Luukasiup Aglangit 21

Uiggarniup Tunisininga

Maakusi 12:41-44

1Jiisusi takusarami ajuqsanngittunik takuvuq tunirrutimingnik puuqsiqattaqtunik tuksiarvigjuap tunirrusirvinganut; 2amma takugivuq uiggarnirmik ajuqsaqtumik tunisijumik kiinaujaakuluungnik kannujaangnik marruungnik. 3Jiisusi uqaqpuq, “Sulijumik uqautivassi, una uiggarniq ajuqsaqtuq tunisiniqsauvuq asilimaaminit; 4asingit tunisingmata aturnianngitamingnik; unali arnaq ajuqsaqtuugaluarluni pijjutiksatuaminik tamainnik tunisivuq.”

Jiisusiup Uqausiqarninga Tuksiarvigjuap Siquttiqtaujumaarninganik

Maatiusi 24:1-2; Maakusi 13:1-2

5Ilinniaqtingita ilangit uqaqatigiigutiqalauqput tuksiarvigjuarmik, takuminarninga uqausirillugu, ujaraillu sanasimatsiarninginnik, Guutimut tunirrutigijauvaktut pillugit, Jiisusili uqaqpuq, 6“Takujasi tamakkua, ulluni nalliutijumaaqtuni ujaralimaatsiat atausirmigluunniit inigijamini ilisimajuqarunniirumaaqput urruutitaujumaarmata.”

Kappianaqtut Akiraqtuqtaunirlu

Maatiusi 24:3-14; Maakusi 13:3-13

7Ilinniaqtingita apirivaat, “Ajuriqtuiji, qanga tamakkua taimaittumaaqpat? Qanuq nalunaikkutaqarumaaqpat pigialirutik?”

8Jiisusi uqaqpuq, “Qaujisarissi silairrijauqunasi; amisut tikittumaarmata uvannut pijiuniraqtut, uqarlutik, ‘Taannauvunga Christuusi!’ Ammalu, ‘Maanna piviksanga nalliutivuq!’ Taakkua malingniarasiuk. 9Unataqtunik tusarussi saalagiqattautinasuktunik, sivuuraniarasi; tamakkua sivulliujariaqarmata, silarjuulli isua suli nalliutinngilaq.”

10Jiisusi tavva uqaliqpuq, “Inuuqatigiigjuat inuuqatigiigjuanut asimingnut unatarumaaqput, angajuqqaarjuaqarvit asimingnut angajuqqaarjuaqarvingnut unatarumaaqput; 11nuna angijumik sajukpiluqattarumaaqpuq naukkutuinnaq, kaangnaqtualuuqattarluni nanituinnaq aannianaqtuqaqpaglunilu; kappianaqtunik qaujijariurnaqtunik saqqittuqarumaaqpuq qilangmit. 12Tamakkua pilauqqaaqtinnagit tigujaujumaaqpusi, akiraqtuqtaulusi, aataujumaaqpusi Juutit ukpirnirmut katimavinginnut tigujausimavingmuaqtaujumaaqpusilu, angajuqqaarjuanut aulatsijinullu pititaujumaaqpusi uvanga pijjutigilunga. 13Taimaitauliqtillusi piviksaqarumaaqpusi uqausirnik tusaruminaqtunik uqausiqarunnarlusi. 14Isumajaarniarasi, qanuq uqausiksaqarniarmangaassi; 15uvanga uqausiksaqaqtittumaaqpassi silatuniqaqtillusilu, akiraqtuqtissinnilluunniit akiraqtuqtaujunnarumaanngilasi kiggusiksairujjijumaaqpusili taakkuninga. 16Tigujautitaujumaaqpusi angajuqqaassinnit, qatanngutissinnillu, ilassinnillu nangminissinnit, ilannaarijassinnillu, ilangit ilasi tuqutaujumaaqput. 17Tamainnut uumigijaujumaaqpusi uvanga pijjutigilunga, 18niaqussinni atausirmigluuniit nujamik asiujuqarnianngilaq. 19Qinuisaarnissinnut kisiani ilissinnik piulijumaaqpusi.”

