Luka 22
22
Ukusopelela Yesu
(Mateyu 26:1-5; Marko 14:1-2; Yohani 11:45-53)
1Impindi ipalamila iyachakulya chino chisi numutawa, chino watanji ichakulya chakupitililwa. 2Wasimapepo wakulu nawasambilizya wamasundo wavwambanga umwakuti wakomele Yesu, muno watinanga awantu.
Yuda azumila ukukutilila Yesu
(Mateyu 26:14-16; Marko 14:10-11)
3E Satana ayinjila mwakwe Yuda, wino watanji Iskarioti, wumwi uwawasambilizi ikumi nawawili. 4Achaleka Yuda-nye weyo apita aya alanda nawasimapepo wakulu nawamusika wang'anda yakwe Leza, umwakuti alemechele Yesu kwewoliwo. 5Awakunda nkaninye awati wandi wamupe indalama. 6Yuda azumila awalonda impindi nzima iyakulemechela Yesu kwewoliwo pane awantu watamanyile.
Yesu ayisengania ukulya ichakulya chakupitililwa
(Mateyu 26:17-25; Marko 14:12-21; Yohani 13:21-30)
7Ngapano uwanda wukulu uwachakulya chino chisi numutawa awufika pano ing'onzi zyachakulya chakupitililwa zyakomilwe. 8Yesu atuma Peter nu Yohani awakomelezya ati, Yanji katutewetelani ichakulya chakupitililwa twize tulye.
9Nawo awamuwuzya ukwakuti wakatewetele awati, Kwinye?
10Ati, Teyelezyani! Mwala mwinjila mukaya umonsi wino anyamuzile insembo yaminzi wandi akawasunkanie. Weyonye awino mumukonke mpaka mung'anda yino wandi akinjile, 11mufike munene umwening'anda muti, Umusambilizya akuti, Wuzye ing'anda yino awasambilizi wane ponga nani twandi tulile ichakulya chakupitililwa ilikwi? 12Wandi akawalanjizye ing'anda nkulu injanie iyapapela, kokonye akuno mukayanie vyonsi. 13Awapita awaya awazana vyonsi ndimuno Yesu wawanenzile awateweta ichakulya chakupitililwa.
Ichakulya Chamfumu
(Mateyu 26:26-30; Marko 14:22-26; 1 Wakorinte 11:23-25)
14Ila impindi yafichila, Yesu aya ayikala nawasambilizi wakwe pachakulya. 15Anena awasambilizi wakwe ati, Nalondesyanga nkaninye ukulya ichakulya chakupitililwa apaliponga namwe pano ntani nchule! 16Amuno nkuwanena nkuti, Ntalitela inchilye chisuke chifiswe mu Wufumu wakwe Leza.
17Ngapano Yesu atola ulupindi, asalifya Leza, ati, Tolani yankanani mwensi; 18amuno nkuwanena nkuti ukufumilila kanonzi ntandi ing'we mwenemo wusuke Uwufumu wakwe Leza wize-wize.
19Anyoka atola ichakulya, apepa kwe Leza, amenyania, awapa ati, Woo amuwili wane [wuno wapwa muno amwemwe. Chitanji awonye-woo ngamuwanjizuchila. 20Mumwata wowonye awala walya, awapa ulupindi, ati Ulupindinye 100 alilayano'pya lyakwe Leza luno lwasililwa nuwazi wane wuno wawazwila mwemwe.]
21Ukuwa, lolani! wino akunkutilila ali panye-paa akulya nani! 22Amuno Umwana Muntu alifwa ndimuno Leza wapanzizya; ukuwa akalanda kasikolo kumuntunye weyo wino akumukutilila!
23Ngapano awatalika awavwanzyania wakuti wuzye wino angachita ichamwata wonye-woo weweni?
