Intaliko 8

Insilo yantalala

1E Leza ayizuka Nowa ni nyama zyonsi ni vikwato vino vyalinji nawe mu wato. Nga Leza aleka umuza awuwapupa munsi, aminzi ayatalika ukupwa; 2utuntopwezi twa minzi na mapongololo ya mwi yulu aviyalwa, ni mvula iputuka, 3na minzi ayawapwa katichi-katichi. Ayala manda yasila umwanda wonga na makumi yasano aminzi ayachepa; 4nga mu mwezi wachitimunenulambali, mu wanda wachitikumi na munenulambali (17) uwa mwezi wowonye, uwato awimilila pa myamba yakwe Ararati. 5Aminzi ayalanga yakupwa ukwiza fika na mu mwezi wachitikumi; mu mwezi wachitikumi, pa wanda wakutalika wa mwezi wowonye, insongo zya myamba azitalika ukuloleka.

6Ayala manda yasila amakumi yani Nowa ayiyula ipongololo lya wato, 7nga atuma ichipata; achiwapapuka konsi-konsi ayasuka aminzi ayapwa munsi. 8Swinya atuma inkunda alyakuti amanye ndi aminzi yapwa munsi; 9ukuwa inkunda ipotwa apakwimilila, achaleka iwela ku wato, amuno aminzi yatezile yalipo munsi. Apano asomfya ikasa pi pongololo ayinjizya inkunda mu wato. 10Nowa alindilila amanda yanji munenulambali, anyoka atuma inkunda swinya; 11inkunda inyoka kwakwe weliwe amanguzi, si lolani, yalinji nifwa lino yakuntuzile ku mungungu ku mulomo wakwe; apano Nowa amanya kuno aminzi yapwa munsi. 12Swinya anyoka alindilila amanda yanji munenulambali, anyoka atuma inkunda; ilala yapita nanti kunyoka swinya.

13Pano Nowa walinji ni myaka imyanda mutanda nu mwaka wonga (601), mu mwezi wakutalika, mu wanda wakutalika uwa mwezi apano aminzi yapwile munsi; nga Nowa ayiyula ichisakati cha wato, ala watalangania alola kuno umusili wakala. 14Mu mwezi wachitiwili pano kwasila amanda amakumi yawili na manda munenulambali (27) umusili awukala. 15Apano Leza anena Nowa ati, 16Fuma mu wato, wewe apaliponga nu wakwako, na wanako, na wanyokovyala. 17Ufumye na wila chintu chonsi ichawumi chino uli nacho—inyunyi ni nyama na chonsi chino chikasela pansi—ukuti vikakwatanange munsi, ukuti viwasanduluka nu kunyama munsi. 18Apano Nowa afuma, na wanakwe nu muchi na wanyinavyala. 19Ni nyama zyonsi, na vino vikasela pansi, ni nyunyi, ni cha wumi chonsi icha munsi, icha mwiko na mwiko, avifuma mu wato.

Nowa afima inzuwi

20Ngapano Nowa azenga ileza, asenda na pakwe wila nyama nzima na wila nyunyi nzima, apa inzuwi njoche penepo ku Mfumu e Leza. 21Ala pano Imfumu e Leza wapochelela ifungo nunchile, avwanga mu mwezo wakwe ati, Ntalitela ntipe insi swinya amuno amulawa, amuno amelengania ya mu mwezo wakwe amawipe ukufumilila ku wucheche wakwe; swinya ntalitela ndovye ivya wumi vyonsi ndivino nachita. 22Pano insi ichili ilipo, impindi ya kutanda ni ya kusinza, impindi ya mpepo ni ya chilungula, ichisiku ni chisanya, uwusiku nu musanya, vitalisila.

Currently Selected:

Intaliko 8: WWN82

Highlight

Copy