Lûk 9
9
Njisə̀s ə tom ghɨətom əvəynghe njò sepɛ̀
(Matyò 10.5-15; Mâk 6.7-13)
1Ə̀ tè nyi tuʼfîfe Njisə̀s ə tɔŋɔ ə̀ghɨtom ə vəynghe njò sepɛ̀ ə zùŋtə̀ ghənə lùʼ emɔ̀ʼ ə fo atyaʼ àkɨ̂m sê ghənə kə ghənə ə chûmə̀ fɨsə tèpamə̂ tə satàyntè nâʼà tèkɨ̂m fɨnə tsuʼə tèzaf, 2ə tiynsə̂ ghənə nə ə fɨ ndù ndàʼà əghɛ kûmə̀ èfɔ̂yn ə Fezhə̀e ə fɨyn tsuʼ əghɨ ghɛ ə zafə. 3Ə kɛsə pîə sê ghənə nə, “Ə̂ ghàyn piə ndùə ndò, kə wùə nə̂ nji nâʼà afɨa kyia, kə wùə nə̂ nji mbàŋ kə ə nyi pi shəyn ə̀ àwaf, kə wùə nə nji àfɨa ezhiəke kə ə nyì pî èkɛ, kə wùə nə nji sèndzɨs sepɛ̀. 4Ə ghàyn ndù naʼapi ə tə̀ʼ èkè ə ndɛ, ghàyn ndamə kə ətəyn se zaʼâ kə ghàyn tə ndò fuə tɔ̂ŋ. 5Ə ghàyn ndù naʼapi ghayn, ghɨə ətəynghe ə tàʼa fiə ghàyn, ghà piə ndô ndò, ghà puʼə sètsɨm saynse#9.5 Ə tè nyàʼ famə nə, ghàyn ə puʼə tsɨ̂sə̀ àpɨ̂l ə̂ ghàyn ə ghòl sê ghənə kə ghənə ke nə ghənə nə̀yn shwîə.”
6Ghɨətom ə vəynghe ə fɨə kwiə ndùə kə ə tə̀ʼ ə tə̀ʼ, ndàʼà ndùə tom èchùŋ, fɨnə tsuʼə ə̀ghɨ naʼapi ghayn ə ghənə fe.
Ghɛ tè fɨmsə̂ Ɛlɔ̀t kûmə̀ èfɨ̂aʼ ekayntə zɛ è zɨ
(Matyò 14.1-12; Mâk 6.14-29)
7Ɛlɔ̀t Anti pàs vɛ è tè saʼa pâs ə Ngalìlî kyia tè zɨ nâʼà əghɛ ə̀kɨ̂m ghɛ ə ghe kyâyn, ghɛ ətəynze e fɨmsə̂ vəyn, kûmə̀ nə ghɨə mɔ̀ʼɔghe tè piə sê vəyn nə Njɔyn Foə M̀mò ə kɛse zômə̀, 8yî ghe e piə nə fɨ̀aʼtè Èlanjà ə fɨyn kɛse pə̀yn, yî ghe e piə nə ə̀ nyi fɨ̀aʼtè èghaʼâ vîvè kèpi kə shise ə se tè nyi etuʼ ə shi kə è kɛse zômə̀. 9Ɛlɔ̀t ə zɨtə̂ əghɛ ətəynghe sè kayntə̂ kə nâʼà sə və ə ngɨŋ piə nə, “Mə tə nə̀yn ə tənə àtuə Njɔyn Foə M̀mòke. Ə̀ nyiə se fɨyn nyi ndè nə vɨnə ə piə ghɛ ghɨyn kûmə̀ və ə?” È və se zhə̀tə̀ sə̂ ndamə kyiŋə kə se fe Njisə̀s.
Njisə̀s ə pfɨte ghɨghe ghe tsɛ̂ sèkam sètâyn
(Matyò 14.13-21; Mâk 6.30-44; Njɔyn 6.1-14)
10Ə tè nyi kə ghɨətom ə Njisə̀sə̀ kɛse kwɨlə pə̀yn sê vəyn ə tsà naʼapi ghè vɛ ə ghənə nə̀yn, è və njìə ghənə, yî ghə̀ ghənə ə zà əghɨ ə ndùə njiə ə tɔ̂ŋ zhîzè, e tɔŋtə̂ nə Pètsayndà. 11Ghɨghe ə kê naʼapi ashìŋə̀ àkè nə ə nyi elùʼ vɛ ə è nyi ətəyn, ə chùmtə̀ ndùə vəyn fu. Njisə̀s ə fiə ghənə nâʼà àchûŋ ə wàmnə̀ sê ghənə kûmə̀ èfɔ̂yn ə Fezhə̀e ə fɨnə tsuʼə ghɛ ə ghənə tè kyi zafte.