Awasambilizi awapokotela uwusongo
24Imipanzi ikatuka muwasambilizi iyakuti ngaweni wazipila ukuti awe wesongo ukulusye awawuye. 25Yesu awanena ati, Imfumu zyamunsi zili namaka ukupanzya awantu wawo, nawakapanzya wakakwitwa wakuti, Aviwuza vyawantu. 26Ukuwa mwenji asi avino chili; mwenji, wino amukulu mwakwe mwemwe awino wazipila ukuwa amutichi nkani, nawe nankolelo wazipila awe ngati amuwomvi. 27Ngawino wakula weweni, wino ayisilipachakulya pamwi wino akumupyunjila? Nachawuzimanye, awino ayisile. Ukuwa nenji mwakwe mwemwe indi ngati awino akupyunga.
28Mwikala nani impindi zyonsi izyamelezyo yane; 29ndivino Tata wampezile uwufumu, avino nani nandi ndayane namwe. 30Muliya mukulya nukung'wa ivyapitebulo lyane ilya muWufumu, mwize mwikale pazyandulu muwapanzya imyiko yakwe Israeli ikumi nayiwili.
Yesu awumbula kuno Peter wandi amukane
(Mateyu 26:31-35; Marko 14:27-31; Yohani 13:36-38)
31We Simoni; Simoni! Teyelezya!
Satana azumilizizwe ukuti awelezye, mwensinye ndivino umulimi akapawula inkumba ayela ilyelelo. 32Ukuwa nkulambilizizizye, we Simoni, ukuti isuwilo lyako litize lilongoloke. Ndiwiza wanyoka kwenene, uyize usimpisye awanyonko.
33Peter atolelela ati, Mfumu, nasinama ukuti inje kuvingololo apaliponga nawe nukufwa apaliponga!
34Yesu atolelela Peter ati, Nkukunena nkuti ilelonye lyoo wala pano mukolwe atani alamule watela wankana yatatu wati utamanya.
Akamuwa kandalama, ichakupempela nulupanga
35Ngapano Yesu awanena ati, Pano nawatumile amupita nanti kusenda imyuwa yandalama, nant'achakupempela, nanti andyatu, wuzye mwasowezilwe chimwi?
Awamutolelela awati, Nanti chongachonga.
36Yesu awanena ati, Ukuwa kanonzi, wensi wino ali nakamuwa kandalama nanti achakupempela wazipila ukusenda; nawensi wino asi nulupanga wazipila akazye umwinjilo wakwe akale ulupanga. 37Amuno nkuwanena chonye-choo nkuti, Amawaliko Matele yano yavwanga yati, Wasanzizwe ponga nawasimisoka, kuvyane yale yafiswe. Amuno vino vyawalichizilwe nene vyandi vifiswe.
38Awasambilizi awati, Silola! Tuli nimpanga zyoo ziwili, Tatakulu!
Atolelela ati, Aleni, fwandi zyayana!
Yesu aya mukupepa pamwamba wamingungu
(Mateyu 26:36-46; Marko 14:32-42)
39Yesu afuma mukaya apita, ndimuno wachitilanga penye, aya kumwamba wamingungu; nawasambilizi wakwe awamukonka. 40Ala wafika kweneko awanena ati, Pepanji alyakuti mutaponela mukwelezwa.
41Ngapano apita awasya, aya ndipano iwe lyakuzukuza lingafika, asokowala awapepa. 42Ati, Tata, ndi ukulonda funtusya ulupindi 100 pakwe nene. Ukuwa ukulonda kwane pole, nkandi ukulonda kwako. [ 43Umungeli afuma mwiyulu amulolechela amusimpisya. 44Muno akulwilwinta nichikonko apepa nkaninye alutilizya; itwinsi lyakwe aliwatonya pansi ngati amamata yawazi.]
45Ala wakatuka pano akupepa, anyochela kuwasambilizi wakwe azana waponechile, amalanda yawatompontozile. 46Nga awanena ati, Ngamuno chani chino muponechile? Katukani, mupepe alyakuti mutize muponele mukwelezwa.
Ukulemwa kwakwe Yesu
(Mateyu 26:47-56; Marko 14:43-50; Yohani 18:3-11)
47Ala vino Yesu achili akuvwanga iwumba alitunka. E Yuda weyo, uwawasambilizi ikumi nawawili, awino wakolelezile iwumba, aya kwe Yesu afika amukukula. 48Ukuwa Yesu ati, Ye, we Yuda, wuzye wakukula Umwana Muntu pakumukutilila?
