Luku 9
9
Mae Jisas ne kuru fajifladi nabotho phei nogna mae khurure
(Mat 10:5-15; Mak 6:7-13)
1Mae Jisas ne kilo fodudi nogna nabotho phei mae khurure. Aonu mana ne tusu ranghidi nolaghi te mala fakelidi naikno te fogra, nei nolaghi te mala bruedi naiture. 2Mae Jisas ne kuru fajifladi mae khuru re mala tei toutonuni mare nakarha te funei frunini God na, nei mala fakarhidi iheire te fogra. 3Mana ne cheke eghu ka mare, “Thosei hata kaisei glepo mala togho ghami themi jateula khodo, gloi, gano, ba sileni. Thosei hata phei pohe te mala pipichi na. 4Ka suga aheva te ruma ghotilo na, au jare ke ghilei jifla kokoni ghotilo namono tuana. 5Eghuteuna te posa ghotilo ka kaisei namono ne theome magnahaghei ghami naiknogna namono tuana ba tirodi fanomho ka chekemi ghotilo re, jifla kokoni namono tuana. Kate jifla na, ghotilo ghiha koko gnagnapa te au ka ghahemi are ke uludi eghu. Igne kaisei fagaglana te mala falalaseni ghotilo ka naiknore God ginauna na fatedi.” 6Aonu mae khurure jifla ne tei ka namono te gnafare mala toutonuni Nonomho te Keli na, nei mala ke fakarha fapulodi naikno te fogra re.
Mae Herod ne nomhini eigna mae Jisas
(Mat 14:1-12; Mak 6:14-29)
7Ka vido tuana, mae King Herod Antipas ne nomhidi naikno te toutonudi gobigna lepo te edi mae Jisas re. Aonu mana ne faꞌihoni fara, naugna keha naiknore ne filoni nogna gloku mae Jisas na ne cheke eghu, “Mae Jone Apublahi teke lehe tifa ia kela karha fapulo.” 8Eghuteuna keha naiknore ne cheke eghu, “Mae profet Elija ia kela pulo mei.” Eghuteuna, keha naiknore te chekei na, “Kaisei mae ka hatimare mae profet tifa ra kela karha fapulo.” 9Nu mae Herod ne cheke eghu, “Mae Jone ia iara neke chekedi mare neke kukusu pha'ugna na tifa. Eghume mae ihei eghu si te nomhini iara thoutonu gna na gnea?” Eghuteuna mae Herod ne magnahaghei fara te filoni mae Jisas.
Mae Jisas ne faghamudi glima thogha mae
(Mat 14:13-21; Mak 6:30-44; Jon 6:1-14)
10Kate gnafa nodi gloku na, mae khurure neke pulo mei ka mae Jisas. Mare ne toutonu ka mana gobigna lepo teke edi mare re. Ke leghugna igne, mare ne tei balugna mae Jisas ka kaisei namono te kiloi Betsaeda. Mare ne tei au thedi jare. 11Nu kate nomhini igne naiknore ne tei ke leghugna mae Jisas. Aonu mana ne theome lhotidi nu mana gleale'a te filodi naiknore ne toutonu ranghidi eigna u nakarha te funei fruni ni God na. Eghuteuna mana ne fakarhidi naikno te magnahaghei teke keli nodi ka fogra.
12Kate figri hila naprai na mae khurure ne mei cheke eghu ka mae Jisas, “Kuru teidi naikno igre mala tei hiro ghedi gano, nei suga mala thuru eghu ka namono te namo teu agne are. Naugna theo kaisei naikno te au ka vido igne na.”
13Nu mae Jisas ne cheke eghu ka mare, “Theo. Faghamudi si ghotilo naikno gre.”
Mare ne cheke eghu ka mana, “Ghehati au glima bret nei phei sasa eghu kolho. Ba iagho magnahaghei ghami ghehati te tei foli gano te mala nabadi naikno te kmana igre sia?!” 14Mae khurure ne cheke eghu naugna nabagna glima thogha mae te au teu jare na.
