Eksodas 9

Kaisei khabru ne thokedi glepo te oho mae Ijep re

1Ke leghugna igne na, Lord neke cheke ka mae Moses mala tei cheke eghu mana ka mae king, “Nomi Lord God ghehati mae Hibru gre na ne cheke mei ka iagho mala snakredi iagho nogna naiknore mala tei pogho soru ranghini mana. 2Jame te tirou fanomho iagho ka nogna cheke mana igre na, 3mana ginau na lisa lao kaisei khabru te thono diꞌa fara ka nomi hose, dongki, kamel, buluka, sipu nei nanigot teu ghotilo are. 4Nu Lord ginau na reireghi fakelidi nodi mae Israel re, eghuteuna na theo kaisei ka nodi mare igre nate lehe na.

5“Eghume nathuꞌu ngala u narane te mala eni Lord u puhi igne na.” 6Mae king ne tirogna fanomho ka cheke igre. Aonu ka keha narane na, Lord ne leghuni nogna nhaꞌa cheke na, aonu nodi hose, dongki, kamel, buluka, sipu nei nanigot teu mae Ijep re ne kafe lehe, nu nodi mae Israel re ne theo kaisei te lehe na. 7Mae king ne ghusna eghu ka nogna naiknore, “Ba? Nodi hose, dongki, kamel, buluka, sipu nei nanigot teure e keli au kolho ba theo?” Keha naiknore ne cheke eghu ka mana, “Uve, kafe keli au kolho, theo kaisei te lehe na.” Nu mae king ne maku fara nagnafagna na ne tirogna snakre teidi naiknore.

Nhughe biꞌo ne jifla mei ka thinidi naiknodi Ijep re

8Lord ne cheke eghu ka mae Moses ghe mae Eron, “Ghopa na tei atha keha nakrofu ka suga te mala kuki brik gno mala tei ka mae king. Kate lao te khegra ghopa ke ulugna mae king na, iagho mae Moses mala koko haghe kligna u nakrofu tuare ke ulugna mae king. 9U nakrofu igre ginau flalo tongana jateula gaughavu eghu heva heva ka namono te gnafa ke lamnagna Ijep. Kate khoko soru u nakrofu igne ka thinidi naikno, ba hose, dongki, kamel, buluka, sipu nei nanigot teu igre, u nhughe ginau jifla mei eghuteuna na phosa vuhai thubu biꞌo ka thinidire.”

10Aonu mae Moses ghe mae Eron ne atha nakrofu ka suga te mala kuki brik na ne tei ne kegra ke ulugna mae king gna Ijep. Mae Moses ne koko haghe nakrofu igre ka maloa na. Eghuteuna u nakrofu igre ne khoko soru ne vuhai nhughe. Nhughe igre ne phosa ne vuhai thubu biꞌo ka thinidi naikno ba ka thinidi nodi gobigna lepo teke oho mae Ijep re. 11Hatimare mae meresin theome tangomanadi te mei khegra ke ulugna mae Moses na. Naugna hatimare mae Ijep te gnafa re kafe nhughe hui, neubane mae meresin mare ne jaola ne nhughe. 12Nu Lord ne famamhaku nagnafagna mae king na ne tirogna fanomho ka nodi cheke mae Moses ghe mae Eron re, jateula teke chekenihi thegna Lord ia neu.

Nakhete thina aes ne soru mei

13Ke leghugna igne, Lord ne cheke eghu ka mae Moses, “Hamerane nathuꞌu na iagho tei mala thafoni mae king mala cheke eghu ka mana: Igne unha te chekeni Lord, nomi God ghehati mae Hibru gre na, ‘Snakredi nogu naikno iara gre mala tei mare mala pogho soru ranghi ghau iara. 14Jame te theome eni iagho igne na, gognaro na iara ginau para nigho iagho baludi nou mae funei nei naikno teu iagho are. Ghotilo ginau na thofno laseni te theo kaisei god jateula iara teu te au nolaghi biꞌo ka nauthoglu igne na. 15Uve, jame magnahaghei te para nigho baludi nou naikno gre ka khabru biꞌo meula iara na, ghotilo jame kafe lehe hui. Naugna iara au nogu nolaghi biꞌo. 16Nu iara snakre ghami ghotilo te mala karha teu te mala falalase ari iara nogu nolaghi biꞌo na ka ghotilo, eghuteuna naiknore ginau na toutonuni nanghagu iara na ka nauthoglu gne. 17Nu iagho ne maku fara nagnafamu na ne theome snakredi nogu naikno iara gre mala tei neu. 18Fanomho sagho, jateula vido narane gognaro gne teu nathuꞌu na, iara ginau na kuru mei kaisei nakhete thina aes mala soru mei ka ghotilo agne Ijep. Jame igne ngala u nakhete thina aes te biꞌo fara salaꞌudi nakhete biꞌo teke filodi tifa ra, ginauna thoke mei agne Ijep funu tifa te ghilei mei posa ka narane gognaro gne. 19Eghume iagho gognarona faghose tei cheke ka mae nalhaꞌu te gnafa ra mala atha posa nomi hose, dongki, kamel, buluka, sipu, nanigot ba unha te au teu ka nomi nagare ra mala lilisei ka vido te keli ke lamna suga. Nakhete thina na ginau soru mei ke klignadi naikno te gnafa nei ke klignadi gobigna lepo te gnafa teu te au teu ke kosigna suga. Jame te theome atha te posa mare na, glepo igre ginau na kafe lehe.’ ”

