Maatiusiup Aglangit 16
16
Kamanaqtuliqujillutik Ajuinnaqtut
Maakusi 8:11-13; Luukasi 12:54-56
1Paarisit ilangit Saajjusillu Jiisusimuaqput uukturumallugu; taimaimmat kamanaqtuliquvaat, takutitaujumallutik nalunaikkutarmik qilangmit pijumik. 2Jiisusiup kiuvait, “Siqiniq nipiliqtillugu uqaqpakpusi, ‘Silatsiavaulaalirivuq; nuvujait aupaqsingmata.’ 3Ullaammarikkullu uqaqpakkivusi, ‘Ullumi silalungniaqpuq, nuvujait aupaqtuullutik Qirniqtaungmata.’ Silamik nalauttaijunnaqtusi takunnaarlusi qilangmik, tukisijunnanngilasili nalunaikkutarnik nalliutiliqtunik maannaujumik! 4Ullumi inuit piunngittuulijut Guutiqanngittullu kamanaqtunilirmik takujumavut, uuminga kisiani tunisiviuniaqput Juunaup kamanaqtulininganik.”
Tavva qimakpait aullarluni tavvanngat.
Paarisit Saajjusiillu Puvallaqqutingit
Maakusi 8:14-21
5Ilinniaqtit tasikkut ikaarlutik akianuaramik, niaquujamik naksariaksaq puiguqtuviniuvut. 6Tavva Jiisusiup uqautivait, “Kamatsiarissi ikpigusutsiarlusilu Paarisit Saajjusillu puvallaqqutinginnik.”
7Taakkua immingnut uqaqatigiiliqput, uqarlutik, “Taimaanguna uqatuq niaquujamik naksalaunnginnittinnut.”
8Jiisusiup qaujimagamigit qanuq uqausiqarmangaata, uqautivait, “Sungmat ilissinnut uqaqatigiikpisi niaquujaggiqsimannginnissinnik? Ukpirniqanngiluarassi! 9Suli tukisinngilasi iqqaumanasilu niaquujanik agguilaurama tallimanik 5,000-nut pijauniaqtunik? Qatsinik iviujanik tatailauqpisi? 10Ammaluttauq puigurivisiuk niaquujanik 7-nik agguilaurama 4,000-nut pijauniaqtillugit? Qatsinik iviujanik tatailauqpisi? 11Sungmalli tukisinngilasi niaquujamik pijjutiqarlunga uqannginnama? Ilissinnik ikpigusutsiarissi Paarisit Saajjusillu puvallaqqutinginnik!”
12Tavva ilinniaqtit tukisiliqput uluriasuqujaunnginnirmignik niaquujamut puvallaqqutimik, Paarisilli Saajjusillu ajuriqtuininginnik taakkuningatuaq.
Piitturuusiup Nalunaiqsininga Jiisusimik
Maakusi 8:27-30; Luukasi 9:18-21
13Tavva Jiisusi Sisaria Pilipaip nunangata qanigijaanuaqpuq, tavvani ilinniaqtini apirivait, “Inuup Irninga inungnit kinaunasugijauva?”
14Taakkua kiuvaat, “Ilangit Juanasi Paaptitsirijiuniraivut, ilangilli Ilaijjauniraivut, ilangilluttauq Jirimaiauniraivut uvvalu nalauttaijut ilangat.”
15Tavva Jiisusiup uqautivait, “Ilissili kinaunasugivisinnga?”
16Tavva Saimuuni Piitturuusiup kiuvaa, “Misaiasiuvutit,#16:16 “Christuusi” “Misaiasi” ajjigiingmatik tukiqaqpuq uqsuqtitausimajuq niruaqtausimanirminut Guutiup uumajuup Irninga.”
17Jiisusiup uqautiva, “Saimuunii Juanasiup irninga nalaagut uqaqputit! Tamanna qaujititauniit inutuinnarmit pinngilaq, Ataatamali qilangmiittuup tamatuminga tukisitippaatit. 18Taimaimmat uqautivagit, Piitturuusiuvutit, qaiqtuq; qaiqtumut tavvunga ilagiiktuqutikka tunngaviqaqtillugit aaqqiksurniaqpakka, kappianaqtuviullunniit isiqtarvingata saalagijunnarnianngilaq. 19Tunisiviginiaqpagit Guutiup Ataniuvingata ukkuirutinginnik; nunarjuami qilaksurniaqtatit qilangmi qilaksuqtausimajumaarivut, nunarjuamilu tamaani qilarujjaarniaqtatit qilangmittauq qilarujjaaqtaujumaarivut.”
20Tavva Jiisusiup ilinniaqtini iniqtiqpait kinamulluunniit uqaqunagit Christuusiunirminik.
Jiisusiup Aanniatitauniksaminik Tuqutauniksaminiglu Uqausiqarninga
Maakusi 8:31—9:1; Luukasi 9:22-27
21Tavvanngat pigiarluni Jiisusi nalunanngitsiaqtumik ilinniaqtiminut uqausiqaliqpuq, “Jiruusalimmuariaqaqpunga tavvani aanniatitaujumaaqpunga angijumik Juutinut angajuqqaujunut, tunirrusiqtitsijillu angajuqqaanginnut, piqujaniglu ilisaijinut, tuqutaujumaaqpunga, ulluilli pingajuanni makittumaarivunga.”
22Piitturuusiup saniminuaqtilluniuk iniqtimmariliqpaa; uqarluni, “Guutiup tamanna nuqqaqtilliuk, Ataniq! Tamanna ilingnut tikilauqsimanianngilaq!”
23Jiisusiup Piitturuusi saattlugu uqautivaa, “Saataanasi, tununnuarit! Aturiaqaqtannik agviarasuaravit; tamanna isumagijait Guutimit pinngimmat, inutuinnarmilli pivuq!”
24Tavva Jiisusiup ilinniaqtini uqautivait, “Nalliat uvannut maligumajuq, pinasuarumajaminik qujanaaqsijuksauvuq, sanningajuliminik agjaqsiluni, maliktuksauvuq uvannik. 25Inuusirminik annirusuktuq inuusirminik asiujijumaaqpuq, nallialli inuusirminik asiujijuq uvannik pijjutiqarluni taanna inuusirmik nanisiniaqpuq. 26Inuk sunamik pivalliutiksaqarajaqpaa silarjualimaamik pitaaruni, inuusirminiglu asiujiluni uvvalu sunamik tunijaksaqarajaqpa? Inuusirminik utiqtitsijunnaqullugu? 27Inuup Irninga tikittumaarmat aingiliqutini ilagilugit Ataatangata niqturnarnirjuanganit, tavvani atunit akilirumaaqpait piniarnirilauqtangit maliglugit. 28Sulijumik uqautivassi! Uvaniittuqaqpuq Inuup Irningata angajuqqaarjuangurniriniaqtanganik takulauqqaaratik tuqunianngittunik.”
Currently Selected:
Maatiusiup Aglangit 16: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
