Luka 23

Awatwala Yesu kwe Pilato

(Mateyu 27:1-2, 11-14; Marko 15:1-5; Yohani 18:28-38)

1Umupanda wonsi awupazamukaawutwala Yesukwe Pilato 2awatalika ukumulongola wakuti, Twalemile ichimuntunye choo chikupalantula awantu witu, nukuwalesya ukusonka imisonko kumfumu akuti vwile cholichonye achili mfumu, e Klistu.

3Nga Pilato amuwuzya ati, Vwile we mfumu ya wa Yuda?

Yesu amutolelela amunena ati, Wasimpa molimonye.

4Ngapano Pilato anena wasimapepo wakulu niwumba ati, Ntazanile umulandu wumwi mumuntunye wee.

5Ukuwa awalemasya nkaninye awati, Akuvulungania awantu wonsi mwe Yuda nimisambilizizye yakwe. Watalichizile mu Galileya, kanonzi wee, wafika nakoo.

Awatwala Yesu kwe Herodi

6Ala Pilato wivwa wowonye awuzya ati, Wuzye umuntunye wee amu Galileya? 7Ala wamanya kuno Yesu walinji awamunsi yino Herodi wapanzyanga, amutuma kokonye, wino mumandanye yayo watezile ali mu Yerusalemu. 8Ala Herodi walola Yesu akunda nkaninye, amuno wivwile ivyakwe awalondesya ukumulola impindi ntali. Walolelanga ukuti alole Yesu wachita ichizunguko chimwi. 9Achaleka Herodi awawuzichisya Yesu amawuzyo mavule, ukuwa weni nanti kutolelela izwi nanti lyonga. 10Ngapano wasimapepo wakulu nawasambilizya wamasundo awapalamila awalemasya ukulongola Yesu, 11Ngapano Herodi nivita vyakwe awasoweka Yesu awamuyimvya nkaninye, Awamuzwika numwenda wuyembe ngapano amunyosya kwe Pilato. 12Pawandanye wowo awuno Herodi nu Pilato awakundana; amuno watezile wapatana.

Yesu apanzizwa imfwa

(Mateyu 27:15-26; Marko 15:6-15; Yohani 18:39—19:16)

13Nga Pilato ayita wasimapepo wakulu, nawasongo, nawantu apaliponga, 14awanena ati, Mulesile umuntu wee kwenene mwati akuvulungania awantu. Kanonzinye kaa, namwelezya pankolelo pakwe mwemwe, ntamuzanile numulandu wumwi wuno mukumulongola. 15Nanti we Herodi-nye atazanile uluwi lumwi, amuno wamunyosya kwesweswe. Pasi ichintu nanti chimwi chino umuntunye wachita chino angakomelwa. 16Nenji nandi muvwapule awowo mutaye apite.

[ 17Pampindi zyonsi izyachakulya chakupitililwa Pilato wawasapulilanga uwamuvingololo wumwi.] 18Iwumba lyonsi alipazamuka nichongo awati, Ale akomwe-nye! Tusapulile e Barabasi! 19(Barabasi walinji muvingololo muno awuchisanguka wuno wachisile mukaya nga nuwuchikoma.)

20Pilato walondanga ukutaya Yesu, achaleka anena awantu swinya. 21Ukuwa awantu weni awapongomoka awati, Ale, asayikwe! Asayikwe!

22Pilato awanena swinya impindi yachititatu ati, Ngawachita mulanduchi? Nenji ntazanile umulandu wumwi wuno angakomelwa! Nandi muvyapule mutaye apite.

23Awamupatichizya awapongomoka namazwi makulu ukuti Yesu ale apamantilwe pachuchingane; pansizi amazwi yawo ayalutilizya. 24Ngapano Pilato apanzya umulandu wakwe Yesu ndimuno walondelanga, 25Awasapulila umuntu wino walondanga, wino wiyalizilwe muvingololo kuwuchisanguka nuwuchikoma, awalemeka Yesu ukuti amuchite chino walondanga.

Yesu apamantilwa pawuchingane

(Mateyu 27:32-44; Marko 15:21-32; Yohani 19:17-27)

26Awasenda Yesu. Nga awala pano wakupita, awasunkania e Simoni wa k u Kureni, wino winjilanga mukaya ukufuma mulonde. Awamulema, awamutwika uwuchingane, asenda akonka Yesu.

