Lûk 10

Njisə̀s ə tom chùmtè èpàm sə vəynse m̀ghɨ̂m sɛmbɛ njò sepɛ̀

1Ə̀ tè nyi epàm əghɛ nə ghɨyn, Pɛ̂pɛ ə chɔʼtə̂ ə̀ghɨ mɔ̀ʼɔ m̀ghɨ̂m sɛ̀mbɛ njò sepɛ̀ ə tomə ghənə, ə pɛ̀ ə pɛ̀ nə ghənə ndù əshi ə setɔ̂ŋ sekɨ̂m è luʼ tɛ nâʼà vəyn tè nyì se ndù ətəyn, 2ə fɨnə piə sê ghənə nə, “Fɨazhiəve se nyi se kwi, tsɨ̀ə kə nyi, pîza ghɨe kwiəghe tsɨ̂ə va. Ghàyn tsə̀m sê Pɛ̂pɛ Zhə̀ fayn fɛ ə fe nyi Pɛ̀ àfùʼ, ə fe tom kwəynse ə̀ghɨ efɨaʼa, ə ghe səʼ kwi kwɨlə è vəynve. 3Ghàyn ndu, pîza ghàyn ke nə m tomə ghàyn kə ghɔ sendzè əfètə̂ senyàm sə epɨase. 4Kə ghàyn nji kɛve pi shəyn àwaf. Kə ghàyn nji kwəynse sepfɨ sə ghòl shise. Kə ghàyn nji shîŋə̀kè se tɔŋtə wùə endom. 5Ə ghàyn ndù nji naʼapi apɨəyn àkè, ghà tɔŋtə əghɨ təynghe sə shi ə piə nə, ‹Zhə̀fè fo pɔ̂ynè sê ghàyn əkɨ̂m fà apɨəyn.› 6Ə Wùə nyi fu apɨəyn kwəynə sə̂ kyî pɔ̂ynè, ə pɔ̂ynè zâyn ndu sê vəyn. Ə wùə va, ə pɔ̂ynè ətəyn kɛse pə̀yn sê ghàyn. 7Ə ghàyn faŋ ke fumə apɨəyn, zhiə fɨnə mɨə naʼapi ghè vɛ ə fo sê ghàyn kûmə̀ nə ə kyi sə̂ ndâʼà wufɨ̀aʼa. Kə ghàyn nə tyâŋtə̀ m̀pɨəyn. 8Ə ghàyn nji naʼapi ə tɔ̂ŋ èkè, ə fiə ndə̂mə̀ naʼapi ghayn ghàyn, ghàyn ə zhiə naʼapi ghè vɛ ə fo sê ghàyn. 9Ə ghàyn nji ə tɔ̂ŋ nə zɛ, ghà tsuʼə əghɨ zafə ghɛ ə ghe nyi ətəyn ə tsà sê ghənə nə, ‹Fɔ̂yn ə Fezhə̀vè ə paʼse sê ghənə.› 10Pîza ə ghàyn nji ə tɔ̂ŋ, ə̂ tàʼa fiə ghàyn, ghà fɨə ndùə ə tendom tetɛte ə piə sê ghɨ nə ghɛ nə, 11‹Ghàs puʼtə̂ tsɨ̂sə̀ àpɨ̂l ə tɔ̂ŋ kayn kɨ̂nə̀ ə ghàs əghòl nyi se tyə̀yn kə̂ chwiə nə ngəʼ zâynzè ə faŋ sê ghàyn. Pîza ghàyn e ke nə fɔ̂yn ə Fezhə̀vè ə paʼsê sê ghàyn.› 12M pîə sê ghàyn səmɔʼ nə ə̀ tə nə̂ ə nyi etuʼ e saʼ ə Fezhə̀vè, ə ngəʼ ə nyi sê ghɨ tɔ̂ŋ nə ghɛ tsɛ̂ kə è tə nə̂ ə è zə nyi sê ghɨə Sondòmə̀.

(Matyò 11.20-24)

13Ngəʼ èghaʼâ tə nə̂ ə è zə nyi sê ghàyn ə ghɨə Kòlàzɨ̀nə̀ è kɨ̂sè è ghàyn ə ghɨə Pètsayndà! Ə̂ tè nyi nə ə nə̀yn ghɛ e kayntə ghɨyn sê ghɨə Tayà è ghɨə Sindɔ̀nə̀, mə ghənə ə tə tso tsɨsə ə fuʼə̀ àpfɨchia ə ghənə ewìyn ə zàŋse màʼa sèndzɨs se kwuse, ə kwiynə̂ ə̀təm epiə ghənə. 14Ə̀ tə nə̂ ə nyi etuʼ e saʼ ə Fezhə̀vè, ə ngəʼ ə nyi sê ghàyn tsɛ̂ kə è nyi sê ghɨə Tayà è ghɨə Sindɔ̀nə̀. 15Ghàyn ghɨə Kàpanùmə̀, ghàyn kwàʼtə̀ nə Zhə̀fè tə kɔʼsə̂ ghàyn ə ghàyn kɔʼ tayn ekwùtwəyn mə? E va chi zâ. Fe tə maʼà kə ndò ghàyn elùʼ vɛ ə ve lɔŋɔ kwûŋsə̀.”