12Ə nə̀ nə̂ ə̀ nyi ashìŋə̀ ezhwikwɨləke, chùmtè èpàm sə vəyn sɛ njò sepɛ̀ ə pə̀ piə sê vəyn nə, “Pi sê ghɨ ghɨyn nə ghe chyase nji ndù ə setə̀ʼ, è luʼte ə sembvɨnə̀ tɛ ə te nyi paʼse kə ghənə kyiŋ fɨake ə zhi fɨyn kyi elùʼ se pɨəyn, kûmə̀ nə luʼ vɨ̀nə nyi è pame.”
13Pîza Njisə̀s ə pə̀ynsə̀ sê ghənə nə, “Nâʼà ghàyn fo fɨake, ə ghənə zhi.”
Ghənə piə sê vəyn nə, “Ghàs kyi ke èsene epɨaynve etwɔ̂yn è mbwɔ̀ve èpɨ̀a. Ò kyiŋə nə ghàs ndù zhɔyn èfɨazhiəu sê nɔ̂yn kɨ̂nə̀ àkɨ̂m ə?” 14Ndômnə̀ tè nyi anɔ̀yn nə kɨ̂yn, zaʼâ ndùə sèkam sètâyn.
Njisə̀s ə piə sê chùmtè èpàm sə vəynse nə, “Ghàyn nəyn, ə ghənə tsɨsə ətelùʼ ətelùʼ, naʼapi anɔ̂yn àkè tè kyi əghɨ se zaʼâ m̀ghɨm m̀tâyn.”
15Ghənə ə piə, ghɨ ətəynghe ə tso tsɨsə ə chi. 16Njisə̀s ə fiə èsene epɨayn nə vɛ è mbwɔ̀ vɛ èpɨ̀a ə naynə̂ kɔʼsə̂ ekwùtwəyn ə fo àzɔ̀ŋnè sê Zhə̀fè ə pɨaʼlə̂ fo sê chùmtè èpàm sə vəynse nə se chyàtə̀ sê ghɨ nə ghɛ. 17Ghənə zhiə kolə nâʼà ə̀kɨ̂m, chùmtè èpàm sə vəynse ə komtə̂ èpɨaʼlê vɛ ə ve faŋ, ve ə lwinə ə ekwà njò sepɛ̀.
Pità ə tsàyn wùə vɛ ə Njisə̀s nyi vəyn
(Matyò 16.13-19; Mâk 8.27-29)
18Ə̀ tè nyi tuʼfîfe, Njisə̀s e tsə̂mə̀ elùʼ kè yî chùmtè èpàm sə vəynse ə ke pfɨf sê ghənə nə, “Ghɨ piə nə m nyi ndè?”
19Ghənə ə piə nə, “Yî ghe piə nə ò nyi Njɔyn Foə M̀mò, yî ghe piə nə ò nyi fɨ̀aʼtè Èlanjà, yî ghe e piə nə ò nyi fɨ̀aʼtè èghaʼâ vîvè kə è kɛse zômə̀.”
20Njisə̀s ə pfɨfə se ghənə nə, “Nâʼà ghàyn piə nə m nyi ndè?”
Pità ə piə nə, “Ə̀ nyi gho Klâys, ə vɛ ə Zhə̀fè tom.”
(Matyò 16.20-28; Mâk 8.30–9.1)
21Njisə̀s ə ke kàyn nə kə ghənə nə̂ tsàyn ghɛ nə zɨnə sê wùə, 22ə fɨnə piə nə, “Va Wùə kyi ke nâʼà se fe ngəʼ èghaʼâ, nə chəʼse yî ghɨkɔʼsə nə eshyə̀ engaŋtəghe è tyə̀ynsè sə alàŋsè tə vəyn, ə zhwi vəyn, ə sè nyi sə mtuʼ mta, ə è kɛse zômə̀.”
