Eksodas 20

Nabotho Vetula

1God ne cheke eghu ka naiknodi Israel re:

2“Iara Lord, nomi God ghotilo. Iara neke atha fajifla ghami ghotilo ka naꞌau sosolo Ijep neke atha mei ghami ghotilo agne.

3“Thosei ghatho tahuni kaisei god delei, kaisei Iara ngala te mala ghatho tahu ghau ghotilo na.

4“Thosei sari kaisei mumuju, ba eni kaisei thotogale gna kaisei glepo te au ka maloa ba ka nauthoglu ba ka nhorora ke pari glose. 5Thosei tuturupuku soru tarai ka mumuju god nei keha tothoghaledi keha god delei. Naugna kaisei Iara ngala nou Lord nei God teu ghotilo te mala loku ranghini na. Iara ginau na theome keli tagu ka naikno te tuturupuku soru te tarai ka mumuju ba tothoghale igre. Jame te theome magnahaghei ghau iara ghotilo na, iara ginau na para ghami ghotilo eigna u nakhibo te eni ghotilo tuana. Theome ka ghotilo kolho eghu, nu iara ginau na jaola na paradi goro thumi, grami nei fapea grami teu ghotilo are. 6Nu jame te namha ghau iara nei leghudi nogu vetula iara gre teu ghotilo na, iara ginau na thofno namha ghami ghotilo nei kaisei thogha vikemi ghotilo nate karha mei teu thogheiro re.

7“Thosei cheke faparini nanghagu iara na. Iara nomi Lord nei God eghu ghotilo. Tutuani, iara ginau na paradi naikno te cheke faparini nanghagu iara na.

8“Ghatho tahuni narane Sabat gne nogu narane iara. 9Ghotilo au namno narane ke lamnagna kaisei wik te mala loku na. 10Nu fafitu narane na nogu narane iara mala gnafa. Ka narane tuana theo kaisei naikno nate loku na. Ghotilo baludi thumi are, nomi naikno gloku te gaꞌase ba nalhaꞌu, nomi buluka nei naiknodi keha kantri te mei au teu balumi ghotilo are eghu mala thosei loku. 11Naugna ka fafamno narane na iara Lord neke vuavuhadi nauthoglu, maloa, nhorora nei gobi nafnotu fateote'o te au ke lamnadi. Nu ka fafitu narane na, iara neke gnafa. Naugna igne, iara Lord neke fablahini narane Sabat gne mala nogu narane iara.

12“Ghatho tahudi idomi kmami are, nei leghudi nodi cheke re eghu. Jame te eghu ghotilo na, ghotilo ginau na theome ghosei lehe, thono theo fara. Ghotilo ginau na karha fabrahu tifa tifa ka glose teke tusu ari iara Lord nomi God ghotilo igne.

13“Thosei aknu poruni ihei ka gaoghatho te diꞌa.

14“Thosei huhughuni vetula gna tholaghi.

15“Thosei blau.

16“Thosei vuavuha cheke ranghini ihei.

17“Thosei mamagnani nogna glepo ihei. Thosei mamagnadi nogna suga, khetogna, nogna naikno gloku, nogna buluka, nogna dongki ba keha glepo la ngau eghu teke nogna mana re.”

Naiknore ne mhaghu te lao namo ka God na

18Kate nomhini naiknore te poha fila nei taitanhi khufli nei filoni nakafli nei gagahu te haghe ka thogele na teuna, naiknore ne thono mhaghu nodi fara. Aonu naiknore ne theome lao namo ka thogele na ne khegra neu delei, 19ne cheke eghu ka mae Moses, “Jame te cheke iagho ka ghehati na, ghehati ginau na nomhi nigho iagho. Thosei snakreni God mala cheke ka ghehati na, na eghunu lehe ghehati eghu.”

20Mae Moses ne cheke eghu, “Thosei mhaghu, God na mei mala fariuriu ghami ghotilo kolho, eghume ghotilo mala ghatho tahuni Mana eghuteuna ghotilo mala thosei eni kaisei nakhibo eghu.”

21Nu kate tei mae Moses rhegna grokho te au teu God igne na, naiknore ne kegra neu delei.

Vetula eigna olta

22Lord ne cheke ka mae Moses mala chekeni mana cheke igne ka mae Israel gre. Lord ne cheke eghu ka mana, “Ghotilo la lase ghauhi iara te au teu kligna te cheke balumi ghotilo. 23Fanomho fakeli ghotilo ia. Thosei hohoro mumuju ka gol ba ka silva mala jateula iara eghu mala pogho soru ranghini glepo tuana. Theo, ghotilo mala pogho soru ranghi ghau iara kolho.

24“Ghotilo atha keha glose mala hohoro nogu olta iara. Eghuteuna ka olta igne ghotilo mala fafara sipu, nanigot nei buluka eghu ka vido aheva teke vahini iara ranghi ghami ghotilo te mala pogho soru ranghi ghau na. Jame te eni ghotilo igne ka vido aheva teke vahini iara te mala pogho soru ranghi ghau na, iara ginau na soru mei mala fablahi ghami ghotilo. 25Jame te babana ghotilo ka thina nogu olta iara na, ghotilo thosei atha thina teke kusu mare re. Naugna jame te kusu thina ghotilo ka vido aean na, thina igne theome doglo ka tathagu iara te mala eni ka nogu gloku blahi iara na. 26Kate hohoro olta ghotilo te mala fafara ka iara teu na, ghotilo thosei eꞌei glalako haghe tagna. Glahula kakhana mamajami are kate haghe ghotilo ka glalako na.”

Currently Selected:

Eksodas 20: mrn

Highlight

Copy