Intaliko 40

Jozefu azimbula ivilota

1Pansizi pakwe choo, kateweta wa mfumu ya ku Ijeputi, nu katenda wawifizye kwe yisikulu imfumu ya mu Ijeputi. 2Achaleka Fero wavitizilwe inkombe zyakwe zyowili e kateweta nu katenda, 3nga awiyalila mu ng’anda yakwe musika wa vita, mu ng’anda ya vingololo muno Jozefu walinji. 4E musika wa vita apa awantu wawo mu makasa yakwe Jozefu, awawalindilila; awalanga wali mwenemo ku mpindi yimwi; 5uwusiku wumwi wowilinye walosile ivilota—e kateweta nu katenda wa mfumu ya mu Ijeputi, wano wiyalizilwe mu ng’anda ya vingololo. Wila muntu walosile ichilota chakwe, wila chilota ni misulile yakwe cholicho. 6Walanga pano Jozefu waya kwe woliwo umutondotondo, alola wafwilimine. 7Achaleka awuzichisya inkombe zyakwe Fero zino zyalinji nawe mu ng’anda ya vingololo mu ng’anda yakwe yisikulu, ati, Nga chani chino ilelo mufwilimine? 8Awamutolelela awati, Tulosile ivilota, swinya pasi wumwi wino angatuzimbulila. Ngapano Jozefu awawuzya ati, Wuzye ukuzimbula kusi akwakwe Leza? Nazina nenani ivilota vinu.

9Achaleka kateweta awumbulila Jozefu muno walotezile ati, Mu chilota chane ndosile umuti wa vikomwa vino wakasuta ipala pankolelo pakwe nene, 10na ku muti kuli insamba zitatu; pano zyafundika imfundwa, wawalula na maluwa, ni visansangu vya vikomwa vyacha. 11Ulupindi lwa mfumu e Fero lwatela luli mu makasa yane, nasenda vikomwa nafinila mu lupindi lwakwe Fero namupa mu makasa. 12Ngapano Jozefu amunena ati, Ukuzimbula kwa chilota chako kuli woo: insamba zitatu amanda yatatu; 13ndi amanda yatatu yasila imfumu e Fero alikukatusya, akunyosezye ku mulimo wako; uliwapa Fero ulupindi ndivino pakutalika, pano walinji we kateweta wakwe. 14Ukuwa uyize unjizuke pano vyonsi viza vyawa ichete kwe wewe, nazina uyize umfwile inkumbu, umvwanjile kwe Fero, alyakuti mfume mu ng’anda yoo. 15Muno nachawuzimanye wanjivile munsi ya wa Heberi; nga swinya nanti a konyekoo ntachita ichintu nanti chonga chino wambichila mu ng’anda ya vingololo.

16Ala pano katenda walola kuno ichilota chazipa, anena Jozefu ati, Naninye ndosile, nsenzile imise yitatu iya chakulya pa mutwe wane. 17Na mu chise cha papela mwalinji ivyakulya vya misango-misango ivitende ivyakwe Fero, ukuwa inyunyi zyatela zikusompa mu muse pa mutwe wane. 18Nga Jozefu atolelela ati, Imizimbulile ya chilota chako ayoo. Imise yitatu a manda yatatu; 19ndi kwasila amanda yatatu Fero alikukatusya alikufumya, akunyonge ku muti; ni nyunyi ziliwakulya.

20Pa wanda wachititatu wuno walinji a wanda wa nkwatwa yakwe Fero, atewetela awawomvi wakwe wonsi ichakulya, akatusya kateweta nu katenda paminso ya wantu wakwe. 21Asapula kateweta aya ku mulimo wakwe, awapyunjila e Fero nu lupindi; 22ukuwa anyonga e katenda, ukulingana na muno Jozefu wazimbulizile ivilota. 23Ukuwa kateweta atatela ayizuke Jozefu, wamwiwilizile.

Currently Selected:

Intaliko 40: WWN82

Highlight

Copy