Lucas 6
6
Shorjete trivo in jịꞌjutyitidyesĉan mạyedyeꞌ
(Mat 12:1-8; Mar 2:23-28)
1Mọꞌ mạyedyeꞌ jịꞌjutyitidyes, Jesús nati jịꞌchiyactyiꞌtum muꞌ, cätidyeꞌĉan trivo muꞌĉan tyeij in. Jịꞌchiyactyiꞌ muꞌ shorjepte in trivos väsh muꞌ, jebepte in. 2Pạrej muꞌyaꞌ fariseo cạvacsi in, yi muꞌin jéyacsi in:
—¿Junꞌ dash meꞌ miꞌin? Jam damꞌ chiquetiñeꞌ yụꞌtacdyeꞌ urucyas, mijam ạ̈räjjetiñeꞌ jịꞌjutyitidyes mạyedyeꞌ, carijtaqui mọmoꞌ miꞌin.
3Vorjeyacsi Jesús:
—¿Jam adac p̂eyetiñeꞌ miꞌin mọꞌ sánacdyeꞌ p̂eijtes jiquej muꞌ David? Yiꞌ junꞌ chuc muꞌ jiquej yoquiꞌdyemꞌ dáquiyaꞌ jiquej u in penꞌdyeꞌtum muꞌ. 4Siti penꞌdyeꞌtum muꞌ Jenꞌsiꞌĉan acaꞌ muꞌ, jebete muꞌ pan Jenꞌyadyety, judyeyaꞌ soꞌmacsi penꞌdyeꞌ chimeꞌ muꞌ. Yiꞌ mọꞌ yụꞌtacdyeꞌ uts nash cudyititydyety mọmoꞌ Jenꞌcheꞌ in, muꞌin mọmoꞌ tupuj jebete in yiꞌ, mijam damꞌ yoctyidyety in, meꞌ tsanꞌ meꞌ, jebete qui namꞌ muꞌ David jam mọꞌ jedyeꞌ shupquiꞌ —jéyacsi Jesús.
5Chimeꞌdye yi jéyacsi:
—Yụ nash Anictyity Muntyiꞌ bächäiꞌtyiꞌ yụ ọij jịꞌjutyitidyes mạyedyeꞌ in.
Muntyiꞌ putyuijtyiꞌ un
(Mat 12:9-14; Mar 3:1-6)
6Yocsiꞌĉan mạyedyeꞌ jịꞌjutyitidyes muꞌ Jesús ĉọ́queꞌ vajmuꞌyaijĉan judío in, jịꞌchiyacsi. Chimeꞌdye muꞌĉan yirity muntyiꞌ tacvesve putyuijtyiꞌ un. 7Pạrej muꞌin fariseo in judyeyaꞌ jịꞌchiyacsity yụꞌtacdyeꞌ Jenꞌsiꞌ in, muꞌin vaj mọꞌches vej muꞌin cạvevaꞌte in muꞌ Jesús, junꞌjete a ĉa jiꞌchäĉajte jịꞌjutyitidyesĉan mạyedyeꞌ, yi in, muꞌin mạꞌjeꞌ in paj qui jiꞌmeꞌte in ayoꞌyaꞌ. 8Muꞌ qui namꞌ chị́yacsebi dyijyedyeꞌ muꞌin, jéte muꞌ muntyiꞌ putyuijtyiꞌ un:
—Sacyeva tashcheꞌ buꞌva.
Meꞌdye muꞌ sacyi muꞌ muntyiꞌ. 9Chat qui muꞌ Jesús jéyacsi muntyiꞌ in:
—Q̂uinꞌ raꞌ yụ jéyac miꞌin: ¿Jụꞌñis buty tupuj yụꞌtyejaꞌ jịꞌjutyitidyes mạyedyeꞌ? ¿Areꞌ jämꞌsiꞌ areꞌ aꞌc̣his? ¿Tupuj buty jiꞌchäĉajsha muꞌ muntyiꞌ, areꞌ jiꞌmeꞌyeja mọmoꞌ? ¿Jätäjyiꞌ buty yụꞌtacdyeꞌ Jenꞌsiꞌ muꞌ? —yi jéyacsi Jesús.
10Jesús cạvi jéyacsi chum muntyiꞌ in, chat qui jéte muꞌ muntyiꞌ:
—Chụiꞌjebadaꞌ un mi.
Meꞌdye muꞌ chụiꞌjeyaĉan un muꞌ, meꞌĉandye jämꞌjobanꞌ un muꞌ. 11Muꞌin fariseo in jiꞌmeꞌtyeyete in mọꞌdyes qui fạ́quete in. Shuban muꞌin in tiyacchuiꞌ dyijyi in junꞌjete chuc raꞌ in.
