Eksodas 2

Moses ne karha

1Ka narane tuare kaisei mae ka vikegna Livae ne tolaghi ka kaisei gaꞌase ka vike igne la. 2Gaꞌase igne bukla ne karha kaisei sua nalhaꞌu. Kate filoni naꞌa te famane sua nalhaꞌu na, naꞌa tei pophoru sua igne ghilei thilo nhigra. 3Nu kate biꞌo haghe mana na, idogna na theome tangomana te pophoruni mana na. Aonu naꞌa atha kaisei kharaꞌo biꞌo te theome tangomana khoꞌu te ruma na ne fathuru lao mae sua igne ne tei pophoru farihotei buburu ka geri Khoꞌu biꞌo Nael. 4Eghuteuna greghagna sua igne kegra filo neu delei mala filoni unha nate eni ka sua igne.

5Kaisei narane thugna gaꞌase king na tei ka khoꞌu na mala apu baludi nogna gaꞌase glokure. Kate apu teu naꞌa na, nogna gaꞌase naꞌare nolo tafri neu rhegna khoꞌu igne. Naꞌa ne filo teini kharaꞌo igne thao neu fari hotei buburu. Aonu naꞌa ne kuru teini kaisei nogna gaꞌase gloku mala tei atha mei kharaꞌo igne ka naꞌa. 6Kate tothora naꞌa kharaꞌo igne, naꞌa ne filoni mae sua nalhaꞌu igne ne tanhi neu. Aonu thugna king igne ne kokhoni nognani ne cheke eghu, “Igne thudi mae Hibru.”

7Aonu greghagna mae sitei igne mei ne cheke eghu ka thugna king, “Ba, iagho magnahaghei ghau iara te tei hironi kaisei thau Hibru mala taego ranghi nigho iagho sua igne?”

8Eghuteuna naꞌa ne cheke eghu ka gaꞌase igne, “Uve, tei sagho!” Aonu gaꞌase igne tei ne kilo meini idogna mae sitei igne. 9Kate posa mei idogna mae sitei igne, thugna king na ne cheke eghu ka idogna na, “Iagho atha sua igne mala taego ranghi ghau iara, eghuteuna iara ginauna foli nigho iagho.” Aonu idogna na ne atha sua igne ne taego thugna na. 10Ke leghu kate biꞌo haghe te rheta mae sitei na, idogna na neke atha fapulo ka thugna king, ihei te tajini jateula te thofno thugna thegna neu. Eghuteuna naꞌa ne cheke eghu, “Naugna iara neke atha hagheni mana ka khoꞌu na, iara ginauna kiloni mana Moses.” Gaoghathogna Moses teu igne, “hata haghe ka khoꞌu” eghu.

Mae Moses ne rikha ne tei Midian

11Kaisei narane, kate rheta tela biꞌohi na, Moses tei ne sighodi kheragna mae Hibru gre, eghuteuna mana filodi maedi Ijep gre huhurudi mare mala loku heta fara. Ka narane tuana, mana ne filoni kaisei maegna Ijep ne puri fadiꞌani kaisei maegna Hibru. 12Mana filo tafri te theome filoni kaisei naikno te au namo jare na, mana ne puri fadiꞌani maegna Ijep igne ne ghilei lehe. Aonu mana ghosei ne pophoru thinigna na lamna nusu. 13Ka keha narane na, Moses tei ne filodi phei Hibru ne magra. Aonu mana ne cheke eghu ka mae ihei te jafra ka phiamare na, “Naugna unha sagho te tutini mae kheramu themu gnea?”

14Nu mae igne ne cheke eghu ka mae Moses, “Ei! Ihei teke vahi nigho iagho te mae mala reireghi ghami ghehati nei mala fate ghami ghehati teuna? Ba, iagho magnahaghei te falehe ghaula iara jateula maegna Ijep teke aknu falehe iagho gnora ia eghu?”

Aonu kate nomhini igne, mae Moses ne mhaghu nogna fara, ne ghaoghatho eghu, “Naikno gre jame kafe lasenihi teke aknu falehe iara maegna Ijep gnora ia.”

15Kate nomhini king eigna igne, mana fariuriu mala aknu faleheni mae Moses, nu mae Moses rikha ne tei ka nohi Midian. Kaisei fata, kate gnokro teu Moses rhegna kaisei seu na, 16fitu gaꞌase ne mei ka vido igne. Gaꞌase igre thugna mae Jetro kaisei mae pris gna Midian. Gaꞌase igre mei balu nogna sipu nei nanigot eghu Jetro mae kmadi na mala fakoꞌudi. 17Nu keha mae greireghi sipu mei ne ngohli teidi gaꞌase igre. Aonu mae Moses kegra haghe ne tei fakarhidi ka mae igre. Eghuteuna mana toghodi reꞌe ne fakoꞌudi nodi sipu nei nanigot teure.

18Kate pulo ka mae kmadi na, mae Jetro ne ghusna eghu ka reꞌe, “Ne faꞌunha site ghosei teke pulo mei ghotilo gognaro gnea?”

19Rehati ne cheke eghu, “Kaisei maegna Ijep mei ne fakarhi ghami ka keha mae greireghi sipu. Mae igne jaola neke toho ghemi khoꞌu ghehati, nei khoꞌu maladi nomi sipu nei nanigot teu ghehati re.”

20Kmadi na ne ghusna eghu, “Ahevau mana na? Naugna unha ne theome kilo meini si ghotilo ia mala ima baluda tahati? Cheke meini!”

21Aonu mae Moses mei ne au baludi mare. Ke leghu, Jetro ne snakre lao thugna gaꞌase Sipora igne ka mana mala khetogna mana. 22Ke leghu, Sipora ne karha kaisei thugna nalhaꞌu, eghuteuna mae Moses ne ghaoghatho eghu, “Iara kaisei mae phosa ka namono igne. Eghume, iara kiloni mae sitei igne Gesom. Gaoghathogna nangha igne, ‘Mae phosa.’ ”

23Kmana finogha salaꞌu ke leghudi igre, king gna Ijep na ne lehe. Nu vikegna Israel igne ne diꞌanagnafadi fara fabrahu ka gloku biꞌo te edi mare re. Leuleghu fata na mare tanhi ka God, naugna mare magnahagheni fara God te toghodi. Eghuteuna nodi tharai mare na tei thoke ka God. 24God nomhidi nodi tharai mare igre, eghuteuna mana filoni te au diꞌanagnafa fara mare na. Aonu mana ghathoni u nhaꞌa cheke teke eni mana ka mae Ebraham, ka mae Isak nei ka mae Jekop. 25Aonu God ne filo ka naiknodi Israel te jateula naikno sneka teu te loku heta fara igre ne kokhoni nognadi fara.

Currently Selected:

Eksodas 2: mrn

Highlight

Copy