Yohani 15

E Yesu amuti wavikomwa wakusimichila

1Nemuti wavikomwa wakusimichila, e Tata amulimi. 2Akaputula insamba zyonsi mwakwe nene zino zisikoma ivikomwa, swinya akasanzulila insamba zyonsi zino zikakoma ivikomwa, alyakuti zisanzulilwe muswepe nga ziwakoma ivikomwa vivule. 3Mwenji mwaswepa kali amuno amazwi yane yano nawanena. 4Yikalani mwakwe nene, nani nandi njikale mwakwe mwemwe. Ulusamba lutanga lukome longa; ukuwa lungakoma ndi luli mumuti. Avino namwenye mutanga mukome ivikomwa nkandi ndimwikala mwenene.

5Nemuti, mwenji mwensamba. Wensi wino ali mwakwe nene, nani nkawa mwakwe weliwe, awino akakoma ivikomwa vivule; amuno mutanga mufungule chimwi mwenga ndinsipo. 6Wensi wino asinakwikala mwakwe nene akasumbwa kulonde, ngati alusamba, akala; insamba nkale zikakonganikwa, azisumbilwa mumulilo, azilungulila. 7Ndachino mwikala mwakwe nene, namazwi yane yikala mwakwe mwemwe, peni muliwalenga chonsi chino mukulonda, amupochelelela. 8Etata akachindamichilwa kwechonyechoo: muno mukukoma ivikomwa vivule; apano muliwa mwewasambilizi wane. 9Nawakunda ndivino Tata wankunda; yikalanji mulukundo lwane. 10Ndi mukutontela amasundo yane, muliyikala mulukundo lwane, ndivino nani natontela amasundo yakwe Tata nikala mulukundo lwakwe.

11Nawanena vyonye-vyoo alyakuti ichimwemwe chane chiwe mwakwe mwemwe, nga nichimwemwe chinu chiwe achimwemwe chenecho. 12Lyoo alisundo lyane: ilyakuti kundananji, ndivino nawakunda. 13Ulukundo Iwenecho luno umuntu wazipila ukukunda iviwuza vyakwe akuwafwila. 14Mweviwuza vyane, ndimwachita vino nawasunda. 15Ntandi ndawita swinya nkuti mwewawomvi wane, amuno umuwomvi asimanya chino yisikulu akuchita. Achaleka nkuwita nkuti mweviwuza vyane, amuno nawawumbulila vyonsi vino nivwa kwe Tata. 16Mutansola; ukuwa nawasola, nawalasika ukuti mukakomange ivikomwa vivule, ivikomwa vino vikalandila. Nachonsi chino mwiza mwalenga kwe Tata mwizina lyane aliwapa. 17Chonye-choo achino nawakomelezya, ichakuti, Kundananji.

Ukupakwa nawalwani wakwe Leza munsi

18Ndi awalwani wakwe Leza munsi wawapata muwakwizuka kuno wampasile nene pakutalika. 19Ndi mutele mwe wakwe woliwo peni walyanye wanga wawakunde amuno mwanga mutele mwakolana nawo. Ukuwa nawasola nawafumya mwakwe woliwo, swinya musi mwe wawo; achaleka wawapata. 20Yizukanji chino nawanenile: chino natili, Umuzya atakula walusya yisikulu. Ndiwanjimvizye nene, namwenye waliwayimvya; ndi watontezile amazwi yane, ye namwenye walitontela amazwi yinu. 21Ukuwa waliwachitila ivintu vyonsi vyonye-vyoo amuno mwewantu wane; amuno watamanya wino wantuma. 22Ndachino ntele ntizile mvwanga nawo ngali wasi mumulandu; ukuwa kanonzi wasi nakapemezyo kuluwembu lwawo. 23Wensi wino wampata, atela wapata nu Tatanye. 24Ndintele ntawomba imilimo yakuzungusya mwakwe woliwo ngali wasi numulandu ndivino wali nawo kanonzi, ukuwa napano walola vino nachita wampata wapata nu Tatanye. 25Naponye choo chapona alyakuti chino chawalikwa mumasundo yawo chifiswe ichakuti, Wampasile apavye patupu.

26Ndiwatumila kavwa — e Muzimu wakusimichila, wino wafuma kwe Tata, awino ayize ukufuma kwe Tata avwange ivyane. 27Namwenye muliwavwanga ivyane, amuno mwawanga nani ukufumilila pakutalika.

Currently Selected:

Yohani 15: WWN82

Highlight

Copy