Jesús tsimꞌtacsi yiriꞌtac päräꞌ jiyi jutactyiꞌ muꞌ
(Mat 10:1-4; Mar 3:13-19)
12Aty meꞌsiꞌ muꞌ Jesús mụcuꞌcheꞌ jịjcaij cọdajquiqui Jenꞌcheꞌ muꞌ, dyutsenꞌjeꞌ tsedyedyeꞌ meꞌquiꞌ cọdaqui Jenꞌcheꞌ. 13Meꞌdye nạijjoij muꞌ Jesús, chat fayacseban jịꞌchiyactyiꞌ muꞌ, muꞌinĉantyiꞌ in muꞌ Jesús tsimꞌtacsiꞌ muꞌin yiriꞌtac päräꞌ jiyity in, muꞌin qui yụꞌtacsi jutacdyety muꞌ. 14Ọij nash tịj muꞌin jutactyiꞌ muꞌ: Simón, muꞌdyemꞌ Pedro jịꞌtiꞌete, judyeyaꞌ Andrés, vojity muꞌ Simóntyiꞌ, judyeyaꞌ Santiago, judyeyaꞌ Juan, judyeyaꞌ Felipe, judyeyaꞌ Bartolomé, 15judyeyaꞌ Mateo, judyeyaꞌ Tomás, judyeyaꞌ Santiago, Alfeotyiꞌ ạvaꞌ muꞌ, judyeyaꞌ Simón, muꞌ cäc̣häꞌchucsity muꞌin fạ́cacsity Romaĉantyiꞌ in, 16judyeyaꞌ Judas, Santiagoty ạvaꞌ muꞌ, judyeyaꞌ Judas Iscariote, muꞌ raꞌ jiꞌmincatety muꞌ Jesús, meꞌtum tsimꞌtacsi.
Jesús daiꞌ jịꞌchiyacsi muntyiꞌ in
(Mat 4:23-25)
17Chat qui muꞌ Jesús mụcuꞌcheꞌ jijtuban, räjtumdye jutactyiꞌtum muꞌ, mojijĉansiꞌ jac chaꞌshebanꞌ in. Yoctyiꞌ jịꞌchiyactyiꞌ muꞌ, daiꞌ muꞌin ĉọshte in, yoctyiꞌtum muꞌin muntyiꞌ chimeꞌ in, räj muꞌin jajbuꞌyety in mọꞌ jac Judea, judyeyaꞌ Jerusalénĉantyiꞌ in, judyeyaꞌ Tiroĉantyiꞌ in judyeyaꞌ Sidónĉantyiꞌ in, mọꞌin päräꞌ bäꞌyedyeꞌ in sinves mar in. Junanaj chuc bäꞌyi muꞌĉan in muꞌvevety atsij in, mạꞌjeꞌ seꞌveshbite p̂eyacdyeꞌ in, judyeyaꞌ paj qui meijjetacsebive areꞌredyeꞌ chimeꞌ muꞌin. 18Muꞌ jiꞌchäcacseban judyeyaꞌ sọyoꞌ meijjetyetacseban. 19Mọꞌdyes muntyiꞌ in mạꞌjeꞌ räj tocoꞌjete in, ĉaĉaij na räj jiꞌchäcacseban muꞌin tocoꞌjetety in, muꞌ na jịꞌĉojcayaqui ferdyeꞌ muꞌ.
Maꞌjodyedyes judyeyaꞌ ñịbedyes
(Mat 5:1-12)
20Jesús cạvacsi muꞌin jịꞌchiyactyiꞌ muꞌ, jéyacsi:
—Maꞌjoij muꞌin ñịbety q̂uinꞌ in, aty Jenꞌyadyety in ayoꞌbuꞌyedyedyety muꞌ.
21Maꞌjoij muꞌin dáquity q̂uinꞌ in ĉaĉaij na muꞌin raꞌ räj soꞌmac in. Maꞌjoij muꞌin tárity q̂uinꞌ in, jäquiꞌve raꞌ muꞌin dyisi in.
