Eksodas 16

Lord ne famei ‘manna’ nei nanghaji ka naiknore mala ima

1Vike fateote'o gna Israel na ne kafe jifla mei Elim ne mei posa ka namono nagou Sanai, fari hotei Elim nei Sanai. Mare posa jare nabotho glima narane ka fapea nhigra na, ke leghugna teke jifla mare Ijep na. 2Naiknore ne diꞌa tadi fara ne nguru ngau ka mae Moses ghe mae Eron ka vido igne. 3Naiknore ne cheke eghu ka phia mare, “Jame te keli na Lord gne jame neke falehe ghami ghehati kolho Ijep. Au teku jare ia ghehati neke au ghemi kmana nafnata gano te magnahaghedi ghehati re. Nu ghopa ne atha mei ghami ghehati ka namono nagou te theo kaisei gano gna igne neu. Ba ghopa magnahaghei ghami ghehati te mei lehe agne sia? Jame au meu ghehati Ijep me lehe meu na keli!”

4Aonu Lord ne cheke eghu ka mae Moses, “Iara ginau na tusu mei gano gna kligna na mala soru mei jateula nakhete eghu ka ghotilo. Leuleghu narane na naiknore mala jifla atha gano malagna narane tuana. Ka puhi igne iara ginau na fariu riudi naikno gre mala laseni te leghudi ghu theo ghu teu nogu cheke iara re. 5Eghuteuna ka fafamno narane na, naiknore atha gano ne kuki naba phei narane.”

6Aonu mae Moses ghe mae Eron ne cheke eghu ka naiknodi Israel re, “Ka grafi igne ghotilo ginau na laseni Lord ngala teke atha fajifla ghami ghotilo Ijep na. 7Hamerane nathuꞌu na ghotilo ginau na filoni nogna nolaghi nei siasigla teu Lord na, naugna Mana la nomhidihi te diꞌatami nei nguru ngau teu ghotilo ka Mana ra. Ghepa naikno kolho jateula ghotilo eghu, eghume ghotilo theome diꞌatami ka ghepa, nu ghotilo diꞌatami ka Lord.” 8Eghuteuna mae Moses neke cheke eghui, “Tutuani, leuleghu grafi na Lord ginau na tusu mei nafnahi mala ima ghotilo. Eghuteuna leuleghu hamerane na Mana ginau na jaola tusu mei bret te magnahagheni ghotilo na. Naugna Mana la nomhidihi te nguru ngau ghotilo ka Mana ra. Ghotilo theome nguru ngau ka ghepa mae Eron, naugna ghepa naikno kolho, nu ghotilo nguru ngau ka Lord.”

9Aonu mae Moses ne cheke eghu ka mae Eron, “Iagho tei chekedi naikno ra mala mei kegra rhegna Lord, naugna Mana la nomhidihi te nguru ngau naikno ra.”

10Aonu kate cheke teu mae Eron ka naiknore na, naiknore ne figri lao neu fei namono nagou, eghuteuna siasigla gna Lord na ne megei nga ne thakle mei ka khoveo na.

11Lord ne cheke eghu ka mae Moses, 12“Iara la nomhidihi te nguru ngau nogu naikno iara ra. Eghume iagho na cheke ka naikno are, fei grafi na naiknore ginau na ima nafnahi, eghuteuna fei hamerane na naiknore ginau na ima bret leghuni nihai te magnahagheni mare na. Kate ima te boho na naiknore ginau na laseni te Iara gne ngala te nodi Lord nei God teu mare na.”

13Ka grafi tuana kmana nanghaji fara ne soru mei ne fodu ka vido te au mare na. Eghuteuna hamerane kate haghegna naprai na, u nabubla na ne soru ne thafru buburu re. 14Kate moja nabubla igne na, naiknore ne filodi kmana glepo te ikodi te jateula wefa teu te iko tongana namono nagou na. 15Kate filoni naiknore glepo igne na, mare ne cheke eghu fari thedi, “Tore, unha glepo si ignea?”

Mae Moses ne cheke eghu, “Igne ngala u bret teke tusu mei Lord mala ima ghotilo teku mana na. 16Eghuteuna igne unha teke chekeni Lord ka iara mala cheke iara ka ghotilo teku na, ‘Kaisei naikno teu ke lamnagna tharakna na ghotilo tangomana te salo naba phei khara'o ikodi te mala ima na. Igne naba hila te fodu kaisei suspen te mala ima te boho ghotilo na.’ ”

17Naiknore ne leghuni unha te chekeni mae Moses na. Kehare ne salo fakmana nu kehare ne theome salo fakmana kolho neu. 18Nu kate fananaba mare gano teke salo naiknore, mare ne laseni te iheire teke salo fakmana re ne theome raꞌe kmana ne salaꞌui, eghuteuna iheire teke theome salo fakmana re ne theome ari ne kmoꞌe neu ka gano na. Mare te gnafa ne ima ne boho, ne theo kaisei naikno te glehe rofo na.

