Luku 8
8
Goro gaꞌase te tei balugna mae Jisas
1Kaisei fata ke leghugna igne, mae Jisas ne tei ka namono biꞌo nei ka namono ikodi eghu ka Provins Galili mala toutonuni Nonomho te Keli eigna nakarha God te funei frunini. Eghuteuna, hatimare nabotho phei nogna mae fanomhore 2nei keha gaꞌase langau eghu ne tei balugna mana. Eghuteuna gaꞌase igre mana neke fakarhidi ka naitu nei kau kmana nafnata khabru. Kaisei na Meri, naꞌa thau gna Makidala, mana neke brue fajifladi fitu naitu ka naꞌa tifa. 3Eghuteuna kehana Joana, khetogna mae Kusa, mae biꞌo te mala reireghidi nogna glepo mae King Herod Antipas. Kehana Susana baludi kmana gaꞌase langau eghu. Eghuteuna gaꞌase igre tangomana te toghodi mae Jisas nei hatimare nogna mae fanomhore ka nodi glepo thedire.
U cheke naba eigna joꞌu sisi
(Mat 13:1-9; Mak 4:1-9)
4Aonu kmana naikno ne khapru mei ka mae Jisas, mei funudi kau namonodire. Aonu mana ne cheke eghu ranghidi kau cheke naba igne, 5“Kaisei mae tei ne joꞌu kmana sisi ka nogna nagare na. Kate toatofa mana sisire, keha sisire ne soru ka nabrou. Eghuteuna naiknore mei ka nabrou na ne tapla ke klignadi, eghuteuna nanghajire mei ne ghamu fateo. 6Eghuteuna, kehare ne soru ke kligna glose te saesape ka thina. Sisi igre ne sublo haghe, nu ghosei ne lehe, naugna glose na ne moja fara. 7Keha sisire ne soru ka vido te au gnarho fachuchuru. Eghuteuna gnarho te fachuchuru tuare ne kotu haghe baludi sisire ne farore ne theome kotu. 8Nu keha sisire ne soru ka glose te keli. Aonu sisi igre ne kotu fakeli ne thokeni kaisei gobi.”
Gnafa teuna, mae Jisas ne cheke eghu, “Uve, ghotilo naikno te fanomho ka iara gre, hiro fakeli gaoghathodi cheke igre.”
Mae Jisas ne rurutha gaoghathogna cheke naba igne
(Mat 13:10-23; Mak 4:10-20)
9Hatimare nogna mae fanomho mana re mei ne ghusna ka mae Jisas gaoghathogna cheke naba eidi sisi igre. 10Mae Jisas ne cheke eghu ka mare, “God neke tusu ari ka ghotilo kolho glalase te mala lase fakelidi thofno glepo te au poru ka nakarha God te funei frunini. Nu iara cheke ranghidi keha naiknore ka cheke naba kolho. Kate eni iara igne ne horoghoto fara ka unha teke chekeni mae profet Isaia tifa ia,
“ ‘Neubane hiro mare, mare na theome tangomana te filo glanini.
Eghuteuna neubane fanomho mare, mare ginauna na theome tangomana te nomhi fakelini.’ ”
11Mae Jisas ne cheke eghu ka nogna mae fanomhore, “Gaoghathogna cheke naba igne. Sisi igne chekegna God. 12Eghuteuna sisi te soru ka nabrou na igre eidi iheire te nomhini cheke na, nu mae Satan mei hata fadelei ka nagnafadire cheke igre mala theome fatutuani, nei theome hatani eghu mare thofno nakarha na. 13Eghuteuna sisi te soru ka glose te saesape ka thina igne, eidi iheire te nomhini cheke na eghuteuna hata balu gleale'a. Nu ruma lamna ka gaoghathodire kolho. Mare fatutuani katha vido kmoꞌei kolho, eghuteuna kate thoke mei vido te ninhigrana igre, mare ginauna na lisa lao kolho gobigna lepore. 14Eghuteuna sisi te soru farihoteidi glathi gnarho te fachuchuru igre, eidi iheire te nomhini cheke na nu nanga nodi fara eidi kmana nafnata glepo. Mare namha dila dedei gna nauthoglu igne ba glepo te keli kau nakarha igne kolho. Aonu cheke igne ginauna theome kotu fakeli nei au kaisei sisi ikoi eghu kolho. 15Nu sisi te soru kau glose te keli igre eidi iheire te fanomho ka cheke na, eghuteuna loku famaku ka nagnafadi te klino nei tutuani teure. Eghuteuna mare leghuni chekegna God na ne heta ghedi ne ghilei au sisi te keli.”