22Maꞌjoij raꞌ miꞌin muntyiꞌ fáquinac yụ́dyes jụijyaꞌ in judyeyaꞌ ñäñinacyaꞌ yụ́dyes in, paj tsanꞌ vaꞌquicnac in judyeyaꞌ fạraꞌñinac in yụ́dyes cäc̣häꞌchucdyeꞌyaꞌ Anictyity Muntyiꞌ yụ. 23Aty raꞌ meꞌtyinac muntyiꞌ jụijyaꞌ in, jam raꞌ tári miꞌin, jịꞌcavetiñeꞌ raꞌ mọmoꞌ mọꞌ jämꞌsiꞌ maꞌjodyeꞌ miꞌin, ĉaĉaij na aty mọꞌyaꞌ jäꞌmiiꞌtyiꞌ chäcdyis bijodyedyes soꞌminac muꞌ Jenꞌ mạyedyeꞌcheꞌ. Jeshaꞌ, muꞌin vóshiꞌvun utstyiꞌ meꞌtyinactyiꞌ q̂uinꞌ in, meꞌdye muꞌin chimeꞌ jiquej in meꞌtacsi in, muꞌin jasoꞌmitity p̂eyacdyeꞌ Jenꞌ jiquej in.
24Där raꞌ ñịbeꞌ cạvetiñeꞌ q̂uinꞌ miꞌin jedyeꞌtumtyiꞌ miꞌin, ĉaĉaij na meꞌquiꞌdye raꞌ maꞌjodyeꞌ cạvetiñeꞌ úcheꞌ q̂uinꞌ miꞌin.
25Där raꞌ ñịbeꞌ cạvetiñeꞌ miꞌin soꞌmactyiꞌ jedyeꞌ q̂uinꞌ miꞌin, yirisĉan raꞌ mạyedyeꞌ dáqui miꞌin.
Där raꞌ ñịbeꞌ cạvetiñeꞌ miꞌin dyisity q̂uinꞌ miꞌin, yirisĉan raꞌ mạyedyeꞌ tári miꞌin.
26Där raꞌ ñịbeꞌ cạvetiñeꞌ miꞌin timaꞌquinactyiꞌ q̂uinꞌ muntyiꞌ in, ĉaĉaij na meꞌ muꞌin jiquej vóshiꞌvun muꞌin utstyiꞌ muntyity in timaꞌcacsi in muꞌin väñäijtyiꞌ jiquej in, muꞌin jeñej buꞌyity jasoꞌmitity p̂eyacdyeꞌ Jenꞌ jiꞌĉutity in.
Jemoñeꞌ mạꞌjeyacsejaꞌ muꞌin fáquisinꞌtyiꞌ in
(Mat 5:38-48; 7:12)
27Chimeꞌdye yi muꞌ Jesús jéyacsi jiquej:
—Seꞌvibutiĉamꞌ jämꞌ ọij p̂eyacdyeꞌ yụ: Mạꞌjeyacsejamꞌ muꞌin fáquinactyiꞌ in, jämꞌyejamꞌ mọmoꞌ muꞌintum in. 28Cọdyemac Jenꞌ muꞌindyes in tyi chuc aꞌc̣his soꞌminactyiꞌ p̂eyacdyeꞌ jụijyaꞌ in, judyeyaꞌ muꞌindyes in meꞌtyinactyiꞌ in. 29Chimeꞌdye tyi chuc ĉatjinac jụijyaꞌ yirisve an, jemoñeꞌ pärenꞌve jiꞌĉattyeyetinte. Tyi chuc chutyinac jụijyaꞌ fajchety quịꞌsiꞌ miꞌin, jam raꞌ quijatutyetinte miꞌin camisamun chimeꞌ jịꞌcayemac. 30Tyi chuc cudyinac jedyeꞌ jụijyaꞌ miꞌin, jam raꞌ quijatutyetinte miꞌin. Chutyinac jedyeꞌ jụijyaꞌ miꞌin, jam raꞌ cọdyetyebajtinte. 31Jemoñeꞌ miꞌin jämꞌyedyeꞌtum jämꞌjeyacsi räj muntyiꞌ in. Jeshaꞌ miꞌin mạꞌjetiñeꞌ paj qui muntyiꞌ in jämꞌyedyeꞌtum jämꞌjinac in, meꞌdye raꞌ miꞌin jämꞌyedyeꞌtum jämꞌjeyacsi räj muntyiꞌ in.
