Eksodas 1
1
Vikegna mae Jekop na ne thovu ne vuragha
1-2Kaisei narane mae Jekop, keha nanghagna na mae Israel, atha thugnare ne tei Ijep. Aonu thugna mana re ne atha khetodi nei thudi teure ne tei baludi ne au Ijep. Nanghadi thugna mae Israel re igre:
mae Ruben, mae Simion, mae Livae, mae Juda,
3mae Isaka, mae Sebulun, mae Benjamin,
4mae Dan, mae Naftali,
mae Gad, nei mae Asa.
5Eghuteuna ka narane tuare, Josep kaisei mae ka mae thabusigna igre kulu auhi ka kantri Ijep. Eghuteuna khaputudi naikno teke tei au jare igre fitu salei naikno.
6Kmana finogha ke leghudi igre, mae Josep baludi thabusigna mana igre au neu jare ne ghilei kafe lehe. 7Nu naiknodi Israel igre ne au kmana thudi ne vuragha fara nei nheta fara neu heva heva jare Ijep.
8Aonu kmana finogha ke leghudi igre, kaisei king majaghani ne kegra funei Ijep, mae igne theome laseni unha teke eni mae Josep Ijep tifa na. 9Eghuteuna king igne ne cheke eghu ka nogna naiknore, “Gognarona tahati la filo tathada theda tela kmana tela salaꞌu ghita naiknodi Israel igre, nei nheta salaꞌu ghita tahati. Eghume tahati ginauna na theome tangomana ghita nate sagheleghudi nafnata naikno igre. 10Tahati na hironi kaisei puhi mala fakhusudi mare, glahu goigoni ghita mare. Jame te eghu tahati na, kate thoke mei magra na, mare ginauna loku fodu baludi noda naoka tahati gre mala magra ka tahati eghuteuna mare ginauna ulu ghita, eghuteuna mare ginauna nake khotogna noda namono tahati igne.”
11Aonu mae Ijep igre ne lilisei keha mae mala reireghidi nei huhurudi eghu maedi Israel mala loku jateula naikno sneka eghu. Mare eni igne mala thofno paradi mare. Ka puhi igne mare huhurudi mare mala loku ka phei namono biꞌo Pitom ghe Ramese, aheva king te lilisei gano nei keha glepo eghu tagna. 12Nu neuba, naiknodi Israel igre, kmana fara ne salaꞌui nei rheta eghu heva heva ka kantri Ijep. Naugna igne, naikno te gnafa te au ke lamnagna kantri Ijep ne thofno theome magnahaghedi nei mhaghu nodi fara ka mare. 13Aonu naiknodi Ijep ne huhurudi mare mala loku heta fara salaꞌuni tifa, 14mala diꞌa salaꞌui fara nakarhadi re. Mare huhurudi naiknodi Israel mala loku ka brik, nei mala loku ka suga biꞌo ka namono na, nei mala loku ka nodi nagare, eghuteuna leuleghu fata na mare goigonidi nei tirodi kokhonidi.
15Kaisei narane, king ne kilodi phei gaꞌasedi Hibru Sifra ghe Pua, phei gaꞌase igre mala toghodi goro gaꞌasedi Hibru ka narane te karha sua. 16Mana ne cheke eghu ka repa, “Gognarona, kate toghodi ghopa gaꞌasedi Hibru igre kate karha sua na, iara magnahaghei ghami ghopa kate fifilo ghopa te sua nalhaꞌu na, ghopa falelehe, eghuteuna kate filo ghopa te sua gaꞌase na, tuana te mala karha.” 17Nu repa ne theome leghuni unha te chekeni king igne, naugna repa ghatho tahuni God. Kate karha sua nalhaꞌu na, repa snakreni sua igne mala karhau kolho. 18Aonu, kaisei narane, king ne kilodi repa ne ghusna eghu ka repa, “Naugna unha si ghopa te theome leghuni nogu cheke iara na te snakredi sua nalha'u gre te karha teu kolho grea?”
19Repa ne cheke eghu ka mana, “King, gaꞌase Hibru gre theome jateula gaꞌasedi Ijep igre eghu. Bligi kolho ka rehati Hibru te fakarha sua na, nu ghehati theome tangomana te ghosei te fakarha sua na. Eghume kate theome posa lao teu kaisei ka ghepa ka vido igne na, rehati la kulu karhahi thudire eghu.”
20-21Naugna repa ghatho tahuni God, eghuteuna God keli fara ranghidi repa, aonu mana ne fablahidi repa ne au kmana thudi. Kate karha sua te kmana vikegna Israel igre eghuteuna mare thofno nolaghi fara.
22Aonu king ne cheke faheta ka nogna naiknore, ne cheke eghu, “Jame kaisei gaꞌase Hibru karha kaisei thugna nalhaꞌu, ghotilo koko lao sua tuana ka Khoꞌu biꞌo Nael mala lehe, nu snakredi sua gaꞌase te gnafa re mala karhau.”
Currently Selected:
Eksodas 1: mrn
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