20Keha nogna mae funei mae king re mare nomhini nogna cheke Lord igne ne mhaghu nodi fara ne ghosei ne tei ne atha posa nodi mae gloku nei nodi gobigna lepo fateote'o teke oho teke au teku mata re. 21Nu kehare ne tirodi ghatho tahuni nogna cheke Lord na ne snakredi nodi mae gloku nei nodi gobigna lepo fateote'o teke ohore ne au neu ngala mata.

22Aonu Lord ne cheke eghu ka mae Moses, “Tusu haghe khamemu ana ka maloa gno, eghuteuna u nakhete thina na ginau na soru mei Ijep ke klignadi naikno, ke klignadi glepo te oho nei ke klignadi gano te au teu ka nagare na are eghu.” 23-24Kate tusu haghe mae Moses nogna khodo na ka maloa na, Lord ne fagafui maloa na ka khoveo ne romno soru, aonu nakhete thina aes na ne funu soru mei ka vido te gnafa ka kantri Ijep. Aonu fila na poha ne inge ka maloa na, eghuteuna u nakafli na ne sigla ulu leghu funu kligna ne soru mei ka glose na. Igne ngala u nakhete thina ulu lahu te thono biꞌo fara teke eni jare Ijep na. Tifa na mare neke theome filoni kaisei nakhete jateula igne teku na. Thono theo fara. 25U nakhete thina aes igne ne kafe falehedi naikno te gnafa nei nodi glepo teke oho te gnafa nei ghedi gano te au ka nagare te gnafa, ba thua nafnata gaju te mala ghamu sisidire ne kafe klopa ne gnafa. 26Eghume kaisei nohi Gosen aheva te au mae Israel gre ngala te theome soru mei tagna u nakhete thina aes na.

27Aonu mae king ne fatei cheke ka mae Moses ghe mae Eron mala tei phiamare ka mana. Kate tei phiamare ka mana na, mana ne cheke eghu ka phiamare, “Phia mae, iara la thofno nakhibogu biꞌo fara, Lord na doglou kolho. Te iara nei nogu naikno iara teu nga gre te jafra na. 28U gromno nei nakhete thina aes teu igne la thono goigoni ghami farahi ghehati, eghume ghopa toreni Lord mala atha fadelei mana glepo igne ka ghehati. Iara ginau na snakre tei ghami ghotilo. Ghotilo theome tangomana teke au teu ka vido igne na.”

29Aonu mae Moses ne cheke eghu ka mana, “Uve, kate jifla ari iara kosi ka namono biꞌo igne na, iara ginau na ngafa haghe khame ghu gre mala tarai ka Lord. Eghuteuna fila igne ginau na gnafa, eghuteuna nakhete thina aes igne ginau na hui eghu ngala signea. Eghume iagho ginau na laseni, u glose igne nogna Lord kolho. 30Nu te laseni iara na, iagho baludi nou mae funei gre ghotilo kafe theome mhaghuni Lord God.”

31Gognaro na gaju ikodi te mala eꞌei ghajo ka gulidi ra, nei rais teura la kafe diꞌahi, naugna reꞌe namo muitahi. 32Nu sisi wit gre kolho teke theome diꞌare, naugna reꞌe neke theome biꞌo nga nekeu, igre na teke gano teu thogheiro re.

33Mae Moses ne jifla ka mae king ne tei ke kosigna namono biꞌo na. Mana ngafa haghe khame gnare ne tarai ka Lord. Aonu maloa na neke theome gafu ka gromno, eghuteuna nakhete thina aes na neke hui. 34Kate filoni mae king nei hatimare nogna mae funei manare eghu teke aho na, mare neke maku fara nagnafadire. 35Aonu mae king neke tirogna snakre teidi naiknodi Israel re. Igne ne horoghoto fara ka unha teke chekeni Lord na eghu teku ka mae Moses ia.

Currently Selected:

Eksodas 9: mrn

Highlight

Copy