ə vəynze e ndəmə̂ ndùə kə əshi, Zhə̀fè e fɨnə pɔsə̂ vəyn.

Njisə̀s ə ndù wâmnè ə Ndɛ Ètsə̀mə

41Pɨ̀a Njisə̀s yî nyiə vəyn tè ndamə kɔʼɔ kə pìŋ sekɨ̂m ə Njèlusalɛ̀m se zhiə etuʼ Ezaʼa tsɛe. 42Vayn ə tə ndəmə̂ taynə̀ pìŋ njò sepɛ̀, ghənə ə kɔʼɔ kəpi fu kə ghənə tè ndamə kɔʼɔ. 43Ə tə zhi mɨ̂sè èzaʼa tsɛe, ghənə e sè kwɨlə̂, pîza Njisə̀s ə faŋa kə epàm ə Njèlusalɛ̀m, pɨ̀a yî nyi e ke va, 44kwâʼtə̀ kə nə è nyi əfètəyn ə̀ ghɨ̀. Ghənə ə kwiə sə fetuʼ fe fɨ̂plèfè ə kɛsə̂ sè pfɨfə vəyn sê ghɨ esas ə ndɛ ə ghənə̂zè è ghɨə mɔ̀ʼɔ̂ ghɛ ə ghənə tè kè vəyn, 45pîza fe va, ə kɛsə̂ kɔʼɔ ə Njèlusalɛ̀m sè kyiŋə vəyn fumə. 46Ə kyiŋə sə mtuʼ mta ə ndùə fè vəyn ə Ndɛ Ètsə̀mə, è tsɨs yighə̀ tyə̀ynsè, zɨtə̂ ə̀ghɛ ghɛ ə ghənə piə fɨnə pfɨftə̂ ghə mɔ̀ʼɔ̂. 47Ə̀ tè zɨə piə ndè kə è wàmnə̀, kayntə̂ kəndò nə̂, è nyiə nji ghayn tɔfe nyiə. 48Ə pə̀ kə pɨ̀a vəyn è nyiə vəyn fè vəyn za, ghɛ ətəynze e kwə̂mə̀ sê ghənə! Nyiə vəyn ə pfɨfə sê vəyn nə, “Vayn vɨm, kûmə̀ ghè ò nə̀yn kyi eghɛ nyiə sê ghàs ə? Ghasè pɛ̂ ə kyiŋ gho sè fànə̀.”

49È və pfɨfə sê ghənə nə, “Ghàyn fè kyiŋə zayn mi elùʼ ə ndô və? Ghàyn fè mɛ ndô nə m kyi sə̂ nyi ə̂ Pɨ̀a vɨ̂mvè ə ndɛ ə̀?” 50Pîza ghənə tàʼa zɨə kê eghɛ zɛ è pi.

51È və ndò ashìŋə̀ nə kɛ ə kɛsə̂ tso ə Nazalɛ̀t yî ghənə sè zɨə sê ghənə. Nyiə vəyn ə ndə̀mə̀ əghɛ nə ghɨyn nâʼà əkɨ̂m ə vəyn ekwâʼtè, ghə faŋa kəndò. 52Njisə̀s e sè ndəmə̂ kɔʼɔ kə nâʼà àchûŋ, tɔf eghaʼâ ə vəynze e tɔ̂ʼɔ̀ ndəmə̂ ndùə kə èshike. Zhə̀fè e kɔ̂ŋɔ̀ vəyn, nâʼà ə̀ghɨ e pɔŋɔ kɔ̂ŋɔ̀ vəyn.

Currently Selected:

Lûk 2: bfm

Highlight

Copy