Mae Jisas ne cheke eghu ka nogna mae fanomhore, “Chekedi si ghotilo naikno are mala gnokro ka glima fului kaisei tothoghei eghu.” 15Mae fanomhore ne leghuni unha te chekeni mae Jisas na. Eghuteuna naikno te gnafare ne gnokro ka tothoghei. 16Mae Jisas ne hata glima bret nei phei sasa teure ne filo haghe kligna ne cheke fakelidi ka God. Mana tufa ganore ne tusu lao ka nogna mae fanomhore mala tufa mare ka naiknore. 17Naikno te gnafare ne kafe ghamu ne boho. Eghuteuna mae fanomhore ne salo fodu vido gano teke salaꞌui re, ne fafofodu nabotho phei khara'o.
Mae Pita ne cheke thakleni eigna mae Jisas
(Mat 16:13-28; Mak 8:27–9:1)
18Kaisei fata, kate au teu thegna na, mae Jisas ne tarai. Eghuteuna nogna mae fanomhore ne mei ka mana. Mana ne ghusna eghu ka mare, “Ba, naiknore ne mae ihei eghu ghau iara?”
19Mae fanomhore ne cheke eghu ka mana, “Kehare te chekei na, iagho mae Jone Apublahi. Kehare te chekei na, iagho mae profet Elija. Eghuteuna kehare te chekei na, iagho kaisei mae ka hatimare mae profet di tifa ra kela karha fapulo.”
20Eghuteuna mae Jisas ne ghusna eghu ka mare, “Nu ghotilo ba? Mae ihei eghu ghau iara ghotilo?”
Mae Pita ne cheke eghu ka mana, “Iagho thofno mae Kraes teke mei funu ka God!”
21Mae Jisas ne cheke faheta ka mare mala thosei toutonu ka ihei nga eigna igne. 22Eghuteuna mana jaola ne cheke eghu ka mare, “Iara mae teke mei funu ka God na, mare ginauna para ghau fara iara. Ginauna hatimare mae pris ulu, nei hatimare mae velepuhigna vetula nogna mae Moses, nei mae biꞌodi hatimare mae Jiu langau eghu na tirodi ghau iara. Mare ginauna na eꞌei puhi mala falehe ghau iara. Nu ka fatilo narane na God nake fakarha fapulo ghau iara kau glehe.”
23Mae Jisas ne cheke eghu ka mare gnafa, “Mae ihei te magnahaghei mei balugu iara na, mana thosei ghathoni thegna kolho, nu mana sasaꞌa mala lehe ka gaju fafatha, nei mala leghu ghau iara leghu narane. 24Naugna mae ihei te magnahaghei fakarhini kolho nakarhagna thegna na, mana ginauna theome ludeni thofno karha na. Eghuteuna, mae ihei te snakreni nakarhagna na malagu iara teuna mana ginauna hatini thofno nakarha na. 25Eghuteuna jame kaisei mae dedei fara ka nauthoglu igne, nu lehe mana teuna, glepo igre ginauna na theome toghoni mana. Thono theo fara. 26Mae ihei te mamaja ghau iara nei mamaja nila chekegu iara mae teke mei funu ka God na teuna, uve, iara ginauna jaola theome kiloni mana kate pulo mei iara balu nogu siasigla nei balu nogna nolaghi biꞌo mae Mama nei balu nodi nolaghi hatimare mae engel te blahi.
27 “Tutuani fara, te chekeni iara ka ghotilo na. Keha naikno te au teu balugu iara gognaro igre, mare ginauna theome leheu na filoni God te funei frunidi nogna naiknore.”