Endom se chùmtə Njisə̀s
23Njisə̀s ə wàmnə̀ za ə se pi sê nɔ̂yn ə ghɨ kɛ ə ke pə̀yn nə, “Ə̂ kɔ̀ŋɔ̀ pìə ndè se chùmtè ə mi, è və màʼà ngɨŋ ə vəyn, ə è pɨ̀aʼà awâmnè ə vəynke kè tuʼ mè m̀kɨ̂m chûmtə̀ mi. 24Ə̂ mɔ̀msə̀ piə ndè se sɔ̀ ngɨŋ ə vəyn ə è kwu, mə ə̂ kwu pi ndè kûmə̀ mi, ə è ndam faŋ. 25Wùə nyi kàʼa ə è zhi nâʼà ghè ezhoghɛ è kyi ke mbi èkɨ̂m pîza ə njisə̀ ngɨŋ ə və ə? 26Naʼapi ndè vɛ ə è ghomə kûmə̀ mi è zaʼlê zɨme, ə è və ke nə Vâ wùə tə pɔŋɔ ghomə kûmə̀ vəyn ezhoghɛ ə è kɛse pə̀yn əfètə̂ èpomsê zɛ ə è kyi, ə̀ nyi èpomsê ə Pɨ̀aze è tsi sə vəyn sə eŋwaʼase. 27M tsâ sê ghàyn səmɔʼ nə, ghɨə mɔʼɔ tyəm ke nâʼà fayn zôyn, va se tə kwu nâʼà səkɔs se zaʼâ kə ghənə fe fɔ̂yn ə Fezhə̀e.”
Wiyn ə Njisə̀svè ə kwiynê ə pfɨ̂yn
(Matyò 17.1-8; Mâk 9.2-8)
28Ə̀ tè se kɔʼɔ ndùə m̀tuʼ mfamə kə Njisə̀s wàmnè ghɛ nə ghɨ̂nə̀, è və njiə Pità, è Njɔyn, è Njə̂m, yî ghə̀ ghənə ə kɔʼɔ ə pfɨ̀yn se tsə̀m. 29Kə Njisə̀s tè tsə̂mə̀, kyâʼ ə vəynze ə pfɨ̀ŋə̀ kwiynə̂, ndzɨs sə vəynse e sè fɨfə kə nyi, ŋwâŋtə̀. 30Kè nyi, ghɨghe ə pɛ̀ ə tyəmə sè kâtə̀ əghɛ è vəyn. Ə̀ tè nyi Mosîs yî Èlanjà. 31Ghənə tè nyi nâʼà əfètə̂ epomsê eghaʼazè, wàmnə̀ kûmə̀ èkwu zɛ Njisə̀s tè nyi se kwu ə Njèlusalɛ̀m se lwiynse eghɛ zɛ ə Zhə̀fè tè ndəm. 32Ə tè nyi za, Pità yî ghɨə mɔʼɔ ghɛ̂ e pɨənə nâʼà sə ŋaŋ. Ghənə ə zə̀mə̀ ə fe èpomsê ə Njisə̀szè è ndômnèghè əpɛ̀ ghɛ ə tè tyəm yîghə̀ Njisə̀s. 33Ghɨ ətəynghe ə pə̀ kə ndô, Pità ə se pi sê Njisə̀s nə, “Ze ə tsɔ̀f ə Pɛ̀ apɨəyn kə ghàs nyi fâyn. Ghàs nə̀ pɛ m̀pfɨ̀ə m̀ta, ə ò kyi fèmɔ̀ʼ, Mosîs e kyi fèmɔ̀ʼ, Èlanjà e kyi fə mɔ̀ʼɔfe.” È tè wàmnə̀ za, ke pi va ghɛ zɛ ə è piə.
34Kə Pità pa wâmnə̀, mbàʼsè ə tso kɨlə ghənə, fâynzè ə ko ghənə fuə fètə̂ sèmbàʼ. 35Kyə̀ ə fɨə fu əfètə̂ sèmbàʼ ə piə nə, “Ə̀ vɨ̀nə nyi Vayn vɨm vɛ ə m chɔʼ. Ghàyn zɨ sê vəyn!”
36Kə kyə̀ nə zɛ wàmnè mɨ̂sè, ghənə ə fe mə Njisə̀s se nyi ke fu vəyn ènɨŋ. Ghənə kɨmə̂ kə mɔŋ ə tàʼa tsàyn eghɛ zɛ ə ghənə fe nâʼà sê wùə èmɔ̀ʼ ə mtuʼ nə mɛ.
