Luku 7

1Kate chekedi te gnafa mae Jisas glepo igre ka naiknore mana jifla ne tei Kapanam.

Mae Jisas ne fakelini nogna mae gloku kaisei mae funeidi hatimare mae armi

(Mat 8:5-13)

2Ka namono Kapanam, jare kaisei nogna mae gloku mae funeidi hatimare mae armi di Rom, mana thono fogra fara namo ne lehe. Mae funeidi hatimare mae armi di Rom igne, thono namhani fara nogna mae gloku na. 3Kate nomhini mana thoutonu eigna mae Jisas na, mana ne kuru teidi keha mae biꞌo ka hatimare mae Jiu mala tei toreni mae Jisas mala mei fakelini nogna mae gloku na. 4Kate thoke mare ka mae Jisas na, mare ne tore faheta eghu ka mana, “Mae funeidi hatimare mae armi di Rom thofno magnahaghei fara nou thotogho iagho na ka nogna mae gloku na. 5Naugna mae biꞌodi hatimare mae armi igne thono namha ghami ghehati fara neke babana nomi suga tharai ghehati na.” 6Aonu mae Jisas ne tei baludi mare.

Kate tei te namo posa mae Jisas ka sugagna mae biꞌo na, mae biꞌo na ne kurudi keha mae ne mei cheke eghu ka mae Jisas, “Funei, mae biꞌo na ne cheke eghu, ‘Thosei fagloku biꞌo nigho te mei ka sugagu iara na. Naugna iara theome nabagu te ruma iagho ka sugagu na. 7Iara thegu na jaola theome nabagu te mei filo nigho na. Nu ka chekemu kolho mala ke keli fapulo nogu mae gloku na. 8Tutuani fara, iara gne kaisei mae aula mae biꞌo te mala kuru ghau na. Nu au kmana mae soldia langau te mala kurudi iara re. Eghuteuna, te cheke eghu iara ka mae igne, “Tei sagho,” mana na tei. Nu te cheke eghu iara ka keha mae ana, “Mei sagho agne!” mana na mei. Nu te cheke eghu iara ka nogu mae gloku na, “Eni sagho igne!” mana na eni tuana.’ ”

9Kate nomhini cheke igne, mae Jisas ne jaglo nogna fara ka mana. Mana figri ne cheke eghu ka naikno teke leghuni mana re, “Icho idomi! Tuani fara, te chekeni iara ka ghotilo na, iara neke theome filodeni kaisei naikno te biꞌo nogna fatutuani na jateula mae igne teu agne Israel.” 10Mae teke khurudi mae biꞌo na teke mei filoni mae Jisas re neke pulo ka suga na. Kate pulo mare ka suga na, mare ne filoni mae teke fogra na neke keli fapulo.

Mae Jisas ne fakarhini thugna naikno biꞌo na

11Kaisei narane ke leghugna igne, mae Jisas ne tei ka namono te kiloi Nain. Eghuteuna hatimare nogna mae fanomhore, nei kmana naikno fara langau eghu ne tei balugna mana. 12Kate posa mei mae Jisas rhegna namono na, kaisei jajagha naikno te mala tei ka giugilu na pala ne mei kaisei mae sua nalhaꞌu teke lehe na. Mae sua igne ngala thugna naikno biꞌo te glehe kokoi na. Eghuteuna naiknogna namono tuana ne kafe tei balugna naꞌa. 13Mae Jisas ne filoni naꞌa ne kokhoni nogna ni. Mana ne tei ka naꞌa ne cheke eghu, “Naikno biꞌo, thosei tanhi.”

14Aonu, mana lao ne habo ka glele na. Hatimare mae teke pala re ne kegra snoto. Mae Jisas ne cheke eghu ka masitei na, “Mae majaghani! Te chekeni iara ka iagho na, ‘Ke karha fapulo sagho!’ ” 15Mae sua teke lehe na gnokro haghe ne vuha facheke. Aonu mae Jisas neke snakre fapuloni ka idogna na.

16Iheire teke au tekeu jare ka vido tuana ne kafe jaglo nodi fara, ne kilo fnaknoni God. Mare ne cheke eghu, “Kaisei mae profet biꞌo la thakle mei farihoteida tahati! God na la mei mala toghodi nogna naiknore!”

17Nonomho eigna mae Jisas igne ne tei tongana ka namono te gnafa ka Provins Judia nei ka keha namono langau ka keha provins rhegna Judia.

