Intaliko 39

E Jozefu numuka Potifara

1Jozefu wasenzilwe aya ku Ijeputi, e Potifara esongo wa musika wa vita vyakwe Fero mu Ijeputi wamukazile ku wina Ishumaeli, wane wamutwazile kweneko. 2Imfumu e Leza walinji nu Jozefu, walinji amupepwe; wikalanga mu ng’anda yakwe yisikulu umu Ijeputi, 3nu yisikulu alola kuno Imfumu e Leza walinji nawe, achaleka chonsi chino wachisile Imfumu e Leza walesile achiwa chintu chizima. 4Achaleka Jozefu wapochelezile inkuAleka awa we songo wa mu ng’anda yakwe, apaliponga na vyonsi vino vyalinji mwenemo aviwa mu makasa yakwe. 5Ukufumilila pa mpindi-nye yoyo pano wamulasisile pa wusongo mu ng’anda yakwe, na pakwe vyonsi vino walinji navyo, Imfumu e Leza apepa ing’anda ya mwina Ijeputi muno we Jozefu, ukupepwa kwa Mfumu e Leza kwalinji pakwe vyonsi vino walinji navyo, mu ng’anda na ku londe. 6Achaleka wawisile vyonsi vino walinji navyo mu makasa yakwe Jozefu, nga muno weliwe atasakamikwanga nanti chimwi suka ndi akulya kwakwe kutupu.

Jozefu wazifile nkaninye ku milolechele yakwe. 7Achaleka uwanda wutalile kantu, e muka yisikulu amulolechesya, amunena ati, Ulale nani. 8Ukuwa akana, anena muka yisikulu ati, Lola, e tatakulu atamanya ichintu chimwi chino chili mu ng’anda, swinya wapa ivintu vyonsi mu makasa yane; 9mu ng’anda yoo pasi wino wandusya uwusongo nanti weliwenye, swinya atayisunjila ichintu chimwi, nkandi wewenye muno we muchi; ngamuno chani chino ingachita ichintu chiwipe ndivino choo, mbembuke kwe Leza. 10Chingatenga wanenanga e Jozefu uwanda nu wanda, lela atatela amuzumilizye, ukuti alale nawe nanti akwikala nawe. 11Ukuwa uwanda wumwi pano Jozefu wayile mu ng’anda mukuwomba umulimo wake, mutalinji nu muntu winji mwenemo, 12amulema umwenda, amunena ati, Lala nani. Ukuwa amusila umwenda asamalila pa londe. 13Ukuwa ala walola kuno wasyala nu mwenda mu makasa yakwe, wasamalila pa londe, 14ayita awawomvi awonsi awanena ati, Lolani, watuletela umu Heberi kukutukwelengula; ayizile kwe nene wati ndale nawe, achaleka napunda nizwi kulu; 15achaleka pano wivwa kuno napundisya wasya umwenda wasamalila pa londe. 16Achaleka alanga ali nu mwenda asuka yisikulu awela ku kaya. 17Apano amulandila ilandwe ati, Umuwomvi umu Heberi, wino watuletela, watela ayizile kwenene nu kunkwelengula; 18ukuwa pano napundisya mbali nu kulila, wansila umwenda wakwe wasamalila pa londe.

19Walanga pano yisikulu wivwa amazwi yano umuchi wamunenile, ati, Woo awuli mwata wuno umuwomvi wako wanchisile, avitwa nkaninye. 20Nga yisikulu ayiyalila Jozefu mu ng’anda ya vingololo, mu ng’anda yino awavingololo wa mfumu wiyalilwanga, amuno awamwiyalila, awakwikala mwenemo. 21Ukuwa Imfumu e Leza walinji nu Jozefu, amulanjizya ulukundo lukulu, 22aleka ekasunga wa vingololo apa Jozefu amaka ya kusunga awa vingololo wonsi wano wanyefilwe; aleka na chonsi chino chachitwanga mwenemo, achichitwa nu Jozefu; 23acheleka kasunga wa vingololo nanti kupechela kwe chino Jozefu wachitanga, amuno Imfumu e Leza walinji nawe; na chonsi chino Jozefu wachitanga, Imfumu e Leza wamwavwilizyanga.

Currently Selected:

Intaliko 39: WWN82

Highlight

Copy