Mateos 3
3
Voroꞌtacdyemꞌ Juan chojtacsity
(Mar 1:1-8; Luc 3:1-9,15-17; Juan 1:19-28)
1Aty meꞌsiꞌ atsij muꞌ Juan chojtacsity jiquej, voroꞌtacsi muꞌ cäjyasĉan jac Judeaĉansiꞌ. 2Yi muꞌ:
—Dyijyevac juchajcheꞌ miꞌin, aty c̣hẹiꞌyaꞌ ayoꞌbuꞌyi raꞌ muꞌ Jenꞌ.
3Aty meꞌ voroꞌtacsiyaꞌ muꞌ Juan, cạ̈tsiꞌ ọij p̂eyacdyeꞌ muꞌ Isaíassiꞌ jasoꞌmititysiꞌ Jenꞌ jiquej. Yiꞌ sánacdyeꞌ:
"Cäjyasĉan jac muꞌĉan raꞌ yirity fer p̂eyaquity, yi:
Jämꞌ yụꞌtyevac majmi Ayodyes tsun,
chụiꞌjevac jäꞌmij", yiꞌ sánacdyeꞌ.
4Juan quịꞌsituiꞌ p̂anacsiꞌ fin cameyos, judyeyaꞌ ñutuꞌtacdyeꞌ muꞌ shoꞌpaꞌ, säcsedyemꞌ shọ́coꞌ judyeyaꞌ coroma däräꞌĉantyiꞌ. 5Ĉọcte in Jerusalénĉan bäꞌyity in judyeyaꞌ paiꞌ Judeaĉantyiꞌ in judyeyaꞌ c̣hẹiꞌyaꞌ Jordán bäꞌyity in, räj muꞌin ĉọcte in seꞌvecbite p̂eyacdyeꞌ in. 6Muꞌin p̂eyaqui juchaj muꞌin chat qui muꞌ Juan chojtacsi cojiro Jordánĉan.
7Juan cạvacsi daiꞌ atsij in fariseo in judyeyaꞌ saduceo in, ĉọcte muꞌin chimeꞌ in, mạꞌjeꞌ tsanꞌ jiꞌchojti in muꞌyaꞌ. Jéĉunacsi muꞌ:
—¡Där ac̣hiꞌtyity miꞌin jeñejtyity nas miꞌin! Jeñej aty raꞌ mọꞌ jiꞌchojtidyeꞌ tupuj jiꞌc̣honnac därsiꞌyaꞌ vaꞌtacdyeꞌ Jenꞌsiꞌ ĉúti u miꞌin. 8Damꞌdye jämꞌ tashcheꞌ jäꞌmij rụij bäꞌyi miꞌin, mọꞌ raꞌ jịꞌĉoiꞌ anic dyijyi juchajcheꞌ miꞌin. 9Jam raꞌ ĉụiꞌ dyijtuti miꞌin mijam raꞌ yi miꞌin: "Tsun nash vóshiꞌ Abrahamvuntyiꞌ muꞌ." Yụ jéyac Jenꞌ tupuj mij jiꞌmunacsi uts in Abrahamtyiꞌ vóshiꞌ muꞌ. 10Jenꞌ aty raꞌ tuiꞌ vaꞌtacdyeꞌ, jeñej yirity muntyiꞌ jịvaꞌchaiꞌ jam väshis cätidyeꞌ, meꞌdye raꞌ chimeꞌ Jenꞌ jịvaꞌchacsi muꞌin jam rụij bäꞌyity in, tsäquiꞌsis raꞌ vaꞌtacdyeꞌ vaꞌtyeyac in. 11Yụ nash chojtyeyac miꞌin ojñiꞌĉan, mọꞌ jịꞌĉoiꞌ aty dyijyi juchajcheꞌ miꞌin. Muꞌ qui raꞌ atsij mujuꞌchaꞌ fer buꞌyity, jam jeñej yụ, uyaꞌyaꞌ yụ, mijam tupuj yụ cạpte yujches muꞌ. Muꞌ raꞌ Jenꞌsiꞌ Ạꞌedyemꞌ yuꞌtyiyinac miꞌin judyeyaꞌ pạrej raꞌ yuꞌtyiyinac tŝij. 12Muꞌ raꞌ jịꞌcäts yụꞌtacsi muntyiꞌ in juchadyes, jeñej yirity muntyiꞌ tyiftety trivo, muꞌ tyiftactyiꞌ jämꞌ yụꞌtac acaꞌĉan muꞌ, mọꞌ na simꞌ jiꞌcoꞌshayac tŝijĉan, jam quivꞌjoiꞌsiꞌĉan, meꞌdye raꞌ chimeꞌ muntyiꞌ in.
Jiꞌchojtidyeꞌ Jesucristos
(Mar 1:9-11; Luc 3:21-22)
13Chimeꞌdye muꞌ Jesús atsij Galileaĉantyiꞌ, Jordánve jịjcaij ĉọcte muꞌ Juan, mạꞌjeꞌ jiꞌchojti Juanyaꞌ. 14Juan yi jéĉunꞌte:
—Damꞌdye jämꞌ yụ jiꞌchojti míyaꞌ, ¿junꞌ buty meꞌ ĉushdyim?
15Vorjete Jesús:
—Meꞌ raꞌ q̂uinꞌ mi paj qui jịꞌcätsepja Jenꞌsiꞌ dyijyedyeꞌ muꞌ.
Jụjyi qui muꞌ. 16Aty jiꞌchojtiyaꞌ muꞌ Jesús aty chanamꞌcheꞌ jịjcabanyaꞌ, vanacyiꞌ vatyquej mạyedyeꞌcheꞌ. Cạvepte Jenꞌsiꞌ Ạꞌedyeꞌ muꞌ jeꞌñes ọꞌtoꞌ, joꞌmes chạiꞌ játŝuti muꞌ Jesús. 17Seꞌveꞌ vatyquej mạyedyeꞌches p̂eyacdyeꞌ yiꞌ:
—Uts nash mạꞌjeyacdyety Ạvaꞌ yụ, anic maꞌjotaqui yụ.
Currently Selected:
Mateos 3: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