Mae khuru vuhadi ka mae Jone Apublahi

(Mat 11:2-19)

18-20Nogna mae fanomho Jone Apublahi re ne toutonu ka mana unha te edi mae Jisas re. Aonu mana ne kurudi phei nogna mae fanomhore ne tei ka mae Jisas mala ghusna eghu ka mana, “Iagho ngala si mae teke chekeni mae Jone Apublahi mala mei fakarhi ghami ghehati teku ia, ba kaisei mae ngau te mala ofoni teu ghehati ia?” Aonu, mare ne tei ka mae Jisas mala ghusnani mana.

21Phei mae fanomho igre tei ne filoni mae Jisas te fakelidi kmana naikno te fogra, nei dofu, nei bruedi naitu teure. 22Mana ne cheke eghu ka phiamare, “Ke figri si ghopa ka mae Jone mala ke toutonu ka mana, unha glepo teke nomhidi nei filodi teku ghotilo ra. Iara gognarona fakelidi naikno te dofu, naikno te blughu, naikno te thubu biꞌo, naikno te megli, fakarha fapulodi naikno teke lehehi, nei toutonuni Nonomho te Keli na ka naikno te kumare. 23Eghume, ihei te maku fabrahu ka iara nogna fatutuani na, mana ginauna na gleale'a fara.”

24Aonu, ke leghugna teke pulohi nogna mae fanomho mae Jone re, mae Jisas ne toutonu eigna mae Jone ka naiknore. Mana ne ghusna eghu ka mare, “Ghotilo teke tei kau namono nagou ia unha nafnata naikno teke tei filoni ghotilo jare na? Ghotilo neke tei mala filoni kaisei mae te ghatho peapea jateula fora te blele tafri kau nuri ia eghu? Theo! 25Ba neke tei mala filo unha? Mala filoni kaisei mae te pipichi pohe te famane? Theo! Ihei te pipichi nafnata pohe tuare au ka sugagna mae funei. 26Ba, neke tei mala filo unha si ghotilo ia? Kaisei mae profet? Uve, tutuani fara! Mae Jone Apublahi na kaisei mae profet biꞌo fara ka mae profet teke kulu au tifa ra. 27Naugna God neke cheke eigna mae Jone Apublahi ka mae Thugna na neke cheke eghu,

“ ‘Iara na kuruni mae nogu gloku na mala kulu ari ke ulumu iagho, mala kulu tarabana nabrou mala tei mu iagho.’

28 Tutuani fara, te chekeni iara ka ghotilo na, mae Jone Apublahi gne kaisei mae biꞌo fara ka fiti naikno kolho te gnafa kau nauthoglu igne. Nu naikno te ikoi fara ke lamnadi naikno God te funei frunidire, mana mae biꞌo fara uluni mae Jone.”

29Kate nomhini igne, naiknore ne keli tadi fara ka nogna farirhiu God na. Hatimare mae mala salo takis gre ba jaola ne keli tadi fara. Naikno igre neke kulu apublahi ka mae Jone. 30Nu mae Farasi nei mae velepuhigna vetula nogna mae Moses teu igre, mare ne tirodi leghuni nogna ghaoghatho God te maladi thedi na. Mare theome magnahagheni mae Jone te faꞌapublahidi.

31Eghuteuna, mae Jisas ne cheke eghu ka mare, “Iara lase ghami ghotilo naikno gognaro gre. 32Ghotilo jateula phei bukrei sua te gnokro teu ka glalaba na, te eha eghu fari thedi ira eghu,

“ ‘Ghotilo te koje ghehati khoje te mala gleale'a nei ragi teuna,

ghotilo tiromi ragi kolho.

Nu te koje ghehati u khoje te mala diꞌanagnafa na,

ghotilo tiromi diꞌanagnafa nei tanhi eghu kolho.’

Igne thotoghale eimi ghepa mae Jone Apublahi na. 33Kate mei mae Jone te theome ima nei theome koꞌu teuna naiknore ne cheke eghu, ‘Mae igne au kaisei naitu tagna signe.’ 34Eghuteuna kate thoke mei iara te ima nei koꞌu teuna, naiknore ne cheke eghu, ‘Filoni si ghotilo mae igne! Mana ima nei koꞌu teuna ngala te glepo ulu ka mana na! Eghuteuna, mae te diꞌa te salo takis nei keha mae te diꞌa la teu igre ngala te mae kheragna mana re.’ 35Eghuteuna mare ginauna na filoni nogna gaoghatho te keli God na kate thakle meidi unha glepo te tutuanire.”

