Mateos 2

Muꞌin chị́quity ọ́rotaꞌyaꞌ in atsij in

1Jesús naꞌi Belénĉan, Judea tịj mọꞌ jacsiꞌ, yoquiꞌdyemꞌ ayoꞌbuꞌyiyaꞌ Herodes jiquej u.#2:1 Jam yirity mọmoꞌ Herodes in Jenꞌsiꞌcheꞌ sánacdyeꞌ muꞌ. Uts Herodes jéte in "Tashchety Herodes", jéte in. Muꞌ ayoꞌbuꞌyi jiquej yoquiꞌdyemꞌ naꞌi Jesús. Muꞌ jiꞌijacsity miquiꞌmuntyiꞌ in. Atsij in pạrej muꞌin chị́quity ọ́rotaꞌyaꞌ in, pamꞌvety atsij in Jerusalénĉan shupqueti in. 2Yiꞌ jéyacsi muntyiꞌ in:

—¿Junaꞌ buty muꞌ naꞌity ayoꞌbuꞌyity raꞌ judíodyes in? Pamꞌve cạvete tsun jịꞌĉocdyety ọ́rotaꞌ mọꞌdyes atsij tsun mạꞌjeꞌ timaꞌquete tsun muꞌ naꞌity joijnoꞌ.

3Muꞌ ayoꞌ Herodes aty seꞌvacsebiyaꞌ p̂eyacdyeꞌ muꞌin, anic yoqui tyeij, räjtumdye Jerusalénĉan bäꞌyity in. 4Mọꞌdyes muꞌ Herodes vajmuꞌyaꞌjeyacsi muꞌin tashchety cudyitity Jenꞌcheꞌ in judyeyaꞌ muꞌin jịꞌchiyacsity yụꞌtacdyeꞌ in, chat qui yi jéyacsi:

—¿Junaꞌ buty raꞌ naꞌi muꞌ Jiꞌc̣honacsity Muntyiꞌ?

5Muꞌin yi vorjete in:

—Belénĉan ca raꞌ naꞌi, mọꞌ Judeaĉansiꞌ jac, yi nash jiquej muꞌ jasoꞌmitity p̂eyacdyeꞌ Jenꞌ jiquej, yiꞌ sánacdyeꞌ:

6"Mi Belén, Judáĉansim,

meꞌ tsanꞌ miquis bäꞌyedyeꞌ mi,

mọjoꞌchaꞌ buꞌyiꞌ qui namꞌ mi ĉaĉaij na muꞌĉan raꞌ naꞌi yirity Ayoꞌ,

muꞌ raꞌ ayoꞌbuꞌyi muntyidyes yụ Israeltyiꞌ vóshiꞌ in",#2:6 Miqueas 5:2 yiꞌ sánacdyeꞌ —jéte in muꞌ Herodes.

7Chat qui muꞌ Herodes pạrejjeyacsi muꞌin chị́quity ọ́rotaꞌyaꞌ in, caminve jéyacsi:

—¿Junꞌdyeyaꞌ caꞌ tiyacchuti jiꞌcaviti muꞌ ọ́rotaꞌ?

8Chimeꞌdye muꞌ jéyacsi:

—Tạij miꞌin Belénĉan jịjcajamꞌ quevicmac muꞌ miquity. Dạctinteyaꞌ raꞌ miꞌin, atsijban raꞌ miꞌin úyaꞌ, jítiĉaꞌ raꞌ yụ miꞌin paj qui yụ chimeꞌ timaꞌquecte.

9Aty meꞌsiꞌ seꞌvepteyaꞌ p̂eyacdyeꞌ ayoꞌsiꞌ in, chat qui sacti in. Muꞌdye ọ́rotaꞌ pamꞌve cạvetety jiquej in muꞌdye jịjcatyete in junꞌ quiꞌ chuc chaꞌsheꞌ in mọꞌ acaꞌ yóĉandyemꞌ miquity u, muꞌyaꞌ dyäqui muꞌ ọ́rotaꞌ. 10Aty cạveteyaꞌ in muꞌ ọ́rotaꞌ dyäqui, anic där maꞌjoij in. 11Chat qui siti acaꞌĉan in cạvete muꞌĉan miquity in judyeyaꞌ tseꞌ muꞌ María, muꞌĉan dyụtsyi in timaꞌquete in. Jäcaqui ñịbeꞌyedyes muꞌin mọjoꞌchaꞌ jämꞌsiꞌ mọꞌ soꞌmete in, oro, judyeyaꞌ jiꞌcoꞌshayacdyeꞌsiꞌ jẹrejres, judyeyaꞌ yäcäs jẹrejres mirra tịj mọs. 12Chat qui taminꞌdyeꞌĉan Jenꞌ jéyacsi paj qui yocve tyeban in, jam Herodesyaꞌ, meꞌ buꞌyi ĉụiꞌsiꞌĉan jac jijtuban in.