Mae Jisas ne cheke baludi mae Moses ghe mae Elija
(Mat 17:1-8; Mak 9:2-8)
28Nabagna kaisei wik ke leghugna teke chekedi mana glepo igre, mae Jisas ne hata balugna mae Pita, nei mae Jemes nei mae Jone ne haghe ka thogele na mala tarai. 29Kate tarai teu mana na, thinigna mae Jisas na ne nhogri eghuteuna nogna pohere ne vegha fara. 30-31Eghuteuna phei mae megei nga ne thakle mei, mae Moses ghe mae Elija. Phiamare ne phae ka siasigla gna nogna nolaghi biꞌo God na ne toutonu neu balugna mae Jisas eigna narane te mala jifla kokoni mana nauthoglu igne, nei glepo teke ghathoni God na ginauna edi Jerusalem. 32Mae Pita baludi phei mae kheragnare thilomare ne thuru fara. Nu kate dofra haghe na thilomare ne filoni nogna naphae God te siasigla faligohoni mae Jisas na. Eghuteuna jaola thilomare ne filodi phei mae ne kegra neu balugna mana. 33Kate namo jifla mae Moses ghe mae Elija na, mae Pita ne cheke eghu ka mae Jisas, “Velepuhi, thofno keli fara te au tahati agne na. Ghetilo na horo thilo grorofe agne, kaisei malamu iagho, kaisei malagna mae Moses, nei kaisei malagna mae Elija.” Mae Pita ne cheke eghu eigna mana theome laseni gaoghathogna unha te chekei na.
34Kate cheke teu mana na, kaisei khoveo ne thakle mei ne toku tafrudi mare ka naungogna na. Eghuteuna thilomare ne mhaghu nodi fara ka khoveo te mei ke klignadi na. 35Eghuteuna thilomare ne nomhini cheke te mei ke lamna khoveo na. Cheke igne ne cheke eghu, “Igne mae Thugu iara na. Mana kaisei mae neke vavahi iara. Leghuni mana!” 36Kate gnafa cheke igne, thilomare filoni mae Jisas kegra neu thegna. Mae Pita, mae Jemes, nei mae Jone eghu ne au kmu, eghuteuna ka narane tuana thilomare ne theome toutonu ka ihei unha teke filoni thilomare na.
Mae Jisas ne brueni kaisei naitu ka kaisei mae sitei
(Mat 17:14-18; Mak 9:14-27)
37Ka keha narane na, mae Jisas, mae Pita, mae Jemes nei mae Jone eghu neke soru funudi ka thogele na. Mare soru ne thafodi kmana naikno khapru ofoni teu mae Jisas. 38Kaisei mae ka nakhapru na, ne eha eghu mei ka mae Jisas, “Mae velepuhi, iara magnahaghe nigho fara mala toghoni mae thugu na. Naugna kaisei mana ngala mae thugu iara na. 39Kaisei naitu na mei faheta koba ka mana nei megei nga eha fabiꞌo eghu. Eghuteuna mana theome au snoto nei fajifla naoko koba eghu ka foflogna na. Eghuteuna naitu na theome tei kokoni mana, nei goigoni ni koba mana eghu! 40Iara neke toredi nou mae fanomho iagho gre mala brueni naitu na, nu mare ne theome tangomana kolho te eni na neku!”
41Mae Jisas ne cheke eghu, “Tore, ghotilo naikno igre theome fatutuani ni God kolho! Puhimi ghotilo re thono kafe jafra fara! Niha fata au fabrahu iara balumi sia? Iara hongo ghau fara ka ghotilo!” Mana ne cheke eghu ka mae igne, “Hata mei mae thumu na ka iara agne!”
42Kate mei mae sitei na ka vido te au teu mae Jisas na, naitu na ne koko soruni mana pari ne raraja. Nu mae Jisas ne cheke faheta ka naitu na mala jifla mei ka masitei na. Aonu mae Jisas neke fakelini mana nei ke tusu fapuloni mae sitei na ka mae kmagna na. 43Naiknore ne kafe jaglo nodi fara kau nogna nolaghi biꞌo God na.
Fapea fata mae Jisas cheke eigna glehegna na
(Mat 17:22-23; Mak 9:30-32)
Kate kafe jaglo nodi fara teu naiknore ka unha te edi mae Jisas igre, mae Jisas ne cheke eghu ka nogna mae fanomhore, 44“Fanomho fakeli ka unha nate chekedi iara ka ghotilo gognaro gre! Iara mae teke mei funu ka God gne, mare ginauna na snakre lao ghau iara ka khamedi naiknore.” 45Nu mae fanomhore theome laseni cheke mana igne. Gaoghathogna igne thono poru fara ka mare, mala theome tangomana mare te laseni na. Nu mare mhaghu ne theome ghusna ka mana.