Cheke naba eigna juta
(Mak 4:21-25)
16Eghuteuna mae Jisas ne cheke eghu, “Theo kaisei mae te fakasa juta na te toku tafru ke pari khara'o na, ba lilisei ke pari sape. Nu mana na lilisei ka vido te mala augna na, eghuteuna naikno te ruma ka suga tuana na fifilo fakeli eigna naphae tuana. 17Eghume jateula tuana eghu gobigna lepo te au poru teu gognaro gre, gobigna lepo tuare na thakleu ka vido te snagla. Eghuteuna gobigna lepo te poru ka naiknore ginauna na filo fakelini kate jifla mei kate snagla. 18Naugna te eghu tuana me, ghotilo faghano fanomho fakeli ka cheke igre. Naugna mae ihei te au nogna glepo na, God ginauna nake tusu ranghini mana keha glepoi. Nu mae ihei te theo nogna glepo na, neubane katha ikoi kolho te au ka mana na, God ginauna nake hata fadelei ka mana.”
Vikegna mae Jisas
(Mat 12:46-50; Mak 3:31-35)
19Idogna nei thabusigna teu mae Jisas re ne mei mala filoni mana. Nu mare theome tangomana te lao namo ka mana na, naugna naikno kmana fara te khapru faligohoni mana na. 20Aonu naiknore ne cheke eghu ka mae Jisas, “Idomu nei thabusimu teu iagho re kegrau kosi. Mare magnahaghei te mei filo nigho iagho.”
21Mae Jisas ne cheke eghu, “Iheire ngala te nomhini chekegna God na, nei leghuni mana teu, igre ngala te idogu nei thabusigu teu iara re.”
Mae Jisas au nolaghi mala famuanani maraghata biꞌo na
(Mat 8:23-27; Mak 4:35-41)
22Kaisei narane mae Jisas ne cheke eghu ka nogna mae fanomhore, “Tahati na tei kasa ka keha phile kholo gno.” Aonu mare saghe ka mola na ne funu kasa. 23Kate selo te kasa mare ka kholo na mae Jisas ne thuru iho. Eghuteuna kaisei seseuru biꞌo ne soru kau kholo na. Aonu mola na ne vuha fodu ka khoꞌu, ne funu plulu soru.
24Mae fanomhore mhaghu ne tei fadofrani mana, ne cheke eghu ka mana, “Mae funei, mae funei, tahati la namo lehe!”
Aonu mae Jisas kegra haghe ne cheke faheta ka nuri na, nei ke jaola ka galore. Eghuteuna nuri na ghosei ne snoto, nei kholo na neke beata. 25Ke leghugna igne, mae Jisas ne cheke eghu ka mae fanomhore, “Ba, tore, aheva si nomi fatutuani ghotilo na ia?” Nu hatimare ne mhaghu nei jaglo nodi ne cheke eghu fari thedi, “Tore, unha nafnata mae si ignea? Nuri ba ne galo ne faꞌuveni ngala chekegna mana na!”