Mae Jisas ka sugagna Simon kaisei mae Farasi

36Kaisei mae Farasi, nanghagna na mae Simon, mana ne toreni mae Jisas mala tei ima ka sugagna na. Eghuteuna mae Jisas ne tei ka sugagna mae igne ne gnokro soru ne ima. 37Aonu, kaisei naikno biꞌo te gnognoro fara ne nomhini mae Jisas te ima teu ka suga tuana. Aonu naꞌa ne hata kaisei botol thina te fodu ka kholo te sisiri keligna. 38Naꞌa kegra ke leghugna mae Jisas ne tanhi neu. Naꞌa ne fabobothu ka kholo tathagnare phei ghahegna mae Jisas re. Eghuteuna naꞌa tuturupuku soru ne famomoja ka khaklagna thegna te brahure ne gnangho fabrahu. Jaola naꞌa totofa kholo te sisiri keligna na ke klignadi.

39Kate filoni igne, mae Simon ne au gaoghathogna ne cheke eghu, “Jame thofno mae profet mae igne na, mana jame laseni puhigna thau te haboni mana igne. Naugna naꞌa kaisei naikno gnognoro fara!”

40Mae Jisas ne cheke eghu ka mana, “Ghema Simon, iara magnahaghei te chekeni kaisei glepo ka iagho.”

Mae Simon ne cheke eghu ka mae Jisas, “Uve, velepuhi, facheke sagho.”

41 Mae Jisas ne cheke eghu, “Uve, kaisei mae ne snakredi phei mae ne kaoni sileni. Kaisei mae ne kaoni glima gobi dola, keha mae na glimafulu dola kolho. 42Nu phei mae igre theo nodi sileni, eghume phiamare theome tangomana teke tughu fapulo nodi kaonire. Nu mae ihei teke tusu ranghidi phiamare sileni igre lasedi phei mae igre theo nodi sileni naba te mala tughu fapulo nodi kaonire. Aonu mana ne cheke eghu ka phiamare, ‘Keli kolho, te chekeni iara ka ghopa na. Iara snakre ghami ghopa mala thosei tughu fapulo nomi kaonire.’ Mae ihei ka phei mae igre te namhani tulao mana na?”

43Mae Simon ne cheke eghu, “Te ghathoni iara na, jame mae ihei te biꞌo fara nogna kaoni na igne.”

Mae Jisas ne cheke eghu ka mana, “Iagho famane cheke tughu fara.”

44Mae Jisas figri lao ka naikno biꞌo na ne cheke eghu ka mae Simon, “Filoni sagho naikno biꞌo igne! Iara mei ruma ka sugamu iagho gne, eghuteuna iagho theome famei khoꞌu mala titihi iara ghahegu gre. Eghuteuna thau igne ne titihi ghahegu gre kau kholo di phei tathagnare, nei famomoja kau khaklagna thegna re. 45Kate ruma mei iara ka sugamu na, iagho theome mei kubae ghau iara. Nu funu ruma mei gu iara te ghilei thokei gognaro ao, naꞌa theome gnafa te gnaognanghodi ghahegu iara gre. 46Iagho theome dadalu pha'ugu iara na ka sedi, eghuteuna naꞌa ne dadalu ghahegu iara re kau kholo te sisiri keligna igne. 47Uve, naikno biꞌo igne au kmana nakhibogna fara. Nu te chekeni iara ka iagho na, iara la hata fadeleihi nakhibognare. Naugna naꞌa ne namha ghau fara iara. Nu ihei te theome kmana nakhibogna te mala hata fadelei iara na, mana theome tangomana te namhadi fara keha naiknore.”

48Gnafa teuna mae Jisas ne cheke eghu ka naꞌa, “Naikno biꞌo, iara la hata fadeleihi nakhibomu iagho re.”

49Aonu, hatimare mae te gnokro ima teu ka tevo na, ne cheke eghu fari thedi, “Tore, mae ihei si ignea? Tangomana si mana te hata fadeleidi nakhibodi naikno grea?”

50Mae Jisas ne cheke eghu ka naikno biꞌo na, “Iagho fatutuani ghau iara. Naugna igne iara ne fakarha nigho ka nakhibo. Jifla tei kau pharikeli.”

Currently Selected:

Luku 7: mrn

Highlight

Copy