Mae ihei ka mae igre te ulu na?
(Mat 18:1-5; Mak 9:33-37)
46Nogna fanomho mae Jisas gre ne funu fapoaphola fari thedi eigna mae ihei ka mare na te ulu na. 47Nu mae Jisas ne filo glanidi nagnafadi mare re. Aonu mana ne hata kaisei sua ikoi ne fakekegra rhegnai. 48Ke leghugna igne mana ne cheke eghu ka mare, “Mae ihei te toghoni sua igne ka nanghagu iara na, mana togho ghau la iara. Eghuteuna ihei te togho ghau iara na, mana theome togho ghau iara kolho nu togho nila mae teke kuru mei ghau iara na. Mae ihei te lisei soruni thegna pari lahu na, mana ngala mae te biꞌo lahu ka ghotilo te gnafa na.”
Mae ihei te theome au ka tothoghei mare na
(Mak 9:38-40)
49Mae Jone ne cheke eghu ka mae Jisas, “Mae funei, ghehati neke filoni kaisei mae te brue naitu ka nanghamu iagho na. Ghehati chekeni mana mala thosei eni tuana naugna mana theome au ka noda tothoghei tahati gne.”
50Mae Jisas ne cheke eghu ka mana, “Ghotilo thosei lhotini mana, naugna mae ihei te theome kegra fanogra ghami ghotilo na, mana kherami ghotilo.”
Mae Jisas ne tei ka kaisei nodi namono mae Samaria na
51Narane God te mala hata fapuloni mae Jisas kligna na la namohi. Aonu mae Jisas ne thono magnahaghei te kulu tei Jerusalem. 52Aonu mana ne kurudi keha nogna mae te mala hata nonomhore ne kulu ulu. Mare ne tei ka kaisei nodi namono hatimare mae Samaria, mala tarabana gobigna lepore malagna mana. 53Nu naiknogna namono tuana ne theome magnahagheni mana te tei ka nodi namono na, naugna mare neke filo glani mana kate haghe Jerusalem na. 54Kate filoni igne, mae Jemes ghe mae Jone ne cheke eghu ka mae Jisas, “Lord, iagho magnahaghei ghami ghepa te chekeni khaꞌaghi na mala soru mei funu kligna mala roꞌedi naikno tuare?” 55Nu mae Jisas ne figri ne diꞌatagna ka nodi cheke phiamare na. 56Ke leghugna igne mare jifla ne tei ka keha namono na.
Mae ihei nabagna te mala leghuni mae Jisas
(Mat 8:19-22)
57Kate tei mare ka nabrou na, kaisei mae ne cheke eghu ka mae Jisas, “Mae velepuhi, iara magnahaghei te mala kaisei nou mae fanomho iagho, mala tei balumu iagho ka namono aheva nate tei iagho na.”
58Mae Jisas ne cheke eghu ka mana, “Gauhare au nodi vido te mala thuru na eghuteuna nanghajire au nodi gnoku. Nu iara mae teke mei funu ka God na, theo kaisei namono te mala augu na.”
59Ke leghugna igne mae Jisas ne cheke eghu ka keha mae na, “Iagho mei balugu iara!”
Nu mana ne cheke eghu, “Mae funei, snakre ghau iara mala kulu tei giugiluni mae kmagu ia.”
60Nu mae Jisas ne cheke eghu ka mana, “Iagho lisa laodi naikno te tirodini nakarhagna God na mala giugilui mare thedi. Tei sagho mala toutonuni nakarha te funei frunini God na.”
61Eghuteuna kaisei mae langau ne cheke eghu, “Mae funei, iara ginauna na tei balumu iagho. Nu ulu lahu na iagho snakre ghau iara mala ke pulo kubaedi vikegu ra.”
62Mae Jisas ne cheke eghu ka mana, “Mae ihei te snakredi keha naiknore te mala fanogrini nogna gloku God na, mana theome nabagna te au baludi naikno te funei frunidi God re.”
Currently Selected:
Luku 9: mrn
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