16È və wàmnə̀ zâ ə se pi sê ghɨətom nə ghɛ nə, “Nâʼàpî ndè vɛ ə è zɨ ghàyn, ə zɨ mi. Nâʼàpî ndè vɛ ə è toynse se zɨə ghàyn, ə toynse se zɨə mi. Vɛ ə è toynse mi, ə toynse vɛ ə è tom mi.”

Ghɨ ghɛ m̀ghɨ̂m sɛmbɛ njò sepɛ̀ ə kɛse kwɨlə

17Ghɨ nə ghɛ m̀ghɨ̂m sɛ̀mbɛ njò sepɛ̀ ə kwi ndùə ə kɛsə kwɨlə è saŋnê ə piə sê Njisə̀s nə, “Pɛ̂pɛ, naʼapi tèpamə̂ tə satàyntè ə zɨ sê ghàs kə ghàs kàyntə̀ ghɛghe ə ghò ezə!”

18Njisə̀s ə piə sê ghənə nə, “Ma fe kə Satàyn ndò ekwùtwəyn ə pfɨ̀ə, mɨ̂anə̀ kə eghol. 19Ghàyn e ke nə mə fo tyaʼa sê ghàyn nə ghàyn kàʼa ə ghàyn tsəle mbam sepise è kwəm ekwue ə fɨnə fo atyaʼ nə ghàyn tɛ tsɛ̂ pàyn, kè ndom tekɨ̂m. Nâʼà àfɨa kyia tə fo va ngəʼ sê ghàyn. 20Pîza kə ghàyn ə saŋnə nə zuʼ se pise ə zɨ sê ghàyn, ghàyn pɨlə saŋnə̂ nə, ə nyàʼ zə ghaynghe ə ŋwàʼlè ə̀ ekwùtwəyn.”

(Matyò 11.25-27; 13.16-17)

21Ə tè nyi kepî ashìŋə̀ nə kɛ, Zuʼ se Ŋwaʼase ə nə̀, Njisə̀s è saŋnə̂ nâʼà sə ŋaŋ ə ke tsə̀m nə, “Pɨ̀a vɨm, Pɛ̂pɛ vɛ ə ò saʼa wuləke è chia, m fo àzɔ̀ŋnè sê ghò kûmə̀ nə ò ndə̀tə̀ ghɛ ghɨyn sê ghɨ ghɛ ə ghənə kwâʼtə̀ nə ə tɔfə ndò ə tyə̀nə̀ sê ngou. Səmɔʼ ə Pɛ̂, ə̀ kɔ̀ŋ kê ghò se nə̀yn nyiə mə.”

22Kə è wàmnè zâ ə ke pi sê chùmtè epàm sə vəynse nə, “Pɨ̀a vɨm ə fo fɨave ekɨ̂m sê mi. Wùə fɛtə kê va wùə vɛ ə Vayn nyi vəyn, ə tsɛ̂ kəva Pɨ̀a. Wùə e fɛtê ke va wùə vɛ ə Pɨ̀a nyi vəyn ə tsɛ̂ kəva Vayn, è ghɨ ghɛ ə Vayn chɔʼ se tyə̀nə paynsê ə Pɨ̀a sê ghənə.”

23È və wàmnə̀ za ə se pə̀ynsè ewiyn ə nyaʼtə̂ piə sê chùmtè epàm sə vəynse nə, “Chùŋ nyi sê ghàyn ghɛ ə fê ghɛ ghe ə ghàyn fê! 24M piə sê ghàyn nə, fɨ̀aʼtè se ghaʼa se tsɨəse è fɔ̂yntè tè nə̂ kɔ̂ŋɔ̀ se fe əghɛ ghɛ ə ghàyn fe, fɨnə kɔ̂ŋɔ̀ se zɨ əghɛ ghe ə ghàyn zɨə, pîza ze ə tàʼa kyàyn.”

Ngàyn kûmə̀ wùə Sàmalyà èchùŋ

25Tyə̀ynsè alâŋ vîvè ə tyəmə ekwùtwəyn se mɔ̂mə̀ Njisə̀s ə pfɨfə nə, “Tyə̀ynsè, m nyiə kàʼa ə m nəyn nâʼà ghè se tə kyi endam zɛ ə e tə mîə va ə?”

26Njisə̀s ə pə̀ynsə̀ pfɨfə sê vəyn nə, “Ə nyaʼ nə ghe ə ŋwàʼlè Èsaʼ ə Mosîszè ə? Ò tɔŋɔ zɨ nə ghe ətə ə?”

27Wùə təyn ə pə̀ynsə̀ nə, “Ò kyi sə̂ kɔ̂ŋɔ̀ Pɛ̂pɛ Zhə̀ fɛfe è təm ghɛghe əkɨ̂m, è zuʼ sɛse sekɨ̂m, è tyaʼ kɛke àkɨ̂m, è ekwâʼtè zɛze ekɨ̂m, fɨnə kɔ̂ŋɔ̀ èkɔ vɛve kè eghɨ kə ò kɔ̀ŋɔ̀ ngɨŋ zɛ.”