Mae Jisas au nolaghi ke klignadi naiture
(Mat 8:28-34; Mak 5:1-20)
26Mae Jisas ne kasa baludi nogna mae fanomhore ka kholo na funudi ka Provins Galili. Mare mei ne longa ka nohi Gerasa. 27Kate longa mae Jisas na, kaisei mae te au naitu na mei ne thafoni mana. Funu tifa te ghilei mei thokei narane igne mae tuana theo kaisei pohe ka thinigna na, nei mana jaola theome au snoto lamna suga. Nu mana au fabrahu kau gluma te mala lilisei thinidi naikno te lehere. 28-29Eghuteuna kmana fata naitu na mei faheta fara ka mana. Neuba naiknore ne haru ghahegna nei khamegna teure ka phukri, ba lilisei mae mala reireghini, mana tangomana ngala te kukusu phukrire. Eghuteuna naitu na ne kuru teini mana mala au ka namono nagou na. Kate filoni mae Jisas na, mana eha eghu fabiꞌo ne tuturupuku ke ulugna mae Jisas. Jisas ne cheke faheta ka naitu na mala jifla mei ka mana. Aonu mae igne ne eha eghu fabiꞌo, “Sei, Jisas, Thugna God te nolaghi! Ba, na faꞌunha ghau iara sagho ia? Iara tore nigho mala thosei goigoni ghau iara!”
30Mae Jisas ne ghusna eghu ka mana, “Iagho mae ihei nanghamu na?”
Aonu mana ne cheke eghu, “Iara nanghagu na ‘Mae Thara.’ ” Naugna kmana naitu fara te au ka mana re. 31Eghuteuna naiture ne toreni mae Jisas mala thosei kuru teidi ka vido te kiloni mare “Glave mamhara te romno fara.”
32Kmana bosu humeu ka thogele na rhegna vido tuana. Aonu naiture ne toreni mae Jisas mala snakre teidi mala ruma ke lamnadi bosure. Aonu mae Jisas ne snakre teidi naitu igre ka bosure. 33Naitu igre jifla mei ka mana ne tei ruma ke lamnadi bosure. Eghuteuna bosure chari ne soru ka gerigna gukhu te phegu na ne krofu ka kholo na, ne kafe lehe.
34Kate filoni igne, mae teke ohodi bosure rikha ne posa ka namono biꞌo na ne toutonu ka naiknore nei jaola ka naikno te au ka nohi tuana. 35Aonu naiknore mei ne filoni unha te toutonuni mare na. Eghuteuna kate mei mare ka mae Jisas na, mare ne filoni mae teke brue fajifla mae Jisas naiture tagna na. Mana pipichi pohe gnokro neu rhedi ghahegna mae Jisas re, eghuteuna gaoghathognare kela doglohi. Aonu naiknore ne mhaghu nodi fara. 36Naikno teke filoni mae Jisas teke fakelini mae teke au naitu na ne toutonu ka keha naiknore eigna igne. 37Naiknodi Gerasa re kafe mhaghu nodi fara, naugna unha teke eni mae Jisas na ne toreni mana mala jifla tei delei. Aonu mae Jisas saghe ka mola na neke pulo Galili.
38Nu mae teke keli fapulo igne ne cheke eghu ka mae Jisas, “Ghema, iara magnahaghei te tei balumu iagho.” Nu mae Jisas ne kuru teini mana, ne cheke eghu ranghini, 39“Theo. Ke pulo sagho ka namonomu na mala toutonu ranghidi naiknore unha teke eni God ka iagho na.” Aonu mana neke pulo ka namono ne tei toutonu ka naiknore eigna unha teke eni mae Jisas ka mana na. Eghuteuna mae Jisas baludi nogna mae fanomhore neke pulo Galili.
Mae Jisas au nolaghi te mala fakelidi phei gaꞌasere
40Kate ke pulo mae Jisas ka keha phile kholo na, kmana naikno ofoni mana neu jare. 41Kaisei mae nanghagna na mae Jaerus ne mei ka mae Jisas. Mae Jaerus gne kaisei mae biꞌo ka suga tharai gna namono tuana. Mana mei ne tuturupuku soru ke ulugna mae Jisas ne toreni mana mala tei ka nogna suga na. 42Mana ne eni igne, naugna kaisei ngala thugna gaꞌase mana te nabotho phei finogha gna kolho igne ne namo lehehi. Mae Jisas ne magnahaghei ne tei ka sugagna mae Jaerus na.
