Lûk 3

Ezaʼlê ə Njɔyn Foə M̀mòze

(Matyò 3.1-12; Mâk 1.1-8; Njɔyn 1.19-28)

1-2Ə̀ tè nyi kə̂ Tìpelùs saʼa kə̂ fɔ̀yn èghaʼâ ə endaʼ ə Lûm, mə sè kɔʼɔ ndùə sèpiŋ njòse tâyn, tom ə Fèzhə̀ ə pə̀ sê Njɔyn, va Sàkàlyâ, endaʼ ashəshəe. Ə̀ tè nyi za mə ə ndə̀m Pontus Paylɛ̀t nə è və saʼa apàs endaʼ kɛ ə tè tɔŋtə nə Njòndyâ, Ɛlɔ̀t e saʼa ə Ngalìlî, ànyìə vəyn Filìp e saʼa epɨ̀as endaʼ vɛ ə tè tɔŋtə nə Ètolyà è Tɨ̀làkɔnitis, Lisanyàs e saʼa ə Apɨ̀lɛ̀n, ghɨkɔʼsə nə eshyə̀ engaŋtə kwəynəghe è ghɨə Njûsə̀ mə nyi Anàs yî Kayfàs e nyi kepî etuʼ nə vɛ. 3Njɔyn ə fɨə ndùə ə Njondàyn kwiə ka kə endaʼ ətəynze ekɨ̂m, ndaʼà tom ə̀ Fèzhə̀ nə zɛ, piə nə ghɨ kwiyne təmə ə ghənə, ə fi môm kə Zhə̀fè lɛse fo sèpi sə ghənə̂sè. 4E tè nyi ke eghɨ kə fɨ̀aʼtè Èsayà tè nyaʼ nə: “wùə vɛ è ndàʼà ə endaʼ ashəshəe nə, Ghàyn fɛte ndom ə Pɛ̂pɛve; ghàyn nə̀yn ndômnə̀ mə Və̂ynmè, ə m̀ mə nânə̀. 5Naʼapi afɔŋne àkè kyi se lwiyn, ə pfɨyn seghaʼâsè è se tətə̂sè tso. Ndomte ngɔynəte kyi sə̂ nânə̀, nə ə pfɨse pɔ̂pɔ̀ʼɔ̀m ə tendom nâʼà tèkɨ̂m kə luʼ tekɨ̂m ə nyi tèpa. 6Naʼapi ndè tə fe èsɔ̂sè zɛ Zhə̀fè tə pə̂ è zəynze.”

7Ə̂ pə̀ kə nɔ̂yn ə ghɨ̀kè fɨ pə̀yn se fiə mmo, Njɔyn e zɔ̂ sê ghənə piə nə, “Mbamse pi sɨ̂nə̀, ə tɔfse nde ghàyn, kə ghàyn ə mɔ̂msə̀ se tə ngəʼ zɛ Zhə̀fè kyiŋə se tom sê ghàyn ə? 8Ghàyn muə ètwɔm ə ghàyn etsɨsə̂ se tyə̀yn nə ghàyn ə kwiyne təm ghayn ghe pighe. Kə ghàyn ə kwàʼtə̀ kə nə ghàyn kàʼa ə ghàyn tə ngəʼ ə̀ Fèzhə̀ nə zɛ kè kûmə̀ nə ghàyn piə nə, ghàyn nyi əghɔ ghɔnə sê Aplàghâm. M tsâ sê ghàyn nə Zhə̀fè kàʼa ə fe nə̀yn, ə chi ghɨnə kɛse sə əghɔyn, ə è fo sê Aplàghâm. 9Njàm nyîə nyi è pɨaʼtêzè se kwə̀lə̂m mkaʼ ə te ghàŋ. Ə faŋ pî fèkâʼ fè kè se mu etwɔm echûŋvè, ə kwə̀ mâʼà ewùs.”