Njisə̀s ə tsuʼ vayn viu mə è kyi sezuʼ se pise
(Matyò 17.14-18; Mâk 9.14-27)
37Tuve ə zo, Njisə̀s yî chùmtè èpàm sə vəyn shise se ta ə kɛse tso ə pfɨ̀yn, nɔ̂yn ə ghɨ̀kè ə pə̀, tsɨ̀ə kə nyi se fè vəyn. 38Wùə viu əfètə̂ ànɔ̀yn nə kɛ ə pɨa nâʼà è kyə̀ etɛ ə piə sê Njisə̀s nə, “Tyə̀ynsè, mə tə chyate chùmtè epàm sɛse nə se tsamte vayn è ndômə̀ vɨ̂m vɨ̀yn kûmə̀ nə ə̀ nyi kè vəyn sê mi. 39Zuʼse pise faŋa va se ko vəyn nə è shɨŋ pɨa è chie ə è pfɨə ə chi, pfɨpfɨke e fɨə ə vəyn echo. Ke nə̂ ke nə̂ za, fo ngəʼ sê vəyn, zâ kə vəyn mə è və pɔ nâʼà sə ŋaŋ. 40Mə tə chyate chùmtè epàm sɛse nə se chùm fɨse, pîza se ə tɛ ghaʼa ghənə.”
41Njisə̀s ə pə̀ynsə̀ piə nə, “Ə̀ nyi anɔ̂yn a pi àkè kɨ̂yn ə ke ke va se pomə nyiə, m ndamə tânə̀ zàyn ghâsènì tsɔ̀fə kə ghàyn pomə ə?” È və wàmnə̀ za ə se pi sê wùə təyn nə, “Pə̀yn è vayn vɛ nə vɛ fayn.”
42È və pi fɨə se ndù è vəyn, pamə̂ ə satàyn zɛ ə màʼà va ətəyn ə chi, è ve sè shiŋə. Pîza Njisə̀s ə kàyntə̀ ə̀ghɛ sê zuʼ se pi nə sɛ, se ə fɨə, va ətəyn ə tɛ. È və kɛse fo vəyn sê pɨ̀a vəyn. 43Nâʼà ghɨ əkɨ̂m fu e sè nyi è kayn kûmə̀ atyaʼ ə Fezhə̀a.
Njisə̀s ə fɨyn wâmnè kûmə̀ èkwuə vəyn
(Matyò 17.22-23; Mâk 9.30-32)
Ghɨə tè pa kayntə̂ kə ndò ghɛghe əkɨ̂m ghɛ ə Njisə̀s tè nə, Njisə̀s ə piə sê chùmtè èpàm sə vəynse nə, 44“Ghàyn tɔʼ zɨ eghɛ zɛ m kyiŋə sê pi sê ghàyn. Ə nə̀ fo Va Wùə sê ghɨə.” 45Pîza ghənə ə tàʼa zɨə kê eghɛ nə zɨ̂yn kûmə̀ nə ə tè nyi za mə ghɛze ə nə̀yn nə kə ghənə zɨ kê. Ghənə e sè fànə̀ ghaʼa se pfɨf sê vəyn nə ghɛ ətəynze tyə̂nə̀ tso nə ghe ə?
Njisə̀s ə zaʼle kûmə̀ wùə vɛ ə è tsɛ̀ wùə mɔ̀ʼɔ
(Matyò 18.1-5; Mâk 9.33-37)
46Saʼnêzè ə ndwìə əfètə̂ sè chùmtè èpàm nə, ə̀ nyi nde wùə vɛ ə è ngaŋtə tsɛ̂ ə ghənə fètəyn ə? 47Njisə̀s ə kê eghɛ zɛ ə ghənə kwâʼtə̀ ə njiə vayn ə tɔmə paʼsə̂ ə və ngwùŋ 48ə piə sê ghənə nə, “Ə̂ tɔ̀ʼnə̀ pi ndè è vayn nyiə kə vɨ̀nə kûmə̀ mi, ə nyi mə è tɔ̀ʼnə̀ è mi. Ə vɛ ə è tɔ̀ʼnè è mi ə ke nə è və tɔ̀ʼnè è vɛ ə è tom mi. Ghàyn ke nə wùə vɛ ə è tətə kwûŋsə̀ ə ghàyn əfètəyn əkɨ̂m nyi vəyn vɛ ə è ngaŋte tsɛ̂.”
