Eksodas 17

Lord ne fajifla meini khoꞌu na ka thina na

1Naiknodi Israel gre ne leghuni chekegna Lord na ne jifla Sanai ka namono nagou na. Mare tangomana te jifla ka kaisei namono ke tei ka keha namono na teuna. Leghu lahu na mare mei ne posa ka vido te kiloi Refidim ne au jare. Nu vido igne theo kaisei khoꞌu te mala koꞌu na. 2Aonu naiknore ne diꞌa tadi fara ka mae Moses, ne cheke eghu ka mana, “Tusu mei ka ghemi khoꞌu mala koꞌu ghehati!” Mae Moses ne cheke eghu ka naiknore, “Naugna unha site diꞌatami ghotilo ka iara gnea? Ba, ghotilo magnahaghei te fariu riuni nogna nolaghi Lord na sia?” 3Nu naiknore ne thono rodi koꞌu fara ne nguru ngau fara ka mae Moses, ne cheke eghu ka mana, “Moses, mala unha neku neke atha ghami ghehati Ijep neke mei agne sagho ia? Ba, iagho atha mei ghami ghehati ka vido te theo khoꞌu gna igne mala lehe ghehati baludi thumi, nomi sipu nei nomi buluka teu igre ka groi koꞌu na neku sagho ia?”

4Aonu mae Moses ne tarai ne cheke eghu ka Lord, “Lord, na faꞌunhadi sara naikno igrea? Naikno igre magnahaghei te fadi falehe ghau iara ka thina!”

5Eghuteuna Lord ne cheke eghu ka mae Moses, “Iagho atha keha mae biꞌo ka mae Israel are mala kulu ulu ka naikno are. Kate tei ghotilo na, iagho atha balumu u khodo teke puphuri iagho ka Khoꞌu biꞌo Nael ia. 6Kate ari te posa iagho ka thina te au ka Thogele Sanai ia na, iara ginau na au jare balumu iagho. Eghuteuna iagho mala atha nou khodo ana mala puphuri ka thina na, eghuteuna khoꞌu na ginau na jifla mei ka thina tuana mala koꞌu naikno are.” Mae Moses ne eni igne ne jifla mei khoꞌu na ka thina na kate filo teu goro mae biꞌodi Israel re. 7Naiknore ne diꞌa tadi ne fariu riuni Lord ne ghusna eghu, “Lord na au baluda tahati ba theo?” Aonu mae Moses ne kiloni vido igne Masa, gaoghathogna na “Fariu riu” nei Meriba, gaoghathogna na “Diꞌa tadi.”

Hatimare mae Israel gre ne magra ka hatimare mae Amalek

8Kate mei au mae Israel gre jare Refidim na, hatimare mae Amalek gre mei ne magra ka mare. 9Aonu mae Moses ne cheke eghu ka mae Josua, “Iagho na vavahi keha mae ka mae tahati igre mala jifla nathuꞌu mala tei magra ka hatimare mae Amalek. Nu iara ginau na kegra ka thogele ikoi igne balugu khodo mala atha iara teku God igne.”

10Aonu mae Josua ne leghuni unha teke chekeni mae Moses na ne atha keha mae ne tei magra ka hatimare mae Amalek. Mae Moses ghe mae Eron nei mae Huri eghu ne haghe ka thogele ikoi na. 11Kate tusu haghe mae Moses khamegna re, hatimare mae Israel gre ne heta ghedi fara ne uluni u magra na. Nu kate lisei soru mae Moses khamegna re, hatimare mae Amalek gre neke funu uludi mae Israel gre. 12Leghu lahu na mae Moses ne ghilei babaꞌo khamegna re, mana theome tangomana teke tusu haghe khamegna re. Aonu mae Eron ghe mae Huri ne atha kaisei thina ne lilisei soru pari ka glose na ne gnokro mae Moses tagna. Phiamare ne kegra ka phei philegna mae Moses re ne loku haghe phia khamegna mana re kligna. Phiamare loku haghe neu khamegna mae Moses gre ne ghilei plulu naprai na. 13Aonu mae Josua nei hatimare mae Israel gre eghu ne falehedi mae Amalek gre, mare thono theome kokhonidi fara kolho maedi Amalek.

14Ke leghugna igne Lord ne cheke eghu ka mae Moses, “Rioriso eigna magra igne nei unha cheke igne eghu, eigna iara ginau na dalu koko fahui naiknodi Amalek gre mala theo kaisei naikno ka nauthoglu igne nate ghathodi re. Eghuteuna iagho iu'iju fabiꞌo ranghini mae Josua mala nomhini la ngau mana eghu.”

15Kate cheke te gnafa Lord na, mae Moses ne titili kaisei olta mala fafara. Mana ne kiloni olta igne, “Lord na jateula nogu greoreo eghu iara naugna mana neke togho ghau iara neke uludi nogu naoka re.” 16Mae Moses ne cheke eghu, “Iara nhaꞌa cheke, Lord ginau na magra fabrahu baludi hatimare mae Amalek gre tifa e tifa.”

Currently Selected:

Eksodas 17: mrn

Highlight

Copy