32Miꞌin mạꞌjeyacsi jụijyaꞌ muꞌin mọmoꞌ mạꞌjinactyiꞌ in, mọꞌ raꞌ jam junꞌ timaꞌcac miꞌin, meꞌdye mọmoꞌ muꞌin dyijyi in muꞌin chimeꞌ juchajtumtyiꞌ muntyiꞌ in, meꞌtyity mọmoꞌ mạꞌjeyacsi in. 33Chimeꞌdye miꞌin jämꞌyi mọmoꞌ muꞌintum in muꞌin jämꞌjinactyiꞌ in, mọꞌ raꞌ jam timaꞌcac miꞌin. Meꞌdye muꞌin juchajtumtyiꞌ muntyiꞌ in. 34Miꞌin prestajjeyeyacsi mọmoꞌ jụijyaꞌ miꞌin muꞌin jiꞌcaꞌñiyibunactyiꞌ in, mọꞌ raꞌ jam junꞌ timaꞌcac. Meꞌdye muꞌin chimeꞌ juchajtumtyiꞌ in, muꞌin prestajjeyeyacsi mọmoꞌ in muꞌin jịꞌcaꞌñeyeyacsity in. 35Miꞌin na mạꞌjeyacsejamꞌ muꞌin fáquinactyiꞌ in, jämꞌyejamꞌ muꞌintum in. Meꞌ raꞌ tsanꞌ jam jiꞌcaꞌñiyibunac jedyeꞌ jụijyaꞌ miꞌin, prestajjeyeyacsi raꞌ mọmoꞌ miꞌin. Meꞌ jụijyaꞌ miꞌin, därsiꞌ raꞌ bijodyeꞌ soꞌmac miꞌin jäquiꞌve, judyeyaꞌ raꞌ ạvaꞌ muꞌ Jenꞌtyiꞌ mujuꞌchaty shupqui miꞌin, ĉaĉaij na muꞌ jämꞌjeyacsi ac̣hiꞌyity in, muꞌin jam yoshoropaij yity in. 36Jemoñeꞌ ñịbeꞌ ĉọcsi miꞌin, yojdyemꞌ miꞌintyiꞌ Jenꞌ u ñịbeꞌ ĉọcsi muntyiꞌ in.
Dyijtucdyeꞌ yoctyis juchaj
(Mat 7:1-5)
37Chimeꞌdye jéyacsi muꞌ Jesús:
—Jam raꞌ ac̣hiꞌ dyijtucsebi ĉojtyiꞌĉan yoctyis dyijyedyeꞌ muꞌin, mijam raꞌ p̂eijtacsebi juchaj muꞌin, paj qui muꞌ Jenꞌ jam dyijtubunac juchaj miꞌin. Tyi chuc juchatunac jụijyaꞌ miꞌin, jam raꞌ dyijtuvaꞌbibajtinte juchaj muꞌ, paj qui muꞌ Jenꞌ vayacjibunac juchaj miꞌin. 38Ñịbeꞌjeyacsi raꞌ muntyiꞌ miꞌin paj qui muꞌ Jenꞌ ñịbeꞌjinac chimeꞌ miꞌin. Mujuꞌchaꞌ raꞌ soꞌminac, damꞌdye raꞌ mọjoꞌchaꞌ jịꞌcaꞌñebanꞌ muꞌ Jenꞌ, damꞌcheꞌ cäch raꞌ soꞌmac juban miꞌin. Junꞌ quisĉan chuc tuputuyacsi soꞌmacsi jiquej miꞌin muꞌin yoctyiꞌ muntyiꞌ in, meꞌquisĉandye raꞌ chimeꞌ Jenꞌ jiꞌcaꞌñiyibunac.
39Jesús jéyacsi jịꞌĉocdyes p̂eyacdyeꞌ, yi:
—Yirity tofety jam junꞌ tapcapte un jiꞌmiꞌete yoctyiꞌ tofety muntyiꞌ, jiꞌmiꞌiti tsanꞌ in, vaj meꞌ toꞌĉan tŝọij jọꞌchaij in. 40Chimeꞌdye muꞌ jiꞌchäyitity jam junꞌ mujuꞌchaꞌ, uyaꞌyaꞌ muꞌ jịꞌchiyacsity muꞌ. A raꞌ chat jiꞌmeꞌsiyaquiyaꞌ jiꞌchäyitidyeꞌ muꞌ tupuj raꞌ cätste jịꞌchiyacsity muꞌ.
41¿Junꞌ buty meꞌ cavin cạvacsebi mi yoctyis juchaj muꞌin? Ĉụiꞌsiꞌ na jam junꞌ cạvaqui juchaj mi. Anic jeñej yirity muntyiꞌ cavin nạijbite chätidyes miquis vejĉansiꞌ patsacdyeꞌ muꞌ, ĉụiꞌsiꞌ na jam junꞌ cạvaqui mọꞌ chäcdyis son vejĉansiꞌ muꞌ. 42Yi jétinte chätidyeꞌ miꞌin: "Jeshaꞌ yụ raꞌ jäcbibadyeye miquis vejĉansiꞌ patsacdyeꞌ mi", yi jétinte ĉụiꞌsiꞌĉan qui namꞌ vej miꞌin jam dyijtuqui miꞌin, meꞌ tsanꞌ därsiꞌ son mọꞌĉan, mijam mọꞌ chị́yaqui miꞌin. ¡Anic ac̣hiꞌ dyijyity miꞌin, jämꞌ yuꞌti tsanꞌ miꞌin! Jemoñeꞌ tashcheꞌ chum ĉụiꞌsiꞌĉansiꞌ vej jäcaqui miꞌin, paj qui chuñem naijti miꞌin paj qui tupuj jäcbibajtinte chätidyes miꞌin mọꞌ miquis patsacdyeꞌ vejĉansiꞌ muꞌ.