10Nɔ̂yn ə ghɨ nə kɛ ə pfɨfə sê vəyn nə, “Ghàs nyiə nə̀ kwiə nâʼà zàyn zô?”

11È və pi sê ghənə nə, “Ə̂ kyi naʼapi ndè ndzɨse sepɛ̀, è və fo sèmɔ̀ʼ sê wùə vɛ è kyi pîva səkɔs, ə̂ kyi pî ndè Fɨazhiəu, è və pɔŋɔ chyàtə̀ fo əghɨ mɔ̀ʼɔ̂.”

12Ghɨ ghɛ ə ghe tè tənə tâksè ə pɔŋɔ pə̀ se fiə mmo ə pfɨfə sê vəyn nə, “Ghàs nyiə nə̀ pɔŋɔ gha ghè ə Tyə̀ynsè?”

13È və piə sê ghənə nə, “Kə ghàyn fɨyn nə̀yn nə wùə ndàʼ kɛ ə taksvè, ə və tsɨ̂ə tsɛ̂ kə ve fè kyi sə̂ nyi.”

14Sokə̀ʼse ə pɔŋɔ pə̂ ə pfɨfə nə, “Ə nâʼà ghàs ghayn ghe?”

È və piə nə, “Kə̂ ghàyn fɨyn fi àfɨa ə wûəkè sə atyaʼ, kə̂ ghàyn fɨyn pi nə wùə ə nə̀yn ghɛe, ndɔ̀ʼɔ è nə̀yn, kûmə̀ kə nə ghàyn kyiŋə àfɨa. Ghàyn zhiə kə ekɛ vɛ ə ndâʼà ghàyn ə təyn.”

15Ə̀ tè nyi kə ghɨə naynə̂ Njɔyn, nyaʼâ kayntə̂ kə sê ngɨŋ sə ghənə̂sè nə ə̀ nyi vəyn vɛ ə chɔʼ ndə̂m mə. 16Njɔyn ə piə kə sê ghənə əkɨ̂m nə, “M fo m̀mo sê ghàyn kè nâʼà è mômə tsòm, pîza wùə pə̂ ndò ə mi epàm tsɛ̂ mi, m kwənə pi va se zhə̂nə̀ se kwɨ̀l sə sepfɨ sə ghòl sə vəynse, è tə nə̀ ə è və fo m̀mo sê ghàyn è Zuʼse Ŋwaʼase è kɨ̂sè èwuse. 17Nâʼà zô nyi, è kyi ke kɨ əvəyn ə və gho se foptə̂ sesɔ̀f se ndə̀m ə vəyn etwəyn, se nyɔ̀ʼɔ se pfɨəse ewùs, mə ve pɛ̂, ndɨmə̂ va.”

18È və piə za ə tsà tom èchùŋ sê ghənə ə fɨnə təftə̂ ghənə ə tendom, te tsɨ̀ə kə nyî 19Ə̀ tè nyi za mə Njɔyn ə tè zɔ̂ sê Ɛlɔ̀t vɛ è tè saʼa apâs endaʼ kyîke, kûmə̀ nə è kyi fi Ɛ̀londyàs, ə zhwiə ànyìə vəyn ə fɨnə nə̂ kəpi əghɛ pi yiə. 20Kə Njɔyn tè zɔ̂ sê vəyn zâ, è və fɨnə nə̂ kə zəmɔ̀ʼɔ̂e, ə kyiə fâ Njɔyn ə chaʼ.

Njisə̀s ə fi môm

(Matyò 3.13-17; Mâk 1.9-11)

21Ghɛ nə ghɨnə tè piə kyànə za, mə Njɔyn tè nyi mə è və fo mɨ̀sè môm sê ghɨə, tuʼfîfe, Njisə̀s ə pə̀, è və pɔŋɔ fo m̀mo sê vəyn. È ve sè tsə̂mə̀, ke nyi, kwùtwəynve ə chwìə. 22Zuʼse Ŋwaʼase ə tso pə̂ ə və tu, kyàʼà kə kə akwɨ̀l, kyə̀ ə fɨə ekwùtwəyn piə nə, “Ə̀ nyi ke nâʼà ghò Vayn èkɔ̀ŋ vɨ̂m, m saŋnə̂ kûmə̀ ghò sə nɨŋ.”

