Eksodas 19

Ka Thogele Sanai

1-2Naiknodi Israel igre jifla Refidim ne tei. Eghuteuna ka narane ulu lahu ka fatilo nhigra ke leghugna teke jifla Ijep igne, mare mei ne posa ka namono nagou ka pesi Thogele Sanai. Aonu mare ne lisei haghe nodi suga tapuale re ka vido igne.

3Mae Moses ne haghe ka thogele igne mala cheke balugna God. Aonu Lord ne cheke eghu ka mana, “Igne nogu cheke iara na mala tei cheke iagho ka naiknodi Israel vikegna mae Jekop ra. 4‘Iagho themu neke filodihi glepo teke edi iara ka naiknodi Ijep ra. Eghuteuna ghotilo jaola neke filo ghauhi iara te hata mei ghami iara agne. Iara neke hata ghami ka namono igne jateula kaisei gaghata biꞌo te pala thugna re flalo te mei kligna ra neku agne. 5Jame te leghu ghau iara ghotilo na, eghuteuna tajini ghotilo nhaꞌa cheke teke eni iara balumi ghotilo ia teuna, ghotilo mala thofno nogu naikno iara salaꞌudi keha naikno te gnafa ka nauthoglu igne. Neuba nauthoglu igne ne nogu iara gognarona, 6iara ginauna fablahi ghami ghotilo mala nogu naikno gloku iara mala loku jateula nogu mae pris eghu iara.’ Igre nogu cheke iara te mala toutonudi iagho ka naiknodi Israel.”

7Aonu, mae Moses neke soru mei funugna ka thogele ro ne kilodi hatimare mae lida mala kafe mei, aonu mana ne cheke ka mare eidi gobigna lepo teke chekedi Lord ka mana re. 8Naiknore ne kafe cheke eghu, “Ghehati ginauna edi gobigna lepo te chekedi Lord igre.” Aonu mae Moses ne atha nodi cheke naiknore neke pulo ka Lord.

9Lord ne cheke eghu ka mae Moses, “Fanomho sagho, iara ginauna mei ka iagho ka kaisei khoveo biꞌo, mala tangomana naiknore te nomhi ghau iara te cheke balumu iagho na. Aonu naiknore ginauna fatutuani nigho iagho fabrahu.” Mae Moses ne cheke lao ka Lord nodi cheke naiknore.

10Eghuteuna Lord ne cheke eghu ka mae Moses, “Iagho ke pulo ka naikno ra mala cheke ranghidi gognaro nei nathuꞌu iagho ginauna fablahidi, mala tangomana mare te pogho soru ka iara na. Mare mala jaola titihi fagae nodi pohere, 11eghuteuna tarabana mala mei pogho soru ka iara nauriha. Naugna ka narane tuana, iara Lord ginauna soru mei ke kligna Thogele Sanai eghuteuna naiknore ginauna tangomana te filo ghau iara na. 12Iagho lilisei nohi lithuini thogele igne, eghuteuna iagho cheke ka naiknore mala thosei haghe ka thogele igne, ba habo ka pesigna thogele igne. Jame ihei te habo kolho ka thogele igne na mana ginauna mala lehe. 13Mare mala fada falehe mae igne ka thina ba ka jata, mala theome tangomana kaisei naikno te habo tagna na. Neubane kaisei naikno ba kaisei buluka te habo ka thogele igne na, mala lehe. Nu ke leghu kate nomhini mare kaisei naogla khufli te taitanhi te raugha na, mare ginauna tangomana te haghe ka thogele igne.”

14Kate soru mae Moses funugna ka thogele igne, mana ne fablahidi naiknore, mala tangomana mare te pogho soru ka God. Eghuteuna naiknore ne titihi nodi pohere. 15Aonu mae Moses ne cheke eghu ka naiknore, “Ghotilo tarabana malagna nauriha. Eghuteuna ghotilo thosei thuru baludi khetomi are ghilei thokeni narane te gnafa tarai na.”

16Hamerane ka fatilo narane na, mare ne filoni te phae nakafli biꞌo na, eghuteuna fila na ne poha, eghuteuna khoveo biꞌo ne toku tafru thogele igne. Eghuteuna naiknore jaola ne nomhini naoglagna khufli na mala laseni God te mei sighodi nogna naiknore. Eghuteuna iheire te gnafa teke au ka vido igne ne thofno mhaghu nodi fara ne fififri fara. 17Ke leghu, mae Moses batudi naiknore mala tei thafoni God, nu naiknore au neu kolho ka pesigna thogele igne. 18Aonu Lord ne soru mei ke lamna khaꞌaghi biꞌo ne phae falithui ke kligna thogele, eghuteuna gagahu biꞌo ne toku thafruni thogele na. Gagahu igne ne haghe kligna ka maloa na jateula gagahugna kaisei khaꞌaghi biꞌo, eghuteuna thogele igne ne nghali thongana. 19Eghuteuna naoglagna khufli igne ne taitanhi fabiꞌo fara. Eghuteuna leuleghu fata na mae Moses cheke, eghuteuna God ne cheke tughu ka mana jateula fila biꞌo te poha ra neu.

20Eghuteuna kate soru mei Lord ke kligna Thogele Sanai igne, mana ne ehani mae Moses mala haghe ka thogele igne. Aonu, mae Moses ne haghe, 21eghuteuna Lord ne cheke eghu ka mana, “Moses, ke soru sagho, thosei snakredi naiknore mala mei salaꞌuni nohi cheke faheta ka naikno teke lilisei iagho igne, mala theome tangomana mare te filo ghau iara Lord. Jame te mei salaꞌuni mare nohi igne na, kmana naikno ka mare ginauna lehe. 22Neubane mae pris, mae iheire te tangomana te mei rhegu iara te mala mei fafara igre, mare jaola mala kulu fablahidi thedi. Jame te theo mare na, iara ginauna paradi mare.”

23Mae Moses ne cheke eghu ka Lord, “Naikno igre theome tangomana te haghe ka Thogele Sanai, naugna iagho themu neke kulu nanhaꞌa vetula ranghi ghami ghehati mala lilisei nohi falithuini thogele igne neke fablahini.”

24Aonu Lord ne cheke eghu ka mana, “Uve, nu iagho ke soru, atha mei mae Eron balumu agne. Nu hatimare mae pris nei keha naikno teu are thosei mei salaꞌuni nohi igne, mala mei ka iara Lord. Jame te mei mare na, iara ginauna paradi mare.”

25Aonu mae Moses neke soru ka naiknore ne chekedi glepo teke chekedi Lord ka mare re.

Currently Selected:

Eksodas 19: mrn

Highlight

Copy