27Iwumba kulu nkaninye ilyawantu alimukonka; paponye palinji nawanachi wane walosyanga wakusinsimuchila muno we Yesu. 28Ukuwa Yesu apepetuka awalola ati, Mwe wanachi wa mu Yerusalemu-mwe! Mutize muwandilila, ukuwa yilililanji mwewenecho nawana winu. 29Amuno amanda yakwiza pano awantu waliwati, Awalongo ang'umba wane wasitela, wawe nawana, wane wasitela wakwate awana, wane wasitela wonsye! 30Yoyonye ayino iliwa amp indi yino awantu waliwanena imyamba wakuti, Tuponelani! wanena nimilundu wati, Tufumpachizyani! 31Amuno ndi ivintunye ndivyoo vyachitwa kumuti wuwisi, nga kuwukale chingawa wuli?

A wamutwika uwuchingane asenda

32Wasenzile nawantu wanji wawili, nawonye walinji awachononi, ukuti wakawakome apaliponga nu Yesu, 33Awala wafika pamasyo yano wakutanji, Ipanga, paponye apano awapamantila Yesu pawuchingane, apaliponga nawachononi, wumwi kwendilo numuwuye kwekamani. 34Ngapano Yesu ati, Tata! Watetele amuno watamanyile chino wakuchita.

Awankana ivizwalo vyakwe muvipendo. 35Awantu wimilile paponye walolechesyanga, nawasongo wawa Yuda awamuweleketa wakuti, Watulanga wanji; silekani ayitule umwenecho, ndi we Mesava wino Leza wasola!

36Nivitanye aviwamusoweka; aviwaya vikumupa amasi yinala, 37wakuti, Yitule wemwenecho, ndi wemfumu ya wa Yuda! 38Papela pakwe weliwe pawalisilwe amawaliko yakuti, Wee aMfumu yawa Yuda.

39Echononi wumwi wino wasayisilwe paponye amukwelengula ati, Susi we Mesaya? Siyitule ututule naswe.

40Ukuwa umuwuye weni, amukalipila ati, Wuzye usinakutina nanti we Leza-nye? Vino swensinye tuli mukusundwa ukulikonga. 41Ukuwa kweni, swenji vryine, amuno twapochelela ichilambu chino chiyine nimilimo yitu; ukuwa weni atachita ichiwipe chimwi. 42Ngapano anena Yesu ati, Unjizuke, pano watema uwufumu wako!

43Yesu amunena ati, Nachawuzimanye; nkukunena nkuti ilelonye lyoo wandi ukawange nani mu Paradise mwiyulu.

Imfwa yakwe Yesu

(Mateyu 27:45-56; Marko 15:33-41; Yohani 19:28-30)

44Kwela pano ilanzi lyafika pamutwe imfinzi ikoma munsi yonsi ukwizafika pano ilanzi lyasenuka, 45ichimwenda chakuchinga chamung'anda yakwe Leza achilepuka pawili. 46Yesu apunda nizwi kulu ati, Tata nakulemeka mumakasa yako umuzimu wane! Ala wavwanga wowonye afwa nukufwa.

47Ala musika wavita walola wowonye, atumvya Leza, ati Nachawuzimanye umuntu wee walinji amulungamane!

48Awala awantu wane wawungine paponye mukumutamba walola chino chachisilwe, awawela kuzyamwawo, wakuyikung'unta pavifuwa vyawo. 49Wonsi wane wawelezinie nawe, apaliponga nawanachinye wane wamukonsile ukufuma ku Galileya, wimilile apatali awalanga wakulola ivintunye vyovyo.

Ukuzikwa kwakwe Yesu

(Mateyu 27:57-61; Marko 15:42-47; Yohani 19:38-42)

50-51Kwalinji umuntu wino izina lyakwe walinji we Jozefu, wafumile mu Arimatiya akaya kawa Yuda. Walinji amuntu muzima umulumbililwe, walolelanga ukwiza kwa Wufumu wakwe Leza. Chingatenga umuntunye wee walinji ankombe yamwipembo, atazumilizizye nipanzyo lyawo navino wachisile. 52Weyonye awino wayile kwe Pilato alenga ichala chakwe Yesu. 53Aya ayisya ichala, achivwimba numwenda wutelepe, amulambalika munkungwe yino yafukuzilwe mwemfuziyino wumwi asitela azikwe mwenemo. 54Palinji ape-Chisano, nuwanda wakusolezya yewapalamila.

55Awanachi wane wakonsile Yesu ukufuma ku Galileya awakonka Jozefu awaya awalola inkungwe namuno wala, lichizile ichala chakwe Yesu. 56Awawela kumwawo awaya awayania uwusule wununchile namafuta yakupaka ichala.

Ukuwa awapuza pawanda wakusolezya, ndimuno isundo lyayila.

Currently Selected:

Luka 23: WWN82

Highlight

Copy