49Ukuwa awala awasambilizi wane walinji nu Yesu walola chino chandi chipone, awati, Mfumu, wuzye tuwakome nimpanga? 50Wumwi uwapakwe woliwo asenga umuzya wakwe simapepo mukulu ikutwi lyakwe ndilo.
51Ukuwa Yesu, ati, Ampela lekani!
Alema ikutwi lyamuntu amupozya.
52Ngapano Yesu anena wasimapepo wakulu nawakalindilila wang'anda yakwe Leza nawasongo wane wayile mukumulema ati, Wuzye mwanjizila nizyampanga nizyanduku, ngati nekachila wamasundo? 53Ngavino nawanga namwe mung'anda yakwe Leza amanda yonsi, ukuwa mutatela mundeme. Ukuwa yoo ampindi yinu iyakundemela, amuno amaka yamfinzi.
Peter akana Yesu
(Mateyu 26:57-58, 69-75; Marko 14:53-54, 66-72; Yohani 18:12-18, 25-27)
54Ngapano awalema Yesu awamutwala kung'anda yakwe simapepo mukulu; ukuwa Peter weni alanga akonsile lwapatali. 55Wapemvile umulilo mulusasa mukasi, nu Peter-nye aya ayikala nawano waliwilizizye umulilo wakota. 56Ala umukazyana wumwi umuwomvi wamulola ayisile pamulilo, amulolechesya nkaninye ati, Numuntunye wee walinji nawe!
57Ukuwa Peter akana ati, Ala wemwanachi-we, nenji ntamumanyile! 58Apala patani pazimbe, umuntu winji amumanya ati, Nawewenye mwewaliwonga!
Ukuwa Peter atolelela ati. Wemuntuwe, ala nenji pole!
59Apala pazimba katichi umuntu winji apanichisya nkaninye ati, Achipuma-puma umuntunye wee walinji nawe, amuno nawenye amu Galileya!
60Ukuwa Peter ati, Wemuntu-we, ntamanyile chino ukuvwanga!
Ala vino achili akuvwanga mukolwe ati nukulamula. 61Ngapano Imfumu e Yesu apepetuka alola Peter, paponye Peter ayizuka amazwi yano Imfumu e Yesu wamunenile, ayakuti, Ilelonye lyoo wala pane mukolwe atani alamule utele wankana yatatu wati utamanya,
62Peter afumila palonde aya awalila alila ichilume-lume.
Awatuka Yesu awamuma-nukumuma
(Mateyu 26:67-68; Marko 14:65)
63Awantu wane walemile Yesu akankamanga awatalika ukumusoweka awamuma nukumuma. 64Awamuvwimba paminso nga awamuwuzya awati, Zimbula! Ngaweni wakuma? 65Awamuvwanjila uluwi navinjinye ivivule awamukwelengula.
Yesu ayimilila pankolelo pipanzyo
(Mateyu 26:59-66; Marko 14:55-64; Yohani 18:19-24)
66Ukuwa vino kwacha wasongo wawa Yuda, nawasimapepo wakulu, nawasambilizya wamasundo awawungana apaliponga, nga Yesu atwalwa piwungwe lyawo, 67Awamunena awati, Tunene, wuzye we Mesaya?
Ukuwa weni awatolelela ati, Ndi nawanena, mutandi musuwile, 68pamwi ndinawawuzya iwuzyo mutandi mutolelele. 69Ukuwa ukufumilila kanonzi numuyayaya Umwana Muntu wandi akikalange lwakwikasa lyandilo ilyakwe Leza Wamaka yonsi.
70Nga wonsi awati, Ala, wuzye fwandi we Mwanakwe Leza?
Awatolelela ati, Mwataka mwati neweliwenye.
71Nga nawo awati, Tutanga tuwafwa nukulonda wakalola! Vino sweswenye nalwitu twayivwila amazwi yakwe.
Currently Selected:
Luka 22: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