28Njisə̀s ə piə sê vəyn nə, “Ò fɨ̀ysè ke nâʼà àchûŋ. Ndùə ə ò nə̂ kə zâ, kə ò tə kyi endam zɛ ə ze tə mîə va.”

29Tyə̀ynsè alâŋ nə̂ vɨ̂yn ə tə mɔ̂msè se tyən nə ghɛ zɛ ə zhi fè pfɨf nyi eghɨ, ə ke fɨnə pfɨf sê Njisə̀s nə, “Ànyì vɨm nyi ndè?”

30Njisə̀s ə pə̀ynsə̀ nə, “Wùə tè ndò ə Njèlusalɛ̀m tso ndùə ə Njèlikò. Ghɨ chɔŋɔghe ə kyiə vəyn, ə chɔʼtə̂ sendzɨs ə vəyn ewiyn, ə pusə vəyn ə za kə mbàŋ èmɔ̀ʼ sê kwue. 31Ze ə kyànə̀ nə̂ wùə èkɔʼsə nə̂ èshyə̀ vîvè tè tso ndùə kəpi endom nə vɛ ə fe kə wùə təyn nyiŋ ə tə tsɛ̂ kə àkyi àkyi. 32Wùə mɔ̀ʼɔ e tsɛ̂ kəpi fumə endom, ə wùə èfɨ̀aʼa ə ndɛ̂ ètsə̀mə mə è fɨ esas ə ndɛ ə Levìzè, ə fe kə è nyìŋ ə chi ə pɔŋɔ tsɛ̂ kəpi za. 33Pîza wùə endaʼ ə Sàmalyà viu tè ndùə ekwî ə pi è tsɛ̂ kəpi fumə endom ə kɔʼɔ kə və tu, səyn ze e sè ko vəyn sê vəyn. 34È və shùə tèfiŋ tə vəynte ə zɔlə̂ è fue ə kolə è pɨ̂as ə sendzɨse ə njiə vəyn ə kɔʼse əvəyn etûə nyàm ə ndùə è vəyn ə ndɛ̂ ghɨe motə pə ə pɨənə tɔ̂ʼnə̀ è vəyn fumə. 35Tuʼve ə zo, è və fɨsə èkɛ ə və shəyn ə fo sê wùə vɛ ə è tè fə fumə ndɛ ə piə nə, ‹Ò tɔ̂ʼnə̀ è wùə vɨ̂yn. Ə ò fɨyn kwəynse nâʼàpî ghè fa etuə èkɛ, ə m piə m kɛsə̂ pə̀ ndò ə m ndàʼ sê ghò.›”

36Njisə̀s ə wàmnə̀ mɨ̂sè ə se pfɨf sê tyə̀ynsè alâŋ nə vɨ̂yn nə, “Ə̀ ghò ekwâʼtè, ə nyi vɨ̀yn əfètə̂ ə ghɨ nə ghɨyn ə ta ə è tyə̀yn nə zhi nyi ànyì sê wùə nə vɛ ə ghɨ chɔŋɔ tè kyi ə?”

37È və pə̀ynsə̀ nə, “Ə̀ nyi vɛ ə è tyə̀yn səyn e koe sê vəyn.”

Njisə̀s ə ke pi sê vəyn nə, ‘Ə ò ndù, ò nə̂ kə zamə.

Njisə̀s ə mòtè Maltà yî Mèli

38Njisə̀s yî chùmtè epàm sə vəynse e sè kwiə ndùə ə njiə ə tə̀ʼ zhizè, wùzhɔyn vîvè e nyi ətəyn, e tɔŋtə̂ nə Maltà. Njisə̀s ə njiə ə və ndɛ, è və fiə ndzɨsə kə nâʼà vəyn àchûŋ. 39Ə̀ tè nyi zâ Maltà e kyi ànyìə vəyn vîvè, zə vəynze e nyi Mèli. Mèli ə pə̀ tsɨsə kə ə Pɛ̂pɛ əshi se zɨtə̂ ezaʼlê ə vəynze. 40Maltà e sè fɨmə èfɨâʼè tsɨəze ə nə̀ pə̀ sê Njisə̀s ə piə nə, “Pɛ̂pɛ, ò fe va nə ànyì vɨ̂mvè ə zà mi, m kyiŋə̀ kə è fɨ̂aʼè mi nɨŋ ə? Pi sê vəyn nə è pə̀yn tsâmtè mi.”

41Pɛ̂pɛ ə tɔŋtə̂ vəyn ə pìə sê vəyn nə, “Maltà, Maltà, ghɛ nyiə fo ètsôs sê ghò, tsɨ̀ə kə nyi. 42Pîza ə nyi ke eghɛ èmɔ̀ʼ ə kyiŋə. Mèli ə nji ghɛ echûŋ nə zɛ, mə vâyn kàʼa ə fɨyn fi sê vəyn.”

Currently Selected:

Lûk 10: bfm

Highlight

Copy