19Mae Moses ne cheke ka naiknore mala thosei toki keha gano ghilei hamerane.

20Nu keha naiknore ne tirodi fanomho ka nogna cheke mae Moses re ne lilisei neu keha vido gano ne ghilei hamerane. Nu vido gano teke lilisei teku teke ghilei hamerane igre ne kafe siosilo ne funu siri botodi. Eghuteuna mae Moses ne diꞌatagna fara ka naiknore.

21Leuleghu hamerane na naikno te gnafa re ne salo ghedi naba gano te mala ima na. Nu kate haghe te brana naprai na, gano teke theome salo mare teke au teku ka glose na ne blalho ne vuhai khoꞌu kolho.

Lord ne cheke ka naiknore mala gnafa ka narane Sabat na

22Ka fafamno narane gna wik na, naikno te gnafa re mala salo gano te mala nabagna phei narane. Eghuteuna hatimare mae biꞌodi Israel gre mei ne cheke ka mae Moses eigna puhi igne. 23Mae Moses ne cheke eghu ka mare, “Igne unha te chekeni Lord na, nathuꞌu na narane mala gnafa, narane Sabat, nogna narane Lord. Eghume gognaro na ghotilo salo unha te magnahagheni ghotilo na mala gahu ka khaꞌaghi ba mala kuki ka suspen. Eghuteuna unha te salaꞌui na ghotilo lilisei malagna fei hamerane.”

24Naiknore leghuni nogna cheke mae Moses na ne tathaji neu vido gano teke salaꞌui re ne ghilei hamerane. Eghuteuna gano igne ne theome siri nei theome au tagna siosilo neu. 25Ka narane ke leghugna igne na mae Moses ne cheke eghu ka naiknore, “Gognaro gne u narane Sabat, narane mala gnafa mala kilo fnaknoni nanghagna Lord. Eghume ka narane igne na, ghotilo theome tangomana teke hiro gano ke kosigna vido te au teu tahati igne na. Eghume ghotilo na imau ngala vido gano teke salaꞌui teku ka ghotilo ra. 26Ka fafamno narane gna wik na, ghotilo mala atha gano tuana. Eghuteuna ka fafitu narane na, narane mala gnafa, eghume ka narane igne na ghotilo ginau na theome filoni kaisei gano te mala salo ghotilo na.”

27Neuba ngau, keha naiknore ne tei ne hiro gano ka narane igne, nu mare ne theome filoni kaisei gano te au teu jare na. 28Aonu Lord ne cheke eghu ka mae Moses, “Ghema Moses, niha fata tiromi fanomho ka nogu cheke nei ka nogu farirhiu teu iara gre siba ghotilo mae Israel grea? 29Fanomho fakeli sagho, iara Lord, iara neke tusu ari ka ghotilo narane te mala gnafa igne. Eghume ka fafamno narane na iara ginau na tusu ari ka ghotilo gano te mala nabagna phei narane na. Aonu ka fafitu narane na naiknore mala gnafau kolho ka sugadire, theo kaisei nalhaꞌu ba gaꞌase te tangomana te jifla ka sugagna na te tei loku na.” 30Eghume naiknore mala theome loku ka fafitu narane na, nu mala gnafa kolho.

Mae Eron ne fablahi keha mana ne tusu ranghini Lord

31Naiknodi Israel re ne kiloni gano igne “Manna”, gaoghathogna na, “Tore, unha glepo si ignea?” U Mana igne e vegha nu ikoi jateula kaisei sisi gaju eghu. Eghuteuna famane mamahe jateula bisket teke eni ka jujurukuli eghu. 32Mae Moses ne cheke eghu ka naiknore unha teke chekeni Lord ka mana na, “Igne unha teke chekeni Lord ranghi ghita tahati na, tahati mala atha kaisei suspen ikoi mala fafofodu ‘manna’ tagna, mala athahi au maladi vikeda nate karha mei ke leghuda thogheiro re. Mare ginau na tangomana te filoni gano teke tusu ranghi ghita Lord ka vido teke au tahati ke lamnagna namono nagou igne. Ke leghugna teke atha fajifla ghita Ijep teke mei au agne na.”

33Aonu mae Moses ne cheke eghu ka mae Eron, “Iagho atha kaisei suspen thina mala fafofodu ‘manna’ ke lamnagna mala lilisei ke ulugna Lord mala laseni goro sua nate karha mei thogheiro re.”

34Aonu mae Eron ne leghuni nogna cheke Lord na ne ginauna lilisei suspen “manna” na rhegna Bokis Nhaꞌa Cheke na. 35-36Naiknodi Israel gre ne ima u “manna” igne nabagna phia tutu finogha neke tei nga neke au soru jare ka nohi Kenan. Mare fananaba “manna” igne malagna kaisei naikno teuna leuleghu narane. Igne namo thokeni phei kilo nabagna kaisei khara'o ikoi, mare kiloni igne oma.

Nabotho oma na nabagna kaisei efa.

Currently Selected:

Eksodas 16: mrn

Highlight

Copy