Nâʼà pi ndè vɛ ə è pànə̀ va ghàyn nyi ghâynghə̀ ghənə
(Mâk 9.38-40)
49Njɔyn ə piə zə vəynze nə, “Pɛ̀ apɨəyn, ghàs fè fe wùə, è və chûmə̀ fɨsə tèpamə̂ tə satàyntè ə ghò ezə, ghàs ghɛ ə pi nə kə è fɨyn mɔ̀m kûmə̀ nə è va chi wùə èmɔ̀ʼ ə ghàs əfètəyn.”
50Njisə̀s ə piə sê ghənə nə, “Kə ghàyn fɨyn tam vəyn kûmə̀ nə wùə vɛ ə è nò va ghàyn nyi ə ghàyn apàs.”
Tə̀ʼ ə Sàmalyà ə kwiynse se fiə Njisə̀s kə è tè kɔʼ ə Njèlusalɛ̀m
51Njisə̀s ə tə ndə̀m nə è kɔʼɔ ə Njèlusalɛ̀m kûmə̀ nə shîŋə̀kè tè se paʼsə̂ pə̀ kə ə nji kɔʼ è vəyn ekwùtwəyn. 52È və tomə ə̀ghɨ nə ghe ndù əshi ə tə̀ʼ ə̀ Sàmalyà zhîzè ə pɨaʼte naʼapi ghè sê vəyn fu. 53Pîza ghɨə Sàmalyà nə ghɛ ə tə nə ghe fiə va Njisə̀s kûmə̀ nə e tè nyi səmɔʼ nə è tè kyàʼà ndùə kə ə Njèlusalɛ̀m. 54Chùmtè epàm sə vəynse, mə za nyi Njə̂m yî Njɔyn ə zɨə eghɛ nə zɨ̂nə̀ ə piə nə, “Pɛ̂pɛ, ò kyiŋə nə ghàs tɔŋɔ wuse, ə ve tso ekwùtwəyn ə ve zhwite ghənə mə?”
55Pîza Njisə̀s ə pə̀ynsə̀ ewiyn ə naynə̂ ghənə ə kànə̀ nə kə ghənə mɔm. 56Nyi, Njisə̀s yî chùmtè èpàm sə vəynse ə ndò ə ndùə ə tə̀ʼ zhize.
E tè tɛ ghaʼa əghɨ se chùmtə Njisə̀s
(Matyò 8.19-22)
57Kə̂ Njisə̀s yî chùmtè èpàm sə vəynse tè kwìə ndùə endom, wùndômə̀ viu ə pə̀ piə sê Njisə̀s nə, “M chùmtə̀ gho m ndù naʼapi ghayn kə ò ndùə.”
58Njisə̀s ə pə̀ynsə̀ nə, “Sɔ̀ŋɔ̀m nyîə kyi èpûʼ ə ghənə̂vè, nɨ̂ŋmè e kyi sendɛ, pîza Vâ Wùə e kyi va luʼu se nyɨ̀ŋsè atu ə vəynke ətəyn se zɨ̀tè.” 59Njisə̀s ə nə̀ ə fɨnə piə sê wùə mɔ̀ʼɔ nə, “Chùmte mi.”
Pîza wùə nə vɛ ə piə sê vəyn nə, “Pɛ̂, za m kwɨlə ndu pfɨ̂mə̀ pɨ̀a vɨ̂m tsɔ̀fə kə m pə̀yn chûmtè ghò.”
60Njisə̀s ə piə sê vəyn nə, “Za, əghɨ ghɛ ə ghe nyi kepî kə ghɨe kwutəghe ə pfɨ̂mə̀ əghɨe kwutə ə ghənə. Pîza sê ghò, ò ndâʼà ndùə saʼghe kûmə̀ èfɔ̂yn ə Fezhə̀e.”
61Wùə mɔ̀ʼɔ ə fɨnə piə nə, “M chùmtə̀ ghò ə Pɛ̂pɛ, pîza za m ndù tɔŋtê əghɨ ghɨmə.”
62Njisə̀s ə piə sê vəyn nə, “Nâʼàpî ndè vɛ ə è zhə̀tə̀ fə̂zè kɛsə̂ naynə̂ epam kwənə va ghɛe ə efɔ̀yn ə Fezhə̀e.”
Currently Selected:
Lûk 9: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