Egiptoĉan jịjcaij tiĉavꞌquete miquity in

13Muꞌin chị́quity ọ́rotaꞌyaꞌ in aty meꞌsiꞌ jọban in chat qui Jenꞌtyiꞌ anjer muꞌ taminꞌdyeꞌĉan jiꞌcaviti Joséyaꞌ. Jajiti:

—Sacta Egiptoĉan jịjcava tiĉavꞌqueme muꞌ miquity tseꞌtumdye. Muꞌĉan raꞌ taĉan meꞌ buꞌyim junꞌ quiꞌ chuc yụ jébadyeye, ĉaĉaij na muꞌ Herodes quevte raꞌ muꞌ miquity, mạꞌjeꞌ ijate.

14Meꞌdye muꞌ José tsạꞌi tsedyedyeꞌ, jiꞌĉavꞌquete muꞌ miquity tseꞌtumdye muꞌve jịjcaij Egiptoves majmi jịjcaiꞌ. 15Muꞌĉan meꞌ buꞌyi in junꞌ quiꞌ chuc säñi muꞌ ayoꞌ Herodes, q̂uinꞌdyemꞌ shuban Egiptoĉan in. Meꞌ cạ̈tsiꞌ Ayoꞌsiꞌ p̂eyacdyeꞌ muꞌ, sáñeꞌ muꞌ jasoꞌmitity p̂eyacdyeꞌ Jenꞌ jiquej. Yiꞌ mọꞌ: "Yụ fayaqui ĉụiꞌtyiꞌ Ạvaꞌ yụ paj shuban Egiptoĉan."#2:15 Oseas 11:1

Herodes jutacsi paj qui ujacsi miquiꞌmuntyiꞌ in

16Muꞌ Herodes aty cạveꞌyaꞌ junꞌ chuc muꞌin chị́quity ọ́rotaꞌyaꞌ in väñätute in, chat qui muꞌ fạ́coij tyeij. Jutacsi qui väc̣häꞌtyity muꞌ paj qui ijacsi in muꞌin miquiꞌmuntyiꞌ sonꞌ in, räj Belénĉan bäꞌyity in judyeyaꞌ c̣hẹiꞌyaꞌ bäꞌyity chimeꞌ in. Päräꞌ yómodyeꞌyity in judyeyaꞌ joijnoꞌ in chimeꞌ, räj ijacsi in, ĉaĉaij na meꞌ muꞌin yi in chị́quity ọ́rotaꞌyaꞌ in, aty päräꞌ yómodyeꞌ tyiti cạvete ọ́rotaꞌ jiquej in. 17Meꞌ cạ̈tsiꞌ mọꞌ p̂eyacdyeꞌ jasoꞌmititysiꞌ Jenꞌ Jeremías tịj muꞌ. Muꞌ sáñeꞌ yi:

18"Fersiꞌ táredyeꞌ muꞌin Ramáĉan bäꞌyity in vóshiꞌ mọꞌ Raqueltyiꞌ,

anic fer táraqui ạvaꞌ muꞌin.

Jam junꞌ tyäpiꞌ táredyeꞌ muꞌin ĉaĉaij na aty itŝij ạvaꞌ muꞌin."

Caꞌñibun in Nazaretĉan jijtuban in

19Aty säñiyaꞌ muꞌ Herodes chat qui Jenꞌtyiꞌ anjer muꞌ taminꞌdyeꞌĉan jiꞌcavibun Joséyaꞌ Egiptoĉan. 20Yi jajiti:

—Sacta, Israelĉan jịjcabada cạbajme muꞌ miquity tseꞌtumdye, a nash säñi muꞌin mạꞌjeꞌ ijatety jiquej in muꞌ miquity.

21Meꞌdye muꞌ sacbun Israelĉan jijtuban, tubajte muꞌ miquity tseꞌtumdye. 22Chị́qui muꞌ aty qui muꞌ Arquelao Judeaĉan ayoꞌbuꞌyi,#2:22 Uts Herodes Arquelao, muꞌ ạvaꞌ muꞌ jétety in "Tashchety Herodes", muꞌ jiꞌijacsity miquiꞌmuntyiꞌ in. P̂eyevaꞌ Mateos 2:1 jeñej buꞌyi jenꞌvun jiquej muꞌ Herodes. Mọꞌdyes muꞌ José noiꞌyi, aty jam mạꞌjeꞌ ĉụiꞌsituban bäꞌyedyeꞌ muꞌ, cuvij taminꞌdyeꞌĉan jéyac, mọꞌdyes qui Galileave jịjcaij muꞌ. 23Nazaretĉan qui bäꞌban muꞌ mọꞌ Galileaĉansiꞌ bäꞌyedyeꞌ. Meꞌ ọij cạ̈tsiꞌ p̂eyacdyeꞌ muꞌin jasoꞌmititysiꞌ Jenꞌ jiquej in. Yiꞌ in: "Muꞌ nash Nazaretĉantyiꞌ", jéte raꞌ in.

Currently Selected:

Mateos 2: CAS

Highlight

Copy