Pɨ̀aə Njisə̀s ghə shiə

(Matyò 1.1-17)

23Njisə̀s tè piə è zhə̀tə̀ èfɨ̂aʼ əvəynze ə chi, ə sepìŋ m̀ghɨ̂m ta, nyi va Njosɛ̀f kè nâʼà kə ghɨ tè kwàʼtə, mə pɨ̀a Njosɛ̀f tè nyi Èli, 24Èli e nyi va Matàt, Matàt e nyi va Levì, Levì e nyi va Melkì, Melkì e nyi va Njanày, Njanày e nyi va Njosɛ̀f, 25Njosɛ̀f e nyi va Màtatyàs, Màtatyàs e nyi va Emòs, Emòs e nyi va Nawùm, Nawùm e nyi va Eslì, Eslì e nyi va Nangày, 26Nangày e nyi va Mât, Mât e nyi vayn Màtatyàs, Màtatyàs e nyi va Simə̀yn, Simə̀yn e nyi va Njosɛ̀k, Njosɛ̀k e nyi va Njondà, 27Njondà e nyi va Njòwanà, Njòwanà e nyi va Lesà, Lesà e nyi va Zɛ̀lupàpɛ̂l, Zɛ̀lupàpɛ̂l e nyi va Shietèl, Shietèl e nyi va Nelì, 28Nelì e nyi va Melkì, Melkì e nyi va Andi, Andì e nyi va Kosàm, Kosàm e nyi va Emandàm, Emandàm e nyi va Êl, 29Êl e nyi va Njoshwà, Njoshwà e nyi va Èlyezà, Èlyezà e nyi va Njolim, Njolim e nyi va Matàt, Matàt e nyi va Levì 30Levì e nyi va Simyòn, Simyòn e nyi vâ Njondà, Njondà e nyi va Njosɛ̀f, Njosɛ̀f e nyi va Njonàm, Njonàm e nyi va Èlyakìm, 31Èlyakìm e nyi va Milyà, Milyà e nyi va Menà, Menà e nyi va Màtatà, Màtatà e nyi va Natàn, Natàn e nyi va Ndàfît, 32Ndàfît e nyi va Njesì, Njesì e nyi va Opèt, Opèt e nyi va Powàs, Powàs e nyi va Salmòn, Salmòn e nyi va Nashòn, 33Nashòn e nyi va Àminandàp, Àminandàp e nyi va Atmìn, Atmìn e nyi va Ani, Ani e nyi va Ɛsɛlòn, Ɛsɛlòn e nyi va Pèlês, Pèlês e nyi va Njondà, 34Njondà e nyi va Njàkɔ̂p, Njàkɔ̂p e nyi va Azɨ̀k, Azɨ̀k e nyi va Aplàghâm, Aplàghâm e nyi va Telà, Telà e nyi va Nawò, 35Nawò e nyi va Selùk, Selùk e nyi va Lû, Lû e nyi va Pelèk, Pelèk e nyi va Epà, Epà e nyi va Shelà, 36Shelà e nyi va Kenàn, Kenàn e nyi va Afasàt, Afasàt e nyi va Shêm, Shêm e nyi va Nuwà, Nuwà e nyi va Lamèk, 37Lamèk e nyi va Mètuselà, Mètuselà e nyi va Enɔ̀k, Enɔ̀k e nyi va Njalèt, Njalèt e nyi va Màalalèl, Màalalèl e nyi va Kenàn, 38Kenàn e nyi va Enɔ̀s, Enɔ̀s e nyi va Sêt, Sêt e nyi va Andàm, Andàm e nyi va Fèzhə̀.

Currently Selected:

Lûk 3: bfm

Highlight

Copy