Eksodas 18

Mae Jetro ne tei sighoni mae Moses

1Mae Jetro gne mae pris gna Midian, mana nanghogna mae Moses. Aonu mana ne nomhidi thoutonu eidi unha te edi God ranghini mae Moses nei hatimare mae Israel teure. Nei mana jaola neke nomhidi nafnata thoutonu eigna Lord teke atha teke mei naiknodi Israel gre funu Ijep.

2Aonu mae Jetro mei ne sighoni mae Moses. Tifeiro na mae Moses neke kulu kuru fapuloni Sipora khetogna na neke tei au neku balugna mae Jetro. Eghuteuna gognaro na mae Jetro neke tathalei fapuloni Sipora 3baludi phei mae thugna nalhaꞌu re ka mae Moses. Phei thugna mae Moses gre nanghadi re mae Gesom ghe mae Eliesa. Mae Moses neke cheke eghu, “Iara mae neke mei funu ka keha vidoi la mei au ka keha kantri ia.” Eghume nanghagna mae thugu ulu lahu igne iara na kiloni mana, mae Gesom. Gaoghathogna Gesom teu igne “mae phosa.” 4Eghuteuna ke leghugna igne, mae Moses neke cheke eghu, “Nogna God mae kmagu iara neke togho ghau iara neke fakarhi ghau iara ka mae king gna Ijep na.” Aonu mana ne kiloni fapea mae thugna na, mae Eliesa. Gaoghathogna Eliesa teu igne “God neke togho ghau iara.”

5-6Kate au teu mae Moses ka namono nagou na rhegna thogele blahi na, mae Jetro ne kulu famei cheke igne ka mae Moses, “Iara gne la mei mala sigho nigho iagho, eghuteuna iara gne la atha la mei khetomu nei phei mae thumu nalhaꞌu teu iagho ra.”

7Kate nomhini mae Moses cheke igne na, mana tei ne thafoni mae Jetro ka nabrou na. Mae Moses ne tuturupuku soru ke ulugna mae Jetro, aonu mana kegra haghe ne gnanghoni mae Jetro. Ke leghugna te fari faghuaghusnai fari thedi eigna nakarhadi re, phia mare ne tei ruma ka suga tapuale mae Moses na. 8Mae Moses ne toutonu ka mae Jetro gobigna lepo te edi Lord ranghini king, nei naiknodi Ijep. Eigna Lord neke fakarhadi naiknodi Israel. Mana neke jaola neke toutonu ka mae Jetro eigna Lord te toghodi mare ka thua hoholo fateote'o te mei thafodi mare ka nabrou na.

9Kate nomhidi mae Jetro thoutonu te edi mae Moses igre, mana ne thono keli tagna fara ka famane thoutonu eidi glepo te keli teke edi Lord teke atha fapulo naiknodi Israel gre ka khamedi hatimare mae Ijep. 10Mae Jetro ne cheke eghu, “Cheke fakelini nanghagna Lord! Mana neke atha fajifla ghami ghotilo ka naꞌau sosolo ka khamedi hatimare mae Ijep. 11Gognaro na iara thofno laseni Lord na thono uludi fara keha god te pogho sorudi keha naikno re, naugna Mana ne reireghi fakeli ghami ghotilo ka narane te fakokhoana ghami ghotilo mae Ijep ra.” 12Aonu mae Jetro ne fafara ka God glepo tautagu te thofno krono fara. Mana ne jaola ne eni keha fafara na ka God. Eghuteuna mae Eron nei hatimare mae biꞌodi Israel gre ne mei ima balugna mae Jetro ke ulugna God.

