Intaliko 9

E Leza alayana nu Nowa

1E Leza apepa Nowa na wanakwe awanena ati, Kakwatananji muwanyama, mwizuzye insi. 2Ivya wumi vyonsi viliwawatina, ni nyunyi zya mupela zyonsi, na wila chintu chino chikasela pansi, ni nswi zya mwe sumbi, viliwa ni ntete; vyapwa kwakwe mwemwe. 3Ichawumi chonsi a chakulya chinu; ndivino nawapile kali ivya mafwa, achino kanonzi nawapa vyonsi-nye. 4Ukuwa mutize mulye ichakulya apaliponga nu wumi wakwe cholicho, akuli kuti mutize muwalya uwazi wakwe cholicho. 5Amuno nachawuzimanye ndilandula uwazi wakwe mwemwe mwensi; uwazi wakwe wila nyama nu wazi wakwe wila muntu, kwikasa lya munyina wa muntu ndilandula uwumi wakwe. 6Wensi wino wiza wazwisya uwazi wa muntu, nawe uwazi wakwe wulizwiswa nu muntu; amuno Leza welewuzile umuntu ku wukola wakwe. 7Kakwatananji muwanyama, muvule munsi muwakonjelezya.

8Apano Leza anena Nowa apaliponga na wanakwe ati, 9Nkulayana namwe ilelo, nga ni kwata linu ilya pansizi pakwe mwemwe, 10nga ni vya wumi vyonsi vino muli navyo, inyunyi, ivikwato, na wila nyama yonsi munsi yino mukuwanga nayo, vyonsi vino vyafuma mu wato. 11Nkulayana namwe nkuti, Pataliwa uwanda nanti wonga swinya wuno minzi ya ntalala yalilovya ichawumi chonsi. Kutalitela kuwe intalala ya konona insi swinya. 12Nga Leza ati, Choo achimanyilo chilayano lino nkulayana namwe nga ni vya wumi vyonsi vino muli navyo, nga ni kwata linu lyonsi lino liliyiza; 13Nawika umulalafute wane mwi yulu, a chimanyilo chi layano lyane munsi kukulayana ni vya-munsi. 14Ndi niza naleta amawingo papela pansi pano umulalafute waloleka mu mawingo, 15apano ndiyizuka ilayano lyane lino nalayana namwe nga ni vya wumi vyonsi; ukuti kutalitela kuwe intalala yakulovya ichawumi chonsi. 16Ponsi pano umulalafute wuliloleka mu mawingo, ndiwulola njizuke ilayano ntasila line ndayine ni vya wumi vyonsi vino vili munsi. 17Leza anena Nowa ati, Choo a chimanyilo chi layano lyane kwakwe mwemwe na ku vya wumi vyonsi vino vili munsi.

E Nowa na wanakwe

18Awanakwe Nowa wane wafumile mu wato walinji we Shem, nu Ham, nu Jafeti. Ham walinji we yisi wakwe Kenani. 19Waa wotatu walinji awana wonsi wakwe Nowa; nu kufuma kwakwe woliwo insi yonsi yizuzile na wantu.

20Nowa walinji we sichilima wakutalika. Walimile imiti yavikomwa vino wakasuta ipala, 21ang’wa ipala, akolwa, alala chintakwa mu mutanda wakwe. 22Nga Ham e yisi wakwe Kenani alola yisi, aya anena awanyina wowili panzi. 23Ngapano Shem nu Jafeti awasenda ichizwalo pa maweya yawo wowili, awapita chimfundansizi, awaya awazwika yisi; nanti kumulolela. 24Ala Nowa wakolokwa wamanya chino umwanakwe umuzuna wachisile, ati,

25Kenani watipwa,

aliwa muzya nkaninye ku wanyina.

26Swinya anyoka ati,

Ndi Imfumu e Leza apepe Shem;

ukuti aleke Kenani awe a muzya wakwe,

nu kuti Kenani ayize awe a muzya wakwe.

27E Leza akuzye Jafeti

ukuti ayize awakwikala mu mitanda yakwe Shem;

28Yalanga pano intalala yasila Nowa atela wamala imyaka imyanda yitatu ni myaka amakumi yasano (350). 29Uwulanzi wakwe Nowa walinji ni myaka imyanda mufundikambali ni myaka amakumi yasano (950); nga afwa.

Currently Selected:

Intaliko 9: WWN82

Highlight

Copy