Jiisusiup Uqausiqarninga Jiruusaliup Siquttiqtaujumaarninganik

Maatiusi 24:15-21; Maakusi 13:14-19

20“Jiruusalim takugussiuk unataqtuksanut ilumajaujuq, qaujijumaaqpusi tavva siquttiqtauviksanga qaglingmat. 21Tavva taimailiqpat Juutiami nunaqaqtut qaqqanut qimaajariaqalirumaaqput, iglugasagjuanilu nunaqaqtut aullariaqalirlutik, iglugasagjuat asiani nunaqaqtut iglugasagjuanut itirasuaqtuksaunngilat. 22Taakkua ulluit sugiaqtauviungmata, aglangni uqausiusimajulimaat nalausiqullugit. 23Angijumik kappianarumaaqpuq taakkunani ulluni arnanut nutaraksaqaqtunut, nutaralaaqaqtunullu! Nunarjuarmi kappianaqtuqarumaarmat angijumik Guutiullu ninngausinga tikiutijumaarmat inungnut taakkununga. 24Ilangit savigjuamut tuqutaujumaaqput, ilangillu tigujaulutik aullarujjaujumaaqput Juutiunngittunut; Jiruusalimlu tulliraqsaujumaaqpuq Juutiunngittunut, piviksangat isulilaunginningani.”

Inuup Irningata Tikinniksanga

Maatiusi 24:29-31; Maakusi 13:24-27

25“Kamanaqtuqarumaaqpuq siqinirmi taqqirmilu ullurianilu, nunarjuarmilu inuuqatigiigjualimaat nalulirnaqtumiittumaaqput kappiasummariglutiglu imarjuap iktuulijaarninganut ingiulialungnullu. 26Inuit nukiqarunniirumaaqput kappiasungnirmut utaqqinirmullu nunarjuarmut tikippalliajut pillugit; qilaup pijunnarningit aulataujumaarmata. 27Tavva Inuup Irninga takujumaaqpaat nuvujatigut qaijuq pijunnarnirjuaqaqtuq niqturnarnirjuaqarlunilu. 28Tamakkua pivallialiqpata, qummut takusalirissi, piulijauviksasi qaglingmat.”

Napaaqtuup Paurngaliup Ilinniarutiksauninga

Maatiusi 24:32-35; Maakusi 13:28-31

29Jiisusiup ajjiujumik uqautivait, “Napaaqtuq paurngalik isumagiliqsiuk, napaaqtulimaallu asingit. 30Uqaujangit piruliqpata, qaujimavakpusi aujallarinngurniaqtuq qanittuulirmat. 31Taimaaktauq, tamakkua pivalliajut takulirussiuk, qaujimajjutiginiaqpasi Guutiup Ataniuvingata qanittuulirninganik.

32“Sulijumik uqautivassi, tamakkualimaat nalliutijumaaqput inuit maanna inuujut tuqujuinnaulauqqaaqtinnagit. 33Qilaglu nunalu nungujumaaqpuuk, uqausikkali nungujumaanngilat.”

Qaujisatsiariaqarniq

34“Qaujisatsiarissi ilissinnik uummatissigut uqumailititauqunasi niriluarnirmut imiluarnirmullu inuusirmullu isumajaanaqtutaqarninganut, ullumut taissumunga upaluijauqunasi nigaqtitaujutitut. 35Tamanna tikittumaarmat inulimaanut nunarjuarmiittunut. 36Taimanngat qaujisatsainnarissi, tuksiaqattarlusi pijunnarniqaqtitauqullusi aniguijunnaqullusi tamakkua pijumaaqtut atuliqpata, nangirunnaqullusilu Inuup Irningata saangani.”

37Qautamaat Jiisusi ajuriqtuiqattaqpuq tuksiarvigjuarmi, unnugaangalli anivagluni unnualimaaq qaqqamiippagluni napaaqtulingmi paurngaqaqpaktunik uqsuksaujunnaqtunik. 38Qautamaat ullaaraarjukkut inulimaat tuksiarvigjuarmuaqattaqput tusaajaqturlutik taassuminga.

Currently Selected:

Luukasiup Aglangit 21: EAIBR

Highlight

Copy