Mọꞌ cätidyeꞌ chị́yac ĉụiꞌsiꞌcheꞌ väsh mọꞌ
(Mat 7:17-20; 12:34-35)
43Mọꞌ jämꞌsiꞌ cätidyeꞌ jam junꞌ aꞌc̣hiiꞌ väshiꞌ, chimeꞌdye mọꞌ aꞌc̣his cätidyeꞌ jam junꞌ jämꞌ väshiꞌ. 44Mọꞌ cätidyeꞌ chị́yac ĉụiꞌsiꞌcheꞌ väsh mọꞌ. Mọꞌ yutijtumsiꞌ däräꞌ jam junꞌ jiꞌshupqueꞌ higo, judyeyaꞌ chimeꞌ aꞌc̣his däräꞌ jam junꞌ jiꞌshupqueꞌ ova. 45Meꞌdye muꞌ chimeꞌ muntyiꞌ, muꞌ rụijtyity muntyiꞌ rụijsis dyijyedyeꞌ jiꞌshupqueꞌ, ĉaĉaij na rụijsis meꞌchuiꞌ ĉojtyiꞌĉan muꞌ. Muꞌ na ac̣hiꞌyity muntyiꞌ, mọꞌdye jiꞌshupqueꞌ, aꞌc̣his dyijyedyeꞌ muꞌ, ĉaĉaij na mọꞌdye ĉojtyiꞌĉan muꞌ. Ĉaĉaij na jedyeꞌ chuc mọjoꞌchaꞌ mọꞌyaꞌ ĉojtyiꞌĉan, mọꞌ shupquiꞌ chụꞌĉan p̂eyac.
Päräꞌ acaijtyiꞌ in
(Mat 7:24-27)
46Chimeꞌdye yi muꞌ Jesús jéyacsi:
—Fibiꞌ mọmoꞌ jítiĉaꞌ yụ miꞌin: "Mi nash Ayoꞌ tsun, mi nash Ayoꞌ tsun", meꞌ jítiĉaꞌ yụ miꞌin, jam qui namꞌ méquiꞌ chäquibutiĉamꞌ yụs p̂eyacdyeꞌ miꞌin. 47Tyi chuc atsij yụ́yaꞌ jụijyaꞌ, seꞌvibun p̂eyacdyeꞌ jụijyaꞌ yụs, judyeyaꞌ mọꞌ chäquibun jụijyaꞌ yụ in, muꞌ jeñej buꞌyi 48yirity acaijtyiꞌ muntyiꞌ. Tashi fadyeꞌ mochĉan toꞌ, junꞌ quiꞌ chuc chaꞌshete muꞌ mij, chat qui muꞌ jatapchuti yócheꞌdyemꞌ päꞌ buꞌyiꞌcheꞌ u, chat q̂uinꞌdyemꞌ mọꞌcheꞌ jämꞌtyeꞌ acaꞌ muꞌ. Meꞌ qui tsanꞌ ayij mọꞌ bänedyeꞌ, jachaꞌshibuti tsanꞌ acaꞌ muꞌ, mijam qui junꞌ yäcänjajibuti acaꞌ muꞌ, ĉaĉaij na anic dyich buꞌyiꞌ jämꞌtyeꞌ mijcheꞌ. 49Meꞌ buty tsanꞌ seꞌvibun p̂eyacdyeꞌ yụ in, jam qui namꞌ chäquibun yụ in, muꞌin raꞌ jeñej buꞌyi yoctyiꞌ acaijtyiꞌ muntyiꞌ. Muꞌ na jaccheꞌ mọmoꞌ jämꞌtyeꞌ acaꞌ, jam jämꞌ yụꞌtyeꞌ cach buꞌyiꞌcheꞌ mijam mij chaꞌshete. Aty ayijyaꞌ mọꞌ bänedyeꞌ jachaꞌshibuti acaꞌ muꞌ, fer tacjajibuti chat qui jajivaꞌchabuti acaꞌ muꞌ, räj patsac tŝọiꞌ jọꞌchaiꞌ muꞌ.
Currently Selected:
Lucas 6: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