Mae Moses ne vavahi keha mae mala fadodoglo puhi

13Ka keha narane ke leghugna te fafara tuana, mae Moses ne gnokro ka vido te mala fadodoglo puhi na ne fanomho ka naiknore, eghuteuna naiknore ne mei khapru faligohoni mae Moses funu hamerane ne ghilei rafi. 14Mae Jetro ne filoni unha te eni mae Moses te mala toghodi naiknore igne ne cheke eghu ka mana, “Mae biꞌo, iagho edi kmana gloku fara te mala toghodi naikno igre. Naugna unha sagho te eni sopa kolho themu u gloku ignea? Naugna unha sagho te snakredi naikno gre te mei khapru faligoho nigho iagho funu hamerane te ghilei rafi gnea?”

15Mae Moses ne cheke eghu ka mana, “Iara eni igne naugna naikno gre magnahaghei te laseni unha God te magnahaghei eni mare na. 16Jame phia mae fari fapholai, phia mae igre ginau na atha mei ka iara puhi igne. Eghuteuna iara na fadoglini puhi tuana ka phia mare leghuni unha te chekeni ka nogna vetula God na.”

17Mae Jetro ne cheke eghu ka mana, “Ghema Moses, iagho theome leghu fakeliniu kolho u puhigna gloku igne. 18U gloku te eni iagho igne thono biꞌo fara. Theome nabamu iagho themu kolho te eni na. Jame eni fabrahu iagho tuana meuna, iagho ginauna lao ghilei hongo nigho, eghuteuna naiknore ginau na jaola ghilei hongodi la eghu. 19Fanomho sagho ka unha te chekeni iara ka iagho igne. Jame te leghuni iagho unha te chekeni iara ka iagho igne na, God ginau na au balumu iagho. Iaghou ngala jame te mala atha lao ka God nodi cheke naiknore. Iagho mala atha lao ka mana nodi magra fapholai teu naiknore. 20Iagho famane farirhiudi naiknore nogna vetula God igre, mala lasedi nei thofno leghuni fabrahu eghu mare u puhi te doglo na. 21Jaola, iagho vavahi keha famane mae funei te lalase mae iheire te ghatho tahuni God nei mae iheire te tutuani nodi cheke re nei mae iheire te theome tusu lao sileni ka naiknore te mala eni u puhi te diꞌa na eghu. Mae igre keha mala batuni kaisei thogha naikno, keha mala batuni kaisei gobi, keha mala batuni glima fului nei keha mala batuni nabothoi eghu. 22Eghume mae igreu te mala jateula mae mala fate teu ka naiknore ginau na. Mae igreu te mala fadoglidi re puhi te ikodi re kau kot na. Nu puhi te biꞌo are mare tangomana te atha te mei ka iagho te mala fadoglidi re eghu. Eghume mae igre ginau na togho nigho iagho mala kofe ranghi nigho iagho ka gloku biꞌo te eni iagho igne. 23Glepo te chekeni iara ka iagho igne ngala unha te magnahagheni God mala eni iagho teku na. Jame te leghuni iagho unha te chekeni iara ka iagho igne na, u gloku igne ginau na theome tangomana te fababaꞌoni thinimu iagho na. Eghuteuna naikno igre ginau na ke pulo ka sugadire balu gleale'a ke leghugna tela fadoglini hila ghotilo u puhi fapholai teke eni mare na eghu.”

24Aonu mae Moses ne nomhini famane farirhiu te eni mae Jetro igne, 25ne vavahi keha famane mae funei te lalase ka vike te gnafa hatimare mae Israel gre ne lilisei mae te mala batudi tothoghei nabothoi, glima fului, kaisei gobi nei kaisei thogha. 26Eghuteuna leuleghu fata na mae igreu ngala te mala athagna u kot na. Mareu te mala fadoglidi puhi fapholai te bligi re, nu atha lao ka mae Moses puhi fapholai te biꞌo re mala fadoglidi mana.

27Ke leghugna igne, mae Moses ne kubaeni mae nanghogna na, eghuteuna mae Jetro neke pulo ka nogna kantri na.

Currently Selected:

Eksodas 18: mrn

Highlight

Copy