Kate funu nolo te tei mae Jisas na, kmana naikno ne fahuahuta ne tei fari thedi rhegna mana, naugna mare magnahaghei te mei ka mana. 43Kaisei naikno biꞌo ke lamnadi naikno igre, naꞌa dadara fabrahu nabagna nabotho phei finogha. Naꞌa koko fahui nogna silenire ka hatimare mae dokta, nu theo kaisei mae dokta tangomana te fakelini naꞌa na. 44Eghuteuna naꞌa ne mei ke leghugna mae Jisas ne habo ka nogna khukru pohe mana na. Ka vido tuana dadara na ghosei ne noto.
45Aonu mae Jisas kegra snoto ne ghusna eghu, “Ihei si te habo ghau iara ia?”
Naikno te gnafare ne cheke eghu, “Ghehati theome habo nigho.” Mae Pita ne cheke eghu, “Velepuhi, naugna unha site ghusna eghu iagho gnea? Kmana naikno fara te khapru faligoho nigho nei kafe thugha mei teu ka iagho igre!”
46Nu mae Jisas ne cheke eghu, “Tutuani, kaisei naikno ne habo ghau iara! Iara haimini nogu nolaghi na ne jifla mei mala fakelini kaisei naikno.”
47Kate laseni nate filo deni mare na, naꞌa mhaghu nogna fara ne mei balu fififri ne tuturupuku soru ke ulugna mae Jisas. Kate kafe fanomho teu naiknore, naꞌa ne cheke thakleni eigna unha te mei naꞌa te haboni mae Jisas na. Naꞌa ne chekeni la kate haboni mae Jisas na, naꞌa ghosei neke keli fapulo nogna. 48Mae Jisas ne cheke eghu ka naꞌa, “Naikno biꞌo, iagho kela keli fapulo naugna iagho ne fatutuani. Iagho tangomana te tei na, eghuteuna thosei nanga nou eghu.”
49Kate facheke nga teu mae Jisas ka naꞌa na, kaisei mae ne mei ka mare funu ka sugagna mae Jaerus mae biꞌo gna suga tharai na. Mana ne cheke eghu ka mae Jaerus, “Ghema, thumu gaꞌase iagho na la lehehi! Thosei fagloku biꞌoni mae velepuhi na.”
50Kate nomhini igne mae Jisas ne cheke eghu ka mae Jaerus, “Thosei nanga nou fara, nu fatutuani ghau ngala iara. Eghuteuna thumu iagho na ginauna nake keli fapulo.”
51Kate tei te posa ka suga mae Jaerus na, mae Jisas ne theome snakredi naiknore te ruma balugna kau chogho te au sua gaꞌase na. Nu mae Pita, mae Jemes, mae Jone nei idogna kmagna teure ngala te ruma balugna re. 52Naikno te au ka suga tuana ne kafe tanhi balu diꞌanagnafa, naugna sua gaꞌase na la lehehi. Nu mae Jisas ne cheke eghu, “Thosei tanhi. Naꞌa theome lehe, nu naꞌa thuru au kolho!”
53Naiknore ne funu maꞌeni mae Jisas, naugna mare lasenihi tela lehehi sua gaꞌase na. 54Nu mae Jisas loku ka khamegna sua gaꞌase na, ne cheke eghu, “Sua gaꞌase, kegra haghe.” 55Nuinurigna sua gaꞌase na neke pulo mei ne ghosei neke kegra haghe. Mae Jisas ne cheke ka mare mala faꞌimani. 56Idogna nei kmagna teure ne jaglo nodi fara. Nu mae Jisas ne cheke faheta ranghidi mala thosei toutonu ka ihei nga eigna unha teke eni mana ranghini sua gaꞌase igne.
Currently Selected:
Luku 8: mrn
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
